സെറ്റിയിൽ ഇരിക്കുമ്പോൾ ദേവിക ചേച്ചിയുടെ ഒപ്പം ഇറങ്ങി വന്നു. നേരത്തെ താലത്തിൽ വച്ച നീല പട്ടു സാരി ആണ് ഉടുത്തിരുന്നത്. നല്ല ചേർച്ച. ഇവൾക്ക് സ്വർണത്തിന്റെ നിറം ആണ്. വട്ട മുഖം, നീണ്ട കണ്ണുകൾ, നിതംബത്തിനു താഴെ കിടക്കുന്ന കാർകൂന്തൽ.. കഴുത്തിൽ കുറെ മാലകളും കാതിൽ വലിയൊരു ജിമ്മുക്കിയും ഉണ്ട്. നെറ്റിയിൽ ചുവന്ന പൊട്ടും സിന്ദൂരവും.
കയ്യിൽ നിറയെ വളകൾ..
ഇവൾക്ക് ഇത്ര ഭംഗി ഉണ്ടായിരുന്നോ? അല്ലെങ്കിലും പെൺപിള്ളേരെ അധികം ശ്രദിക്കാറില്ലായിരുന്നു… എന്താകുമോ എന്തോ..
അപ്പോഴേക്കും പള്ളിയിൽ നിന്ന് അച്ചനും കമ്മിറ്റി അംഗങ്ങളും വന്നു. ആംഗ്ലിക്കൻ ചർച് ആയതുകൊണ്ട് ഇവർക്ക് ഇതൊന്നും ഒരു പുത്തരി അല്ല.
ആരോ പറഞ്ഞു നാളെ കൊണ്ടുപോയി രജിസ്റ്റർ ചെയ്യിക്കാം.. അയാളുടെ ക്ലാസ്സ്‌മേറ്റ് ആണ് രെജിസ്റ്റാർ എന്നും, സാധാരണ 30 ദിവസം നോട്ടീസ് പതിക്കണം എന്നോ… ആ.. എന്തോ ആവട്ടെ..
അച്ചൻ പ്രാർത്ഥിച്ചു ആശീർവദിച്ചു പോയി.. ഒരു ദിവസം റിസപ്ഷൻ വെക്കണം. ഒരു ചടങ്ങു കഴിഞ്ഞതുകൊണ്ടു ഇനി പള്ളിയിൽ വെച്ച് നടത്തണം എന്നില്ല എന്നും പറഞ്ഞു.
അങ്ങിനെ എല്ലാവരും പോയി.. രണ്ടുമൂന്നു ആന്റിമാർ മാത്രം നിന്നു. പിന്നെ ചേട്ടനും ചേച്ചിയും പിള്ളേരും.
രാത്രി ഭക്ഷണം കഴിച്ചു.. പെണ്ണുങ്ങൾ പിന്നെ ഇരുന്നോളാം എന്ന് പറഞ്ഞതുകൊണ്ട് ഞാൻ കഴിച്ചു. ഫുഡ് പുറത്തു നിന്ന് വരുത്തിയതാണ്.
ഭക്ഷണം കഴിഞ്ഞു അച്ഛൻ എന്നെ വിളിച്ചു..
പുറത്തു കൊണ്ട് പോയി “ഡാ കുഴപ്പം ഒന്നും ഇല്ലല്ലോ?” എന്ന് ചോദിച്ചു…
“ഇല്ല…” എന്ന് ഒറ്റവാക്കിൽ ഞാൻ മറുപടി കൊടുത്തു.
“നീ അവളെ വിഷമിപ്പിക്കരുത്… കേട്ടോ?”
“ഉം…” എന്ന് ഞാൻ മൂളി..
“എന്ന പോയി കിടന്നോ…” എന്ന് പറഞ്ഞു അച്ഛൻ ഒരു സിഗരറ്റു കത്തിച്ചു.
ഞാൻ അകത്തേക്ക് ചെന്നു “കിടന്നോടാ..” എന്ന് ചേച്ചി പറഞ്ഞു.
ഞാൻ ആരോടും പറയാതെ മുകളിലേക്ക് നടന്നു..
റൂം തുറന്നു അകത്തു കയറി.. റൂമൊക്കെ ചെറുതായി അലങ്കരിച്ചിരിക്കുന്നു. ചേച്ചി ആയിരിക്കും.. എന്തിന്റെ സൂക്കേടാണാവോ എന്ന് ഞാൻ മനസ്സിൽ ആലോചിച്ചു ബാത്റൂമിലേക്കു ചെന്ന് കുളിച്ചു ഡ്രസ്സ് മാറി. സാധാരണ ഒരു ട്രാക്ക് പാന്റും ബനിയനും ഇട്ടു.
എന്നിട്ടു മൊബൈൽ എടുത്തു ബെഡിലേക്കു ചാരി.. ബെഡിൽ റോസാ പൂവിന്റെ ഇതൾ ഒക്കെ ഇട്ടിരിക്കുന്നു..
മൊബൈൽ നോക്കി.. ആരൊക്കെയോ അറിഞ്ഞിരിക്കുന്നു. കുറെ മെസ്സേജുകൾ.. അതൊന്നും നോക്കാൻ ഒരു മൂഡ് തോന്നിയില്ല.
പാദസ്വരത്തിന്റെ ശബ്ദം കേട്ടപ്പോൾ ഞാൻ വാതിൽക്കലേക്കു നോക്കി. സാരി ഒക്കെ മാറ്റി, ക്രീം കളർ സാരി ഉടുത്തു ഒരു താലത്തിൽ ഗ്ലാസിൽ പാലും ഒക്കെയായി ഇതാ നിൽക്കുന്നു ദേവിക… എന്റെ ഭാര്യാ!
അവൾ മടിച്ചു നിൽക്കുകയാണ്.. എനിക്കും എന്താ പറയേണ്ടത് എന്ന് അറിയുന്നില്ല.. അവൾ വന്നു താലം മേശയുടെ മുകളിൽ വച്ചു.. എന്നിട്ടു മെല്ലെ “എനിക്ക് അച്ഛനെ ഒന്ന് വിളിക്കണം..” എന്ന് പറഞ്ഞു.
ഞാൻ രാജേട്ടൻ എന്ന് സേവ് ചെയ്തിരുന്ന നമ്പർ എടുത്തു ഡയൽ ചെയ്തു.. ഒരു റിങ്ങിനു തന്നെ അവിടെ ഫോൺ എടുത്തു “എന്താ മോനെ??” പരിഭ്രാന്തനായ ശബ്ദം.
“രാജേട്ടാ.. ഒന്നുമില്ല.. അവൾക്കു ഒന്ന് സംസാരിക്കണം എന്ന്…” ഞാൻ അത് പറഞ്ഞു ഫോൺ ദേവികക്ക് കൊടുത്തു.
അവൾ ഫോൺ വാങ്ങി “അച്ഛാ… “ എന്ന് വിളിച്ചു… ഞാൻ എണീറ്റ് ബാല്കണിയിലെക്കുള്ള ഡോർ തുറന്നു പുറത്തേക്കു ഇറങ്ങി..
ആകാശത്തിൽ നിറയെ നക്ഷത്രങ്ങൾ.. അവളോട് എന്ത് പറയണം എന്ന് ഞാൻ ആലോചിച്ചു നോക്കി.. കുറച്ചു നേരം ചിന്തിച്ചു ശേഷം ഞാൻ അകത്തു കയറി.
അവൾ ബെഡിൽ ഇരിക്കുകയായിരുന്നു. എന്നെ കണ്ടതും അവൾ എണീറ്റു..
“ഇരിക്ക്…” എന്ന് പറഞ്ഞിട്ടു ഞാനും ബെഡിൽ ഇരുന്നു.. അവൾ മെല്ലെ ഇരുന്നു.
“അച്ഛൻ എങ്ങനെ ഉണ്ട്?”
“കുഴപ്പമില്ല.. ഇവിടെ ആയതുകൊണ്ട് സമാധാനം ഉണ്ടെന്നു പറഞ്ഞു…”
“അതാണ് ഞാനും പറയുന്നത്… നീയിപ്പോൾ ഈ വീട്ടിലെ ഒരു അംഗം ആണ്. ഒരിക്കലും പ്രതീക്ഷിക്കാത്ത കാര്യം ആണ് നടന്നത്. എന്നാലും നമ്മുടെ പരന്റ്സിനെ സങ്കടപെടുത്താൻ കഴിയില്ലല്ലോ…”
“ഉം…..”
“നീ പേടിക്കുകയൊന്നും വേണ്ട.. നമുക്ക് സമയം ഉണ്ട്.. അതുകൊണ്ടു സങ്കടപെടാതെ മോള് കിടന്നുറങ്ങാൻ നോക്ക്… എനിക്കും നല്ല തലവേദന ഉണ്ട്..”
“ഉം… ഏട്ടനും സങ്കടപെടരുത്.. ഞാൻ കാരണം..”
“എനിക്ക് സങ്കടം ഒന്നും ഇല്ല. “ എന്ന് ഞാൻ ചിരിച്ചുകൊണ്ട് പറഞ്ഞു. “ഇനി നീ ഇങ്ങനെ കുത്തി വീർപ്പിച്ചു ഇരിക്കണ്ട.. ഇനി എന്നെ ഇഷ്ടമല്ലെങ്കിൽ അതും നമുക്ക് ഭാവിയിൽ ശരിയാക്കാം.. ഇപ്പൊ കിടന്നോളു…”
അവൾ എന്റെ മുഖത്തേക്ക് ഒന്ന് നോക്കി…
ഞാൻ കൂടുതൽ ഒന്നും പറയാതെ ബെഡിന്റെ ഒരു സൈഡിൽ കിടന്നു…നല്ല തലവേദന ഉണ്ടായിരുന്നത് കൊണ്ട് ഞാൻ ഉറങ്ങിപ്പോയി.
***
ആരോ എന്നെ തൊട്ടപ്പോൾ ഞാൻ കണ്ണ് തുറന്നു നോക്കി.. നേരം നന്നായി വെളുത്തു.. ഇപ്പുറ വശത്തേക്ക് തിരിഞ്ഞു നോക്കിയപ്പോൾ.. ദേവിക.. ഒരു കയ്യിൽ ഒരു കാപ്പി കപ്പും പിടിച്ചു നിൽക്കുന്നു. ഒരു നേരിയ പുഞ്ചിരി ഉണ്ട് അവളുടെ മുഖത്തു..
സെറ്റ് സാരി ആണ് ഉടുത്തിരുന്നത്. നല്ല ഭംഗി…
ഞാൻ എന്തോ ആലോചിച്ചു “ഗുഡ് മോർണിംഗ്..” എന്ന് പറഞ്ഞു കാപ്പി വാങ്ങി..
“ഗുഡ് മോർണിംഗ് ഏട്ടാ.. വേഗം റെഡി ആകാൻ പറഞ്ഞു. രജിസ്റ്റർ ചെയ്യാൻ പോകണം എന്ന്…” അതും പറഞ്ഞു അവൾ ഒന്ന് പുഞ്ചിരിച്ചു…
അത് എന്നിൽ ശരിക്കും സമാധാനം ഉണ്ടാക്കി.. ഇന്നലെ കരഞ്ഞുകൊണ്ട് ഇരുന്നവർ പുഞ്ചിരിക്കുന്നു.. രാത്രിയിൽ ഞാൻ പ്രാക്ടിക്കൽ ആയി ചിന്തിച്ചതുപോലെ അവൾ ചിന്തിച്ചിരിക്കാം..
“ഞാൻ വരാം…” എന്ന് അവളോട് പറഞ്ഞപ്പോൾ അവൾ റൂമിനു പുറത്തേക്കു പോയി.
ചേച്ചി ആയിരിക്കാം, വെള്ള ഷർട്ടും മുണ്ടും മേശയിൽ വെച്ചിട്ടുണ്ടായിരുന്നു. ഞാൻ കുളിച്ചു ഒരുങ്ങി അത് എടുത്തിട്ട് താഴ്ത്തേക്കു ചെന്നു.
കുറച്ചു പേര് ഞങ്ങളുടെ ഒപ്പം വന്നു. രെജിസ്റ്ററിൽ ഒപ്പു വച്ച് മാല വീണ്ടും ഇട്ടു. അങ്ങിനെ ഒരു ചടങ്ങു കൂടി കഴിഞ്ഞു. കാറിൽ കയറിയപ്പോൾ അവൾക്കു ഒന്ന് അമ്പലത്തിൽ പോകണം എന്ന് പറഞ്ഞു.
അമ്പലത്തിൽ കാറ് നിർത്താൻ പറഞ്ഞു ഞാനും അവളുടെ ഒപ്പം ഇറങ്ങി അമ്പലത്തിൽ തൊഴുതു വന്നു. എനിക്ക് എല്ലാ ദൈവങ്ങളെയും ഇഷ്ടമാണ്. അതെല്ലാവർക്കും അറിയാം. അത് കല്യാണം നടത്തിയ ശാന്തിക്ക് നന്നായി അറിയാം. അതായിരിക്കാം അദ്ദേഹം എന്റെ പേര് പറഞ്ഞത്..
അവൾ “ഏട്ടാ…” എന്ന് മെല്ലെ വിളിച്ചപ്പോൾ ഞാൻ നിന്ന് അവളുടെ മുഖത്തേക്ക് നോക്കി.. അവൾ കുറച്ചു ചന്ദനം എന്റെ നെറ്റിയിൽ തൊട്ടു തന്നു.. എനിക്ക് വിശ്വസിക്കാൻ ആയില്ല… പിന്നെ ഒന്ന് ചിരിച്ചു ഞങ്ങൾ കാറിന്റെ അടുത്ത് ചെന്നു.. അവൾ ചന്ദനം തൊട്ടു തന്ന കാഴ്ച കണ്ടു ഏട്ടനും ചേച്ചിയും ചിരിക്കുന്നുണ്ടായിരുന്നു..
