“‘ പള്ളീൽ ..പള്ളീൽ പോകാൻ നേരം പോയി . അരുണേട്ടൻ വന്നേരെ “‘ജിഷ അയാളുടെ കുറ്റപ്പെടുത്തൽ കേൾക്കാനാവാതെ ധൃതിയിൽ അവിടുന്ന് രക്ഷപെടാൻ നോക്കി .
“‘ പള്ളീലേക്കല്ല .നമ്മൾ അവരുടെ അടുത്തേക്കാണ് പോകുന്നത് . നിന്റെ അയൽവക്കംകാരെ സഹായിക്കാതെയും സ്നേഹിക്കാതെയും ബലിയർപ്പിച്ചിട്ടെന്താ കാര്യം . പ്രിയടീച്ചർ ക്ലാസ്സെടുക്കാൻ പോകുമ്പോൾ നീയാ കുട്ടിയെ ഇങ്ങോട്ട് വിളിക്ക് . നീയും തനിച്ചല്ലേയുള്ളു .അതൊരു പെൺകുട്ടിയല്ലേ ? .എന്ത് വിശ്വസിച്ചാണ് അവളെ അവിടെ തനിച്ചിരുത്തുക . നീയതലോചിട്ടുണ്ടോ ? ..വാ നമുക്ക് അങ്ങോട്ട് പോകാം “‘ ‘അരുൺ അവളുടെ കൈ പിടിച്ചു .
“” അയ്യോ .. ടീച്ചറോ ..ഞങ്ങളങ്ങോട്ട് വരുവായിരുന്നു.”” പുറത്തേക്കിറങ്ങാൻ തുടങ്ങിയ അരുൺ സിറ്റൗട്ടിലേക്ക് ഇന്ദുവിന്റെ കൈപിടിച്ച് കയറി വരുന്ന പ്രിയയെ കണ്ടു .
“‘ വന്നിട്ടിത് വരെ അയൽവക്കംകാരെ പരിചയപ്പെടാൻ പറ്റിയില്ല . തിരക്കായിപ്പോയി . ഇപ്പൊ മോള് പറഞ്ഞു എന്റെ ക്‌ളാസ് കേട്ടിട്ടുണ്ടെന്ന് . അതാ പെട്ടന്നോടി വന്നേ . അരുൺ ..അരുണല്ലേ ..എന്തിയെ മോൻ ?”” പ്രിയ അരുണിന്റെ പുറകിലേക്ക് നോക്കി .
“‘ ഉണ്ണിക്കുട്ടൻ ..അവൻ പോയി ടീച്ചറെ . ഇപ്പൊ ഒരു വർഷമാകുന്നു . “‘
“‘ ഓഹ് ..സോറി കേട്ടോ . ഞാനറിഞ്ഞിരുന്നില്ലല്ലോ … സാരമില്ല .എല്ലാം ദൈവത്തിന്റെ ഇഷ്ടമല്ലേ . വൈകല്യമുള്ളവർ മരിക്കുമ്പോഴാണ് ചിത്രശലഭങ്ങളായി പുനർജനിക്കുകയെന്ന് കേട്ടിട്ടുണ്ട് . ഉണ്ണിക്കുട്ടനിപ്പോ ഒരു പൂമ്പാറ്റയായി പാറിപ്പറന്നു നടപ്പുണ്ടാവും “‘ പ്രിയ പുഞ്ചിരിച്ചു .
”മോള് വാ .. ഇത് കണ്ടോ ഒരു ചേച്ചി . മോൾക്ക് ചേച്ചി പോകുമ്പോ കൂട്ടാവും മോൾടെ ചേച്ചിയെ പോലെ തന്നെ കണ്ടാൽ മതി കേട്ടോ . ..”‘ അരുൺ ഇന്ദുമോളുടെ കൈ പിടിച്ചു ജിഷയുടെ അടുത്തേക്ക് .നിർത്തി .
“‘ ചേച്ചി … സുഖമാണോ ?”’ഇന്ദു ജിഷയുടെ ശരീരത്തിൽ പരതി . അത് കണ്ടതും ജിഷ അമ്പരപ്പോടെ പ്രിയയയെയും അരുണിനെയും നോക്കി .
”അവൾക്ക് കണ്ണ് കാണില്ല ജീഷേ .”” അരുൺ മെല്ലെ പറഞ്ഞു .
“‘ മൂന്നിൽ പഠിക്കുമ്പോഴാണ് മോൾക്ക് കണ്ണിലൊരു മൂടലുണ്ടായത് . കുറെ ട്രീറ്റ്‌മെന്റ് നടത്തി . ഇനിയൊരു ഓപ്പറേഷൻ കൂടി വേണമെന്ന് പറഞ്ഞിരുന്നു . ക്യാഷിന്റെ പ്രശ്നത്തിൽ അത് മാറ്റി വെച്ചിരിക്കയായിരുന്നു .ഇവിടെയടുത്തൊരാൾ ആണ് ഈ വീട് റെഡിയാക്കി തന്നത് .അദ്ദേഹത്തിന്റെ രണ്ടു പിള്ളേരും ഓട്ടിസം ബാധിച്ചവരാണ് . ഇവിടെയാകുമ്പോൾ എനിക്കിടക്ക് വന്നു പോകാല്ലോയെന്ന് പറഞ്ഞദ്ദേഹമാണ് ഈ വീട് അറേഞ്ച് ചെയ്‌തത്. ഇവൾക്കിപ്പോ വെക്കേഷനാണ് .ഈ വെക്കേഷനിൽ ആ ഓപ്പറേഷൻ നടത്തണമെന്ന് കരുതുന്നു . അദ്ദേഹം സഹായിക്കാമെന്ന് പറഞ്ഞു . “”
””‘ ചായ കുടിക്ക് “‘ ജിഷ ചായ ഉണ്ടാക്കി കൊണ്ട് വന്നപ്പോൾ പ്രിയ കപ്പെടുത്തു . .ഇന്ദുമോൾ അവളുടെ കയ്യിൽ തൂങ്ങി കൂടെയുണ്ടായിരുന്നു .
“” താങ്ക്യൂ … ഇന്ദു പെട്ടന്ന് കൂട്ടായല്ലോ ജിഷയോട് . ഉണ്ണിക്കുട്ടൻ ഒറ്റ മോനെ ഉണ്ടായിരുന്നുള്ളോ ?”’ പ്രിയാ തോമസ് ചായകപ്പ് എടുത്തിട്ട് ചോദിച്ചു
“‘അതേ ടീച്ചറെ . അവനിങ്ങനെ ആയപ്പോൾ ഒരു ഭയം .അതു കൊണ്ട് ഇനിയൊരു കുട്ടി വേണ്ടന്നായിരുന്നു ചിന്തിച്ചിരുന്നത് “‘
”. ഓട്ടിസം ഒരു മാനസിക അവസ്ഥയാണ് . ആയിരത്തിൽ രണ്ടുപേർക്ക് ഓട്ടിസമുണ്ടാകുമെന്നാണ് കണക്കുകൾ . പല തരത്തിലുണ്ട് ഓട്ടിസം . പഠന വൈകല്യം ഉള്ളവരും തീരെ സംസാര ശേഷി കുറഞ്ഞവരും മുതൽ സ്വന്തമായി കുടുംബം നോക്കാനും വരുമാനം ഉണ്ടാക്കാനും വരെ പറ്റുന്നവർ .ഒന്നര വയസ് മുതലേ നമുക്കാ രോഗം മനസ്സിലാക്കാൻ പറ്റും . അപ്പോൾ അവർക്ക് വേണ്ടുന്ന പരിചരണം കൊടുത്താൽ അവരും തീർച്ചയായും സാധാരണക്കാരെ പോലെ ഇടപഴകും .ഓർക്കുക ചാൾസ് ഡാർവിനെ പോലെയുള്ള ശാസ്ത്രജന് വരെ ഓട്ടിസം ഉണ്ടായിരുന്നു . പിന്നെ സംഗീതം പോലെയുള്ള കലകളിൽ ഒക്കെ അവർക്ക് പ്രാഗത്ഭ്യമുണ്ടാകും “”’
”’ ഉണ്ണിക്കുട്ടനെ പോലെയുള്ള കുട്ടി ആവുമെന്ന് കരുതി അതിന് ശ്രമിക്കാതിരിക്കണ്ട.. ഓട്ടിസം ബാധിച്ച ഒന്നോ അതിലധികമോ കുഞ്ഞുണ്ടായാൽ രണ്ടാമത്തെയും മൂന്നാമത്തെയും കുഞ്ഞിന് വരാൻ ചാൻസുണ്ട് . എന്ന് കരുതി ഇതൊന്നും നമ്മുടെ കയ്യിലല്ലല്ലോ . ഇന്ദുമോളെ നോക്കൂ .അവൾക്കൊരു കുഴപ്പവും ഉണ്ടായിരുന്നില്ലല്ലോ . അത് കഴിഞ്ഞല്ലേ കാഴ്ച ശക്തി പോയത് . ഇതൊക്കെ ദൈവത്തിന്റെ തീരുമാനങ്ങളല്ലേ ? ദൈവീക ദാനമല്ലേ.കുഞ്ഞുങ്ങൾ ? അത് കൊണ്ട് നിങ്ങൾ ഉറപ്പായും ഇനിയൊരു കുഞ്ഞിന് വേണ്ടി കൂടി ട്രൈ ചെയ്യണം . .”” പ്രിയയുടെ ഓരോ വാക്കുകളും ശ്രദ്ധിച്ചു കേൾക്കുകയായിരുന്ന ജിഷ ഇന്ദുമോളുടെ കയ്യിൽ മുറുകെ പിടിച്ചിട്ടുണ്ടായിരുന്നു .
“‘ പ്രിയ ടീച്ചർടെ ഹസ്ബൻഡ് ?”’
” ഞാൻ കല്യാണം കഴിച്ചിട്ടില്ല . ഇവളുടെ കാര്യം നേരെയായിട്ട് വേണം .”‘
””’ഇന്ദു മോളുടെ കാര്യമോർത്തു ടീച്ചർ പേടിക്കണ്ട .ടീച്ചർ ജോലിക്ക് പോകുമ്പോൾ എന്റടുത്തേക്ക് വിട്ടേക്ക് . ഞാൻ നോക്കിക്കോളാം എന്റെ മോളായിട്ട്….ടീച്ചറുടെ കല്യാണം കഴിഞ്ഞാലും ഞാൻ നോക്കിക്കോളാം . “” “‘ ജിഷ ഇന്ദുവിന്റെ നെറുകയിൽ ഉമ്മവെച്ചു .
പള്ളിയിലെ ദിവ്യബലിക്കുള്ള മണി മുഴങ്ങുന്നുണ്ടായിരുന്നപ്പോൾ …..
സ്നേഹത്തോടെ .. ❤️
Jithuz💕
