മനു പറഞ്ഞു.
” അവന് എന്ത് പറ്റി ? ”
ടീച്ചർ ചോദിച്ചു.
” ഇന്നലെ രാത്രി ആരാണ്ടൊക്കെയോ പിടിച്ചു തല്ലി. മോഷണ ശ്രമമാണെന്നാ പറയുന്നത് “
” എന്നിട്ട് അവനെന്തെങ്കിലും പറ്റിയോ ? ”
ടീച്ചർ ആശങ്കയോടെ ചോദിച്ചു.
” ചെറിയ പരിക്കുകളൊക്കെയുണ്ടെന്നാ പറഞ്ഞത്. എന്തായാലും ഞങ്ങള് ചെന്ന് നോക്കട്ടെ ”
” നിൽക്ക് ഞാനും വരാം ”
സോഫിയും അവരോടൊപ്പം ചെന്നു.
വിധുവിന്റെ വീടിന്റെ അരികിലെത്തിയപ്പോൾ അയൽവാസികൾ ഇറങ്ങിപോകുന്നത് കണ്ടു. അവനെ കാണാൻ വന്നവരായിരിക്കും. മൂന്ന് പേരും നടന്ന് വീട്ട് മുറ്റത്തെത്തി.
” ഞാൻ ഹൈ സ്കൂളിൽ വിധുവിനെ പഠിപ്പിച്ച ടീച്ചറാ ”
വിധുവിന്റെ അമ്മയ്ക്ക് സോഫി തന്നെ പരിചയപ്പെടുത്തി,
” ടീച്ചറെ എനിക്ക് അറിയാം. ഇപ്പൊ കുറെയായില്ലേ കണ്ടിട്ട് ”
വനജ പറഞ്ഞു.
” അതെ അതെ ”
സോഫി മറുപടി നൽകി.
” ആന്റി വിധുവിന് ഇപ്പൊ എങ്ങനെയുണ്ട് ? ”
മനു ചോദിച്ചു.
” നെറ്റിയിലും,കൈയ്യിലുമൊക്കെ ചെറിയ പൊട്ടലുണ്ട്..വേറെ കുഴപ്പങ്ങളൊന്നുമില്ല. ”
വനജ പറഞ്ഞു.
” പോലീസ് വന്നോ ? ”
ആൽഫി ചോദിച്ചു.
” അവര് രാവിലെ വന്ന് സ്റ്റൈറ്റ്മെന്റ് എടുത്ത് പോയി ”
ശേഷം വനജ അവരെയും കൊണ്ട് വിധുവിന്റെ മുറിയിലേക്ക് ചെന്നു.
” നിങ്ങൾ അവന്റെ അടുത്തേയ്ക്ക് ചെല്ല്. ഞാൻ അപ്പഴേക്കും ചായ എടുക്കാം ”
” എനിക്ക് ചായ വേണ്ട ചേച്ചി,ഒരു ഗ്ലാസ് ചൂട് വെള്ളം തന്നാ മതി.”
സോഫി പറഞ്ഞു.
” ശെരി ടീച്ചറെ ”
അതും പറഞ്ഞ് വനജ അടുക്കളയിലേക്ക് ചെന്നു.
അകത്ത് കട്ടിലിന്റെ തെക്ക് വശത്തെ തലയിണയിൽ അലസമായി തല ചായ്ച്ച് ഇരിക്കുകയാണ് വിധു.
സോഫി ടീച്ചറെ അവരുടെ കൂടെ കണ്ടപ്പോൾ അവനൊന്നു ഞെട്ടി. ഇവന്മാരെന്താ ടീച്ചറുടെ കൂടെ ? വിധു സംശയത്തിലായി. മുറിയിലേക്ക് കടന്ന സോഫി ടീച്ചർ, ബെഡിന്റെ അറ്റത്തായി ഇരുന്നു. ബാക്കി രണ്ടുപേരും കസേരകളിലും ഇരുന്നു.
” വിധു നിനക്കിപ്പൊ വേദനയൊക്കെ കുറവുണ്ടോ ? ”
സോഫി ചോദിച്ചു.
” കുറവുണ്ട് ടീച്ചർ.”
അവൻ സൗമ്യമായി മറുപടി നൽകി.
” സത്യത്തിൽ ഇന്നലെ രാത്രി നിനക്ക് എന്താ സംഭവിച്ചത് ? ”
ആൽഫി ചോദിച്ചു.
” ഇന്നലെ രാത്രി നടന്ന കാര്യങ്ങളെ കുറിച്ച് ഓർക്കുമ്പോൾ തന്നെ പേടിയാകുന്നു.”
” എന്താടാ സംഭവിച്ചത് ? ”
മനു ആകാംഷയോടെ ചോദിച്ചു.
” ഇന്നലെ വൈകുന്നേരം നിങ്ങളുമായി വഴക്കിട്ട് ഗ്രൗണ്ടിന്ന് പോയ എന്നെ കവലയിൽ എത്തുമ്പഴേക്കും ഒരു ജീപ്പിൽ മൂന്നാല് ആൾക്കാര് വന്ന് ബലം പ്രയോഗിച്ച് പിടിച്ച്,വലിച്ച് വണ്ടിയിൽ കയറ്റി. ശബ്ദം പുറത്ത് കേൾക്കാതിരിക്കാൻ വായിൽ തുണി തിരുകി പൊതിരെ തല്ലി. ഒടുവിൽ എങ്ങനെയൊക്കെയോ അവന്മാരെ തള്ളി മാറ്റി ഞാൻ ജീപ്പിൽനിന്ന് ഇറങ്ങിയോടി അടുത്തുള്ള കാട്ടിൽ പോയി ഒളിച്ചു. അപ്പോഴും അവന്മാര് എന്റെ പിന്നാലെതന്നെയുണ്ടായിരുന്നു. നേരം ഇരുട്ടുന്നത് വരെ ഞാൻ അവിടെ തന്നെ ഒളിച്ചിരുന്നു. ആ സമയത്തൊക്കെ നല്ല മഴയായിരുന്നു അവിടെ. മഴ ചെറുതായി തോർന്ന ശേഷം ചൂറ്റും നോക്കി അവന്മാര് അവിടം വിട്ട് പോയീന്ന് ഉറപ്പ് വന്ന ശേഷാ ഞാൻ കാട്ടീന്ന് പുറത്തു വന്നത്.”
വിധു കാര്യങ്ങളൊക്കെ വിശധികരിച്ചു. എല്ലാം കേട്ട് അവരാകെ ഞെട്ടി.
” ഭാഗ്യം, തലനാലിഴക്കാ നീ രക്ഷപെട്ടത്.”
മനു പറഞ്ഞു.
” എന്നാലും ആരാ അവരൊക്കെ ? എന്തിനാ നിന്നെ കടത്തികൊണ്ടുപോകാൻ ശ്രമിച്ചത് ? ”
സോഫി ചോദിച്ചു.
” അറിയില്ല ടീച്ചർ. പക്ഷെ ഒരു കാര്യം ഉറപ്പാ അവരൊന്നും ഇവിടുത്തുകാരല്ല. എറണാകുളം സ്ലാങ്ങിലാ സംസാരം മുഴുവൻ ”
” എറണാകുളം സ്ലാങ്ങോ ? ”
മനു അത്ഭുതത്തോടെ ചോദിച്ചു.
” അതെ ”
” ഇനി വല്ല അവയവ കടത്ത് സംഘം വല്ലതുമാണോ ? ”
ആൽഫി സംശയത്തോടെ ചോദിച്ചു.
” പോലീസിനും ഇത് തന്നെയാ സംശയം.”
വിധു പറഞ്ഞു.
” മുക്കിന് മുക്കിന് CCTVയുള്ള ഈ കാലത്ത് അവന്മാരെന്തായാലും രക്ഷപ്പെടില്ല ”
മനു പറഞ്ഞു.
ഈ സമയം സോഫി, വിധുവിന്റെ തലയിൽ പതിയെ തലോടി. ടീച്ചർക്ക് കുട്ടികളോട് തോന്നുന്ന വാത്സല്യം ആ തലോടലിൽ പ്രകടമായിരുന്നു.
” വിധു.. നീ നന്നായി റസ്റ്റ് എടുക്ക്. എല്ലാം ശെരിയായ ശേഷം മാത്രം പുറത്തോട്ടൊക്കെ ഇറങ്ങിയാൽ മതി. ഞാൻ ഇറങ്ങട്ടെ. സമയം കിട്ടുമ്പോ വിളിക്കാം. ”