” അപ്പൊ ശരി…മോള് ചെന്ന് സുഖായിട്ട് ഉറങ്ങിക്കോ…ഗുഡ് നൈറ്റ്… ”
ഞാൻ യാത്ര പറയാൻ എന്നോണം അവളുടെ മുടിയിഴകളിൽ താലോടി കൊണ്ട് പറഞ്ഞു…അതിന് മറുപടി ആയി അവളുടെ കുഞ്ഞ് നുണക്കുഴി വിടർന്നുള്ള ചിരിയും വന്നു…
” അപ്പൊ ശരി… നാളെ കാണാം… ”
ഞാൻ യാത്ര പറഞ്ഞ് തിരിഞ്ഞ് നടക്കാനൊരുങ്ങി…പക്ഷെ തൊട്ടടുത്ത നിമിഷം എൻ്റെ കൈപിടിച്ച് വലിച്ച ദിവ്യ അവൾക്ക് അഭിമുഖമായി ചേർത്ത് നിർത്തി…ആ രാത്രിയുടെ ഇരുട്ടിൽ പൂത്തുലഞ്ഞ നിലാവിന്റെ ശോഭയിൽ ഞങ്ങളുടെ കണ്ണുകൾ ഒരുനിമിഷം പരസ്പരം തറച്ചു നിന്നു…കാര്യമെന്താണെന്ന് അറിയാൻ പുരികം ഉയർത്തിയ എനിക്ക് അവൾ മറുപടി തന്നത് എൻ്റെ ചുണ്ടിന് മീതേ അവൾടെ ചുണ്ടിനാൽ നൽകിയ ചുടു ചുംബനത്തിലൂടെയാണ്…ഒരു നിമിഷം 210 KV ലൈനിൽ ഊഞ്ഞാലാടിയ അവസ്ഥ ആയിരുന്നു എൻ്റേത്…ആകെ ഒരു തരിപ്പായിരുന്നു… ഒരുമാതിരി റംമിൽ കുരുമുളകിട്ട് അടിച്ചാൽ ഉള്ള അവസ്ഥ….
” ഇന്ന് വൈകിട്ട് തീയറ്ററിൽ മിസ്സായത്…ഇത്ര തിരക്കിട്ട് എന്നെ ഈ രാത്രി കാണാൻ വന്ന എൻ്റെ ഈ കള്ള ചെക്കന് ഞാൻ തരണമല്ലോ… ”
അവളെന്നെ നോക്കി നാണത്തോടെ പറഞ്ഞ ശേഷം തിരിഞ്ഞൊരൊറ്റ നടത്തമായിരുന്നു…വാതിൽ അടയ്ക്കുമ്പോൾ പ്രണയ പൂർവ്വത്തോടെയുള്ള അവൾടെ നോട്ടം കൂടി ആയതോടെ ഞാനിപ്പൊ അറ്റാക്ക് വന്ന് ചാകും എന്ന അവസ്ഥയിൽ എത്തി…ഓ…ഒരു ഉമ്മയുടെ പവറേ…ഒടുക്കം അവൾ വാതിൽ അടച്ചിട്ടും ഒരു രണ്ട് മിനിറ്റ് ആ ഉമ്മറത്ത് ആദ്യമായി തുണ്ട് കണ്ട ബാലകൻ്റെ അവസ്ഥയിൽ ഞാൻ കിളി പാറി നിന്നു…ഒടുക്കം ബോധം വന്നതും ഞാൻ രു ചിരിയോടെ ആ ഉമ്മറ വാതിലിലേക്ക് നോക്കിയ ശേഷം ഗേറ്റ് ലക്ഷ്യമാക്കി നടന്നു…
” എന്നതാ മൈരെ ഇത് റാമ്പ് വോക്കോ…ഒന്ന് ഓടി വാടേയ്… ”
ഗേറ്റിനടുത്തേക്കുള്ള എൻ്റെ ആടിയാടിയുള്ള വരവ് കണ്ട് നന്ദു ചോദിച്ചു…അപ്പോഴാണ് എൻ്റെ യഥാർത്ഥ കിളി വീണ്ടും എന്നിലേക്ക് എത്തിയത്…അതോടെ ഞാൻ വേഗം അവൻ്റടുതേക്ക് വെച്ച് പിടിച്ചു…
” എത്ര നേരായി മൈരേ പോയിട്ട്…ഞാനപ്പഴെ പറഞ്ഞതല്ലെ പെട്ടെന്ന് വരണമെന്ന്…ഈ റോഡീന്ന് ആരേലും എന്നെ കണ്ടിരുന്നെങ്കിൽ നിന്നെ കൊന്നേനെ… ”
ഞാൻ അടുത്തെത്തിയതും നന്ദു ശബ്ദം താഴ്ത്തി പല്ല് കടിച്ചു…
” എൻ്റെടാ ഒന്നും സംഭവിച്ചിലല്ലോ…പിന്നെ അങ്ങനെ ആരേലും കണ്ടാൽ നീ എനിക്ക് വേണ്ടി കള്ളനാവില്ലേ… ”
ഞാൻ ബൈക്കിന് പുറകെ കയറുമ്പോൾ അവനോട് ഒരു ചിരിയോടെ പറഞ്ഞു…
” ആടാ…ഞാൻ…ഞാൻ…ഞാനേക്കാടാ…എന്നെ കൊണ്ട് പറയിക്കല്ലേ… ”
അവൻ തൊരപ്പൻ കൊച്ചുണ്ണിയെ പോലെ എന്നോട് മറുപടി പറഞ്ഞ് വണ്ടി സ്റ്റാർട്ട് ചെയ്തു…അപ്പോഴായിരുന്നു എൻ്റെ ഉള്ളിലൊരു സംശയം ഇനി അവിടെ നടന്നത് എന്തേലും മച്ചമ്പി കണ്ട് കാണുമോ….ഹേയ് ഇല്ല…ഇരുട്ടല്ലേ…അങ്ങനെ ആശ്വസിക്കാം…അപ്പോഴേക്കും നന്ദു വണ്ടി മുന്നോട്ട് എടുത്തിരുന്നു…അതോടെ ഞങ്ങൾ അവിടെ നിന്നും ഹോസ്പിറ്റലിലേക്ക് തിരിച്ചു…
തിരിച്ച് ഹോസ്പിറ്റലിലേക്ക് എത്തിയപ്പോഴും എൻ്റെ ശരീരം മാത്രേ എൻ്റൊപ്പം ഉണ്ടായിരുന്നുള്ളൂ…മനസ് അപ്പോഴും അവളുടെ അടുത്ത് അവിടെ തന്നെ ആയിരുന്നു…ഈ പ്രണയം ഒരു തരം വിപ്ലവം തന്നെ ആണ്… തലയ്ക്ക് പിടിച്ചാ പിന്നെ അതിന് വേണ്ടി മാത്രം ജീവിക്കുന്ന പോലെ ആവും…അങ്ങനെ ഓരോന്നൊക്കെ ചിന്തിച്ച് എപ്പോഴാണ് മയക്കത്തിലേക്ക് വീണതെന്ന് അറിയില്ല… പിറ്റേന്ന് പതിവിലും വിപരീതമായി ഞാനായിരുന്നു ആദ്യം എഴുന്നേറ്റത്…അങ്ങനെ ബാക്കി ഉള്ളതിനെ ഒക്കെ കുത്തി പൊക്കി…അന്ന് ഞങ്ങൾ ഇത്തിരി നേരത്തെ അവിടെ നിന്നും വീട്ടിലേക്ക് വിട്ടു…
” അല്ല ഇന്നിത്തിരി നേരത്തെ ആണല്ലോ… ”
പതിവിലും നേരത്തെ ഹോസ്പിറ്റലിൽ നിന്നൂം വീട്ടിലേക്ക് എത്തിയ എന്നെ നോക്കി ഉമ്മറത്ത് പേപ്പറിൽ തലപൂഴ്ത്തിയിരുന്ന അച്ഛൻ അതിൽ നിന്നും തലയെടുത്ത് എന്നെ നോക്കി ചോദിച്ചു…അതിന് അങ്ങേരെ നോക്കി നല്ല ഒരു ചിരി മാത്രം കൊടുത്ത് ഞാൻ ഉള്ളിലേക്ക് കയറി… പുള്ളി പണിക്ക് പോവാൻ റെഡി ആയിട്ടുള്ള കാത്തിരിപ്പാണ്…അപ്പൊ പതിവ് പോലെ ഇവിടുത്തെ ഐശ്വര്യ റായ് ഒരുങ്ങുന്നേ ഉണ്ടാവൂ…
” ഹാ എത്തിയോ… ”
ഹാളിലേക്ക് കയറി ചെന്നത് നേരെ അമ്മയുടെ മുന്നിലേക്കാണ്…അതോടെ ഞാൻ പുള്ളിക്കാരിയെ കെട്ടിപിടിച്ച് ഒരു ഉമ്മ അങ്ങ് കൊടുത്തു…
” എന്താണ് പതിവില്ലാതെ സ്നേഹം ഒക്കെ…വല്ലതും ഒപ്പിച്ചിട്ടുള്ള വരവാണോ… ”
എൻ്റെ സ്നേഹ പ്രകടനത്തിൽ ഇച്ചിരി സംശയം തോന്നിയ അമ്മ പുരികം ഉയർത്തി…
” ഇതെന്തൊരു കഷ്ടാ…എനിക്കൊന്ന് എൻ്റെ അമ്മയെ സ്നേഹിച്ചൂടെ… ”
ഞാൻ പുള്ളിക്കാരിയോട് ഒരു കപട ദേഷ്യം കാണിച്ചു…
” ആണോ…മോന് അമ്മയോടുള്ള സ്നേഹം തിളച്ച് മറിയുവാണോ… ”
അമ്മ ഡൈനിംഗ് ടേബിളിൽ ഇരിക്കുന്ന ലഞ്ച് ബോക്സെടുത്ത് ബാഗിലേക്ക് വയ്ക്കുന്നതിനോടൊപ്പം എന്നെ നോക്കി കളിയാക്കി ചിരിച്ചുകൊണ്ട് ചോദിച്ചു…
” പിന്നല്ല…എനിക്കമ്മയോട് ഒടുക്കത്തെ ഐ ലവ് യു അല്ലേ… ”
ഞാൻ അമ്മയുടെ മൂക്കിൻ തുമ്പ് പിടിച്ചാട്ടികൊണ്ട് പറഞ്ഞു…
” ച്ഛി പോടാ…പ്രായം പത്തിരുപത്തിമൂന്നായി…ഇപ്പൊഴും കുഞ്ഞാവയെ പോലെ അവൻ കൊഞ്ചാൻ വന്നേക്കുന്നു… ”
അമ്മയെൻ്റെ തലയ്ക്കൊരു കൊട്ട് തന്ന ശേഷം കുണുങ്ങി ചിരിച്ചു…
” പിന്നേ…ഞാനിപ്പോഴും ഈ സുന്ദരി കോതയുടെ കുഞ്ഞാവ തന്നാ… ”
ഇത്തവണ അമ്മയെ വീണ്ടും കെട്ടിപ്പിടിച്ചാണ് ഞാൻ മറുപടി കൊടുത്തത്…
” അയ്യോടാ…എന്നാ അമ്മേൻ്റെ കുഞ്ഞാവ വേഗം പോയി റെഡിയായി കോളേജിൽ പോകാൻ നോക്കിയേ… അമ്മയ്ക്ക് ഡ്യൂട്ടിക്ക് പോണം… ”
അമ്മ എൻ്റെ തലമുടിയിൽ തലോടി കൊണ്ട് പറഞ്ഞു…അതോടെ ഞാൻ അമ്മയുടെ മേലിൽ നിന്നും അകന്നു…
” അമ്മയും വരുന്നോ…എൻ്റൊപ്പം കോളേജിൽ.. ”
ഞാൻ പുള്ളിക്കാരിയെ നോക്കി കണ്ണിറുക്കി കൊണ്ട് ചോദിച്ചു…അതിന് അമ്മ എന്തിനെന്നർത്ഥത്തിൽ പുരികം ഉയർത്തി…
” അല്ല ഇപ്പോഴും കണ്ടാ ആ കോളേജ് കുമാരിയുടെ ലുക്കുണ്ട് എൻ്റെ ഡോക്ടറിന്…അതോണ്ട് വേണെ വന്നോ…പിന്നെ എനിക്ക് അല്ലേ അറിയൂ കെളവിയാന്ന്… ”
ഞാൻ കളിയാക്കി ചിരിച്ചുകൊണ്ട് പറഞ്ഞു..അത് കേട്ട് അമ്മ ചിരിച്ചുകൊണ്ട് എനിക്ക് നേരെ കൈ ഓങ്ങുമ്പോഴേക്കും ഞാൻ ഓടി സ്റ്റയർ കേറിയിരുന്നു…പുറകീന്ന് ഭക്ഷണം കഴിക്കാൻ മറക്കരുത്… അവരിങ്ങുവാണ്.. എന്നൊക്കെ ഉള്ള പതിവ് പല്ലവികളും ഉണ്ടായിരുന്നു…
അങ്ങനെ റൂമിലെത്തിയതും ഒന്ന് മയങ്ങി എഴുന്നേറ്റപ്പോളേക്കും സമയം 10 കഴിഞ്ഞിരുന്നു…ഫോണെടുത്ത് നോക്കിയപ്പോൾ കാമുകിയുടെ 2 മിസ്ക്കോളും നൻപൻ നന്ദു സാറിൻ്റെ 5 മിസ്ക്കോളും… എന്നാ കൂടുതൽ തവണ വിളിച്ചവനെ ആദ്യം വിളിക്കാം എന്ന് കരുതി നന്ദുവിനെ വിളിച്ചു…
” അളിയാ മഴയല്ലേ…നീ കാറെഡുത്തിട്ട് വാ…ഞാൻ വീട്ടിലുണ്ട്… ”
ഫോണ് എടുത്തവാടെ അവൻ്റെ മറുപടി അതായിരുന്നു…അപ്പോഴാണ് പുറത്ത് മഴ പെയ്യുന്നത് ഞാനും ശ്രദ്ധിച്ചത്…
