: എന്നിട്ട് ഹരിയേട്ടൻ അയാളെ കണ്ടുപിടിച്ചോ….
: ഉം… അവിടെ നിന്നാണ് എന്റെ സംശയങ്ങൾ ബ്ലെസ്സിയിലേക്കും അവറാച്ചനിലേക്കും എത്തിയത്…
: ആരാണ് അയാൾ……
ഹരിയുടെ മനസിലുള്ള കാര്യങ്ങളൊക്കെ സ്വപ്നയോട് വിവരിച്ചപ്പോഴേക്കും സ്വപ്നയ്ക്ക് കാര്യങ്ങളുടെ ഏകദേശ ധാരണയായി. ഇതൊക്കെ കേട്ടുകഴിഞ്ഞപ്പോൾ ഹരിയേക്കാൾ ആവേശമാണ് സ്വപ്നയ്ക്ക്. ഒരാളെപ്പോലും വെറുതെ വിടരുതെന്നാണ് സ്വപ്നയുടെ പക്ഷം.
: ഹരിയേട്ടാ…. ഇന്നലെ അന്നാമ്മ വിളിച്ചിരുന്നു. ചുമ്മാ വിളിച്ചതാ. എന്നെ കമ്പനിയാക്കാനുള്ള പ്ലാനാണ്. സൂത്രത്തിൽ ഹരിയേട്ടനെക്കുറിച്ചും ഹരിയേട്ടന്റെ യാത്രകളെക്കുറിച്ചൊക്കെ ചോദിച്ചു…
: നീ ഒന്നും പറഞ്ഞില്ലല്ലോ അല്ലെ…
: ഇപ്പൊഴും വിശ്വാസമില്ല അല്ലെ ദുഷ്ടൻ….
: അത് കലക്കി… ഇപ്പോഴാ നീയെന്റെ പെണ്ണായത്… ഇതുപോലെ ഫ്രീയായിട്ട് സംസാരിക്കണം.
: അല്ല നമുക്ക് പോകണ്ടേ…
സ്വപ്നയുടെ കവിളിൽ ചെറുതായി ഒരു അടികൊടുത്ത് ഹരി വണ്ടിയെടുത്തു. ആദ്യമായി ഹരിയുടെ കൈ തനറെ കവിളിൽ സ്പർശിച്ചതിന്റെ കുളിരിൽ സ്വപ്ന നാണത്തോടെ ഹരിയെ നോക്കിയിരുന്നു. വണ്ടിയിൽ ശബ്ദം കുറച്ചുവച്ചിരിക്കുന്ന പ്രണയഗാനങ്ങളിൽ ലയിച്ചുകൊണ്ട് അവൾ ഓരോ കിനാവുകണ്ടുകൊണ്ട് യാത്ര തുടർന്നു. ദൂരങ്ങൾ താണ്ടുംതോറും സ്വപ്നയ്ക്കും ഹരിക്കുമിടയിലുള്ള അകലം കുറഞ്ഞുവന്നു. അവൾ മനസ്സറിഞ്ഞ് ഹരിയേട്ടാ എന്ന് വിളിക്കുന്നത് ഹരിയെ സന്തോഷിപ്പിച്ചു. ഏകദേശം രണ്ടുമണിയോടെ അവർ കണ്ണൂരിന്റെ ഹൃദയഭാഗത്തുകൂടി കടന്നുപോയി.
: ഹലോ മാഡം… ഇങ്ങനെ സ്വപ്നം കണ്ടുകൊണ്ട് ഇരുന്നാമതിയോ.. എന്തെങ്കിലും കഴിക്കണ്ടേ..
: രണ്ട് മണിയല്ലേ ആയുള്ളൂ… ഹരിയേട്ടന് വിശക്കുന്നുണ്ടോ…
: പിന്നില്ലാതെ…
: ഇനിയും കുറേ ദൂരമുണ്ടോ…
: ഹേയ്…. ഇനി ഒരു അരമണിക്കൂർ ഓടിയാൽ വീട്ടിലെത്താം…
: എന്ന വീട്ടിൽ പോയിട്ട് കഴിച്ചാൽ പോരെ….
: അവരൊക്കെ നേരത്തേ കഴിച്ച് ഉച്ചയുറക്കത്തിൽ ആയിരിക്കും.. വൈകുന്നേരമേ എത്തൂ എന്നാ ഞാൻ പറഞ്ഞിരിക്കുന്നത്… അമ്മായിയുടെ വക കിടിലൻ ഡിന്നർ ഉണ്ടാവും..ഇപ്പൊ നമുക്ക് നല്ലൊരു ബിരിയാണി കഴിക്കാം എന്തേ…
: എന്ന വാ… കണ്ണൂരിന്റെ ബിരിയാണി എങ്ങനുണ്ടെന്ന് നോക്കട്ടെ…
: വാഴയിലയിൽ പൊതിഞ്ഞ നല്ല ചിക്കൻ ധം ബിരിയാണി കിട്ടുന്ന ഒരു ഹോട്ടലുണ്ട്… എന്റെ മോളെ… പറയുമ്പോ തന്നെ വായിൽ വെള്ളമൂറുന്നു…
: അത്രയ്ക്ക് ഭയങ്കരമാണോ…സ്വന്തം നാടാണെന്ന് വച്ചിട്ട് ഇങ്ങനെ തള്ളല്ലേ ഹരിയേട്ടാ
: നീ വാ…
വാഴയിലയിൽ പൊതിഞ്ഞ ധം ബിരിയാണിയുടെ മണം മൂക്കിലടിച്ചതും സ്വപ്നയുടെ കണ്ണുകൾ പാതിയടഞ്ഞു. ആസ്വദിച്ച് മണത്തശേഷം അവൾ ഹരിയുടെ മുഖത്തേക്ക് നോക്കി…
: ഇപ്പൊ എങ്ങനുണ്ട്….. ഇനി കഴിച്ചു നോക്ക്… ഇതുപോലെ മണവും നെയ്പ്പറ്റും രുചിയുമുള്ള ബിരിയാണിയൊന്നും നീ ജീവിതത്തിൽ കഴിച്ചിട്ടുണ്ടാവില്ല…
: കഴിച്ചിട്ട് പറയാം ട്ടോ…
സ്വപ്ന ഓരോ പിടി വാരി വായിലേക്ക് വയ്ക്കുന്നതും നോക്കി ഹരിയും ആസ്വദിച്ച് കഴിച്ചു. കഴിച്ചുകഴിഞ്ഞ് ഹരി വച്ചു നീട്ടിയ ഒരു ഗ്ലാസ് ചൂട് വെള്ളം കുടിച്ചപ്പോഴേക്കും സ്വപ്നയുടെ വയറും മനസും നിറഞ്ഞു….
: ഇനി പോകാം…
: ഹരിയേട്ടാ… എന്നാലും അവരെങ്ങനാ അത് ഉണ്ടാക്കുന്നേ… എന്താ ഒരു ടേസ്റ്റ്.. ആ അച്ചാറിന് പോലും ഒരു പ്രത്യേക ടേസ്റ്റാണ്.. സമ്മതിച്ചു മോനെ..
: ഞാൻ ചെറുപ്പം മുതൽ കഴിക്കാറുണ്ട് ഇവിടെനിന്ന്… അന്ന് അച്ഛനും അമ്മയ്ക്കും നടുവിലിരുന്ന് കഴിച്ച ബിരിയാണിയുടെ അതേ ടേസ്റ്റാണ് ഇന്നും അതിന്.
: അപ്പൊ കണ്ണൂർ ഞാൻ വിചാരിച്ചപോലല്ല അല്ലെ..
: നീ എന്തൊക്കെ കാണാൻ കിടക്കുന്നു പെണ്ണെ…
നഗരത്തിന്റെ തിരക്കുകളിൽ നിന്ന് മാറി ശാന്തമായൊഴുകുന്ന പുഴകളും കടന്ന് ഹരി തന്റെ അമ്മവീട്ടിലേക്ക് വണ്ടിയോടിച്ചു കയറ്റി… വടിയുടെ ശബ്ദം കേട്ടയുടനെ അമ്മാവനും അമ്മായിയും വീടിന്റെ പുറകിൽ നിന്നും മുറ്റത്തേക്ക് ധൃതിയിൽ നടന്നുവന്നു… ഹരിയുടെ വണ്ടി കണ്ടയുടനെ രണ്ടുപേരും സന്തോഷംകൊണ്ട് മതിമറന്നു. കാലം കുറച്ചായേ ഹരി ഇങ്ങോട്ടൊക്കെ വന്നിട്ട്…