ഒരു വർഷം കഴിഞ്ഞ് ലീവിന് വന്ന ശ്രീനിയും രാധികയും ആദ്യം പോയത് രാധികയുടെ വീട്ടിലേക്കാണ്.. അവരുടെ വരവ് പ്രതീക്ഷിച്ചിട്ടില്ലാത്ത സത്യഭാമ പൂർണമായും അയഞ്ഞില്ലെങ്കിലും രാധികയോട് അൽപം മയപ്പെട്ടു..എന്നാൽ ശ്രീനിയോട് പൊറുക്കാൻ അവൾക്കായില്ല..അവർ ലീവ് കഴിഞ്ഞ് പോവുന്നതിന് മുമ്പ് പലവട്ടം സത്യഭാമയെ കാണാൻ ചെന്നു.. ശ്രീനി നല്ലവനാണെന്ന് മനസിലായെങ്കിലും അവനോട് കൂടുതലടുക്കാൻ അവൾ തയ്യാറായില്ല..തന്നെ മാനം കെടുത്തിയ മകളോടും പൂർണമായി സത്യഭാമ ക്ഷമിച്ചില്ല..
മകളോട് പക പോക്കാനെന്ന മട്ടിൽ അവൾ മകൻ ഗോപിക്ക് വേണ്ടി കൊമ്പത്തെ വീട്ടിൽ നിന്നും ഒരു പെണ്ണുമായി കല്യാണമുറപ്പിച്ചു.. ഒരു സ്കൂൾ അധ്യാപനായ ഗോപി ഒരു പാവത്താനാണ്.. അമ്മ പറയുന്നതിനപ്പുറം അവനില്ല.. അമ്മ കെട്ടാൻ പറഞ്ഞ പെണ്ണിനെ അവൻ കെട്ടി..അളിയനും പെങ്ങളും അടുത്ത ലീവിന് വരുമ്പോ കല്യാണം നടത്തിയാ മതി എന്നൊരഭിപ്രായം ഗോപി പറഞ്ഞെങ്കിലും സത്യഭാമയത് സമ്മതിച്ചില്ല..അവർ വരുന്നതിന് മുമ്പ് തന്നെ അവൾ ആർഭാടമായി മകന്റെ കല്യാണം നടത്തി..
പക്ഷേ, കാര്യങ്ങൾ സത്യഭാമ വിചാരിച്ച പോലെ ആയില്ല.. കല്യാണം കഴിഞ്ഞ് ഒരാഴ്ച കഴിഞ്ഞപ്പോ തന്നെ മരുമകൾ രമ്യയുടെ വീട്ട്കാർ ഒരു വാടക വീട്ടിലേക്ക് മാറിത്താമസിച്ചു.. വിവരമറിഞ്ഞ സത്യഭാമ ഞെട്ടിപ്പോയി.. താൻ പറ്റിക്കപ്പെട്ടെന്നറിഞ്ഞ് അവൾക്ക് ഭ്രാന്തായി.. വലിയ ആഡംബരം നിറഞ്ഞ വീടും,മറ്റ് സൗകര്യങ്ങളും, സുന്ദരിയായ രമ്യയേയും കണ്ടതോടെ മറ്റൊന്നും അന്വോഷിച്ചില്ല..
രമ്യയുടെ അഛൻ ബിസിനസ് പൊട്ടിപ്പൊളിഞ്ഞ് വീട് വരെ വിറ്റ സമയത്താണ് സത്യഭാമ വിവാഹമന്വോഷിച്ച് ചെന്നത്..ആ വീട്ടിൽ വെച്ച് തന്നെ മകളുടെ വിവാഹം നടത്തണമെന്നാഗ്രഹിച്ച അവളുടെ അഛൻ, വീട് വാങ്ങിയവരോട് കാല് പിടിച്ചാണ് സമ്മതിപ്പിച്ചത്.. വിവാഹം കഴിഞ്ഞ് ഒരാഴ്ചക്കിടയിൽ തന്നെ അവരാ വീട്ടിൽ നിന്ന് ഇറങ്ങിക്കൊടുക്കുകയും ചെയ്തു..
ഇതറിഞ്ഞ സത്യഭാമ വെറുതെയിരുന്നില്ല.. പറഞ്ഞ സ്ത്രീധനം മുഴുവൻ കിട്ടിയതുമില്ല, ഇപ്പോ ആ വീടും കൂടി പോയി എന്നറിഞ്ഞതോടെ രമ്യക്ക് ഭർത്തൃഗ്രഹം നരകമായി..രണ്ട് മാസത്തിനകം അവൾ രമ്യയെ വീട്ടിൽ നിന്ന് പുകച്ച് പുറത്ത് ചാടിച്ചു.. ഗോപിക്ക് തടയാനൊന്നുമായില്ല.. സ്ത്രീധന ബാക്കി കിട്ടാത്തതും, രമ്യയുടെ വീട് വിറ്റതുമൊന്നും ഗോപിക്ക് പ്രശ്നമായില്ലെങ്കിലും അമ്മയെ എതിർക്കാൻ അവനായില്ല..
രണ്ട് ഭാഗത്ത് നിന്നും ബന്ധുക്കളൊക്കെ ഇടപെട്ട് ചർച്ച നടത്തിയെങ്കിലും ഈ ബന്ധം ഇനി മുന്നോട്ട് പോവില്ലെന്ന് സത്യഭാമ തീർത്ത് പറഞ്ഞു.. വിവരമറിഞ്ഞ് ഖത്തറിൽ നിന്നും രാധികയും ശ്രീനിയും മാറി മാറി സംസാരിച്ചെങ്കിലും സത്യഭാമ ഒത്തുതീർപ്പിന് തയ്യാറായില്ല..
നിനക്കൊരു ജോലിയില്ലേ, നീ രമ്യയേയും കൊണ്ട് ഒരു വാടക വീടെടുത്ത് മാറിത്താമസിക്ക് എന്ന് രാധിക അനിയനോട് പറഞ്ഞെങ്കിലും അമ്മയെ ധിക്കരിക്കാൻ അവനാവില്ലായിരുന്നു..
ഇപ്പോൾ രമ്യ സ്വന്തം വീട്ടിലേക്ക് പോയിട്ട് ഒരു വർഷമായി.. അവളെ ഉപേക്ഷിക്കാൻ അമ്മ പറഞ്ഞത് മാത്രം ഗോപി ഇത് വരെ അനുസരിച്ചിട്ടില്ല.. അതിനിടക്ക് ഖത്തറിലുണ്ടായ ഒരു തീ പിടുത്തത്തിൽ ശ്രീനി ജോലി ചെയ്ത സ്ഥാപനം കത്തുകയും, അവന്റെ പാസ്പോർട്ടടക്കം വിലപ്പെട്ട രേഖകളെല്ലാം നഷ്ടപ്പെടുകയും ചെയ്തു.. സ്ഥാപനം കത്തിയതോടെ ജോലി നഷ്ടപ്പെട്ട ശ്രീനി നാട്ടിലേക്ക് മടങ്ങി.. ഇനി തിരിച്ച് പോകണമെങ്കിൽ പുതിയൊരു ജോലിയും വേണം, പുതിയ പാസ്പോർട്ടും വേണം..അതിനുള്ള ഓട്ടത്തിലാണ് ശ്രീനി.. എത്ര ഓടിയിട്ടും രണ്ടാം പാസ്പോർട്ട് കിട്ടുക അത്ര എളുപ്പമല്ലായിരുന്നു.. അവനിപ്പോ നാട്ടിലെത്തിയിട്ട് എട്ട് മാസമായി.. രാധിക ഇപ്പഴും ഖത്തറിൽ തന്നെയാണ്..
അവൾ പറഞ്ഞതനുസരിച്ചാണ് ശ്രീനി, ഗോപിയുടേയും,രമ്യയുടേയും പ്രശ്നത്തിലിടപെട്ടത്..
Valare mikacha kadhayanu,ithu continue cheythu pokuka…. Othiri kalangalkku sesham aanu feel ulla oru kadha vaayichathu.