ഏതായാലും ഞങ്ങൾ 2 ഗ്രൂപ്പ് ആയി തിരിഞ്ഞു, മുകളിലും താഴെയും ക്ലാസ് കുറവാണ്.. ലാബും സ്റ്റാഫ് റൂം ഒക്കെ ആണ് കൂടുതൽ. ഫസ്റ്റ് ഫ്ലോറിൽ ആണ് ക്ലാസ്റൂമുകൾ കൂടുതൽ. ശ്രീ എന്നെയും കൂട്ടി മുകളിലെ നിലയിൽ ചെന്നു..കൂടെ മുദ്രാവാക്യം വിളിച്ചു കൊണ്ട് കുറച്ചു പിള്ളേരും.. ശ്രീ ആണ് മുന്നിൽ നിന്ന് വിളിക്കുന്നത്. എനിക്ക് നാണക്കേട് തോന്നി.. ആദ്യം ആയാണ് ഇങ്ങനെ ഒക്കെ. ബി.ടെക്. പ്രൈവറ്റ് കോളേജ് ആയത് കൊണ്ട് അവിടെ പൊളിറ്റിക്സ് ഒന്നും ഉണ്ടായിരുന്നില്ല. എന്നാലും ശ്രീ എന്നെ ഇടക്കിടക്ക് നോക്കുന്നത് കൊണ്ട് അധികം ഉച്ചത്തിൽ അല്ലെങ്കിൽ കൂടി ഞാൻ അവരുടെ കൂടെ മുദ്രാവാക്യം വിളിക്കാൻ തുടങ്ങി. ഞങ്ങൾ കേറി വരുന്നത് കണ്ടിട്ടാണോ എന്തോ ചില ക്ലാസ്സിൽ നിന്നൊക്കെ അധ്യാപകർ ഇറങ്ങിപ്പോയി..
ചില ക്ലാസ്സിൽ നിന്നും പിള്ളേർ സ്വമേധയാ ഇറങ്ങി.. ചില ക്ലാസ്സിലേക്ക് കേറി ചെന്ന് അധ്യാപകരോട് കാര്യങ്ങൾ പറഞ്ഞു, പിന്നെ വിദ്യാർത്ഥികളോട് പറയാൻ ഉണ്ടായിരുന്നു. ശ്രീ ആണ് സംസാരിക്കുന്നത്.
അവൾ വിദ്യാർത്ഥികളോട് ഇന്നത്തെ സ്‌ട്രൈക്കിനെ കുറിച്ചും, അതിന്റെ കാരണത്തെ കുറിച്ചും ആവശ്യത്തെക്കുറിച്ചും ഒക്കെ സംസാരിക്കുന്നത് ക്ലാസ് മുറിയിലെ ചുമരിൽ ചാരി ഞാൻ അത്ഭുതത്തോടെ നോക്കി നിന്നു. വീട്ടിൽ വെച്ച് കാണുന്ന ആ മിണ്ടാപ്രാണി, ശബ്ദം ഇല്ലാതെ ചിരിക്കുന്ന ശ്രീ അല്ല ഇത്, ഓരോ വാക്കിലും തീപ്പൊരിയും ഊർജം നിറക്കുന്ന ഈണവും ശബ്ദവും ആയി ഒരു തീപ്പൊരി സഖാവ്. അവളുടെ ഡ്രസിങും കൈ ഉയർത്തി പ്രത്യേക ആക്ഷൻ ഇട്ട് ആവേശത്തോടെ സ്ട്രൈക്ക് വിളിക്കുന്നതും കേട്ട് സന്തോഷം കൊണ്ടോ അഭിമാനം കൊണ്ടോ എന്തൊക്കെയോ കൊണ്ട് ഞാനും മനസ്സ് കൊണ്ട് പാർട്ടിക്കാരൻ ആയി. ആ ക്ലാസ്സിൽ നിന്നും പുറത്തിറങ്ങിയപ്പോ എനിക്കവളെ ഒന്ന് കെട്ടിപിടിക്കണം എന്ന് തോന്നി.. പക്ഷെ അത്രക്ക് അങ്ങോട്ട് അടുപ്പം ആവാത്തത് കൊണ്ടും അവൾ എങ്ങനെ പ്രതികരിക്കുമെന്ന് അറിയാത്തത് കൊണ്ടും ഞാൻ അവളെ നോക്കി കിടുക്കി എന്ന് മുഖം കൊണ്ട് കാണിച്ചു. അവൾ ചിരിച്ചു കൊണ്ട് ഞങ്ങളെ വിളിച്ചു അടുത്ത ക്ലാസ്സിലേക്ക് നടന്നു. പോവുന്ന വഴിക്ക് ” എന്താ സഖാവെ.. സ്ട്രൈക്ക് വിളിക്കാൻ തോന്നുന്നുണ്ടോ” എന്ന് ചോദിച്ചു…
” മ്.. ഉണ്ട് ” എന്ന് പറഞ്ഞ ആ നിമിഷം…
അവൾ എന്നെ ഒന്നുകൂടി നോക്കി…
” ശെരിക്കും? ”
” മ്… ശെരിക്കും..പക്ഷെ എനിക്കിത് പരിചയം ഇല്ല. സപ്പോർട്ട് ചെയ്യണം. ”
” അത് പേടിക്കണ്ട… ഞാൻ കൂടെ ഉണ്ടാവും. ”
” അപ്പൊ സിനില്ല. ഞാൻ റെഡി !! ”
” എന്നാ വാ… അടുത്ത ക്ലാസ്സിൽ ഏട്ടൻ കേറിക്കോ… ”
ഞങ്ങൾ താഴേക്കുള്ള സ്റ്റെപ് ഇറങ്ങാൻ തുടങ്ങി.
ക്ലാസ്സിന്റെ വാതിൽക്കൽ എത്തി അകത്തേക്ക് നോക്കി… ആകെ 10-20 പേരെ ഉള്ളൂ… ഇതെന്താ ഇത്ര ചെറിയ ക്ലാസ്സ്..?? ചിലപ്പോ ബാക്കി ഉള്ളവർ സ്ട്രൈക്ക് വിളിക്കാൻ ഇറങ്ങിക്കാണും… ഞാൻ ഓർത്തു.
ക്ലാസ്സിൽ ഒരു സർ ആണ്.. 45 വയസ്സ് ഒക്കെ കാണും. ഇരുനിറം. ഷർട്ട് ഇൻ ചെയ്തിട്ടുണ്ട്. ബോർഡിൽ എന്തോ എഴുതിക്കൊണ്ടിക്കുകയാണ്. ഞങ്ങളെ കണ്ടതും ക്ലാസിൽ പിറുപിറുക്കൽ തുടങ്ങി. അത് കേട്ടുകൊണ്ടാണ് സാർ തിരിഞ്ഞത്. വാതിൽക്കൽ നിക്കുന്ന എന്നേം ശ്രീയേം ബാക്കി കൊടി പിടിച്ചിരിക്കുന്ന വിദ്യാർത്ഥികളെയും കണ്ടപ്പോൾ പുള്ളി ദേഷ്യത്തോടെ എന്താ വേണ്ടത് എന്ന് ചോദിച്ചു. ഞാൻ ഒന്നും മിണ്ടാതെ നിന്നു. ശ്രീ പതുക്കെ എന്റെ കയ്യിൽ പിടിച്ചു മുന്നോട്ട് നീക്കി നിർത്തിക്കൊണ്ട് പറയ്..പറയ് എന്ന് പറഞ്ഞു.
എന്റെ നാവിറങ്ങിപ്പോയി… നേരത്തെ മനസ്സിൽ തോന്നിയ ധൈര്യം ഒക്കെ ചോർന്നു പോയിട്ടുണ്ട്… കയ്യൊക്കെ ആകെ തണുത്തു മരവിച്ച പോലെ. എന്റെ കയ്യിൽ പിടിച്ച ശ്രീയെ ഞാൻ ദയനീയമായി ഒന്ന് നോക്കി…
”മ്.. പറ…”, അവൾ ശബ്ദം താഴ്തി എന്റെ ചെവിയിൽ മന്ത്രിച്ചു.
” അത് സാർ… സ്ട്രൈക്ക് വിളിക്കാൻ വന്നതാണ്…” ഞാൻ വിക്കി വിക്കി പറഞ്ഞൊപ്പിച്ചു.
” സ്ട്രൈക്കോ?? എന്ത് സ്ട്രൈക്ക് ?? നിങ്ങളാരാ സ്ട്രൈക്ക് വിളിക്കാൻ?? ”
സാർ ദേഷ്യത്തോടെ എന്നെ നോക്കി…
” ഏതായാലും നനഞ്ഞു… ഇനി കുളിച്ചു കേറിക്കോ… ഒന്നും നോക്കണ്ട, മുമ്പത്തെ ക്ലാസ്സിൽ ശ്രീ പറഞ്ഞ കാര്യങ്ങൾ ഒക്കെ ചേർത്ത് ഒരു ഡയലോഗ് അംഗ കാച്ചിക്കോ… “, മനസ്സ് പറഞ്ഞു…
” സാർ… ഇന്നലെ എതിർ പാർട്ടിക്കാർ കാരണം ഒന്നുമില്ലാതെ നമ്മുടെ തേഡ് ഇയർ റെപ്പിനെ തല്ലി.. അവനിപ്പോ പരിക്ക് പറ്റി ഹോസ്പിറ്റലിൽ അഡ്മിറ്റ് ആണ്.. അതിനു കാരണക്കാരായവർക്കെതിരെ നടപടി ഉണ്ടാവണം.. അതാവശ്യപ്പെട്ടാണ് സ്ട്രൈക്ക്.. ” ഞാൻ ഒറ്റ ശ്വാസത്തിൽ പറഞ്ഞുനിർത്തി.
സാർ എന്റെ മുഖത്തേക്ക് തന്നെ നോക്കി നിൽക്കുകയാണ്. ഞാനും നോട്ടം മാറ്റാൻ പോയില്ല.. പേടി ഉണ്ടങ്കിലും സാറിന്റെ കണ്ണിലേക്ക് തന്നെ നോക്കി നിന്നു.
” ശെരി… ഈ തേഡ് ഇയർ റെപ്പ് എന്ന് പറഞ്ഞാൽ ബി.ടെക്ക്.കാരുടെ റെപ്പ് അല്ലേ… അതിനു എം.ടെക്കുകാർ സമരത്തിന് ഇറങ്ങേണ്ട കാര്യം ഇല്ല. നിങ്ങൾ ബി.ടെക്കുകാരെ ഇറക്കിക്കോ… ” , പറഞ്ഞിട്ട് സാർ ക്ലാസ്സ് എടുക്കാനായി തിരിഞ്ഞു.
ഞാൻ എന്ത് ചെയ്യണം എന്നറിയാതെ ശ്രീയെ നോക്കി. അവൾ ഒന്നും മിണ്ടാതെ സാറിനെ നോക്കി നിൽക്കുകയാണ്. എന്താണ് അവളുടെ മനസ്സിൽ?? മുഖത്തു നിന്നും ഒന്നും വായിച്ചെടുക്കാൻ പറ്റുന്നില്ല.. പക്ഷെ പൊതുവെ കൂൾ ആയിട്ടുള്ള മുഖം ചുവന്നിട്ടുണ്ട്..
” അതെന്താ സാർ ഇവിടെ ബി.ടെക്ക് , എം.ടെക്ക് എന്നൊക്കെ ഒരു വേർതിരിവ്?? എല്ലാവരും ഈ കോളേജിലെ സ്റ്റുഡന്റസ് അല്ലെ…?? അല്ല.. അടികൊണ്ടത് ഞങ്ങളുടെ പാർട്ടിക്കാരും അടിച്ചത് സാറിന്റെ പാർട്ടിക്കാരും ആയതുകൊണ്ടാണോ ഇങ്ങനെ? അറിയാൻ പാടില്ലാത്തത് കൊണ്ട് ചോദിച്ചതാ….”
ശ്രീ എന്റെ മുന്നിലേക്ക് കേറി നിന്നുകൊണ്ട് പറഞ്ഞു..
സാർ ആദ്യം ഒന്നു പകച്ചെങ്കിലും പെട്ടെന്ന് അവളെ നോക്കി പറഞ്ഞു..
” വേർതിരിവ് ഒന്നും അല്ല.. പിന്നെ പാർട്ടിക്കാര്യം ഇതിനിടക്ക് പറയണ്ട. ഇവർ ഗവൺമെന്റിന്റെ കയ്യിൽ നിന്നും സ്റ്റൈപ്പന്റ് വാങ്ങി പഠിക്കുന്നവരാ… അവർക്ക് സമരം നടത്താൻ ഉള്ള അവകാശം ഒന്നുമില്ല..”
” അങ്ങനെ ആണെങ്കിൽ 2 മാസം മുമ്പ് ശമ്പളപരിഷ്കരണം എന്നും പറഞ്ഞു ഇതേ സർക്കാരിന്റെ ശമ്പളം വാങ്ങുന്ന സാർ ഒക്കെ തന്നെ അല്ലേ ഇവിടെ സമരം ചെയ്തത്?? ”
” അത്…ന്യായമായ ആവശ്യങ്ങൾക്കുള്ളതായിരുന്നു.. ഞാൻ പറഞ്ഞല്ലോ, നിങ്ങളുടെ റെപ്പിനെ തല്ലിയെങ്കിൽ നിങ്ങൾ സമരം വിളിച്ചോളൂ… ഇവർ ഇവിടെ പഠിക്കാൻ വന്നതാ… നിങ്ങളെ പോലെ അല്ല, അവർക്ക് റിസേർച് കൂടി ഉണ്ട്.. അത് കൊണ്ട് കോളേജിനെ മൊത്തത്തിൽ ബാധിക്കാത്ത കാര്യങ്ങൾക്ക് ഇവരെ ഇറക്കാൻ ഞാൻ സമ്മതിക്കില്ല.. ” സാർ വിട്ടുകൊടുക്കാൻ ഉള്ള ഭാവമില്ല.
