എനിക്കവളുടെ മറുപടികേട്ട് പൊളിഞ്ഞു.
“” ദേ… കുടുംബക്കാരെപ്പറഞ്ഞാലുണ്ടല്ലോ….!! “”
അവളെനിക്ക് നേരെ വിരൽ ചൂണ്ടി പല്ല് കടിച്ചു.
“” പിന്നേ…!! നിന്നെ കൊല്ലൂന്ന് പറഞ്ഞേനല്ലേടി നീയീ ചിക്കനിലെരുവിട്ട് കലക്കിയെന്നെ കിടത്താന്നോക്കിയത്…!! “”
അവളോടുള്ള അമർഷം മുഴുവനുമെന്റെയാ മറുപടിയിൽ ഉണ്ടായിരുന്നു.
“” എരുവോ…! “”
ഒരു സംശയംപോലെ ചോദിച്ചിട്ടവള് ചിക്കനിൽ വിരലുമുക്കി നാക്കിൽ പുരട്ടിനോക്കി.
ചുമച്ചുപോയി അവൾ.
ആ നിമിഷമവൾടെ മുഖത്തേക്കിരച്ചെത്തിയ
ദയനീയഭാവം കണ്ടപ്പോ അവളെ കാലേവാരി നിലത്തടിക്കാൻ തോന്നിപ്പോയി എനിക്ക്.!!
“” നീ ഭാവാഭിനയമൊന്നും കാണിക്കേണ്ട…. നിന്നെവിശ്വസിച്ചുപോയതാ ഞാൻ ചെയ്തുപോയ തെറ്റ്…!! “”
“” എടാ… സത്യായിട്ടും ഞാനറിഞ്ഞോണ്ടല്ല…!! അളവൊക്കെ കൃത്യമായിട്ടാ ഓരോ പൊടിയും ഞാൻ ചേർത്തെ… ഇതെന്താ പറ്റിയേന്ന് ഒരുപിടീമില്ല…!! “”
അവളുടെ വിശദീകരണത്തിന് ചെവികൊടുക്കാതെ ഞാനെണീറ്റ് ഫ്രിഡ്ജിനടുത്തേക്ക് ചെന്നു. തണുത്തവെള്ളം കുറച്ചെടുത്ത് കുടിച്ചു. ഇപ്പഴും ആ പുകച്ചിലങ്ങടങ്ങിയിട്ടില്ല.
കോപ്പ്…! ഏത് നേരത്താണാവോ അവളോട്‌ ഉണ്ടാക്കിക്കോളാൻ പറയാൻതോന്നിയത്..!
ഒരു കഷ്ണം ചിക്കൻ കഴിച്ചപ്പോഴേക്കും വയറിങ്ങനെ പുകയണമെങ്കിൽ എന്തോരം സ്‌പൈസ് അവളതിൽ ഇട്ട് കാണണം…!!
കുറേ നേരം അങ്ങോട്ടുമിങ്ങോട്ടും നടന്നു. അപ്പോഴൊക്കെ താടക വിശദീകരണം തന്നോണ്ടിരിക്കുകയായിരുന്നു എങ്കിലും ഞാനത് കേട്ടതായിപ്പോലും ഭാവിച്ചില്ല.
പുകച്ചിലിന് ഒരു കുറവും ഇല്ല എന്നായപ്പോൾ ഞാൻ ജിൻസിയെ വിളിച്ചു.
“” ഡീ… നീയെപ്പഴാ വരുന്നേ…!! “”
“” ഞാനിറങ്ങാൻ നിക്കുവാടാ…! ഇന്നത്തെ കഴിഞ്ഞു…! എന്നതാ?! “”
“” ആഹ് അത് നന്നായി… നീയെന്നാ വരുമ്പോ വയറുപുകച്ചിലിനുള്ള മരുന്നെന്തേലും വാങ്ങിക്കാവോ…! “”
“” ഏഹ്… അതിപ്പോ നിനക്കെന്നാത്തിനാ…! “”
“” ഒക്കെ വന്നിട്ട് പറയാ… നീ ഒന്ന് വേഗം വാ…!! “”
കാൾ കട്ട്‌ ചെയ്ത് തിരിയുമ്പോ താടക ഞാൻ പറയണത് ഒക്കെ കേട്ട് എന്റെ പുറകിൽ ഉണ്ടായിരുന്നു.
അവളെയൊന്ന് തറപ്പിച്ച് നോക്കി ഞാൻ റൂമിലേക്ക് ചെന്നു.
അതിനകത്ത് കിടന്നുരുണ്ട് ഒരു സമയമായപ്പോൾ ജിൻസി കേറിവന്നു.
അവളുടെ കയ്യിൽ ഉണ്ടായിരുന്ന ടാബ്ലറ്റും വാങ്ങിക്കഴിച്ച് ഞാൻ കുറച്ച് വെള്ളം കുടിച്ചു.
“” എന്നതാന്ന് പറയെടാ…!! വെറുതേ ആളെ ടെൻഷൻ ആക്കാനായിട്ട് “”
“” അത് ചിക്കൻ കഴിച്ചിട്ട് പറ്റിയതാ… എന്നോട് പകരമ്മീട്ടാൻ അവളതിൽ ഇവിടുണ്ടായിരുന്ന പറങ്കിപ്പൊടി മൊത്തമെടുത്ത് കമിഴ്ത്തീന്ന് തോന്നണു…. ഹൊ.. എന്തൊരെരുവ്…!! “”
“” എന്റീശോയേ…!! ഇവിടുള്ളത് എക്സ്ട്രാ സ്‌പൈസി പൊടിയാ…! അതവൾക്കറിയാമ്മേലെ…!! നീയിങ്ങ് വന്നേ…! “”
അവളെന്നേം വലിച്ച് തടകയുടെ അടുത്തേക്ക് കൊണ്ടുപോയി. ആൾടെ മുഖത്ത് നേരത്തേ ഉണ്ടായിരുന്ന സന്തോഷമൊന്നും ഇപ്പോഴില്ല. ആകെയൊരു ശോകമൂകം.!
“” അഭീ…! ഇവനിപ്പറയണേ ഒക്കെ നേരാന്നോ…!! “”
ജിൻസി താടകയോടായി ചോദിച്ചപ്പോ അവളെന്നെയൊന്ന് നോക്കി.
“” അവനെന്താ പറഞ്ഞേന്ന് എനിക്കറിയാമ്മേല…! പക്ഷേ ഞാനത് അറിഞ്ഞോണ്ട് ചെയ്തെയല്ല. മസാലയൊക്കെ ഞാൻ കൃത്യായ്ട്ട ചേർത്തെ… എന്നിട്ടുമെങ്ങനെ ഇങ്ങനായീന്ന് എനിക്കറിഞ്ഞൂടാ…!! “”
താടകയുടെ മറുപടിയിലെ ആത്മാർഥത തിരിച്ചറിഞ്ഞെങ്കിലും അതങ്ങ് സമ്മതിച്ചുകൊടുക്കാൻ തോന്നിയില്ല.
“” നീ വല്യ സത്യാവതിയൊന്നുമാവാന്നോക്കല്ലേ….!! നിന്റെയഭിനയമൊന്നുമെന്റടുത്ത് നടക്കൂല…! “”
ഇത്രൊക്കെ പറഞ്ഞിട്ടുമൊന്നും എന്റെ തലേക്കേറീലാന്ന് കണ്ടതുമവളുടെ വിധമ്മാറി.
“” എങ്കി നീ കരുതിയപോലത്തന്നെ…. ഇതൊക്കെ ഞാമ്മനപ്പൂർവം ചെയ്തയാ… വിഷം കലക്കിത്തരാനായിരുന്നു പ്ലാൻ…നീനോക്കി നിന്നോണ്ടത് പറ്റാത്തേന്റെ വിഷമമിങ്ങനെ തീർത്തതാ…!!. ഇനിയൊരു ചാൻസ് കിട്ടിയാ ഞാനതൊരിക്കലും മിസ്സെയ്യൂല…!! അല്ലേലും നീയൊക്കെ ചാവണത് തന്നെയാ എല്ലാർക്കും നല്ലത്””
താടകയെനിക്ക് നേരെ ചീറിയതും ഞാൻ നിന്നുരുകിപ്പോയി.ശെരിക്കുമതായിരുന്നോ അവളുടെ പ്ലാൻ…!!. ഇനിയിവളുണ്ടാക്കുന്നയൊന്നും തൊട്ട് പോലും നോക്കൂലാന്ന് ഞാനപ്പൊത്തന്നെ തീരുമാനിച്ചു. ജീവൻ വച്ച് കളിക്കാനൊന്നും അല്ലേലുമെന്നേ കിട്ടൂല…!!
ഒന്നെന്നെ കലിപ്പിച്ച് നോക്കീട്ട് അവളകത്തേക്കു കേറിപ്പോയി. ജിൻസിയാവട്ടെ ഇതൊക്കെ കേട്ട് തലക്ക് കയ്യും വച്ചിട്ടവിടെയിരുന്നുപോയി.എന്നിട്ടവളെന്നെയൊന്ന് നോക്കി.
‘എന്നാടാ നീയൊക്കെ നന്നാവണേ..!!’
എന്നൊരു ധ്വനി ആ നോട്ടത്തിലുണ്ടായിരുന്നു.
“” ഡീ… എന്തേലും വാങ്ങിച്ചോണ്ട് വരുവോ…! വിശക്കണു. “”
എന്നാലവളൊന്നും മിണ്ടാണ്ട് എണീറ്റ് അടുക്കളയിലേക്ക് പോയി. എന്നിട്ടവൾ അവിടുണ്ടായിരുന്ന ചിക്കനൊന്ന് ടേസ്റ്റ് ചെയ്തു നോക്കി.
നന്നായിട്ടൊന്ന് എരുവ് വലിച്ചവളെന്നെ നോക്കി ഇളിച്ചുകാണിച്ചു. ഇത്രേം എരുവുണ്ടാവൂന്ന് അവള് കരുതിക്കാണൂല.!
അവള് അതിലേക്ക് കുറച്ച് വിനാഗിരിയും രണ്ട് ചെറുനാരങ്ങയുടെ നീരും ചേർത്തു. എന്നിട്ടതൊന്ന് നല്ലപോലെ മിക്സ്‌ ചെയ്തിട്ട് കുറച്ചെടുത്ത് എനിക്ക് നേരെ നീട്ടി.
“” പോടീ… എനിക്കൊന്നും വേണ്ട… അല്ലേലെ പുകഞ്ഞ് നിക്കുവാ..!! “”
“” ഇപ്പൊ എരുവൊന്നും കാണൂലട… അതിനുള്ള പണിയല്ലേ ഞാനിപ്പോ ചെയ്തേ…! “”
അവളത്രേം കോൺഫിഡൻസിൽ പറഞ്ഞോണ്ട് മാത്രം ഞാനാ സാഹസത്തിനു മുതിർന്നു.
ഞാനതൊന്ന് ടേസ്റ്റ് ചെയ്ത് നോക്കി. ഇപ്പൊ മുന്നേയുണ്ടായിരുന്ന പോലുള്ള അൻസൈക്കബിൾ എരുവൊന്നുമില്ല. ഞാൻ ജിൻസിയെ നോക്കിയൊരു തമ്പ്സപ്പ് കാണിച്ചു.
എന്നെനോക്കിയൊന്ന് ചിരിച്ചിട്ട് അവള് താടകയുടെ അടുത്തൊട്ട് പോയി.
ഞാൻ കഴിക്കാനിരുന്നു. നല്ലപോലെ വിശന്നിരുന്നു. കഴിച്ചേതാണ്ട് പകുതിയായപ്പോഴാണ് ജിൻസിയും താടകയും തിരിച്ചുവന്നത്.
“” നിനക്കൊന്ന് ഞങ്ങളെ കാത്തിരുന്നാ എന്നാന്നെ…? “”
ഞാൻ കഴിക്കണത് കണ്ട് ജിൻസിയെന്നോട് തിരക്കി.
“” ഓഹ് പിന്നേ…! വിശന്ന് കുടല്കരിഞ്ഞമണമടിക്കുമ്പോ ഞാന്നിന്നേം നോക്കിയിവിടെയിരിക്കാം…! ഒന്ന് പൊയ്ക്കേടി… “
ജിൻസിയെ ഒന്ന് തളർത്തി ഞാൻ പോളിംഗ് പുനരാരംഭിച്ചു.
അതിന് തടകയൊന്ന് ചിരിച്ചോ…! ഹേയ് തോന്നിയതാവും.
“” വിശന്നിട്ട് തന്നാണോ കരിഞ്ഞേ… ഇവള്ണ്ടാക്കിയ ചിക്കൻ കഴിച്ചിട്ടല്ലല്ലോ ലേ…?! “”
നൈസ് ആയ്ട്ട് തടകക്കിട്ടൊന്ന് കൊട്ടിയുള്ള ജിൻസീടെ മറുപടികേട്ട് ഞാൻ ചിരിച്ചുപോയി.! അത് കണ്ട് എന്നേം ജിൻസിയേം കലിപ്പിച്ച് നോക്കീട്ടെണീറ്റ് പോവാന്നിന്ന താടകയെ ജിൻസിയവിടെപ്പിടിച്ചിരുത്തി.
“” എന്തോന്നാടി…! ഇതൊക്കെയൊരു തമാശയായിട്ട് എടുത്താപ്പോരെ…!! അല്ലേലും നീയത് അറിഞ്ഞോണ്ട് ചെയ്തതല്ലല്ലോ… നീയിത് കഴിച്ചെയങ്ങോട്ട്…””
ജിൻസി നിർബന്ധിച്ചപ്പോൾ അവളിരുന്ന് കഴിച്ചെങ്കിലും ഒന്നും മിണ്ടിയില്ല.
