”എടാ അജയാ…അതൊണ്ടല്ലോ…എനിക്കാ പെണ്ണിനെ കണ്ടുപിടിക്കണം…“
ഞാൻ എന്റെ ആവശ്യം ഉന്നയിച്ചു അവനോട്
”കണ്ടുപിടിക്കാനോ….അളിയാ നീ കാര്യമായിട്ടാണോ….“
അല്ല അവന്റെ ചോദ്യവും ന്യായമാണ്…സാധാരണ വായി നോക്കുമെങ്കിലും ആദ്യമായിട്ടാണ് ഞാനൊരു പെണ്ണിനെക്കുറിച്ചു അവനോടിങ്ങനെ ചോദിക്കുന്നത്
”ആടാ…എന്തോ അവളെ കണ്ട് പിടിച്ചു സംസാരിക്കണമെന്ന് എന്നോട് ആരോ പറയുന്നത് പോലെ…“
ഞാൻ കൊറച്ചു മയത്തിൽ പറഞ്ഞു….ചാടി കേറി ബഹളമാക്കി പറഞ്ഞാൽ കഴപ്പിന്റെ പുറത്തു പറയുന്നത് ആണെന്നെ അവൻ കരുതു
”നീയവളുടെ വണ്ടിയുടെ നമ്പർ ശ്രദ്ധിച്ചോ…?
പെട്ടെന്ന് എന്തോ ഓർത്തവണ്ണം അവൻ ചോദിച്ചു….ഞാൻ ആണേൽ അവളെ കണ്ട നിമിഷം മുതൽ ബ്ലാങ്ക് ഔട്ട്‌ ആയിരുന്നല്ലോ അതിനിടെൽ വണ്ടീടേം അണ്ടീടേം നമ്പർ നോക്കാൻ ഉള്ള ബോധമൊന്നും എനിക്ക് ഇല്ലായിരുന്നു
“ഇല്ലെടാ…”
“ഹ്മ്മ്….എന്റെ ഭലമായ സംശയം അവളാ കോളേജിൽ തന്നെ പഠിക്കുന്നത് ആണെന്ന…”
അവൻ പറഞ്ഞു…….
“എനിക്കും അതേ സംശയം തോന്നിയതാ…അല്ലെങ്കിൽ അവളത്രയും നേരമാ പാർക്കിങ്ങിൽ വന്നിരിക്കില്ലല്ലോ…അവൾക്ക ഏരിയ മുഴുവൻ പരിജയം ഉള്ളതാണെന്നാ എനിക്ക് തോന്നിയത്….”
“അങ്ങനെ ആണേൽ വേറൊന്നും നോക്കണ്ട കുട്ടാ നമുക്ക് ആ കോളേജിൽ തന്നെ അഡ്മിഷനു കൊടുക്കാ….നിന്റെ വാരിയെല്ല് കൊണ്ടാണ് അവളെ ഉണ്ടാക്കിയിരിക്കുന്നതെങ്കിൽ അവളവിടെ കാണും….”
അവൻ വളരെ ആത്മവിശ്വാസത്തിൽ പറഞ്ഞു…..
“അതൊക്കെ എടുക്കാം…പിന്നീട് അവിടെ ചെന്നിട്ട് അവളെ എങ്ങനും കണ്ടില്ലേൽ മോനെ അജയാ നിന്റെ വാരിയെല്ലൂരി ഞാൻ കോൽക്കളി കളിക്കും…!
അതും പറഞ്ഞവനെയൊന്നു പേടിപ്പിച്ച ശേഷം ഞാൻ ബെഡിൽ കിടന്നുരുണ്ടു…..പെട്ടന്ന് എന്തോ ഓർത്തെന്നവണ്ണം ഞാൻ ഷെൽഫിൽ നിന്നുമെന്റെ ഐപാടും പേനയുമെടുത്തു……അതുമായി ബാൽകണിയിൽ വന്നിരുന്നു കൊറച്ചു നേരം ചുറ്റിനുമൊന്ന് നോക്കി……സന്ധ്യ കഴിഞ്ഞു…കൂമനും കുറുക്കനും രാത്രി സഞ്ചരത്തിനിറങ്ങിയിട്ടുണ്ട്….മുകളിൽ നിലാവ് പൊഴിച്ചുകൊണ്ട് പാതി മയങ്ങിയ ചന്ദ്രനും….കെട്ടു പൊട്ടി വീണ കടുക്മണികൾ പോലെ താരകങ്ങളും….ഒരിളം കാറ്റു കൂടി വീശിയതും എന്റെയുള്ളിലെ വരയ്ക്കുന്ന ഭ്രാന്തനെ ഞാനഴിച്ചു വിട്ടു……കുത്തി വരയിൽ തുടങ്ങിയൊടുവിലതൊരു സ്ത്രീരൂപമായി മാറി…..അവളെ ഞാനെന്റെ മനസ്സിൽ പതിപ്പിച്ചത് പോലെ തന്നെ വരച്ചെടുത്തു………..
“നിന്റെ പേരെന്താ പെണ്ണേ…….?
ഒരുപാട് നേരമായി ചിത്രവും നോക്കിയിരുന്ന ഞാൻ സ്വയം ചോദിച്ചു………..
”എന്തിനാ എന്റെ മുൻപിൽ വന്നുപെട്ടത്…..?
ഞാൻ വരച്ച ചിത്രത്തോട് കിന്നാരം പറഞ്ഞിരുന്നപ്പോളാണ് അച്ഛൻ കേറി വരുന്നത് കണ്ടത്….പെട്ടന്ന് തന്നെ ഐപാഡ് ഓഫ്‌ ചെയ്തു ഞാൻ എണീറ്റു
“നീ കഴിക്കുന്നില്ലേ കുട്ടാ..?
കൈലി മുണ്ടിന്റെ അറ്റം പിടിച്ചു നിവർത്തികൊണ്ടച്ചൻ ചോദിച്ചു
”ആ കഴിക്കാൻ ഇറങ്ങുവായിരുന്നു…“”
“”എന്നാ നടക്ക്….“
അതും പറഞ്ഞച്ഛൻ ആദ്യമേ സ്റ്റെപ്പ് ഇറങ്ങി….
അന്ന് ഞങ്ങൾ മൂവരും കഴിക്കാനിരുന്നപ്പോൾ ഞാനെനിക്ക് തെരേസ കോളേജിൽ ചേരണമെന്ന ആഗ്രഹം പറഞ്ഞു….
”അവിടെ ആണെങ്കിൽ അഡ്മിഷൻ നോക്കാം രാമേട്ടാ…ദിവസവും പോയി വരാനുള്ള ദൂരമല്ലേ ഉള്ളു…“
എന്നെ വീട്ടിൽ നിന്നും മാറ്റി നിർത്തി പടുപ്പിക്കാൻ ഇഷ്ടമല്ലാതിരുന്ന അമ്മ പറഞ്ഞു….കോളേജ് ഏതായാലും രാത്രി ആവുമ്പോ എന്നെ വീട്ടിൽ കണ്ടേക്കണമെന്ന് ആണ് അമ്മയുടെ ഓർഡർ
അച്ഛനും മറിച്ചൊരു അഭിപ്രായം ഇല്ലാത്തത് കൊണ്ട് മൂപ്പരും സമ്മതം മൂളി
”അവിടുത്തെ ജനറലച്ഛൻ എന്റെ പരിചയക്കാരനാ….നാളെ നമുക്കൊന്ന് പോയി സംസാരിച്ചു നോക്കാം…..“
അതും പറഞ്ഞച്ഛൻ കൈ കഴിക്കാനായി എണീറ്റു പോയി…..
ഞാൻ മുൻപിൽ കാണുന്നത് പോലെല്ലാം സംഭവിക്കുന്നത് കണ്ട സന്തോഷംത്തിൽ ഞാനും എണീറ്റന്റെ മുറിയിലേക്ക് നടന്നു….
കണ്ണുകളടച്ചു ബെഡിൽ കിടന്ന് തലക്ക് മുകളിൽ കറങ്ങുന്ന ഫാനിന്റെ കടകട ശബ്ദത്തേ കേൾക്കുമ്പോഴും മനസ്സു നിറയെ അവളു മാത്രമായിരുന്നു…പെട്ടെന്നൊരു ചിന്തയിൽ ഐപാടിൽ ഞാൻ വരച്ചു ചിത്രമെടുത്തെന്റെ ഫോണിന്റെ വോൾപേപ്പറാക്കി വെച്ചു…..
“നിന്നെ ഞാൻ കണ്ടുപിടിക്കും പെണ്ണെ…”
അതും പറഞ്ഞു ഫോണെടുത്തു നെഞ്ചോടു ചേർത്തു ഞാൻ മയങ്ങാൻ തുടങ്ങി
പ്രേമം നിങ്ങളെയൊരു പൊട്ടനാക്കി മാറ്റും……………കാണുന്നതിന്റെയെല്ലാം സൗന്ദര്യമാസ്വദിക്കുന്നയൊരു പൊട്ടൻ…..
പിറ്റേന്ന് സൂര്യൻ വന്നു തട്ടി വിളിച്ചിട്ടും ഞാനെണീറ്റില്ല…ഒടുക്കമമ്മ തന്നെ വന്നെനെ തല്ലിയെണീപ്പിച്ചു
“എണീറ്റ് പോടാചെറക്ക….കോളേജിൽ പോണ്ടേ ഇന്ന്…”“
അതും പറഞ്ഞമ്മ പോയി…..
”കോളേജ്…..!!!
ഉറക്കം മുറിഞ്ഞഞാൻ കണ്ണു തുറന്നു സ്വയം പറഞ്ഞു….പിന്നീട് ഒരോട്ടമായിരുന്നു….പല്ലു തേപ്പും ബാത്‌റൂമിൽ പോക്കും ഒക്കെ കഴിഞ്ഞിറങ്ങി കണ്ണാടിക്ക് മുൻപിൽ വന്നു നിന്നു
“കുളിച്ചാലോ….?
ഇന്നലെ തന്നെയാ പണിയൻ കോലത്തിലാണ് അവൾ കണ്ടത്…ഇന്ന് ചെല്ലുമ്പോളും എന്റെ ഭാഗ്യത്തിനവളവിടെയുണ്ടെങ്കിൽ മോശമാവരുതല്ലോ അവളുടെ ഭാവി ഭർത്താവ്……
ഡ്രിം ചെയ്തു നിർത്തിയയെന്റെ താടി ചൊറിഞ്ഞുകൊണ്ട് ഞാനോർത്തു….എന്നെ കാണാൻ വെളുത്തു മെലിഞ്ഞു അല്പമൊക്കെ സൗന്ദര്യമുള്ള ശരീരമാണ്…മോശമെന്ന് പറയാൻ ഒന്നുമില്ല….അതുകൊണ്ട് തന്നെ എനിക്കവളെ വളച്ചെടുക്കാൻ പറ്റുമെന്ന് എനിക്ക് നല്ല ഉറപ്പ് ആയിരുന്നു….പക്ഷെ ആദ്യമവളെ കണ്ടു പിടിക്കണ്ടേ….”
ഓരോന്ന് ഓർത്തു സ്വയം വട്ടു പിടിക്കാതിരിക്കാൻ ഞാൻ തോർത്തു മെടുത്തു കുളിക്കാൻ കേറി….അടിച്ചു നനച്ചൊരു കുളി കഴിഞ്ഞപ്പോളേക്കും ടാങ്കിലെ വെള്ളം പാതിയായെന്ന് താഴെ നിന്ന് റിപ്പോർട്ട് എത്തി…പിന്നൊന്നും നോക്കാതെ നല്ലൊരു ബ്ലൂ ഷർട്ടും ഗ്രേ കളർ പാന്റും എടുത്തിട്ടു മുടിയും ചീകിഞാൻ അടുക്കളയിലേക്ക് കയറി
അവിടെയെത്തിയതേ കണ്ടു ഒരു പ്ലേറ്റിൽ ദോശയും പിടിച്ചു നിന്ന് അമ്മയോട് കത്തി വെക്കുന്ന അച്ഛനെ…അമ്മയാണെങ്കിൽ എന്തോ പറഞ്ഞു ചിരിക്കുന്നുമുണ്ട്
“നീയിതെങ്ങോട്ടാ രാവിലെ തന്നെ…?
കുളിച്ചൊരുങ്ങി വന്നു നിൽക്കുന്ന എന്നെ കണ്ടയച്ഛൻ ചോദിച്ചു
”ദേ മനുഷ്യാ അവനെയും കൊണ്ടിന്നല്ലേ നിങ്ങള് കോളേജിൽ പോകാമെന്നു പറഞ്ഞത്…“
അമ്മയച്ഛന്റെ വയറിനു സ്പൂൺ‌കൊണ്ട് തട്ടിക്കൊണ്ടു ചോദിച്ചു
”എടി അതിനു കോളേജ് തുറക്കാനുള്ള സമയം കൊടുക്കണ്ടേ….നീ നിക്ക് ഞാനൊന്ന് ഡ്രസ്സ്‌ മാറി വരാം…“”
