മറുപടിയായി അവൻ തലയാട്ടി. അധികം താമസിയാതെ എല്ലാവരോടും യാത്ര പറഞ്ഞ ശേഷം ടീച്ചർ അവിടെനിന്ന് പോയി.
” ടീച്ചറെന്താ നിങ്ങടെ കൂടെ ? ”
വിധു സംശയത്തോടെ ചോദിച്ചു.
” ടീച്ചറെ ഇങ്ങോട്ട് വരുന്ന വഴിക്ക് കണ്ടതാ. നിന്റെ കാര്യം പറഞ്ഞപ്പോ കൂടെ പോന്നു.”
മനു പറഞ്ഞു.
അത് കേട്ടപ്പോൾ വിധുവിന് സമാധാനമായി.
” ഇവിടെ വന്നപ്പൊ മുതല് ഞങ്ങള് ശ്രദ്ധിക്കുന്നതാ സോഫി ടീച്ചർക്ക് നിന്റെ കാര്യത്തിൽ ഒരു പ്രേത്യേക താല്പര്യം.”
” പൂർവ്വ വിദ്യാർത്ഥിക്ക് അപകടം പറ്റിയാൽ കാണാൻ വരുന്നത് എല്ലാ ടീച്ചർമാരും ചെയ്യുന്നതല്ലേ ? അതിനെന്താ പ്രശ്നം..? ”
” അത് മാത്രമല്ല നിന്നോടുള്ള ടീച്ചറുടെ പെരുമാറ്റവും അത്ര പന്തിയല്ല.”
മനു പറഞ്ഞു.
” ഞാനും സോഫി ടീച്ചറും തമ്മിൽ അവിഹിതമുണ്ടെന്നല്ലേ നിങ്ങള് പറഞ്ഞുവരുന്നത് ? ”
” അതെ ഞങ്ങൾക്ക് ആ കാര്യത്തിൽ നല്ല സംശയമുണ്ട്. ”
മനു പറയുന്നതിലൊന്നും ഒരു കാര്യവും ഇല്ലെന്ന മട്ടിൽ വിധു പുച്ഛിച്ചു.
” നീ പുച്ഛിക്കുകയൊന്നും വേണ്ട. എനി ഈ കാര്യം പറഞ്ഞ് വഴക്കടിക്കാൻ ഞങ്ങൾക്ക് താല്പര്യമില്ല. സത്യം എന്താണെന്ന് വച്ചാ നീ പറ,ഞാനും ആൽഫിയും നിനക്ക് അന്യരോന്നും അല്ലല്ലോ ? കുട്ടിക്കാലം മുതൽക്കേയുള്ള നിന്റെ ബെസ്റ്റ് ഫ്രണ്ട്സല്ലേ.”
അവൻ പറഞ്ഞത് വിധുവിന് നന്നായി ഫീൽ ചെയ്തു. സത്യം തുറന്ന് പറയണോ,വേണ്ടയോ എന്ന ചിന്തകൾ അവന്റെ മനസ്സിൽ മിന്നി മറഞ്ഞു.
” വാടാ നമ്മക്ക് പോകാം ”
ആൽഫി മനുവോട് പറഞ്ഞു.
” എന്നാ ശെരി വിധു ഞങ്ങള് ഇറങ്ങാം. പരിക്കൊക്കെ മാറി നീ ഗ്രൗണ്ടിലോട്ട് വാ. “
അതും പറഞ്ഞുകൊണ്ട് മനുവും,ആൽഫിയും പോകാനൊരുങ്ങി.
” ഡാ പോവല്ലേ.”
വിധു അവരെ പിന്നീന്ന് വിളിച്ചു.
പാപ്പിയുടെ അനിയത്തി മോളിയുടെ കൂടെ അടുക്കള പണിയിൽ മുഴുകിയിരിക്കുകയാണ് ആനി.ഈ സമയം അമ്മച്ചി മറിയ അടുക്കളയിലേക്ക് കയറിവന്നു. രാവിലെ തിരക്ക് കൂടുന്നതിന് മുൻപ് സാധനം വാങ്ങിക്കാൻ റേഷൻ പീടികയിൽ പോയതാണ് അവർ.
” എടി മോളിക്കുട്ടി നിന്നോട് ഞാൻ പറഞ്ഞതല്ലേ ആനിയെ കൊണ്ട് പണിയൊന്നും ചെയ്യിക്കരുതെന്ന്.”
അമ്മച്ചി ഉറക്കെ പറഞ്ഞു.
” അയ്യോ അമ്മച്ചി മോളിക്കുട്ടിയെ വഴക്ക് പറയണ്ട.അവള് പറഞ്ഞതാ എന്നോട് പണിയൊക്കെ അവൾ ചെയ്തോളാംന്ന്. മുറിയില് വെറുതെയിരുന്ന് ബോറടിച്ചപ്പൊ അത് മാറ്റാൻ വേണ്ടി ചില്ലറ പണിയെടുത്തൂന്നെ ഉള്ള ഞാൻ..”
ആനി ചിരിച്ചുകൊണ്ട് പറഞ്ഞു.
” മോളെ ആനി… എനിക്കും,മോളിക്കുട്ടിക്കും ചെയ്യാനുള്ള പണിമാത്രേ ഇപ്പഴി വീട്ടിലുള്ളു. മോൾക്കിപ്പോ വേണ്ടത് നല്ല വിശ്രമാ. നിറവയറും കൊണ്ട് നീ അടുക്കള പണിയെടുക്കുന്നത് പാപ്പിയങ്ങാനും കണ്ടാൽ, പിന്നെ അത് മതി ഇവിടൊരു വഴക്ക് നടക്കാൻ.”
” അതെ ഏട്ടത്തി പാപ്പിച്ചായന് ഇതൊന്നും ഇഷ്ടാവില്ല. ഏട്ടത്തി മുറിയിൽ ചെന്നിരുന്നോ. അല്ലേൽ ഇതും പറഞ് ഇച്ചായൻ ഞങ്ങടെ മെക്കിട്ട് കയറും. ”
മോളിക്കുട്ട പറഞ്ഞു.
” ശെരി, എന്ന ഞാൻ മുറിയിലോട്ട് ചെല്ലാം.”
അമ്മച്ചിയോട് അങ്ങനെ പറഞ് മനസ്സിൽ പാപിയെ പ്രാകികൊണ്ട് ആനി മുറിയിലേക്ക് ചെന്നു.
ഈ സമയം കോളിംഗ് ബെൽ മുഴങ്ങി.
” പുറത്താരോ വന്നിട്ടുണ്ട്.”
മോളിക്കുട്ടി പറഞ്ഞു.
” നീ മീൻ കഴുകി വെക്ക് ഞാൻ പോയി ആരാന്ന് നോക്കീട്ട് വരാം.”
അതും പറഞ് അമ്മച്ചി ഉമ്മറത്തേയ്ക്ക് നടന്നു.
പുറത്ത് സാരിയുടുത്ത് ബാഗ് തോളിൽ തൂക്കിയ ഒരു സ്ത്രീയെ കണ്ടു. അമ്മച്ചിയെ കണ്ടയുടനെ അവൾ പുഞ്ചിരിച്ചു.
” നീ ഇവിടുള്ള സ്കൂളിലെ ടീച്ചറല്ലേ ? ”
ചെറിയൊരു സംശയത്തോടെ അമ്മച്ചി ചോദിച്ചു.
” അതെ.”
” ആനിയുടെ കൂട്ടുകാരിയാണല്ലേ ? എന്താ മോൾടെ പേര് ? “
” സോഫി.”
” മോള് അകത്തോട്ട് വാ ”
അമ്മച്ചി അവളെ അകത്തേയ്ക്ക് ക്ഷണിച്ചു.
” ആനി എവിടെ അമ്മച്ചി ? ”
” അവള് മുറിയിലുണ്ട് ഞാൻ വിളിക്കാം.”
അമ്മച്ചി സോഫിയെ കസേരയിൽ ഇരുത്തി ആനിയെ വിളിക്കാൻ ചെന്നു.
മുറിക്കകത്തിരുന്ന് ആരോഗ്യ മാസിക വായിക്കുകയാണ് ആനി. പെട്ടന്ന് അമ്മച്ചി കതകിന് തട്ടി.
” മോളെ ആനി കതക് തുറക്ക് നിന്റെ കൂട്ടുകാരി വന്നിട്ടുണ്ട്.”