അച്ചുവിന്റെ വാക്കുകൾ ഒരു മുള്ളുപോലെ എന്റെ നെഞ്ചിൽ തറഞ്ഞുനിൽക്കുന്നുണ്ടായിരുന്നു.
എന്നെയും അവളുടെ കരിയറിനെയും ഒരേ തട്ടിൽ വെച്ചു തൂക്കുന്ന ആ പുതിയ അച്ചുവിനെ ഉൾക്കൊള്ളാൻ എനിക്ക് സമയം വേണമായിരുന്നു. കൂടുതൽ സംസാരിച്ചാൽ വീണ്ടും ആ പഴയ വഴക്കിലേക്ക് പോകുമെന്ന് ഭയന്ന് ഞാൻ മനപ്പൂർവ്വം വിഷയം മാറ്റി.
”ശരി ശരി… മതി നിന്റെ ഈ സീരിയസ് വർത്തമാനം. നമുക്ക് ഇതൊക്കെ വിടാം,” ഞാൻ മുഖത്ത് ഒരു കൃത്രിമ ചിരി വരുത്തിക്കൊണ്ട് പറഞ്ഞു
. “അല്ല, നീ ഇന്ന് എന്താ കഴിച്ചതെന്ന് പറഞ്ഞില്ലല്ലോ? ആ ഗൗരി റൂമിൽ വന്ന സ്ഥിതിക്ക് നിനക്ക് ഇനി പട്ടിണി കിടക്കേണ്ടി വരില്ലല്ലോ.”
അതുകേട്ടതും അച്ചുവിന്റെ മുഖം വീണ്ടും വിടർന്നു.
“അത് നീ കറക്റ്റ് ആയി പറഞ്ഞു! ഗൗരി വന്നതോടെ എന്റെ മെസ്സ് ഭക്ഷണം ഒക്കെ നിന്നു. അവൾ ഇന്ന് അടിപൊളി മീൻ കറിയും ചോറും ഉണ്ടാക്കി. ഞങ്ങൾ രണ്ടുപേരും കൂടി ഇരുന്ന് തട്ടി. നീ അവിടെ ആ തണുപ്പത്ത് ബ്രെഡും ജാമും കഴിച്ച് ഇരിക്കുകയല്ലേ?”
അവൾ എന്നെ കളിയാക്കി ചിരിച്ചു.
”പിന്നില്ലാതെ! ഇവിടെ എന്റെ അവസ്ഥ ദയനീയമാണ് അച്ചു. നീ വന്നാൽ എനിക്ക് ഇതുപോലെ മീൻ കറിയൊക്കെ വെച്ചുതരുമോ?”
ഞാൻ തമാശരൂപേണ ചോദിച്ചു.
”ഓ… അതൊക്കെ അപ്പോൾ നോക്കാം. ആദ്യം നീ ഒരുങ്ങിക്കോ, ഓഗസ്റ്റിൽ സ്റ്റുഡിയോയുടെ ഒഫീഷ്യൽ ലോഞ്ച് ആണ്. നിനക്ക് ലീവ് കിട്ടുമോ എന്ന് നോക്ക്,” അവൾ ആവേശത്തോടെ പറഞ്ഞു.
പിന്നീട് ഒരു അരമണിക്കൂറോളം ഞങ്ങൾ പഴയ കാര്യങ്ങൾ പറഞ്ഞ് ഒരുപാട് ചിരിച്ചു. നാട്ടിലെ മഴയെക്കുറിച്ചും, ഞങ്ങളുടെ കല്യാണസമയത്തെ രസകരമായ സംഭവങ്ങളെക്കുറിച്ചും അവൾ വാതോരാതെ സംസാരിച്ചു. ഇടയ്ക്ക് ഗൗരി അകത്തുനിന്ന് എന്തോ വിളിച്ചു ചോദിക്കുന്നതും അച്ചു ഉറക്കെ മറുപടി പറയുന്നതും എനിക്ക് കേൾക്കാമായിരുന്നു.
ആ സംസാരത്തിനിടയിൽ ഞാൻ ആ ചുവന്ന പാടിന്റെ കാര്യമോ സിദ്ധാർത്ഥിന്റെ കാര്യമോ ഒരക്ഷരം പോലും മിണ്ടിയില്ല. ആ സമാധാനം കളയാൻ എനിക്ക് പേടിയായിരുന്നു.
”ഹരി… സമയം ഒരുപാടായി. നാട്ടിൽ ഇപ്പോൾ രണ്ടു മണി കഴിഞ്ഞു. എനിക്ക് നാളെ രാവിലെ നേരത്തെ സ്റ്റുഡിയോയിൽ എത്തണം. സിദ്ധു നേരത്തെ വരാൻ പറഞ്ഞിട്ടുണ്ട്,” അവൾ ഒരു കോട്ടുവായ ഇട്ടുകൊണ്ട് പറഞ്ഞു.
സിദ്ധുവിന്റെ പേര് കേട്ടപ്പോൾ ഉള്ളിൽ ചെറിയൊരു അസ്വസ്ഥത തോന്നിയെങ്കിലും ഞാൻ അത് നിയന്ത്രിച്ചു.
“ശരി അച്ചു, നീ പോയി കിടന്നോ. നല്ലോണം ഉറങ്ങ്. നാളെ വിളിക്കാം.”
”ശരി ഹരി… ഗുഡ് നൈറ്റ്. ഉമ്മ!” അവൾ ഫോൺ സ്ക്രീനിൽ ഒരു ഉമ്മ തന്നു.
”ഗുഡ് നൈറ്റ് ഡി,” ഞാൻ പറഞ്ഞു.
കോൾ കട്ട് ചെയ്ത ശേഷം ഞാൻ ആ ഇരുണ്ട മുറിയിൽ ഒറ്റയ്ക്ക് ഇരുന്നു.
ഫോൺ സ്ക്രീൻ ഓഫായതോടെ എന്റെ ചിരിയും നിലച്ചു. അച്ചു പറഞ്ഞ ഓരോ കാര്യങ്ങളും എന്റെ തലയിൽ വീണ്ടും മുഴങ്ങാൻ തുടങ്ങി. അവൾ എന്നെ പരീക്ഷിച്ചതും, അവളുടെ കരിയറിന് നൽകുന്ന പ്രാധാന്യവും എല്ലാം. സ്നേഹം പഴയതുപോലെ തിരിച്ചു കിട്ടിയെന്ന് തോന്നുമ്പോഴും, എവിടെയോ എന്തോ ഒന്ന് കൈവിട്ടു പോകുന്നത് പോലെ എനിക്ക് തോന്നി.
പിന്നീടുള്ള ഒരാഴ്ച ഞങ്ങളുടെ ജീവിതത്തിൽ വലിയ പ്രശ്നങ്ങളൊന്നുമില്ലാതെ കടന്നുപോയി. എല്ലാ ദിവസവും വൈകുന്നേരം ഞങ്ങൾ വീഡിയോ കോളിൽ സംസാരിച്ചു.
ചിലപ്പോഴൊക്കെ അവളുടെ വാക്കുകളിലെ പുതിയ ശീലങ്ങളും സിദ്ധുവിനെക്കുറിച്ചും ഗൗരിയെക്കുറിച്ചുമുള്ള പരാമർശങ്ങളും എന്നെ അസ്വസ്ഥനാക്കിയെങ്കിലും, അവൾ എന്നോട് സ്നേഹത്തോടെ സംസാരിക്കുന്നു എന്ന സത്യം എനിക്ക് ആശ്വാസം നൽകി. ആ അകലം കുറയ്ക്കാൻ ഞാൻ പരമാവധി ശ്രമിച്ചുകൊണ്ടിരുന്നു.