എന്നാൽ, കുറച്ചു കഴിഞ്ഞപ്പോൾ അലവി ഹാജി മുറിയിൽ നിന്നും തിരിച്ചുവന്നു. മൂപ്പരുടെ കയ്യിൽ ബാങ്കിന്റെ ഒരു ചെക്ക് ബുക്ക് ഉണ്ടായിരുന്നു. അദ്ദേഹം സിറ്റൗട്ടിലെ മേശയ്ക്കരികിലിരുന്ന് അതിൽ നിന്നും ഒരു ചെക്ക് കീറി, താഴെ തന്റെ ഒപ്പ് ചാർത്തി അത് അലിയുടെ കൈകളിലേക്ക് നീട്ടി. “ഇതിൽ ഒരു ഒന്നര ലക്ഷം രൂപ എന്ന് നീ തന്നെ എഴുതിക്കോ,” ഹാജിയാർ ശാന്തമായി പറഞ്ഞു.♥️ 
അതു കേട്ടതും അലിയുടെ മനസ്സ് ആനന്ദനൃത്തമാടി. അത്രയും വലിയ തുകയുടെ ഒപ്പിട്ട ചെക്ക് കയ്യിൽ കിട്ടിയപ്പോൾ അവന്റെ മുഖത്ത് സന്തോഷത്തിന്റെ കോടീശ്വരൻ ഭാവം മിന്നിമറഞ്ഞു. ഹാജിയാർ അവന്റെ തോളിൽ തട്ടിക്കൊണ്ട് പറഞ്ഞു, “നോക്കാൻ പോകുമ്പോൾ നല്ലത് തന്നെ നോക്കി വാങ്ങിക്കോ മോനെ… പക്ഷേ, ഇപ്പോൾ നേരെ മില്ലിലേക്ക് പോയി രാവിലത്തെ ജോലികളൊക്കെ തീർക്കണം. അതുകഴിഞ്ഞ് ഉച്ചയ്ക്ക് ശേഷമേ രാഘവനെയും കൂട്ടി ടൗണിലേക്ക് പോകാവൂ.”
“ശരി ഉപ്പൂപ്പാ…” സന്തോഷം അടക്കാൻ കഴിയാതെ അലി ചെക്കും പോക്കറ്റിലിട്ട് വേഗം അടുക്കള ഭാഗത്തേക്ക് തിരിഞ്ഞു. ഉമ്മയോട് ഈ വലിയ സന്തോഷവാർത്ത പറയാൻ ധൃതി വെച്ച് നടക്കുകയായിരുന്നു അവൻ.
അവൻ തിരിയുന്നത് കണ്ട് ഹാജി പുറകിൽ നിന്നും ചോദിച്ചു, “അല്ല, നീയിനി ഇപ്പൊ എങ്ങോട്ടാ ഈ ഓടുന്നത്?”
“അത്… ഞാൻ ഉമ്മയോട് ഇതൊന്ന് പറയാൻ…” അവൻ അല്പം മടിച്ചുകൊണ്ട് പതിയെ പറഞ്ഞു.
“നല്ല കാര്യത്തിന് ഇറങ്ങുമ്പോൾ ഇങ്ങനെ പുറകോട്ട് പോകേണ്ട. നേരെ ഇറങ്ങാൻ നോക്ക്,” എന്ന് പറഞ്ഞുകൊണ്ട് അലവി ഹാജി അകത്തേക്ക് നോക്കി ഉച്ചത്തിൽ വിളിച്ചു, “റസിയേ…!”
വലിയുപ്പയുടെ വിളി കേട്ട് കുറച്ചു കഴിഞ്ഞപ്പോൾ റസിയ അടുക്കളയിൽ നിന്നും ഉമ്മറത്തേക്ക് നടന്നു വന്നു. “എന്താ ഉപ്പൂപ്പാ?” അവൾ ചോദിച്ചു.
“ആ… അവൻ വണ്ടി നോക്കാൻ വേണ്ടി ഇറങ്ങുകയാ.” ഹാജി പറഞ്ഞു.
റസിയ അലിയുടെ അരികിലേക്ക് നടന്നു വന്നു. അവളുടെ കണ്ണുകളിൽ അവനോടുള്ള സ്നേഹവും പ്രോത്സാഹനവും നിറഞ്ഞുനിന്നിരുന്നു. വലിയുപ്പ മുന്നിൽ നിൽക്കുന്നതുകൊണ്ട് അവൾ അധികം സംസാരിക്കാതെ കണ്ണുകൾ കൊണ്ട് അവന് എല്ലാ ആശംസകളും നേർന്ന് യാത്രയാക്കി. അലി വല്ലാത്തൊരു ആത്മവിശ്വാസത്തോടെയും ആവേശത്തോടെയും പടിയിറങ്ങി, പുതിയ കാർ സ്വപ്നം കണ്ടുകൊണ്ട് വേഗത്തിൽ ബസ് സ്റ്റോപ്പിലേക്ക് നടന്നു.
മില്ലിലെത്തിയ അലിയുടെ മുഖത്ത് എന്നത്തേക്കാളും വലിയൊരു പ്രകാശം നിറഞ്ഞുനിന്നിരുന്നു. അവന്റെ ആ അമിതാഹ്ലാദവും തുള്ളിക്കളിച്ചുള്ള നടപ്പും കണ്ടപ്പോൾ ഓഫീസിലിരിക്കുകയായിരുന്ന രാഘവൻ പുഞ്ചിരിയോടെ ചോദിച്ചു, “എന്താ മോനെ…
രാവിലെ തന്നെ വല്ലാത്തൊരു സന്തോഷത്തിലാണല്ലോ? വല്ല ലോട്ടറിയും അടിച്ചോ!”
“ലോട്ടറി ഒക്കെ ഇതിന്റെ അടുത്തു വരുമോ രാഘവേട്ടാ… ദേ നോക്കിക്കേ! ബൈക്ക് വാങ്ങാൻ പോയ എനിക്ക് വലിയുപ്പ ദാ കാറ് വാങ്ങിത്തരാൻ ചെക്ക് ഒപ്പിട്ടു തന്നിരിക്കുന്നു!” അലി തന്റെ പോക്കറ്റിൽ നിന്നും ആ മാന്ത്രിക ചെക്ക് പുറത്തെടുത്ത് വായുവിൽ വീശി വല്ലാത്തൊരു അഭിമാനത്തോടെ പറഞ്ഞു.
അതു കേട്ടപ്പോൾ രാഘവന്റെ മുഖത്തും വലിയ സന്തോഷം വിരിഞ്ഞു. അയാൾ കസേരയിൽ നിന്നെഴുന്നേറ്റ് അലിയുടെ തോളിൽ തട്ടി, “ഞാൻ പറഞ്ഞില്ലേ മോനെ…
ഹാജിയാർ നിന്റെ ഒരു ആവശ്യത്തിനും എതിര് പറയില്ലെന്ന്. നീ ഇപ്പോൾ മില്ലിലെ കാര്യങ്ങളൊക്കെ ഒറ്റയ്ക്ക് നോക്കി നടത്തുന്നതല്ലേ, മൂപ്പർക്ക് നിന്നിലുള്ള വിശ്വാസം കൂടിയതാ. ഏതായാലും ഇന്ന് നിന്റെ വക വലിയൊരു ചിലവുണ്ട് കേട്ടോ!”
“ചിലവിനൊക്കെ എന്താ രാഘവേട്ടാ… നിങ്ങൾ എന്തു വേണമെങ്കിലും ചോദിച്ചോ, ഞാൻ റെഡി!” അലി വന്യമായ ആവേശത്തോടെ പറഞ്ഞു.
വലിയുപ്പ പറഞ്ഞതുപോലെ അലി അന്നുച്ചയ്ക്ക് തന്നെ മില്ലിലെ പണികളൊക്കെ വേഗത്തിൽ ഒതുക്കി തീർത്തു. ജോലിക്കാരോട് കാര്യങ്ങൾ പറഞ്ഞ് അവരെ പതിവിലും നേരത്തെ തന്നെ വീട്ടിലേക്ക് പറഞ്ഞയച്ചു. അതിനുശേഷം അലിയും രാഘവനും കൂടെ നേരെ ടൗണിലെ ബാങ്കിലേക്ക് തിരിച്ചു.
അലവി ഹാജിയുടെ ഒപ്പുള്ള ആ വലിയ തുകയുടെ ചെക്ക് ബാങ്കിൽ കൊടുത്ത്, അവർ കാശെല്ലാം കൃത്യമായി വാങ്ങി ഒരു ബാഗിലാക്കി.