ചെറിയച്ഛൻ ആണ് അത് പറഞ്ഞത്….. ശരിക്കും ഒരു രോഗിയോട് പറയുന്നത് പോലെയാണ് എനിക്ക് തോന്നീത്….ശരിക്കും ഇതൊരു രോഗം തന്നെ ആയിരുന്നു…. തിരിഞ്ഞ് നടന്ന തേജേടെ കയ്യിൽ പിടിച്ചു കൊണ്ട്
“നീ ഇവിടെ നിക്കടി…..”
പെണ്ണെന്റെ അടുത്ത് വന്നിരിന്നു….എന്നോട് ഒന്നും മിണ്ടീല….ഞങ്ങൾ അങ്ങനെ കുറേ നേരം ഇരിന്നു….ന്നെ കുറച്ചു മാറ്റി കിടത്തി ഓളും ന്റെ സൈഡിൽ കിടന്നു….
“എഡി… നീ ഇപ്പം ഓക്കേ ആണോ…?”
ഞാൻ തല കുലുക്കി ആന്ന് പറഞ്ഞു…… പിന്നെ ചെക്കിടു പൊളിയുന്ന ഒരടിയാണ് എനിക്ക് കിട്ടീത്… സുരാജേട്ടൻ പറേന്നത് പോലെ നല്ല രസികനടി….. ന്റെ കണ്ണീന്നും ചെവീന്നൊക്കെ പാറിയ കിളിക്ക് കണക്കില്ല……
“ഇത് തന്നില്ലേ ന്റെ പേരെനിക്ക് ചേരൂല….”
ആ അടി ഞാൻ നല്ല വൃത്തിക്ക് അഹിർക്കിന്നുണ്ട്….. ഞാൻ ഒരു ചെറു ചിരി മാത്രം പാസാക്കി….
“അന്ന് നീ എന്നെ വിളിച്ച തെറി മൊത്തം എനിക്കിപ്പഴും ഓർമിണ്ട്….. ന്നിട്ടും ഞാൻ നിന്നോട് മിണ്ടണത് നീ അങ്ങനെ ആവാനുള്ള കാരണം ഓർത്തിട്ട് മാത്ര… കേട്ടാഡാ മരപ്പട്ടി….”
അവള് കിടന്ന് ചീറി…..
എന്ത് പറയാനാണ്…..എല്ലാം കേൾക്കാൻ ഞാൻ ബാധ്യസ്ഥാനാണ്….. രാവിലെ അടിക്കുവൊന്നും ചെയ്യാത്തോണ്ട് വല്ലാത്ത വെശപ്പ്… ഞാൻ വയറിൽ കയ്യും കൊടുത്ത് വിശക്കുന്നു ന്ന് കാണിച്ചു….ഓൾ ചിരിച്ച് കൊണ്ട് ന്റെ കയ്യും പിടിച്ചു റൂമിലേക്ക് നടന്നു…
“വല്യമ്മേ ഇവിടൊരാൾക്ക് വെശക്കണൂന്ന്….. ആ ഇന്ന് വയറ്റിൽ കള്ളില്ലാത്തതല്ലേ വെശപ്പ് കാണും….”
ന്നെ കസേരയിലിരുത്തി അതും പറഞ്ഞോള് അടുക്കളേലേക്ക് പോയി….. അമ്മ അപ്പഴത്തേക്കും ഒരു പ്ലേറ്റ് നിറച്ചും ദോശയും പിന്നെ സാമ്പാറും ചമ്മന്തിയുമായി എത്തീരുന്നു….. ന്തോ നല്ല വിശപ്പ്… പിന്നൊന്നും നോക്കീല കൊറേ ദോശ അങ്ങ് തട്ടി….ല്ലാരും എന്നെ തന്നെ നോക്കി ഇരിക്കാണ്….. ല്ലാരേം മുഖത്തെ സന്തോഷൊന്ന് കാണണം….പഴേ ഗൗതത്തെ തിരിച്ചു കിട്ടിയതിന്റെ ഉത്സാഹം എല്ലാരുടേം മുഖത്തിണ്ട്…എല്ലാരുടേം ചായ കഴിഞ്ഞ് ഇറയത്ത് അമ്മേന്റെ മടീൽ തല വെച്ച് കിടക്കുവാണ്….അമ്മ ചെറുതായി മസാജ് ചെയ്ത് തരുന്നുണ്ട്…… നിക്ക് ഭയങ്കര ഇഷ്ടാണ് ഇങ്ങനെ കെടക്കാൻ…..
“അമ്മേന്റെ മസാജിങ് ശരിക്കും മിസ്സ്‌ ചെയ്ത് കേട്ടോ… ”
“അതിന് ഞാൻ എവിടേം ഓടി പോയിട്ടൊന്നും ല്ലല്ലോ….. ചെക്കന്റെ വർത്താനം നോക്കണേ….”
എല്ലാരും ഇത് വരെ സംഭവിച്ച കുറ്റവും കൊറവുകളും എല്ലാം നിരത്തി….. എല്ലാം ഞാൻ ഏറ്റു പറയുവേം ചെയ്തു….
“അമ്മാ നമ്മക്കിന്നെല്ലാർക്കും കൂടി ഒരു സിനിമക്ക് പോയാലോ….”
ആ വീട്ടിൽ നിന്ന് നിന്ന് എനിക്ക് ശരിക്കും വട്ടായിരുന്നു….വീട് വിട്ടാൽ ബാർ… ബാർ വിട്ടാൽ വീട്….വേറെവിടെയും പോക്കില്ല…
“മ്മ് പോവാം….” എല്ലാരും ഒരുമിച്ചാണ് പറഞ്ഞത്…..കൊറേ സിനിമ കാണുന്ന ആളായിരുന്നു ഞാൻ… ഓൾ മരിച്ചെന് ശേഷം ഒരു സിനിമ കണ്ടിട്ടില്ല….. എനിക്ക് റിഫ്രഷ് ആവാൻ സിനിമയെക്കാൾ ബെസ്റ്റ് ഓപ്ഷൻ വേറെ ല്ല…… പിന്നെയും ഓരോന്ന് പറഞ്ഞു സമയം അങ്ങ് പോയി… വൈകുന്നേരം എല്ലാരും കൂടി സിനിമക്ക് പോയി…വേറെവിടെയും അല്ല നമ്മളെ ബഷീർക്കാന്റെ ലിബർട്ടി തന്നെ….പണ്ട് കോളേജിൽ പഠിക്കുമ്പോഴും അത് കഴിഞ്ഞും ആരതീന്റെ കൂടെ ഇവിടെ തന്നെ ആരുന്നു….. കുഞ്ഞൂന് സിനിമക്ക് വരാൻ വെല്ല്യ താല്പര്യം ഒന്നൂല്ല….പിന്നെ എന്റെ തോളിൽ തല വെച്ച് കിടക്കാൻ വരുന്നൂന്ന് മാത്രം….വേറെ ചെക്കന്മാരെ പോലെ തിയേറ്റർ ഇൽ കേറിയാൽ കൊഞ്ചാനും കുഴയാനൊന്നും എന്നെ കിട്ടൂല….ഞാൻ സ്‌ക്രീനിൽ തന്നെ അങ്ങ് ലയിച്ചിരിക്കും….. രാത്രി 9:30 ന്റെ ഷോ നാണ് ടിക്കറ്റ് എടുത്തത്….തണ്ണീർ മത്തൻ ദിനങ്ങൾ ന്ന് പറഞ്ഞ ഒരു മൂവി ആയിരുന്നു….. ആരാ നടനെന്നും നടീന്നൊന്നും എനിക്ക് അറീല….ഞാൻ മൊബൈല് യൂസ് ചെയ്തിട്ട് തന്നെ മാസങ്ങൾ ആയി….. ഞാൻ കൊറേ ചിരിച്ചു….. ഞാൻ ഇത്ര ചിരിച്ചു കണ്ടൊരു സിനിമ ഈയടുത്തൊന്നും ഉണ്ടായിട്ടില്ല….. ഈയടുതെന്ന് പറഞ്ഞാ കഴിഞ്ഞ വർഷം പോലും….. ന്തോ അത്രക്ക് ചിരിച്ചു….. ന്റെ ആ മൂടേ അങ്ങ് മാറി സെറ്റ്
ആയി….തിരിച്ചു കാറിൽ വരുമ്പോ ഞങ്ങൾ ല്ലാരും ചിരിക്കുവാരുന്നു… എല്ലാർക്കും പടം വല്ലാണ്ട് ഇഷ്ടായി…..
“നീ വന്നേരെ ന്റെ ചെക്കൻ ആള് പഴയ പോലെ ആയി… നിൻക് കൊറച്ചു ദിവസം മുന്നേ വന്നൂടായിരുന്നോ…”
“ചെറിയമ്മ വന്നുണ്ടൊന്നും ല്ല….എനിക്ക് നന്നാവാൻ തോന്ന്യതോണ്ടാ….”
ഹ്മ്മ് അങ്ങനെ ഇപ്പൊ അതിന്റെ ക്രെഡിറ്റ്‌ കൊണ്ട് പോയി ഗമ കാണിക്കണ്ട….
“അയ്യടാ… ന്നിട്ട് ന്ത്യേ ഇത്ര ദിവസം തോന്നീല….. അച്ഛനേം അമ്മേനേം കരയിപ്പിക്കാത്ത ദിവസം ണ്ടോ നീ….”
പറഞ്ഞത് സത്യം ആയിരുന്നേലും… ചെറിയമ്മ അത് മുഖത്തടിച്ചു പറഞ്ഞപ്പോ നിക്ക് എന്തോ വല്ലാണ്ട് ഫീൽ ആയി….
“എനിക്കതിൽ ഏറ്റോം ചിരി തോന്നിയ സീൻ എന്താന്ന് അറിയോ….ആ സ്റ്റോറിന്റെ പേരിൽ സാറന്മാര് അടികൂടിന്നില്ലേ….അത് കണ്ടിട്ട് ചിരി നിർത്താൻ പറ്റീല….”
“അയ്യ വിഷയം മാറ്റിയതാണെന്ന് തിരിഞ്ഞേ ഇല്ല…”
എൻക് ഫീൽ ആയത് കണ്ട് വിഷയം മാറ്റാൻ അച്ഛനത് പറഞ്ഞപ്പോ അച്ഛനിട്ട് തന്നെ ഞാനൊരു പണി കൊടുത്തു….ല്ലാരും ലോക ചിരി ആരുന്നു…..
“ഇനി നമുക്കിവന്റെ കല്ല്യാണങ് നടത്തണം…..” ന്റെ മൂഡ് വീണ്ടും നശിപ്പിച്ചു കൊണ്ട് ചെറിയച്ഛനാണത് പറഞ്ഞത്….
“അത് ശര്യാ… ഒരു പെണ്ണ് കെട്ടിയാ ഇവൻ അതൊക്കെ മറക്കും… എല്ലാം ഓക്കേ ആകും….” അത് അച്ഛനും ഏറ്റു പിടിച്ചു…
“അച്ഛാ….എനിക്ക് കൂടുതൽ ഒന്നും പറയാൻ ഇല്ല….നിങ്ങൾ എന്ത് പറഞ്ഞാലും ഞാൻ അനുസരിക്കും….എന്തും ചെയ്യാം….. പക്ഷെ ഇതിന്റെ പേരിൽ ഇനിയൊരു ടോക്ക് വേണ്ട….എന്റെ ജീവിതത്തിൽ ഇനിയൊരു പെണ്ണ് അതുണ്ടാവൂല….നിക്ക് അത് പറ്റില്ല….”
കനത്ത ശബ്ദത്തോടെ അത്രയും തീവ്രമായിരുന്നു എന്റെ തീരുമാനം…..
“ന്തിനാ ഇപ്പം കല്യാണം….ന്റെ കുട്ടന് ആകെ 26 ആയല്ലേ ഉള്ളൂ… ഒരു തെരക്കൂല….ഒരു രണ്ട് വർഷോക്കെ കഴിഞ്ഞ് പതുക്കെ മതി….”
“ചെറിയമ്മേ….രണ്ട് വർഷല്ല…20 വർഷം കൈഞ്ഞാലും ന്റെ തീരുമാനത്തിന്
മാറ്റൊന്നും ണ്ടാവാൻ പോണില്ല….ഈയൊരു കാര്യത്തിൽ മാത്രം എന്നെ നിങ്ങള് നിർബന്ദിക്കാൻ പാടില്ല….നമുക്കാ ടോക്ക് വിടാം…..”
പിന്നാരും അതെ കുറിച്ചവിടെ സംസാരിച്ചില്ല……..
◾️◾️◾️◾️◾️◾️◾️◾️◾️◾️◾️◾️◾️◾️◾️◾️.
ഫുള്ളി ആൽക്കഹോളിക്ക് ആയ എനിക്ക് തിരിച്ചു വരാൻ ചെറിയ കഷ്ടപ്പാട് ഒന്നും ആയിരുന്നില്ല…..6 മാസമേ ആയുള്ളൂ എങ്കിലും ഈ ആറു മാസം കൊണ്ട് ആറു വർഷത്തേക്കുള്ളത് ഞാൻ കുടിച്ചിരുന്നു…മനസ്സ് കൊണ്ട് തിരിച്ചു വന്നെങ്കിലും ശരീരം അതിലേക്ക് എത്തിക്കുന്നത് അത്ര എളുപ്പം ആയിരുന്നില്ല… പക്ഷെ ആ യാത്രയിൽ എല്ലാരും എന്റൊപ്പം ഉണ്ടായിരുന്നു….. അങ്ങനെ ഒരു മാസം കൊണ്ട് മെന്റലി എന്ന പോലെ തന്നെ ഞാൻ ഫിസികലിയും സെറ്റ് ആയി….ഒമുവും ആയി ഉള്ള പ്രശ്നങ്ങൾ ഒക്കെ സോൾവ് ആയി ….. വീണ്ടും തിരിച്ചു ഞാൻ പഴയ ആ ഗൗതം ആയി…….. കാലങ്ങൾ ഒരുപാട് കടന്ന് പോയി….. ഞാൻ ഇപ്പൊ ചെന്നൈ ഇൻഫോസിസിൽ ആണ്….ലൈഫിനെ സീരിയസ് ആയി നോക്കി തുടങ്ങിയിരിക്കുന്നു….നല്ല പട്ടിയെ പോലെ കഷ്ടപ്പെടാൻ തുടങ്ങിയത് കൊണ്ടാവും കഴിഞ്ഞ മാസം അസോസിയേറ്റ് മാർക്കറ്റിംഗ് മാനേജർ പോസ്റ്റ്‌ ലേക്ക് ഞാൻ പ്രോമോടെഡ് ആയി…… അച്ഛന്റെ ഒരു ഫ്രണ്ട്ന്റെ മകളുടെ കല്ല്യാണം…..അതിന് നാട്ടിലേക്ക് പൊയ്ക്കോണ്ടിരിക്കുകയാണ് ഞാൻ….. ഞാൻ വരണില്ല എന്ന് പറഞ്ഞതാ….അച്ഛന് ഒരേ വാശി….ഞാൻ നാട്ടിൽ പോയിട്ട് 6 മാസ്സം കഴിഞ്ഞു.. അതോണ്ട് ഒന്ന് പോയേച്ചും വരാന്ന് കരുതി…… ഞാനൊരു ഓഫ്‌ പോലും എടുക്കാറില്ല….ശ്രദ്ധ മുഴുവൻ ജോലിയിലാണ്….എങ്ങനേലും സീനിയർ മാർക്കറ്റിംഗ് മാനേജർ ആവണന്നുള്ള ഒറ്റ ചിന്തയെ ഉള്ളൂ….പിന്നാരുടെയും ഒരു ആട്ടും തുപ്പും കേൾക്കണ്ട….. വർക്ക്‌ പ്രഷർ ഇല്ല… ഡെഡ്ലൈൻസ് ഇല്ല….. ഫ്രീ ആവാം….. മ്യൂസിക്കിനെ അവിടെ വിട്ടതാണ്….പിന്നെ തൊട്ട് നോക്കീട്ടില്ല…..എന്തോ ഗിറ്റാർ കയ്യിൽ എടുക്കുമ്പോൾ മനസ്സ് മുഴുവൻ ഒരു മരവിപ്പ് ആണ്…… ഒരിക്കൽ ഞാൻ അത്രയും എൻജോയ് ചെയ്തിരുന്ന കാര്യം വേറെ ഉണ്ടായിരുന്നില്ല…..ട്രെയിൻ കോഴിക്കോട് കഴിഞ്ഞിരിക്കുന്നു….. ഇന്നലെ രാത്രി കേറിയതാണ്….രാത്രിയത്തെ ഉറക്കം ശരിയാവതോണ്ട് പകൽ നന്നായി ഉറങ്ങി…… ട്രെയിൻ തലശ്ശേരി എത്തിയപ്പോ ഒമുവിനെ വിളിച്ചു… അവൻ പിക്ക് ചെയ്യാൻ വന്നിരുന്നു…..
