”നാളെ വരും…“
”എടി…. ആരേലുമാ ലളിതയോട് ഇവിടെ വരെയൊന്ന് വരാൻ പറഞ്ഞേ…“
അച്ഛമ്മ വീണ്ടും ഭക്ഷണത്തിൽ മുഴുകിയപ്പോൾ ഉഷാമ്മ പോയി അടുക്കളയിൽ നിന്ന ലളിത ചേച്ചിയെ കൂട്ടി വന്നു…
”നിനക്ക് എതിർപ്പ് ഉണ്ടോ പെണ്ണേ, നിന്റെ മോളെ ഇവിടുത്തെ വേലക്കാരനു പിടിച്ചു കൊടുക്കാത്തതിന്… ഉണ്ടേലിപ്പോൾ പറയണം… ആരേലും ഇവൾക്കു ഞാൻ ചോദിച്ചതൊന്നു കാലും കൈയും കാട്ടി പറഞ്ഞു കൊടുക്ക്…“
അച്ഛമ്മ പറഞ്ഞത് ഉഷാമ്മയാണ് അവർക്കു പറഞ്ഞു കൊടുത്തത്…. പക്ഷെ തർജിമ ചെയ്യുന്നതിന് മുൻപ് തന്നെ അവരതു അച്ഛമ്മയുടെ ചുണ്ടിൽ നിന്നും വായിച്ചു മനസ്സിലാക്കിയെന്ന് എനിക്കു തോന്നി… അവര് അച്ഛമ്മയെ എതിർത്തില്ല…. പിന്നെയിനി വേറെ ആര് എതിർത്തിട്ടും കാര്യവുമില്ലായിരുന്നു…
ഞാൻ മുഖം കഴുകാൻ പുറത്തു ഇറങ്ങി ഇതിനെ കുറിച്ചു ചിന്തിച്ചുകൊണ്ടിരുന്നപ്പോൾ തൊടിയിലൂടെ ആരോ ഓടുന്നതു പോലെ തോന്നി… ഞാൻ ചാടി അകത്തു കയറി… പക്ഷെ അത് ഞാനാരോടും പറയാൻ പോയില്ലാ… അല്ലേൽ തന്നെ എല്ലാവരും നല്ലതു പോലെ പേടിച്ചാണ് ഇരിക്കുന്നത്… ഒന്നുമില്ലേലും ഞാനൊരു പുരുഷനല്ലേ, ഇങ്ങനെ പേടിച്ചാലോ… നാണക്കേട്… ഞാൻ മുറിയിൽ പോയി പുതച്ചു മൂടി കിടന്നു…
കിടക്കുന്നതിനു മുൻപ് കട്ടിലിന്റ അടിയിലും മേശയുടെ പുറകിലുമൊക്കെ വെറുതെയൊന്നു നോക്കി… മനസ്സിലൊരായിരം കാര്യങ്ങളായിരുന്നു… എല്ലാം തകരുന്നത് പോലെ, അതിനിടക്ക് ഒരു യമുനാ….
വെറുതെ പറഞ്ഞു പേടിപ്പിക്കാൻ കുറേ അന്ധവിശ്വാസങ്ങൾ…. അങ്ങനെ ഒരു പ്രേതമുണ്ടേൽ ഇപ്പോൾ ഒന്ന് മഴ പെയിച്ചു കാണിക്കട്ടെ, പറ്റില്ലാലോ…. വെറുതെ ഓരോരോ വട്ട്..
പ്രബലമായ ക്കാറ്റ് വീശാൻ തുടങ്ങി പക്ഷെ മഴയില്ലാ… ഞാൻ മനസ്സിലെന്നെ തന്നെ അഭിനന്ദിച്ചു കിടന്നു ഉറങ്ങി….
ഞാനൊരു കറുത്ത കുതിര പുറത്തു പോവുകയാണ്, ഇരുട്ടാണ്…. പക്ഷെ നല്ല നിലാവുണ്ട്, മരങ്ങൾക്ക് ഇടയിലൂടെ ചന്ദ്രനിൽ നിന്നും വെളുത്ത പ്രഭയെന്റെ മുന്നിലൂടെ വഴി തെളിച്ചു തരുന്നു… എന്റെ മുന്നിലായി കാലുകൾക്കു നടുക്കു കുതിര പുറത്തൊരു പെട്ടി വെച്ചിട്ടുണ്ട്… അത് ഇന്നലെ സ്വപ്നത്തിൽ കണ്ട പെട്ടി തന്നെയാണ്… സഞ്ചരിക്കുന്ന വഴിയും പരിചിതം തന്നെ… ഞാൻ തറവാടിനു പുറകിലൂടെയാ ഗ്രാമത്തിൽ പോയ വഴി, പക്ഷെ അത് കാടും പടലയും കേറി മൂടിയിട്ടില്ല….
ഞാൻ പോയപ്പോൾ കണ്ടതിലും വളരെയേറെ മരങ്ങൾ അവിടെയുണ്ട്… കുതിര കുറച്ചു കൂടെ മുന്നോട്ടു ഓടിയപ്പോൾ തരിശു നിലം കണ്ടു, വെള്ളം ഒഴുകുന്നതിന്റെ ശബ്ദവും കേട്ടു… ഞാനന്ന് കണ്ടതിലും വലുപ്പം നദിക്കു വെച്ചതു പോലെ തോന്നി.. അരയാൾ പൊക്കത്തിൽ വെള്ളമുണ്ട്… നദിക്കു മുന്നിലെത്തിയപ്പോൾ കുതിര ഒന്നമറികൊണ്ട് നിന്നു… അതിനെ കാലുകൊണ്ട് തട്ടിയും, ജീനി കുലുക്കിയും മുന്നോട്ടു നടത്താൻ ശ്രമിച്ചെങ്കിലുമത് വെള്ളത്തിൽ ഇറങ്ങിയില്ലാ…. ഞാനതിന്റെ പുറത്തു നിന്നും ചാടിയിറങ്ങി പെട്ടി കൈയിലെടുത്തു വെള്ളത്തിലേക്കു ഇറങ്ങി നടന്നു… എന്തൊരു തണുപ്പ്…..
-ട്ടപ്പേ-
വലിയൊരു ശബ്ദം കേട്ട് ഞാൻ ഞെട്ടി ഉണർന്നു… കാറ്റിന്റെ ശക്തിയിൽ ജനാലയുടെ ഒരു പാളി തുറന്നു കിടന്നാടി ഉലയുന്നു… പുറത്തു നല്ല ശക്തമായ മഴ, കാറ്റു വീശുമ്പോൾ മഴ തുള്ളികളെന്റെ മുഖത്തേക്കു ജാനാലയിലൂടെ തെറിക്കുന്നുണ്ട്… ഞാൻ എഴുന്നേറ്റു ചെന്ന് ജനാല അടച്ചു, അതിന്റെ കുറ്റി പറിഞ്ഞു പോയിരുന്നു…. വെറുതെയല്ലാ… ഞാൻ കുറ്റി ഇട്ടതാണ് കിടക്കുമ്പോൾ…
ഒരു പഴയ പത്രത്തിന്റെ ഇതൾ മടക്കി ജനാലയുടെ വിടവിൽ തിരുകി വെച്ച് ഞാനത് ചേർത്തടച്ചു… മേശപുറത്തിരുന്ന കൂജയിൽ നിന്നും വെള്ളമെടുത്തു വായിലേക്കു കാമത്തുമ്പോളാണ് ഞാൻ മഴയുടെ കാര്യമോർത്തത്…. ഇനി ഞാൻ പ്രേതമുണ്ടേൽ മഴ പെയ്യട്ടെയെന്ന് പറഞ്ഞിട്ടാണൊ…
പിന്നെ കോപ്പാണ്, അങ്ങനെ മഴ പെയ്യുമെങ്കിൽ സഹാറ മരുഭൂമിയിൽ പോയി ഞാൻ പ്രേതത്തെ വെല്ലു വിളിച്ചാൽ മതിയാരുന്നല്ലോ…. ആഫ്രിക്കയുടെ കുടിവെള്ള പ്രശനം തീരുമായിരുന്നു…
ഓർത്തിട്ടു തന്നെ എനിക്കു ചിരി വന്നു… ഉറക്കം മാത്രം പിന്നെ വന്നില്ലാ, വെറുതെ കട്ടിലിൽ കിടന്നു നേരം വെളുപ്പിച്ചു… രാവിലെ എഴുന്നേറ്റു അടുക്കളയിലൊന്ന് വെറുതെ പോയി നോക്കി, ഉഷാമ്മയോട് ഒരു കട്ടൻ ചോദിക്കാനായിരുന്നു അതിന്റെ ഉദ്ദേശം… അടുക്കളയിൽ മീര മാത്രമേ ഉണ്ടായിരുന്നൊള്ളു… ഇന്നലത്തെ കാര്യങ്ങൾ ഓർമ്മ വന്നപ്പോൾ പിന്നെ അവളോടിന്നു തന്നെ മിണ്ടാൻ ചെല്ലണ്ട എന്ന് തോന്നി..