“ആ… ആ ഇലെക്ട്രിക്കൽ എന്ന് കാണുന്നത് വായിച്ചിട്ടില്ല.. അതൊക്കെ പഠിക്കാൻ ഉള്ളതാ… ബാക്കി ഒക്കെ വായിച്ചതാ….”
അവൾ എണീറ്റ് ചെന്ന് ഷെൽഫിലൂടെ ഒന്ന് കണ്ണോടിച്ചു…
” മാധവിക്കുട്ടി ആണോ ഇഷ്ടപ്പെട്ട എഴുത്തുകാരി?? ” അവൾ ചോദിച്ചു.
” ആ.. ആയിരുന്നു. ഇപ്പൊ അല്ല. ”
” അതെന്തേ…?? ”
” പണ്ട് കോളേജ് ഫൈനൽ ഇയർ ആയപ്പോ ഒരു തേപ്പ് കിട്ടിയിരുന്നു… അങ്ങനെ അതിന്റെ സങ്കടത്തിൽ വായിച്ചു തുടങ്ങിയതാ അവരുടെ കഥകൾ. ഫുൾ നഷ്ടപ്രണയവും പ്രേമവും ഒക്കെ ആണ് അതിൽ… പിന്നെ പിന്നെ എല്ലാം വായിച്ചു കഴിഞ്ഞപ്പോഴും പണ്ടത്തെ തേപ്പിന്റെ സങ്കടം അതിനേക്കാ ഇന്റെൻസിറ്റിയിൽ ഉണ്ട്.. അതോടെ മനസ്സിലായി ഇമ്മാതിരി അവസ്ഥയിൽ വായിക്കാൻ പറ്റിയതല്ല അവരുടെ കഥകൾ എന്ന്..”
ഏതോ ഒരു ബുക്ക് അവൾ എടുത്തിരുന്നു.. അത് അതെ പോലെ പതുക്കെ ഷെൽഫിലേക്ക് വെച്ച് അവൾ അടുത്തത് എടുത്തു.
” നഷ്ടപ്പെട്ട നീലാംബരി ആണോ എടുത്തത്?? “, ഞാൻ ചെറിയൊരു ചിരിയോടെ ചോദിച്ചു..
” ആ…”, പിശാചിന്റെ മുഖത്തും ചെറിയൊരു ചിരി ഒക്കെ..
” ഇതോ?? “, വേറൊരു ബുക്ക് എടുത്ത് അവൾ ചോദിച്ചു.’ ഖസാക്കിന്റെ ഇതിഹാസം.’
” അത് സൂപ്പർ ആണ്… പക്ഷെ വായിച്ചവർ ഒക്കെ ഇത്തിരി പാടാ മനസ്സിലാക്കാൻ എന്നാ പറഞ്ഞത്. ”
പിശാചിന്റെ കയ്യിൽ നിന്നും അതും ഷെൽഫിലേക്ക്…
” അല്ല തനിക്ക് ഏത് ടൈപ്പ് ആണ് വേണ്ടത്?? എൻ്റെ കയ്യിൽ അതിനും മാത്രം ബുക്ക് ഒന്നുല്ല.. ”
” അങ്ങനെ ഒന്നുമില്ല… ഏതേലും..കുറേ കാലം ആയി വേറെ എന്തെങ്കിലും ബുക്ക് ഒക്കെ വായിച്ചിട്ട്… ”
” തേപ്പ് കിട്ടി നിക്കാണോ?? “, ഞാൻ ചിരിച്ചോണ്ട് ചോദിച്ചു.
പിശാച് ഒന്നും മിണ്ടാതെ എന്റെ മുഖത്തോട്ട് തുറിച്ചു നോക്കി…
” അല്ല… തന്റെ നോട്ടവും ഭാവവും കണ്ടപ്പോ ചോദിച്ചെന്നെ ഉള്ളൂ… ഇഷ്ടല്ലേൽ പറയണ്ട ”
” എന്നെ കണ്ടാൽ അങ്ങനെ പറയുമോ?? ” അവൾ എന്റെ മുഖത്തോട്ട് നോക്കി ചോദിച്ചു.
” ആ..പറയും. അതല്ലേ ഞാൻ ചോദിച്ചേ… ”
” മ്… ”
” എന്താ സംഭവം… പറയാൻ പറ്റുന്നതാണേൽ പറ.. എനിക്ക് ഇങ്ങനത്തെ കാര്യത്തിൽ തന്നെക്കാൾ എക്സ്പീരിയൻസ് ഉണ്ട്…”
” ഏയ്.. ഒരാൾ ഉണ്ടാർന്നു… പിന്നെ അത് പോയി.. ”
ആ… അതാണ്.. പിശാചിന് ആദ്യായിട്ട് തേപ്പ് കിട്ടിയതിന്റെ സങ്കടം ആണ്.. അതാണ് ഇത് പോലെ കിളി പോയി നടക്കുന്നത്.
” ആരാ…? കോളേജിൽ ഉള്ളതാണോ? ”
” അല്ല…”
“പിന്നേ… സ്‌കൂൾ?? ”
” മ്..മ്..”
” പിന്നെ ഇപ്പൊ എവിടാ… നാട്ടിലോ?? ”
” മ്….”
‘ നാട്ടിൽ ഇവളെ തേക്കാൻ മാത്രം ഊള ആരാടാ…?? സ്വഭാവം കച്ചറ ആണെന്നല്ല ഉള്ളൂ… കൊച്ചു സുന്ദരി ആണല്ലോ ‘, മനഃസ്സാക്ഷി തെണ്ടി എത്തി…
” അതിപ്പോ ആരാ…?? “, ഞാൻ ചോദിച്ചു.
” നിങ്ങൾക്ക് അറിയാവുന്ന ആളാ…”
” എനിക്കോ… അതാരാ??” എന്റെ ഫ്രണ്ട്‌സ് ലിസ്റ്റ് ഒന്ന് സ്കാൻ ചെയ്തു നോക്കി.. ഏയ്.. ഇല്ല. എന്റെ ഫ്രണ്ട്‌സ് ആർക്കും ഇവളെ അങ്ങനെ അറിയില്ല. പിന്നെ ഇവിടെ നാട്ടിൽ എനിക്കാകെ കുറച്ചു പേരെ കമ്പനി ആയിട്ടുള്ളൂ… അതിൽ ആരാ??
” നോ ഐഡിയ… താൻ തന്നെ പറ…” ഞാൻ കൈമലർത്തി.
” ആരോടെങ്കിലും പറയുമോ?? “, അവൾ എന്നെ നോക്കി…
” ഇല്ല.. പ്രോമിസ്.. പറ “, ഞാൻ ഇത്തിരി സന്തോഷത്തോടെ പറഞ്ഞു. അല്ലെങ്കിലും ഇങ്ങനത്തെ സീക്രെട്സ് ഒക്കെ കേൾക്കാൻ എനിക്ക് നല്ല ഇന്റെരെസ്റ്റ് ആണ്.
” ഇന്നാർടെ കല്യാണാ?? ”
ഞാൻ ഒന്നാലോചിച്ചു… ഓർമ വരുന്നില്ലലോ.. അല്ലെങ്കിലും വീട്ടിലെ കാര്യങ്ങൾ ഒക്കെ ഞാൻ അങ്ങനെ ശ്രെദ്ധിക്കാറില്ല.
” അറിയില്ല… എനിക്ക് പോവാൻ പറ്റാത്തത് കൊണ്ട് ഞാൻ നോക്കിയില്ല… ” ഞാൻ സത്യം പറഞ്ഞു.
” അല്ല…താൻ ആ ഷെൽഫ് ചാരി നിക്കാതെ ഇവിടെ വന്നിരി.. എന്നിട്ട് പറ… ” ഞാൻ ബെഡ് ചൂണ്ടി പറഞ്ഞു.
അവൾ ബെഡിൽ വന്നിരുന്നു.. ഒരു കാൽ മറ്റേ കാലിന്റെ മുട്ടിലേക്ക് കേറ്റി വെച്ച് ഞാൻ കാലിൽ വെക്കുന്ന തലയിണ എടുത്ത് മടിയിൽ വെച്ചു.
” നിങ്ങൾടെ വീട്ടിൽ ഇന്റീരിയറിന്റെ പണിക്ക് വന്നില്ലേ… അവന്റെ കല്യാണം ആണിന്നു… ”
” ആർടെ…?? വിനോദിന്റെയോ?? ” എനിക്ക് ആശ്ചര്യം ആയി.
”മ്..”
ശെരി ആണ്.. അന്നൊരു ദിവസം ഞായറാഴ്ച ഞാൻ പുറത്തോട്ട് ഇറങ്ങുമ്പോ അവന്റെ ബുള്ളറ്റ് ഞങ്ങളുടെ വീട്ടിലേക്ക് തിരിയുന്നത് ഞാൻ കണ്ടിരുന്നു.. കല്യാണം വിളിക്കാൻ വന്നതാവും.
“അതിനു..? ” എനിക്കൊന്നും മനസിലായില്ല… വിനോദിന്റെ കല്യാണവും ഇവളുടെ തേപ്പും തമ്മിൽ എന്താ ബന്ധം??
” അവനാണ് ആൾ ” അവൾ പതുക്കെ പറഞ്ഞു….
” ഏഹ്… ശെരിക്കും?? ” ഞാൻ ഇത്തിരി ഞെട്ടി… സംഭവം വിനോദ് ഭയങ്കര മാന്യൻ ആണ്, ഞങ്ങളുടെ നാട്ടിലെ പരോപകാരി.. ക്ലബ് പ്രവർത്തങ്ങളും ഒക്കെ ഉണ്ട്..
എല്ലാർക്കും ഭയങ്കര ഇഷ്ടം ആണ്.. എന്നേക്കാൾ രണ്ടോ മൂന്നോ വയസ്സ് കൂടും. ജിമ്മൻ ആണ്.. ഇന്റീരിയർ ഡിസൈനിങ്ങും ചെറിയ കുറച്ചു സിവിൽ കോൺട്രാക്ട് വർക്കും ഒക്കെ ആയി നാട്ടിൽ തന്നെ..അത്യാവശ്യം പൈസ ഒക്കെ ഉണ്ട്…കഴിഞ്ഞ മാസം എന്തോ കാര് മാറ്റി ഒരു എക്സ്.യു.വി. എടുത്തിരുന്നു… അപ്പൊ അത് കല്യാണത്തിന്റെ ഭാഗം ആയിട്ടാവും..അല്ല… അങ്ങനെ എല്ലാർക്കും ഇഷ്ടം ഉള്ള ഒരാൾ ഇവളെ തേക്കാൻ എന്താ…?? രണ്ടാൾടെ വീട്ടിൽ പറഞ്ഞാലും വലിയ സീൻ ഒന്നും കാണില്ല.. ഇവിടെ അടുത്ത് തന്നെ ആണ് അവന്റെ വീടും. പിന്നെ തേക്കാൻ ആയിട്ട് അവൻ ലൈൻ അടിക്കുമെന്നു എനിക്ക് തോന്നുന്നും ഇല്ല.
” ഇതെന്ന്…?? ആർക്കും അറിയില്ലേ ഇത്?? ”
” ഇല്ല… പഠിത്തം കഴിഞ്ഞിട്ട് പറയാമെന്നു വെച്ചു. ”
” അല്ല.. അതെന്താ… നിങ്ങൾ ബ്രേക്ക് അപ്പ് ആവാൻ?? ”
” ഞാൻ എം.എസ്.സിക്ക് പോയത് അവനു ഇഷ്ടം ആയില്ല… എന്നോട് പോവണ്ടാന്ന് പറഞ്ഞു.. ഞാൻ കേട്ടില്ല… ”
ആഹാ.. അടിപൊളി… പിശാചിന് പഠിക്കണം എന്ന് പറഞ്ഞപ്പോ അവൻ .കേട്ടില്ല. അങ്ങനെ ബ്രേക്ക് അപ്പ് ആയി, വേറെ കെട്ടി.. അതാണ് കാര്യം. അവൻ എന്തോ ഡിഗ്രി പകുതിക്ക് വെച്ച് നിർത്തി പണിക്കിറങ്ങിയതാണ്.
ഇപ്പൊ കാര്യങ്ങൾ ഒക്കെ പിടികിട്ടി.. പണ്ടത്തെ കാമുകന്റെ കല്യാണം ആണിന്നു… അതിന്റെ ഹാങ്ങോവറിൽ ആണ് പിശാച്.. എനിക്ക് മനസിലാക്കാം… ഞാനും ഇത് കഴിഞ്ഞ വര്ഷം അനുഭവിച്ചതാണ്.. ബിടെക്കിൽ പൊട്ടിയ ലൈൻ കഴിഞ്ഞ വർഷം വേറൊരുത്തനെ കെട്ടി.. അത് എഫ്.ബിയിൽ കണ്ട ഞാൻ അന്ന് രാത്രി വീട്ടിൽ വന്നു പട്ടിയെ പോലെ മോങ്ങിയിരുന്നു.
” മ്… ഇനിയിപ്പോ അതൊന്നും പറഞ്ഞിട്ട് കാര്യം ഇല്ലല്ലോ… കല്യാണോം കഴിഞ്ഞു അവർ ഫുഡ് കഴിക്കാൻ തുടങ്ങിക്കാണും…” പറഞ്ഞിട്ട് പിശാചിനെ ഒന്ന് നോക്കി… കണ്ണൊക്കെ നിറഞ്ഞിട്ടുണ്ട്… നല്ല ഭംഗി ആ മുഖത്തെ സങ്കടം കാണാൻ…
“നീയെന്ത് സാഡിസ്റ്റ് ആണെടാ… ” മനസ്സാക്ഷി ചോദിക്കുന്നു….
” അല്ല… നിങ്ങൾ തമ്മിൽ ഇഷ്ടം മാത്രല്ലേ ഉണ്ടായിരുന്നുള്ളൂ… അല്ലാതെ വേറൊന്നും??”
അയ്യോ… കയ്യീന്ന് പോയി… പിശാചിന്റെ മുഖം മാറി ആ ഉണ്ടക്കണ്ണു കൊണ്ട് എന്നെ ദഹിപ്പിക്കുന്ന ഒരു നോട്ടം നോക്കി….
