Aval | Author : Jithuz
” എന്നിട്ട് നിന്റെ തീരുമാനത്തിൽ ഒരു മാറ്റവും ഇല്ലേ?? “കോഫീ ഹൗസിൽ നിന്നും ചൂട് കാപ്പി മോന്തിക്കുടിക്കുന്ന അവളെ നോക്കി അവൻ വീണ്ടും ചോദിച്ചു.. ഇതെത്രാമത്തെ തവണ ആണ് ഇതേ ചോദ്യം തന്നെ അവൻ ചോദിക്കുന്നത്. ചോദിക്കുന്ന അവനു മടുപ്പില്ലെങ്കിലും കേൾക്കുന്ന അവൾക്ക് മടുപ്പില്ലേ..
മനസ്സിൽ എന്തോ മറച്ചു വെച്ചു കൊണ്ടുള്ള ഒരു പുഞ്ചിരിയോടെ അവൾ അവന്റെ മുഖത്തേക്ക് നോക്കി ആത്മ വിശ്വാസത്തോടെ ഇല്ല എന്ന അർത്ഥത്തിൽ തലയാട്ടി.
” അപ്പോൾ നമ്മൾ ഒന്നിച്ചു കണ്ട സ്വപ്‌നങ്ങൾ… നമ്മുടെ കല്യാണം..വീട്..കുട്ടികൾ.. അതൊക്കെ??? ”
” അതൊക്കെ പണ്ടല്ലേ.. ഇന്നെന്നിക്ക് അതിനെ പറ്റിയൊന്നും ആലോചിക്കാനേ സമയമില്ല… ”
” എന്താ പൊന്നൂസേ ഇങ്ങനെ…?? നമ്മൾ തമ്മിൽ എപ്പോഴും ഉണ്ടാവാറുള്ളതല്ലേ ഇതൊക്കെ?? ”
” അതെ.. എനിക്കിനി അതൊന്നും അനുഭവിക്കാൻ വയ്യ.. ആവശ്യത്തിൽ കൂടുതൽ ഞാൻ സഹിച്ചു..”
” എന്താടീ ഇത്.. ഞാൻ അപ്പോഴത്തെ ദേഷ്യത്തിന് അങ്ങനെ ഒക്കെ പറഞ്ഞു പോയതല്ലേ… നിനക്കെന്നെ അറിയില്ലേ.. ക്ഷമിക്കെടീ….”
അൽപനേരം അവന്റെ കണ്ണുകളിലേക്ക് തന്നെ നോക്കി ഇരുന്നിട്ട് അവൾ വീണ്ടും നിഷേധാർത്ഥത്തിൽ തലയാട്ടി.ഒരല്പനേരം മിണ്ടാതെ ഇരുന്നു അവൻ വീണ്ടും എന്തോ പറയാൻ ശ്രമിച്ചു.അതെ സമയം തന്നെ ടേബിളിൽ വെച്ചിരുന്ന അവളുടെ മൊബൈൽ ബെല്ലടിച്ചു. അപ്പുറത്തു നിന്നും പറയുന്നത് കേൾക്കാൻ ആവില്ല..എങ്കിലും അവളുടെ മറുപടി മറുവശത്തു നിന്നുമുള്ള ചോദ്യം എന്താണെന്നു മനസ്സിലാക്കാൻ പോന്നതായിരുന്നു.
” ഇല്ലെടീ.. ഒരു പത്തു മിനുട്ട്.. ഞാൻ എലൈറ്റിലേക്ക് വന്നോളാ.. നീ ബില് അടിക്കാൻ നിൽക്കുമ്പോ ഒരു മിസ് അടിച്ചാൽ മതി.. ” പറഞ്ഞിട്ട് അവൾ ഫോൺ കട്ട് ചെയ്തു..
” നിനക്കപ്പോൾ എന്റെ കൂടെ ഇരിക്കാൻ പോലും കുറച്ചു സമയം ഇല്ലല്ലേ… ?? “, അനിഷ്ടത്തോടെ ഉള്ള ശബ്ദം വീണ്ടും കേട്ടു..
” എന്താണ് ഞാൻ ഇനി പറയേണ്ടത്???അനിഷ്ടത്തോടെ ഉള്ള ശബ്ദം വീണ്ടും കേട്ടു..
” എന്താണ് ഞാൻ ഇനി പറയേണ്ടത്??? നമ്മൾ ഇതെല്ലാം പറഞ്ഞു തീർത്തതല്ലേ.. കഴിഞ്ഞ രണ്ടു മൂന്നു ദിവസം ആയിട്ട് ഞാൻ എത്ര തവണ ആയി ഇതൊക്കെ പറയുന്നു??? ഇനിയും കേൾക്കണോ.. എന്നാൽ കേട്ടോ.. എനിക്കിനി ഈ റിലേഷൻ തുടർന്നോണ്ട് പോവാൻ പറ്റില്ല… എനിക്ക് മതിയായി.. ഇനിയും ഓരോന്ന് സഹിക്കാനും കരയാനും എനിക്ക് വയ്യ… ”
” അപ്പൊ നീ എന്നെ തേക്കാൻ തീരുമാനിച്ചതാണല്ലേ ?? “, ഇത്ര നേരം ദൈന്യത നിറഞ്ഞു കെഞ്ചിക്കൊണ്ടിരുന്ന ശബ്ദത്തിനു മാറ്റം വന്നിരിക്കുന്നു, വാക്കുകൾക്ക് മൂർച്ച ഉള്ള പോലെ..
” കുറേ ദിവസം ആയി ഞാനീ സെന്റൻസ് കേൾക്കാൻ തുടങ്ങീട്ട്.. ഞാൻ തേച്ചെന്നു.. നിന്റെ കൂട്ടുകാരും, നമ്മുടെ ഫ്രൻഡ്‌സും എല്ലാം.. ഞാൻ എന്ത് തേച്ചെന്നാ ഈ പറയുന്നത് ?? എനിക്ക് നിന്റെ കൂടെ ഇനി അഡ്‌ജസ്‌റ് ചെയ്തു പോവാൻ പറ്റില്ല എന്നുറപ്പായപ്പോൾ മാന്യമായിട്ട് നമുക്ക് പിരിയാം എന്ന് പറഞ്ഞതാണോ ഈ തേപ്പ്? അതോ ഇത്ര ഒക്കെ നീയെന്നോട് ചെയ്തിട്ടും ഞാൻ ഇനിയും ഈ റിലേഷൻഷിപ്‌ കൊണ്ട് പോവാത്തതോ?? രണ്ടാമത് പറഞ്ഞത് ആണെങ്കിൽ അതെ… ഞാൻ തേച്ചു എന്ന് തന്നെ നീ കരുതിക്കോ.. ..എനിക്കൊന്നും ഇല്ല..എനിക്ക് നന്നായിട്ട് അറിയാം, നീ ഞാൻ കൂടെ ഉണ്ടാവണംഎന്ന് വിചാരിച്ചതിനേക്കാൾ ഒരു നൂറു മടങ്ങ്, ഞാൻ നമ്മൾ തമ്മിലുള്ള ബന്ധം തകരാതിരിക്കാൻ സാക്രിഫൈസ് ചെയ്തിട്ടുണ്ട്.. അന്ന് ഞാൻ നിന്നോട് യെസ് പറഞ്ഞതിന് ശേഷം ഇന്ന് വരെ എന്റെ ജീവിതത്തിൽ നീ മാത്രമേ ഉണ്ടായിട്ടുള്ളൂ… നിനക്ക് അങ്ങനെ ആണോ?? ഞാൻ കൂടെ ഇല്ലാത്തപ്പോൾ എത്ര പെമ്പിള്ളേർ നിന്റെ ലൈഫിൽ ഉണ്ടായിട്ടുണ്ട്??? ഞാൻ ഉള്ളപ്പോൾ പോലും ഒരാൾ ഉണ്ടായിരുന്നില്ലേ??? ”” എടീ..അതൊക്കെ പണ്ടല്ലേ.. ഞാൻ അതൊക്കെ നിന്നോട് പറഞ്ഞതല്ലേ… എന്റെ ലൈഫിൽ നീ അറിയാത്ത കാര്യങ്ങൾ ഒന്നും ഉണ്ടാവരുത് എന്ന് വെച്ചല്ലേ ഞാൻ അതൊക്കെ പറഞ്ഞത്…?? ”
” ഹോ.. എന്തൊരു ഔദാര്യം?? അല്ലാതെ നിന്റെ ഫോണിൽ അവളുടെ മെസേജ് ഞാൻ കണ്ടത് കൊണ്ടല്ല അല്ലേ.. ഇനിയും പറഞ്ഞു എന്നെ വിശ്വസിപ്പിക്കാൻ ഒരു കള്ളക്കഥയും ഇല്ലാഞ്ഞിട്ടല്ലല്ലേ… ?? ”
” സോറി ടീ.. അത് അന്ന്..പറ്റിപ്പോയി.. ക്ഷമിക്ക്..ഈ പ്രാവശ്യത്തേക്ക് കൂടി.. ഒരു ചാൻസ് കൂടി താ.. ”
” ഇല്ല.. ഇനി ഒന്നും ഇല്ല.. ഇതൊന്നും ഞാൻ ഒരിക്കലും പറയണം എന്ന് വിചാരിച്ചതല്ല.. പക്ഷെ ഇനി നമ്മൾ തമ്മിൽ സംസാരിച്ചെന്നു വരില്ല.. നീ എന്നെങ്കിലും എനിക്ക് വേണ്ടപ്പോൾ എന്റെ കൂടെ നിന്നിട്ടുണ്ടോ?? എനിക്ക് സങ്കടം വരുമ്പോൾ, എനിക്ക് കരച്ചിൽ വരുമ്പോൾ എന്നെങ്കിലും എന്നെ ഒന്ന് ആശ്വസിപ്പിച്ചിട്ടുണ്ടോ?? എന്നും ആവശ്യം ഉള്ളതിനും ഇല്ലാത്തതിനും എന്നോട് അടി കൂടി എന്നെ കരയിപ്പിപ്പിക്കാൻ മാത്രം അല്ലേ നിനക്ക് സമയം ഉണ്ടായിരുന്നുള്ളൂ.. എത്ര പരീക്ഷയുടെ തലേന്ന് നീ എന്നോട് വഴക്കുണ്ടാക്കി എന്നെ ഒരക്ഷരം പഠിക്കാൻ സമ്മതിക്കാതെ കഷ്ടപ്പെടുത്തിയിട്ടുണ്ട്??? ഓർമ ഉണ്ടോ??അന്ന് ഞാനൊരു ദിവസം ഇൻസ്റ്റയിൽ ഗ്രൂപ് ഫോട്ടോ ഇട്ടത്?? അതിൽ ക്‌ളാസിൽ പഠിക്കുന്ന ഒരുത്തന്റെ കൂടെ നിന്നെന്നു പറഞ്ഞു നീ എത്ര ദിവസം എന്നോട് മിണ്ടാതെ നടന്നു?? ഫെയ്‌സ്ബുക്കിൽ ഒരു പ്രൊഫൈൽ പിക്ച്ചർ ഇടാൻ നീ സമ്മതിച്ചിട്ടുണ്ടോ?? ആരെങ്കിലും അത് ഡൌൺലോഡ് ചെയ്ത് മോർഫ് ചെയ്തു ഇന്റർനെറ്റിൽ ഇടുമല്ലേ.. നിന്റെ ചേച്ചി ഉണ്ടല്ലോ.. അവർ അവരുടെ ഫെയ്സ്ബൂക്കിലും ഇൻസ്റ്റയിലും ഒന്നും ഫോട്ടോ ഇടുമ്പോൾ നിനക്ക് ഒന്നും പറയാൻ ഇല്ലായിരുന്നോ??? ”” എടീ… അത്..അതുകൊണ്ടല്ല..നിന്റെ നല്ലതിനല്ലേ… നീ ആലോചിച്ചേ, അങ്ങനെ എന്തെങ്കിലും ഉണ്ടായാൽ…. വേണ്ട, നീ എന്താണെന്നു വെച്ചാൽ നിന്റെ ഇഷ്ടം പോലെ ചെയ്തോ..ഞാൻ ഒന്നും പറയാൻ വരില്ല..”
” ഇനി നീ എന്തെങ്കിലും പറഞ്ഞിട്ടും കാര്യമില്ല.. ഞാൻ ഇനി അത് കേൾക്കാനോ അനുസരിക്കാനോ .പോവുന്നില്ല. ഓരോ പ്രാവശ്യവും പരീക്ഷയുടെ തലേന്ന് നിന്നോട് ഇരുന്നു പഠിക്കാൻ പറയുമ്പോഴും നീ എന്ത് ചീത്തയാ എന്നെ പറഞ്ഞിരുന്നത്.. ഒരക്ഷരം പഠിക്കാതെ ഫ്രൻഡ്‌സ്‌നിൻറെ കൂടെ കള്ളു കുടിച്ചും കറങ്ങി നടന്നും സമയം കളഞ്ഞിട്ട് അവസാനം എന്താ ഉണ്ടായത്?? അവരൊക്കെ കോപ്പി അടിച്ചെങ്കിലും പാസ് ആയി..നീയോ?? രണ്ടു മാസം കഴിഞ്ഞാൽ റിസൾട് വരും.. അത് കൂട്ടാതെ തന്നെ 10-12 സപ്ലി ഇല്ലേ?? ട്യൂഷന് പോവാൻ പറഞ്ഞിട്ട് ഞാൻ തന്ന പൈസ കൊണ്ട് നീ മൊബൈൽ വാങ്ങി..നമ്മൾ ഒരേ പ്രായം ആണെന്ന് ഓർമ ഉണ്ടല്ലോ.. പഠിച്ചു പാസ് ആയി വല്ല ജോലിക്കും കേറിയാലേ നമ്മുടെ കാര്യം വീട്ടിൽ പറയാൻ പറ്റൂ എന്ന് എത്ര വട്ടം പറഞ്ഞു?? നിനക്ക് അതൊന്നും കേൾക്കണ്ട.. ഉള്ള സമയം അടിച്ചു പൊളിച്ചു കറങ്ങി നടന്നാൽ മതി.. അവസാനം ഞാൻ വീട്ടിൽ പറഞ്ഞു അമ്മ നിന്നെ വിളിച്ചപ്പോൾ… എന്റെ അമ്മയോട് ഒന്ന് മര്യാദക്ക് സംസാരിക്കാൻ നിനക്ക് വയ്യ.. നീ എന്തൊക്കെയാ പറഞ്ഞത്?? പാവം..കരഞ്ഞു കൊണ്ടാണ് ഫോൺ വെച്ചത്… ഇനിയും വയ്യ എനിക്ക്.. വേറെന്തും ഞാൻ സഹിക്കും, നമ്മളെ സപ്പോർട് ചെയ്യാൻ ആകെ അമ്മയേ കാണുമായിരുന്നുള്ളൂ.. അത് പോലും ഓർക്കാതെ നിന്റെ ദേഷ്യം കാണിക്കൽ.. നീയെന്താ വിചാരിച്ചത്?? ഞങ്ങൾക്ക് ആർക്കും ദേഷ്യം ഇല്ലെന്നോ?? നീ ഈ കാണിക്കുന്ന ഓരോന്നിനും എത്ര ദേഷ്യവും സങ്കടവും വന്നിരുന്നെന്നോ.. എന്നാലും നിന്റെ അവസ്ഥ മനസ്സിലാക്കി ആണ് ഇത്ര കാലം ഒന്നും കാണിക്കാതെ നടന്നത്.. എന്നെങ്കിലും നീ നന്നാവും എന്ന് വിചാരിച്ചു….പക്ഷെ എനിക്ക് തെറ്റിപ്പോയി.. നിനക്ക് ഞാൻ വെറും ടൈം പാസ് ആയിരുന്നു.. എന്നെങ്കിലും കുറച്ചെങ്കിലും എന്നെ സ്നേഹിച്ചിരുന്നെങ്കിൽ നീ എന്നോട് ഇങ്ങനെ ഒന്നും ചെയ്യില്ലായിരുന്നു.. ഇത് നോക്ക്… ”ഒന്ന് നിർത്തി അവൾ ചുറ്റുപാടും ഒന്നു നോക്കി.. അത് മനസ്സിലാക്കി തൊട്ടടുത്ത ടേബിളിൽ ഇരുന്ന ഞാൻ കയ്യിലിരുന്ന ഫോണിലേക്ക് മുഖം താഴ്ത്തി.. അവൾ വീണ്ടും തുടർന്നപ്പോൾ നേരത്തെ ശ്രദ്ധിച്ചിരുന്ന പോലെ വീണ്ടും അവരെ തന്നെ ശ്രദ്ധിക്കാൻ തുടങ്ങി.. ഒരു ഇളം നില ഷോർട് സ്ലീവ് ടോപ് ആണ് അവൾ ധരിച്ചിരിക്കുന്നത്.. അതിന്റെ കൈ ഒന്ന് മുകളിലേക്ക് നീക്കി വെച്ച് .ഇരുണ്ട നിറത്തിൽ വട്ടത്തിൽ ആയുള്ള ഒരു മറുക് അവനെ കാണിച്ചു കൊണ്ട് അവൾ തുടർന്നു..” അന്ന്, കോളേജ് ഡേക്ക് സ്ലീവ്‌ലെസ് ഇട്ടെന്നും പറഞ്ഞു നീ കാണിച്ചു കൂട്ടിയതാ.. ഓർമ ഉണ്ടോ?? ഇപ്പോഴും ആ ഡ്രെസ് കബോഡിൽ കാണുമ്പോൾ എനിക്ക് പേടിയാ..അന്ന് നീ കാണിച്ചു കൂട്ടിയതൊക്കെ ഓർമ വരും.. സിനിമയിൽ ഒക്കെ കണ്ടിട്ടേ ഉണ്ടായിരുന്നുള്ളൂ അതൊക്കെ.. പക്ഷെ, നീ സിഗരറ്റ് എടുത്ത് കുത്തും എന്നൊന്നും ഞാൻ സ്വപ്നത്തിൽ പോലും വിചാരിച്ചിരുന്നില്ല.. അന്ന് നീ കരഞ്ഞു കാലു പിടിച്ചു പറഞ്ഞത് കൊണ്ടാ ഞാൻ വീണ്ടും ഒരു ചാൻസ് കൂടി നിനക്ക് തന്നത്.. പക്ഷേ വീണ്ടും….”
അവളുടെ ശബ്ദം ഇടറിയിരുന്നു.. ഇത്ര നേരം രോഷത്തോടെ സംസാരിച്ചുകൊണ്ടിരുന്ന ശബ്ദത്തിലേക്ക് നിരാശയും സങ്കടവും ഒരേ പോലെ അലിഞ്ഞു ചേർന്ന പോലെ…
