🎪 കൊച്ചിൻ കാർണിവൽ 🎪 – 1അടിപൊളി  

തിരിച്ചു വീട്ടിലേക്ക് പോകും വഴി. സ്ഥലം ഏതാണെന്നു അറിയില്ല, കടകൾ എല്ലാം തന്നെ അടഞ്ഞിരുന്നു. സ്ട്രീറ്റ് ലൈറ്റ് മാത്രമുണ്ട്. ഇടയ്ക്ക് ഇടയ്ക്ക് ചില വണ്ടികൾ പാസ്സ് ചെയ്ത് പോകുന്നുണ്ട്. അനിയണ്ണൻ ബൈക്ക് ഒരു സൈഡിലേക്കൊതുക്കി.

ഞാൻ :-എന്താ അണ്ണാ.. എന്ത് പറ്റി…?

അനി :-എടാ..പണികിട്ടി പെട്രോൾ തീർന്നു.

“അയ്യോ..

“നേരത്തെ കണ്ട പമ്പിൽ കേറണമെന്ന് കരുതിയതായിരുന്നു, പക്ഷെ മറന്നുപോയി.

“ഇവിടെ അടുത്തിനി പമ്പ് വല്ലതും ഉണ്ടോ.

“ഒരു 2 കിലോമീറ്ററിൽ ഉണ്ട്.

“ഒരു കാര്യം ചെയ്യാം ഞാൻ പോയി വാങ്ങി വരാം.

“വേണ്ടടാ..ഞാൻ പോയി വരാം. നിനക്കിവിടെ വഴിയൊന്നും അറിയില്ലലോ.നീയാ ബസ് സ്റ്റോപ്പിലേക്കിരി.”അടുത്ത് കണ്ട ബസ്സ്റ്റോപ്പ് ചൂണ്ടി അണ്ണൻ പറഞ്ഞു.

അതുവഴി വന്ന ഓട്ടോയിൽ കേറി അണ്ണൻ പമ്പിലേക്ക് പോയി.സാധനം വാങ്ങിയ കവറുകൾ ബൈക്കിൽ തന്നെ തൂക്കിയിട്ട ശേഷം ഞാൻ ബസ്റ്റോപ്പിലേക്ക് ചെന്നു. സാധാ ബസ്റ്റോപ്പ് അല്ല. ടൈൽസ് ഒക്കെ ഇട്ട്, ലൈറ്റ് ഒക്കെ കൊടുത്തിട്ടുണ്ട്. ഇരിക്കാനും കിടക്കാനും പറ്റുന്ന രീതിയിൽ സ്ലാബും ഉണ്ട്. ഞാനല്ലാതെ വേറെ രണ്ട് പയ്യന്മാർ മാത്രേ അവിടെ ഉണ്ടായിരുന്നുള്ളു.ഞാൻ ചെന്നതിനു പിന്നാലെ ഒരു പെണ്ണും അവിടേക്ക് വന്നു. വന്നപാടെ ആ പെണ്ണിനോട് ആ പയ്യന്മാർ എന്തോ സംസാരിക്കുന്നത് അവിടെ ഇരുന്നുകൊണ്ട് ഞാൻ കണ്ടു. വൈകാതെ അവർ അവിടെ പാർക്ക്‌ ചെയ്തിരുന്ന കാറിൽ കേറി പോയി, “ആഹ്.. ഇത് സംഭവം അത് തന്നെ “ഞാൻ മനസ്സിൽ പറഞ്ഞു.

ഇപ്പോൾ ഞാൻ തനിച്ചാണവിടെ.ആകെയുള്ള ആശ്വാസം ബസ്സ്റ്റോപ്പിൽ ലൈറ്റ് ഉണ്ടെന്നുള്ളതാണ്. ചുറ്റും കൂരിരുട്ടാണ്.

അപ്പോഴാണ് ബസ്സ്റ്റോപ്പിന് മുൻപിലേക്ക് ഒരു കാർ വന്നത്.അതിൽ നിന്നും 2 പെൺകുട്ടികൾ പുറത്തേക്കിറങ്ങി. “നേരത്തെ വന്നത് പോലെ വല്ല കുറ്റിയുമാവും ” അവരെ ഫേസ് ചെയ്യാൻ മടിയായത്കൊണ്ട് ഞാൻ മൊബൈൽ കയ്യിലെടുത്ത് തോണ്ടാൻ തുടങ്ങി. അവർ എന്റെ അടുത്തേക്കായി നടന്നു വരുന്നത് എനിക്ക് ഫീൽ ചെയ്യാമായിരുന്നു. “വന്നു സെക്സിനു താല്പര്യം ഉണ്ടോ എന്ന് ചോദിക്കുമോ..? തിരിച്ചു വേണ്ട എന്ന രീതിയിൽ മാസ് കമന്റ് അടിക്കണോ..? “.. അങ്ങനെ ഒരുപാട് ചോദ്യങ്ങൾ എന്റെ മനസിലേക്ക് വന്നു.

“എസ്ക്യൂസ്‌ മീ..”ഒരു കിളിനാദം കേട്ട് ഞാൻ തലയുയർത്തി നോക്കി..

ഒരു അമ്മച്ചി ലൂക്കുള്ള പെണ്ണിനെ പ്രതീക്ഷിച്ച എനിക്ക് തെറ്റി. എന്റെ മുന്നിൽ ദാ ദേവതയെപ്പോലൊരു പെൺകുട്ടി.അവളുടെ ചുരുണ്ട കറുകറുത്ത മുടി പിന്നിലേക്ക് കെട്ടി വെച്ചിരിക്കുന്നു.മാൻപെട കണ്ണുകൾ,അവളുടെ വെളുവെളുത്ത നിറം, അവളുടെ ചോര ചുണ്ടുകളുടെ ഭംഗി കൂട്ടി. ഒരു സാധാ നീല ടോപ്പാണ് വേഷം.കാതിലെ കമ്മലും നെറ്റിയിലെ കുഞ്ഞു പൊട്ടുകൂടി ആയപ്പോൾ അവളുടെ സൗന്ദര്യം വാനോളം ഉയർന്നു. ആ സുന്ദര രൂപം കണ്ടു എന്റെ കണ്ണുൾ തിളങ്ങി.

“എസ്ക്യൂസ്‌ മീ…”മറുപടി പറയാത്തതിനാൽ ഒരിക്കൽ കൂടി അവൾ പറഞ്ഞു.

“യെ. യെസ്.  എന്താ…”തപ്പിത്തടഞ്ഞു ഞാൻ മറുപടി നൽകി.

“അഭി അല്ലേ…”അവൾ ചോദിച്ചു.

ആ ചോദ്യത്തിൽ ഞാൻ ഞെട്ടിപ്പോയി. ഇവളെ ഞാൻ ആദ്യമായി ആണ് കാണുന്നത്, ഇവിടെയുള്ള ആർക്കും എന്നെ അറിയില്ല ഇവൾക്കെങ്ങനെ എന്നെ അറിയാം…സംശയത്തോടെ ഞാൻ എഴുന്നേറ്റ് നിന്ന് മറുപടി നൽകി “അതെ..ആരാ…”

എന്റെ മുന്നിൽ നിന്ന ദേവതയുടെ രൂപം, പൂത്തനയുടേതായി മാറുന്നതാണ് ഞാൻ പിന്നെ കണ്ടത്. അവളുടെ കണ്ണുകൾ ചുമന്നു കയറാനായി തുടങ്ങി, കഴുത്തിലെ ഞരമ്പുകൾ പെടച്ചുകേറുന്നത് എനിക്ക് നന്നായി കാണാമായിരുന്നു. അവൾ ഒരടി പിറകിലേക്ക് മാറി പെട്ടെന്ന് തന്നെ ഒരല്പം ചരിഞ്ഞു,വലംകാൽ അല്പം ചരിച്ചു എന്റെ വയറ്റിലേക്ക് ഒരു സൈഡ്കിക്ക് എടുത്തു. കണ്ണടച്ചു തുറക്കുന്ന സമയം കൊണ്ട് എന്റെ വയറിൽ അവളുടെ കരുത്തുറ്റ കാൽ ഇടിച്ചുകയറി.വേദന കാരണം ഞാൻ വയർ പൊത്തിപ്പിടിച്ചു. പൊടുന്നനെ അവളെന്റെ മുഖത്തിൽ ഒരു അപ്പർക്കട്ട് പഞ്ച് കൂടി എടുത്തു. മില്ലി സെക്കണ്ടുകൾക്കുള്ളിൽ ഞാൻ നിലം പതിച്ചു.ചുറ്റുമുള്ളതൊക്കെ ഒരു സ്വപ്നമായി എനിക്ക് തോന്നി.വേദനകാരണം ഞാൻ നിലത്തിരുന്നുപോയി.എന്നെ തല്ലിയ ആ പെണ്ണ് ഇപ്പോഴും മുൻപിൽ തന്നെ നിൽക്കുന്നുണ്ട്,എന്നാൽ രൂപം വ്യക്തമല്ല. കണ്ണിൽ മുഴുവൻ ഇരുട്ടാണ്..

“ഇനി മേലാൽ ഇമ്മാതിരി വർത്തമാനം പറഞ്ഞു ശല്യം ചെയ്താൽ, ഇടിച്ചു ഒരു സൈഡ് ഞാൻ തകർത്തിക്കളയും ” അതും പറഞ്ഞു ആ രൂപം അവിടെ നിന്നും മടങ്ങിപോകുന്നത് ഒരു മിന്നായം പോലെ ഞാൻ കണ്ടു.

വേദന ഒട്ടും സഹിക്കാൻ വയ്യ. ആറടി അടുപ്പിച്ചു പൊക്കമുള്ള എന്നെ എത്ര എളുപ്പത്തിലാണവൾ അടിച്ചു താഴെയിട്ടത്. എങ്ങനെയൊക്കെയോ തറയിൽ നിന്നുമെഴുന്നേറ്റ് അവിടുള്ള സ്ലാബിൽ കയറി ഞാൻ ഇരുന്നു. വയർ പൊത്തി മുഖം മറച്ചു ഞാനിരുന്നു. മെല്ലെ മെല്ലെ എന്റെ കണ്ണുകൾ അടഞ്ഞടഞ്ഞു വന്നു.

“അഭി.. ടാ.. പോകാം..”അനിയണ്ണന്റെ ശബ്ദം കേട്ട്, ഞാൻ തല ഉയർത്തി നോക്കി.

“ങേ.. ഇത് എന്താടാ പറ്റിയത് “എന്റെ ചുണ്ടിന്റെ അറ്റത്ത് ചെറുതായി പൊടിഞ്ഞിരുന്ന ചോര കണ്ട് അണ്ണൻ ചോദിച്ചു.ഞാനും അപ്പോഴാണ് ചോര ശ്രദ്ധിക്കുന്നത്. അവിടെ നടന്ന സംഭവങ്ങളൊക്കെ ഞാൻ അണ്ണനോട് പറഞ്ഞു.

“ഇതെന്താ വെള്ളരിക്ക പട്ടണമോ.. നീ വാ പോലീസ് സ്റ്റേഷനിൽ പോകാം..”കലിപ്പ് മോഡിൽ അനിയണ്ണൻ പറഞ്ഞു.

“ഏയ്.. വേണ്ട…ആളുമാറി സംഭവിച്ചതാവും.

“അതുകൊണ്ട്.. നീ എന്തിനാ കണ്ടവൾമാരുടെ  തല്ല് കൊള്ളുന്നത്..നീ വാ.

“അയ്യോ.. അണ്ണാ…വേണ്ട. നാറ്റ കേസ് ആകും.”എങ്ങനെയൊക്കെയോ ഞാൻ അണ്ണനെ സംസാരിച്ചു കൂൾ ആക്കി.

നല്ല വേദനയുണ്ട്, എങ്ങനെയൊക്കെയോ ബൈക്കിൽ കേറി വീട്ടിലെത്തി. രാത്രി കിടക്കാൻ കുറച് വൈകി, വേറൊന്നുമല്ല നല്ല വേദന. മുഖത്ത് കിട്ടിയ പഞ്ച് പിന്നേയും കുഴപ്പം ഇല്ലായിരുന്നു, പക്ഷെ വയറ്റിൽ കിട്ടിയ ചവിട്ട്…ഹമ്മാ 🤧.

രാവിലെ അനിയണ്ണനാണ് വിളിച്ചുണർത്തിയത്.

“അഭി.. ടാ.. എണീക്ക്..

“മ്മ്.. എന്താ അണ്ണാ….”ഉറക്കച്ചടവോടെ ഞാൻ ചോദിച്ചു.

“നീയിത് നോക്കിയേ…”കയ്യിലിരുന്ന മൊബൈൽ എനിക്കുനേരെ നീട്ടിക്കൊണ്ട് പറഞ്ഞു.

കണ്ണ് തിരുമിയ ശേഷം ഞാൻ മൊബൈൽ വാങ്ങി നോക്കി. ഒരു ന്യൂസ്‌ ലിങ്ക് ആയിരുന്നു. ഓപ്പൺ ചെയ്ത് ന്യൂസ്‌ ഹെഡിങ് വായിച്ചപ്പോൾ തന്നെ ഞാൻ പണി മണത്തു.

“അർധരാത്രി കൊച്ചി നഗരത്തിൽ യുവാവിനെ തല്ലി യുവതി ” 🤧. ഒരു വീഡിയോ ക്ലിപ്പ് കൂടി ന്യൂസിൽ ഉണ്ട്. അവൾ എന്റെ കൂമ്പിനിട്ട് ചവിട്ടുന്നതും, മുഖത്തു പഞ്ച് ചെയ്യുന്നതും.കാറിൽ ഇരുന്ന് എടുത്ത വീഡിയോ ആണ്.വീഡിയോ ആംഗിൾ കണ്ടിട്ട്,അവൾ വന്ന കാറിൽ ഇരുന്ന് എടുത്തതാകാനാണ് സാധ്യത. ദൈവഭാഗ്യത്താൽ എന്റെ മുഖം കാണാൻ കഴിയില്ല. അവളുടെ ബാക്ക് സൈഡ് വ്യൂ ആണ് വിഡിയോയിൽ. അവൾ നിൽക്കുകനതിനാൽ എന്റെ ഫേസ് മറഞ്ഞു, പക്ഷെ ശരീരം കാണാം. ഒരു പയ്യനെ പെണ്ണ് അടിച്ച് തറയിലെട്ടതാണെന്ന് ഒറ്റ നോട്ടത്തിൽ മനസിലാകും.ന്യൂസിന്റ കമന്റ്‌ സെക്ഷൻ ഒന്ന് കാണേണ്ട കാഴ്‌ച തന്നെ ആയിരുന്നു.

+4

-2