വാതിൽ തുറന്നപ്പോൾ കണ്ടത്, വീണയുടെ കരഞ്ഞു കലങ്ങിയ കണ്ണുകളും, ക്ഷീണിച്ച മുഖവും കണ്ട് ഹരിയുടെ നെഞ്ച് കലങ്ങി..
ഹരി അകത്തു കാല് എടുത്തു വച്ചതും , പേടിച്ചെന്ന പോലെ വീണ പിന്നിലോട്ട് മാറിയത് കൂടെ കണ്ടപ്പോൾ, ഹരി ശരിക്കും തളർന്നു.
ഹരി തല കുമ്പിട്ടു കൊണ്ട് പറഞ്ഞു : ചേച്ചി,, നാളെ മുതൽ ഞാൻ ഓഫീസിൽ ഉണ്ടാവില്ല.. അത് ഞാൻ തരുന്ന വാക്കാണ്.. എല്ലാറ്റിനും മാപ്പ്..
ഹരി തിരിയാൻ നിന്നതും, വീണ ചോദിച്ചു : എന്നിട്ട്, നീ എന്ത് ചെയ്യും..
ഹരി : എന്തെങ്കിലും പണി ചെയ്യും..
വീണ : ഹരീ,, അതിന്റെ ആവശ്യം ഒന്നുമില്ല.. നീ മാത്രം അല്ല തെറ്റുകാരൻ. ഞാൻ കൂടെ ആണ്. നാളെ ഞാൻ ഓഫീസിൽ വരുമ്പോൾ, നീയവിടെ ഉണ്ടാവണം..
ഹരി : ദേവൂന്…
വീണ : ചെറിയ പനി.. കുഴപ്പമില്ല,, ഇന്നലെ വെയിൽ കൊണ്ടതിന്റെ ആണ്..
ഹരി: മ്മ്..
ഹരി വീണക്ക് നേരെ ഒരു കവർ നീട്ടി… എന്നിട്ട് പറഞ്ഞു : ചേച്ചിടെ ബർത്ഡേ ഗിഫ്റ്റ് ആണ്… ഇത് എനിക്ക് കൊടുക്കാൻ വേറെ ആരും ഈ നഗരത്തിൽ ഇല്ല.. ചേച്ചിക്ക് ഇഷ്ടമായില്ലെങ്കിൽ എന്താണ് എന്ന് വച്ചാൽ ചെയ്തോളു..
ഹരി തിരിഞ്ഞു നടന്നു.. വീണക്കും പറയാൻ വാക്കുകൾ ഇല്ലായിരുന്നു..
പിറ്റേ ദിവസം, ഇന്ന് മാറ്റി വച്ച പിറന്നാൾ ആഘോഷത്തിൽ, ഏറ്റവും പിറകിലായെ ഹരി നിന്നുള്ളു. എല്ലാവരുടെയും മുന്നിൽ വച്ച്, ചേച്ചി എന്ന് വിളിച്ചപ്പോൾ, അല്ലാത്ത സമയത്ത് മാം എന്നാണ് ഹരി വീണയെ അഭിസംബോധന ചെയ്തത്.
ഓഫീസ് കാര്യത്തിനല്ലാതെ, മറ്റൊരു കാര്യത്തിന് പോലും, ഹരി വീണയുടെ അടുത്ത് പോയില്ല. വീണ ഉള്ള കൂട്ടത്തിൽ പോലും പോയില്ല എന്നുള്ളതാണ് ശരി..
ആദ്യം തോന്നിയിരുന്ന മനസ്സമാധാനം, പതിയെ പതിയെ നിരാശ ആയി മാറി വീണക്ക്. ഒഫീഷ്യൽ അല്ലാതെ, ഒരു മൈൻഡും ഹരി കാണിക്കാതായപ്പോൾ.
രാത്രി വളരെ നേരം സംസാരിച്ചിരുന്ന, തന്റെ ഒറ്റ പെട്ട ജീവിതത്തിൽ, സമാധാനമായി വന്നിരുന്ന ഹരി തനിക്കു ഇപ്പോൾ മെസ്സേജ് ചെയ്യാറില്ല, എന്തെങ്കിലും ചോദിച്ചാൽ അതിനു ഉത്തരം മാത്രം, തരും എന്നല്ലാതെ…
വീണ, ഹരിയുടെ ഇഷ്ടപ്രകാരം എടുത്ത ചുരിദാറുകളും, ഹരി വാങ്ങി തന്ന സാരിയും ഇട്ട് ഓഫീസിൽ വന്നു നോക്കി. എല്ലാവരും നല്ലത് പറഞ്ഞു. ഹരി ഒഴിച്ച്, അവൻ ഒന്നും മിണ്ടിയില്ല. വീണക്ക് മനസ്സിൽ സങ്കടം കൂടി കൊണ്ട് വന്നു.
” ദേവൂട്ടീടെ പിറന്നാളിന് എന്താ പരുപാടി “… ഓഫീസ് കഴിയാൻ നേരത്ത് ചോദ്യം വന്നു ഹരിയുടെ.
വീണ : എന്തേലും ചെറുതായി ചെയ്യണം, വീട്ടിൽ വച്ച് തന്നെ..
ഹരി : ക്ഷണം ഉണ്ടാവുമോ?..
വീണ : അതെന്തു ചോദ്യമാ ഹരീ..
ഹരി ഒന്ന് ആലോചിച്ച ശേഷം :കുറച്ച് ആഘോഷം ആക്കിക്കൂടെ..
വീണ : ആഗ്രഹം ഇല്ലാഞ്ഞിട്ടല്ല, ഇതിന്റെ പിറകെ നടക്കാൻ സമയവും ഇല്ല അറിയുകയും ഇല്ല.. പിന്നെ വലിയ ഹോട്ടലുകൾ ആണ് ഉള്ളത്, അത് ഒരുപാട് ചിലവല്ലേ..
ഹരി : ആദ്യം, ഗസ്റ്റുകളുടെ ഒരു ഏകദേശ കണക്ക് ഉണ്ടാക്ക്.. എന്നിട്ട് പറ..
വീണ : അങ്ങിനെ ചോദിച്ചാൽ..
ഹരി വീണയോട് അൽപം ചേർന്നിരുന്നു, തന്റെ ഡയറിയിൽ കുറിക്കാൻ തുടങ്ങി : ഈ ഓഫീസിൽ എത്ര പേർ..
ഫ്ലാറ്റിലെ എത്ര പേർ…….
പരിചയം ഉള്ളവർ, അതായത് വിളിക്കാൻ താല്പര്യം ഉള്ളവർ…….
ദേവൂന്റെ കൂട്ടുകാരുടെ പേരെന്റ്സ്…
ഏകദേശം കണക്ക് എടുത്ത ശേഷം ഹരി പറഞ്ഞു : ഞാൻ അന്വേഷിച്ഛ്, ഏകദേശ ബഡ്ജറ്റ് അടക്കം ഉണ്ടാക്കി പറയാം, ഓകെ ആണെങ്കിൽ, ചേച്ചി പറഞ്ഞാൽ മതി. ബാക്കി ഞാൻ നോക്കി കൊണ്ട്..
വീണ സമ്മതം മൂളി…
ഹരി ഒരുപാട് അലഞ്ഞിട്ടാണെങ്കിലും പിന്നീടുള്ള കുറച്ചു ദിവസങ്ങൾ കൊണ്ട്, റൂഫ് ടോപ് പാർട്ടി ഹാൾ കണ്ടത്തി, ഡിക്കറേഷനും, ഫുഡും എല്ലാം കൂടെ, ഏകദേശ കണക്ക് വീണയോട് ഹരി പറഞ്ഞു. വീണ കേട്ട താമസം, സമ്മതം മൂളി.
പിറന്നാളിന്റെ അന്ന്, ആയിഷയോട് കാര്യം പറഞ്ഞു തന്നെ ആണ് ഹരി ലീവ് എടുത്തത്. ഉച്ചമുതൽ ഹരി എല്ലാറ്റിനും ഓടി നടന്നു എല്ലാം സെറ്റ് ചെയ്തു.