Related Posts
“ഇനി ഞാൻ എങ്ങനെയാ ജോ ഇവിടെ നിൽക്കുന്നെ.. എന്ത് പറഞ്ഞു നിൽക്കും.. ഇന്നലെ വരെ പറയാൻ ഒരു കാരണം ഉണ്ടായിരുന്നു.. ജോയലിന്റെ പെണ്ണ് ആണെന്ന്.. ഇന്നോ..”
അവൾ പറഞ്ഞതിലും കാര്യമുണ്ട്.. വേഗന്ന് തന്നെ ഞാൻ അവളുടെ കൈ തട്ടി മാറ്റി കട്ടിലിൽ നിന്ന് ഇറങ്ങി അമ്മയുടെയും അച്ഛന്റെയും മുറി ലക്ഷ്യമാക്കി നടന്നു
ഇരുന്നിടത്ത് നിന്ന് ഒന്ന് അനങ്ങാൻ കൂടെ ശ്രമിക്കാതെ ചേച്ചി ആ ഇരിപ്പ് തുടർന്നു
അമ്മയുടെ റൂമിലേക്ക് ഓടി കയറിയ ഞാൻ കണ്ടത് കട്ടിലിൽ ഇരുന്ന് എന്തോ സംസാരിക്കുന്ന അച്ഛനെയും അമ്മയെയും തന്നെ ആണ്
ചേട്ടനെക്കുറിച്ചാണ് അവർ സംസാരിക്കുന്നതെന്ന് എനിക്ക് തോന്നി
എന്നെ കണ്ടതും സംസാരം നിർത്തിയവർ എന്നെ നോക്കി
“എന്താ ജോ നീ ഉറങ്ങിയില്ലേ.. നാളെ ക്ലാസ്സിൽ പോണ്ടേ നിനക്ക്..”
വളരെ ശാന്തനായി എന്നോട് അച്ഛൻ ചോദിച്ചു
എന്നെ തല്ലിയ വിഷമം അച്ഛന് ഉണ്ടെന്ന് എനിക്ക് തോന്നി.. എങ്കിലും അച്ഛനെ നോക്കാതെ ഞാൻ അമ്മയോട് ചോദിച്ചു
“ചേട്ടന്റെ കല്യാണം കഴിഞ്ഞോ..?
“മ്മ്..”
അമ്മ ഒന്ന് മൂളുക മാത്രം ആണ് ചെയ്തത്
“അപ്പൊ ഇനി ചേച്ചിയുടെ കാര്യമോ… ചേച്ചി ഇനി എങ്ങോട്ട് പോകും..”
ഉള്ളിലെ സങ്കടത്തിലും ദേഷ്യത്തിലും എന്റെ ശബ്ദം ഇടറിയിരുന്നു
അതിന് അമ്മ ഒന്നും പറഞ്ഞില്ല.. അടുത്തിരുന്ന അച്ഛന്റെ മുഖത്തേക്ക് നോക്കി ഇരുന്നു
ഞാൻ അച്ഛനെ നോക്കി
എന്റെ ചോദ്യത്തിനുള്ള മറുപടി അച്ഛൻ ആണ് തന്നത്
“നിന്റെ ചേച്ചി എങ്ങോട്ട് പോകാൻ..?
ങേ.. ഇനി ഇവർക്ക് ഞാൻ ചോദിച്ചത് മനസിലായി കാണില്ലേ
“ചേട്ടൻ കെട്ടുമെന്ന ഒറപ്പിൽ അല്ലേ ഇത്രയും കാലം ചേച്ചി ഇവിടെ നിന്നത്.. ഇനി അത് നടക്കില്ലല്ലോ..”
ഞാൻ ചോദിച്ചു.. അതിന് അച്ഛന്റെയും അമ്മയുടെയും മുഖത്തു ഒരു ചിരി മാത്രം ആയിരുന്നു മറുപടി
ഇതിപ്പോ എല്ലാത്തിനും വട്ടായോ.. അതോ എനിക്ക് മാത്രം വട്ടായത് ആണോ.. ഇവിടെ രണ്ടു പേരിരുന്ന് ചിരിക്കുന്നു.. അവിടെ റൂമിൽ ഒരുത്തിയിരുന്നു കരയുന്നു
“ദയ എവിടേക്കും പോണില്ല തല്കാലം… ചേട്ടനെക്കൊണ്ട് കെട്ടിക്കാമെന്ന് പറഞ്ഞല്ല ഞാനവളെ ഇവിടെ നിർത്തിയത്… എന്റെ സ്വന്തം മോളായി തന്നെ നോക്കിക്കോളാം എന്ന് പറഞ്ഞാണ് ഞാൻ ഇവിടെ നിർത്തിയത്…ഇനി അവൾക്ക് പോണമെന്നു പറയുന്ന കാലം വരെ അവൾ ഇവിടെ തന്നെ നിൽക്കും.. അതുകൊണ്ട് നീ കൂടുതൽ ഒന്നും ആലോചിക്കാതെ പോയി കെടക്കാൻ നോക്ക്..”
അച്ഛനത് പറഞ്ഞു കഴിഞ്ഞപ്പോ സ്വർഗം കിട്ടിയ ഫീൽ ആയിരുന്നു എനിക്കപ്പോ.. നഷ്ടപ്പെട്ടത് എന്തോ തിരിച്ചു കിട്ടിയത് പോലെ
ഞാൻ തിരിഞ്ഞു റൂമിലേക്കു നടക്കാൻ തുടങ്ങി.. അപ്പോൾ ആണ് അമ്മ പിറകിൽ നിന്ന ചോദിച്ചത്
“അവൾ നിന്നോട് ഇതൊന്നും പറഞ്ഞില്ലേ…?
“എന്ത് പറഞ്ഞില്ലേന്ന്..?
ഞാൻ സംശയത്തോടെ തിരിഞ്ഞു നിന്നു
“അവളോടും കൊറച്ചു മുന്നേ അച്ഛൻ ഇതേ കാര്യം പറഞ്ഞാണല്ലോ വിട്ടത്.. എന്നിട്ട് അത് നീയറിഞ്ഞില്ലേ…ഏതായാലും ഇപ്പൊ അറിഞ്ഞല്ലോ.. ഇനി നീ പോയി കിടക്ക്.. രാവിലെ വിളിക്കുമ്പോൾ എണീറ്റില്ലെങ്കിലാണ് ഞാൻ ബാക്കി പറയാൻ പോണത്..”
ഞാൻ തിരിച്ചു റൂമിലേക്ക് നടന്നു
ചേച്ചിക്ക് ഇപ്പൊ അച്ഛൻ പറഞ്ഞതെല്ലാം അറിയാമായിരുന്നു.. പിന്നെ എന്തിനാ അവിടെ വന്നിരിന്നു കരഞ്ഞത്
റൂമിലെത്തിയപ്പോ അവിടെ ആരെയും കണ്ടില്ല.. ചേച്ചിയുടെ റൂമിലേക്ക് നടന്നപ്പോൾ ആണ് ടെറസ്സിലേക്കുള്ള വാതിൽ തുറന്നു കിടക്കുന്നത് കണ്ടത്
അപ്പൊ ആളവിടെ കാണുമെന്നു എനിക്ക് മനസിലായി
ഞാൻ സ്റ്റെപ്പ് കയറി മുകളിലേക്ക് നടന്നു
ഒരു മൂലയിലായി ഒരു രൂപം നിൽക്കുന്നത് ചെറിയ വെളിച്ചത്തിൽ കാണാം
പിറകെ ചെന്നു പേടിപ്പിച്ചാലോ എന്ന് ആദ്യം കരുതി..പിന്നെങ്ങാനും ചേട്ടനോടുള്ള ദേഷ്യത്തിൽ എന്നെപ്പിടിച്ചു താഴേക്ക് ഇട്ടാലോ എന്ന പേടിയിൽ ഞാനവിടെ നിന്നു..പോത്തുപോലെ വളർന്നെന്ന് പറഞ്ഞിട്ട് കാര്യമില്ല ഇപ്പോഴും ഒരു അരവട്ടത്തി ആണ്
“നീയെന്താ അവിടെ തന്നെ നിക്കണേ..?
തിരിഞ്ഞു നോക്കാതെ ചേച്ചി ചോദിച്ചു
ഇവളെന്നെ എങ്ങനെ കണ്ടു..
“ഞാൻ വന്നതെങ്ങനെ ചേച്ചി അറിഞ്ഞു..?
അവളുടെ അടുത്തേക്ക് നടന്നുകൊണ്ട് ഞാൻ ചോദിച്ചു
“നീയാ സ്റ്റെപ്പ് മുഴുവൻ ചവിട്ടികുലുക്കി കേറി വന്നാൽ എങ്ങനെ അറിയാതിരിക്കും ജോ..”
എന്നെ കളിയാക്കിക്കൊണ്ട് ചേച്ചി പറഞ്ഞു
“ശബ്ദം കേട്ട് എങ്ങനെ അറിയാൻ പറ്റും.. വേറെ ആരെങ്കിലും ആയിരുന്നെങ്കിലൊ..”
“അതൊക്കെ അറിയാൻ പറ്റും… നിന്നെ കാണാൻ തുടങ്ങിയിട്ട് കൊറച്ചായല്ലോ..”
“ഹ്മ്മ്… അത് വിട്.. അച്ഛൻ നിന്നെ എങ്ങോട്ടും പറഞ്ഞു വിടില്ലെന്ന് നിനക്കറിയാമായിരുന്നല്ലേ..”
ഞാൻ അവളോട് ചോദിച്ചു
ചേച്ചി : അറിയാമായിരുന്നു..
പെട്ടെന്ന് തന്നെ മറുപടിയും എത്തി
“എന്നിട്ടാണോടി ചേച്ചി നീയവിടെ വന്നിരിന്നു കരഞ്ഞത്… എന്നോട് എന്തൊക്കെയാ പറഞ്ഞെ.. ഇവിടുന്ന് പോകുവാ വരുവാ എന്നൊക്കെ..”
ചേച്ചി : അത് ഞാൻ നിന്നെ ചുമ്മാ കളിപ്പിക്കാൻ പറഞ്ഞതല്ലേ ചെക്കാ..വെറുതെ നിന്റെ റിയാക്ഷൻ എന്താണെന്ന് അറിയാൻ വേണ്ടി അങ്ങനെയൊക്കെ പറഞ്ഞപ്പോഴേക്കും നീ ഇറങ്ങി ഓടിയില്ലേ..
എന്നെനോക്കി ഒരു ആക്കിയ ചിരിയോടെ അവൾ പറഞ്ഞു.. പറഞ്ഞത് സത്യം തന്നെ ആണ്… അങ്ങനെ ഒക്കെ കേട്ടപ്പോ വേറെ എന്ത് ചെയ്യണമെന്ന് എനിക്ക് അറിയില്ലായിരുന്നു
“മ്മ്… മതി ഇവിടെ നിന്നത്..തണുപ്പടിക്കും..”
അവളോട് ഞാൻ അകത്തേക്ക് കയറാൻ പറഞ്ഞു.. രാത്രി ആയാൽ ചെറിയ രീതിയിൽ മഞ്ഞു വീഴുമായിരുന്നു.. പിന്നെ നല്ല തണുപ്പുള്ള കാറ്റും
ചേച്ചി : ഒരഞ്ചു മിനിറ്റ് കൂടെ ജോമോനെ.. എത്ര നാളായെന്ന് അറിയോ മനസ്സറിഞ്ഞൊന്ന് ഇങ്ങനെ നിന്നിട്ട്..
കൈ രണ്ടും കൂട്ടി കെട്ടി ആകാശം നോക്കി ചേച്ചി അവിടെ നിന്നു
“ചേച്ചി.. ഞാനൊരു കാര്യം ചോദിക്കട്ടെ..?
ചേച്ചി : എന്താടാ..?
“അല്ല വെറുതെ ചോദിക്കുവാ.. ചേട്ടൻ വേറൊരു കല്യാണം കഴിച്ചെന്നു അറിഞ്ഞിട്ടും നിനക്കെന്താ ഒരു വിഷമം ഇല്ലാത്തത്.. ശെരിക്കും ജോയലിനോട് ഇഷ്ടം ഒണ്ടായിരുന്നോ..?
ഒരുപാട് നാളായി ഉണ്ടായിരുന്ന ഒരു സംശയം ഞാൻ തുറന്നു ചോദിച്ചു
ചോദിച്ചു കഴിഞ്ഞപ്പോ എന്നെ തന്നെ നോക്കി നിൽക്കുന്ന ചേച്ചിയെ ആണ് ഞാൻ കണ്ടത്.. മുഖത്തു ചെറിയൊരു ചിരിയും ഉണ്ടായിരുന്നു
ചേച്ചി : നിനക്ക് അറിയില്ലേ സത്യം..?
മുഖത്തെ ചിരി വിടാതെ തന്നെ അവൾ എന്നോട് ചോദിച്ചു
“എനിക്ക് അറിയില്ല.. നീ തന്നെ പറ..?
ചേച്ചി : ശെരി.. ഇത്രയും ആയില്ലേ ഇനി ഞാൻ തന്നെ പറയാം… ആദ്യമൊക്കെ ഇഷ്ടം ആയിരുന്നു നിന്റെ ചേട്ടനെ… അതിന് കാരണം ചോദിച്ചാൽ അന്നത്തെ എന്റെ അവസ്ഥയൊക്കെ നിനക്ക് അറിയാവുന്നത് അല്ലായിരുന്നോ.. അങ്ങനത്തെ ഒരവസ്ഥയിൽ നിന്ന് ഇങ്ങനെ ഒരു കുടുംബത്തിലേക്ക് എന്നെ കൊണ്ട് വന്നതിന് നിന്റെ ചേട്ടനോട് എനിക്ക് തീർത്താൽ തീരാത്ത കടപ്പാടുണ്ട്.. ആ ഒരു ഇഷ്ടം ആയിരുന്നു അവനോടുണ്ടായിരുന്നത്..”
അവൾ പറയുന്നത് കേട്ട് ഞാൻ നിന്നു.. ഇതൊക്കെ എനിക്ക് ആദ്യമേ തോന്നിയ കാര്യങ്ങൾ ആയിരുന്നു
