അകത്ത് കയറി ഇരുന്നെങ്കിലും നിമിഷയെ എന്ത് പറഞ്ഞു ആശ്വസിപ്പിക്കണമെന്ന് അറിയാതെ ഞാൻ വാക്കുകൾ ആലോചിച്ചു നിന്നു….
ഞാൻ ഒന്നും മിണ്ടാതെ ഇരിക്കുന്നത് കണ്ടിട്ടാകണം നിമിഷ തന്നെ സംസാരിച്ചു തുടങ്ങി ….
ലക്ഷ്മി ചേച്ചിയ്ക്ക് എന്താ ചേട്ടാ പറ്റിയത് ?
നിമിഷയുടെ കാര്യമോർത്ത് സങ്കടപ്പെട്ട് നിൽക്കുന്ന എന്നെ വീണ്ടും സങ്കടത്തിൽ ആഴ്ത്തുവാൻ പോന്ന ചോദ്യമായിരുന്നു അത്…..
നിമിഷ ചോദിച്ചതിന്റെ ഉത്തരം ഇന്നും എനിക്ക് അറിയില്ല…. അതിനു ശേഷം ലക്ഷ്മിയെ ഒന്ന് കണ്ടിട്ട് പോലും ഇല്ലാ… ഒന്ന് സംസാരിച്ചിട്ട് പോലും ഇല്ലാ….
ഞങ്ങൾ അറിയാത്ത എന്തെങ്കിലും പ്രശ്നം ഉണ്ടായോ നിങ്ങൾ തമ്മിൽ ? നിമിഷ വീണ്ടും ചോദിച്ചു
ഇല്ലെടോ….
അവൾക്ക് എന്താ സംഭവിച്ചതെന്ന് എനിക്ക് ഇപ്പോളും അറിയില്ല… അതിനു ശേഷം എന്നെ ഒന്ന് വിളിച്ചു കൂടെയില്ല അവൾ….
ലക്ഷ്‌മിയുടെ കാര്യം ഓർത്തതും ഞാൻ ചെറുതായി ഡെസ്പ് ആകാൻ തുടങ്ങി….
അഞ്ചാറ് വർഷങ്ങൾ കഴിഞ്ഞിരിക്കുന്നു ഇപ്പോളും ആ നീറ്റൽ മനസ്സിൽ അതുപോലെ തന്നെയുണ്ട്….
ചേട്ടാ…. ആലോചിച്ചു ഇരുന്നിരുന്ന എന്നെ നിമിഷ വിളിച്ചു ഉണർത്തി
സോറി ചേട്ടാ… വിഷമിപ്പിക്കാൻ ചോദിച്ചതല്ല….. അതും പറഞ്ഞുകൊണ്ട് നിമിഷ എന്റെ അടുത്തേക്ക് വന്ന് ഇരുന്നുകൊണ്ട് എന്റെ കയ്യിൽ പിടിച്ചു
അപ്പോളാണ് ഞാൻ ശ്രദ്ധിച്ചത് എന്റെ കണ്ണിൽ നിന്നും ഒരു പൊടി കണ്ണുനീർ പൊടിഞ്ഞിരിക്കുന്നത്…..
നിമിഷയുടെ കയ്യിൽ നിന്നും എന്റെ കൈ വലിച്ചു കൊണ്ട് കണ്ണ് ഒന്ന് തുടച്ചു…..
ഒരു മിനിറ്റ് രണ്ടാളും മൗനമായി ഇരുന്നു.. അതിനു ശേഷം ഞാൻ സംസാരിച്ചു തുടങ്ങി
നമ്മളൊക്കെ ആഗ്രഹിച്ചതും സ്വപ്നം കണ്ടതും ആയ ജീവിതം ആയിരിക്കില്ലാഡോ നമുക്ക് കിട്ടുക….
അതേ ഞാൻ ആഗ്രഹിച്ചതല്ല എനിക്ക് കിട്ടിയത്…. നിമിഷ പെട്ടെന്ന് പറഞ്ഞു നിർത്തി….
അവൾ ശരിക്കും എന്താണ് ഉദശിച്ചതെന്ന് എനിക്ക് അപ്പോൾ മനസിലായില്ല….
അതേ…. ഞാൻ പറഞ്ഞു
ലക്ഷ്മി ചേച്ചി ഇല്ലായിരുന്നെങ്കിൽ ചിലപ്പോ നമ്മൾ ഒന്നായിട്ടുണ്ടായേനേ അല്ലേ……. എന്റെ തോളിലേക്ക് കൈ വച്ചുകൊണ്ട് നിമിഷ പറഞ്ഞു…
നിമിഷയുടെ ആ ചോദ്യം കേട്ട് ഞാൻ ഒന്ന് ഞെട്ടി…..
ചേട്ടന് എന്നെ ഇഷ്ട്ടമായിരുന്നില്ലേ ? ഞാൻ എന്തെങ്കിലും പറയുന്നതിനും മുൻപേ നിമിഷയുടെ അടുത്ത ചോദ്യം എത്തി
കുറെ നാൾ നിമിഷയോട് അങ്ങിനെയൊക്കെ ഉണ്ടായിരുന്നെങ്കിലും… നിമിഷയും വിപിനും പ്രണയിച്ചു തുടങ്ങിയതിൽ പിന്നെ ആ ചിന്തയൊന്നും മനസ്സിൽ ഉണ്ടായിരുന്നില്ല….. അവരുടെ കല്യാണവും കഴിഞ്ഞതോടെ അങ്ങിനെയുള്ള ചിന്ത പാടെ മാറിയിരുന്നു…. ഇന്നിപ്പോൾ നിമിഷ എന്റെ കൂട്ടുകാരന്റെ ഭാര്യയാണ്…..
അങ്ങിനെയുള്ള ചിന്തയൊന്നും പാടില്ല…. എന്റെ മനസ് മന്ത്രിച്ചു……
നിമിഷേ…… അവളുടെ കൈ തട്ടി മാറ്റിക്കൊണ്ട് ഞാൻ എഴുന്നേറ്റു….
എന്റെ റിയാക്ഷൻ കണ്ട് തല കുമ്പിട്ട് ഇരിക്കുകയാണ് നിമിഷ….
ഇനിയൊരു സംസാരത്തിനു ഇടനൽക്കാതെ ഞാൻ നടന്നു…. നിമിഷയോട് ഒരു വാക്ക് പോലും പറയാതെ എന്റെ ഫ്ലാറ്റിലേക്ക് നടന്നു….
നിമിഷ എന്റെ മനസിലേക്ക് തീ കോരിയിട്ടത് പോലെയാണ് എനിക്ക് തോന്നിയത്……
ആ സംസാരം കുറച്ചുകൂടെ നീണ്ടു പോയിരുന്നെങ്കിൽ അരുതാത്തത് സംഭവിച്ചേനേ…..
അവൾ ഒരു നല്ല പെൺകുട്ടിയാണ്.. വിപിനുമായുള്ള ഇപ്പോളത്തെ ഈ പ്രശ്നങ്ങൾ കൊണ്ട് ആകും ഇങ്ങനെയൊക്കെ തോന്നിയത്…..
ഫ്ലാറ്റിൽ എത്തി വെള്ളം ചേർക്കാതെ രണ്ട് പെഗ് എടുത്തു അടിച്ചു….. മനസിന്റെ നിയന്ത്രണം കള്ള് ഏറ്റെടുത്തപ്പോളാണ് ഒരു സമാധാനം വീണത്…..
നിമിഷ പറഞ്ഞതിനെ കുറിച്ച് വീണ്ടും മനസിലേക്ക് വന്നു…..
ലക്ഷ്മി ഇല്ലായിരുന്നെങ്കിൽ ചിലപ്പോൾ ഞാൻ നിമിഷയെ സ്നേഹിച്ചേനെ….. നിമിഷയെ കണ്ടമാത്രയിൽ തന്നെ മനസിലേക്ക് കടന്ന് കൂടിയിരുന്നു അവളുടെ മുഖം…..
അന്നത്തെ ആ കുട്ടിത്തം തുളുമ്പുന്ന മുഖത്തിനു മാറ്റങ്ങൾ സംഭവിച്ചിരിക്കുന്നു എങ്കിലും….. അവളെ പരിചയപ്പെട്ടപ്പോൾ അവളുടെ സ്വഭാവം മനസിലാക്കിയപ്പോൾ ആ ഇഷ്ടം കൂടുന്നേ ഉണ്ടായിരുന്നുള്ളു….
എനിക്ക് പ്രേമം ഉണ്ടെന്ന് അറിഞ്ഞപ്പോൾ നിമിഷയുടെ മുഖത്ത് വന്ന ഞെട്ടൽ…..
വിപിനുവേണ്ടി നിമിഷയോട് ചാറ്റ് ചെയ്തിരുന്നതും ഉമ്മ ചോദിച്ചതും…..
വിപിൻ അവളെ കെട്ടിപിടിച്ചു ഉമ്മ വെക്കുന്നത് കണ്ട ദിവസം എന്റെ മനസ്സിൽ തോന്നിയ വിങ്ങൽ…..
അങ്ങിനെ ഓരോരോ കാര്യങ്ങൾ മനസിലേക്ക് കടന്ന് വന്നു….
അതേ എന്റെ പെണ്ണ് ആകേണ്ടവൾ ആയിരുന്നു…..
ഇന്നിപ്പോൾ മറ്റൊരു രീതിയിൽ അവൾ ആ കാര്യം തിരിച്ചു അവതരിപ്പിച്ചിരിക്കുന്നു…..
വേണ്ട…. വിപിന്റെ ഭാര്യയാണ്…. ഉറ്റ സുഹൃത്തിന്റെ ഭാര്യ….
കള്ളിന്റെ ശക്തി കൂടിയതും എന്തൊക്കെയോ ആലോചിച്ചു ഉറങ്ങി പോയി…..
പിറ്റേന്ന് എഴുന്നേറ്റപ്പോൾ ഇന്നലെ നടന്നതൊക്കെ ഒരു സ്വപ്നമാണോ എന്ന് തോന്നി….
ഫോൺ എടുത്തു നോക്കിയപ്പോൾ അതിൽ നിമിഷയുടെ മെസ്സേജ് വന്ന് കിടക്കുന്നു
സോറി ചേട്ടാ….
കുറച്ചുനാൾ ഞാൻ ചേട്ടനെ മനസ്സിൽ കൊണ്ട് നടന്നിരുന്നു…..
ചേട്ടന്റെ നോട്ടത്തിലും പെരുമാറ്റത്തിലും ചേട്ടന് എന്നെ ഇഷ്ടമാണെന്ന് തോന്നിയിരുന്നു…..
സോറി
രാത്രിയെപ്പോളോ അയച്ച മെസ്സേജ് ആണ്….
അതിനു മറുപടി കൊടുക്കാൻ നിന്നില്ല….
അന്നൊരു ഞായറാഴ്ച ആയിരുന്നെങ്കിലും നിമിഷയുടെ ഫ്ളാറ്റിലേക് പോകുകയോ വിളിക്കനോ നിന്നില്ല….
പിറ്റേ ദിവസം മുതൽ ജോലിയുടെ തിരക്കിലേക്ക് ഇറങ്ങി….
വെള്ളിയാഴ്ച രാത്രി നാട്ടിലേക്ക് പോയ വിപിൻ തിരിച്ച് വരുന്നത് ബുധനാഴ്ച രാവിലെയാണ്…..
അവനോട് ആ പെണ്ണിന്റെ കാര്യം സംസാരിക്കണമെന്ന് തന്നെ ഞാൻ ഉറപ്പിച്ചു….
ബുധനാഴ്ച രാത്രി തന്നെ ഞാൻ അവനെ വിളിച്ചു ഒന്ന് കാണണമെന്ന് പറഞ്ഞു…..
നിമിഷയെ ഫേസ് ചെയ്യാനുള്ള മടി കാരണം ഞാൻ അവനെ എന്റെ ഫ്ലാറ്റിലേക്ക് വിളിച്ചു….
അവൻ സാധാരണ പോലെയാണ് പെരുമാറിയത്….
ഡാ….. നീ എന്തിനാ ഇങ്ങനെ എപ്പോളും നാട്ടിൽ പോകുന്നത്…. ഞാൻ ചോദിച്ചു
എന്തേ ? അവന്റെ പേർസണൽ കാര്യങ്ങളിൽ ഇടപെടുന്ന ഒരു അന്യനോട് എന്നപോലെ അവൻ ചോദിച്ചു….
നീ മറ്റു പെണ്ണുങ്ങളുടെ കൂടെ കിടക്കുകയോ പിടിക്കുകയോ എന്ത് വേണമെങ്കിലും ആയിക്കോ പക്ഷെ അവർക്കൊന്നും സ്വന്തം ഭാര്യയ്ക്ക് മുകളിൽ ഉള്ള സ്ഥാനം കൊടുക്കരുത്…..
ഓ അവളെല്ലാം വന്ന് പറഞ്ഞോ ? അവൻ പുച്ഛത്തോടെ ചോദിച്ചു
എടാ നിങ്ങളുടെ കല്യാണം നടത്താൻ ഞാൻ കൂടെ കാരണം അല്ലേ…. അത് കൊണ്ട് പറഞ്ഞതാ നിമിഷ…..
നീ എല്ലാ കാര്യവും എന്നോട് പറയുന്നതല്ലേ… പക്ഷേ ഈ കാര്യം മാത്രം എന്താ എന്നോട് പറയാതിരുന്നത്…. ഞാൻ ചോദിച്ചു
നിന്നോട് പറഞ്ഞാൽ നീ സമ്മതിക്കില്ലെന്ന് അറിയാം…. അത്കൊണ്ട്….
നിന്നെ ഇത്രയേറെ സ്നേഹിച്ചു ഇറങ്ങി വന്ന പെണ്ണല്ലേടാ നിമിഷ…. അവളെ ചതിക്കാൻ പാടുണ്ടോ ?
