ഞാൻ അതൊന്നും കണ്ടഭാവം നടിക്കാതെ, ബിരിയാണിയിലേക്ക് ഒരു ലെഗ് പീസ് എടുത്ത് വെച്ച്, അതിലേക്ക് ചില്ലി ചിക്കന്റെ ഒരു കഷ്ണം കൂടേ കൂട്ടികുഴയ്ക്കാൻ തുടങ്ങി. ഏട്ടത്തിയും മോശമാക്കിയില്ല, പുള്ളിക്കാരി ഓംലെറ്റ് മുറിച്ച് വായിലേക്ക് വെച്ചു.
“ഹാവൂ… എന്തൊരു രുചി!” ഞാൻ ചേച്ചിയെ കേൾപ്പിക്കാൻ വേണ്ടി ഉച്ചത്തിൽ പറഞ്ഞു.
ഇതൊക്കെ കണ്ട് സഹികെട്ട് ചേച്ചി എന്തോ പറയാൻ വായ തുറന്നതായിരുന്നു. പക്ഷേ അപ്പോഴേക്കും ഞങ്ങളുടെ ടേബിളിന് ചുറ്റും ഒരു നിഴൽവെട്ടം വീണു….
ഞാൻ തലയുയർത്തി നോക്കി.
നാലഞ്ച് മെഡിക്കൽ സ്റ്റുഡന്റ്സ്! രണ്ട് ആൺപിള്ളേരും മൂന്ന് പെൺപിള്ളേരും. കാണാൻ നല്ല സ്മാർട്ട് പിള്ളേർ. കഴുത്തിൽ സ്റ്റെതസ്കോപ്പും ഐഡി
കാർഡുമൊക്കെയായി നിൽക്കുന്നു.
“എക്സ്ക്യൂസ് മീ… ഇവിടെ ഇരുന്നോട്ടെ? വേറെ സീറ്റൊന്നും ഒഴിവില്ല,” കൂട്ടത്തിലെ ഒരു പെൺകുട്ടി ചോദിച്ചു.
“ഓ… ഇരുന്നോളൂ…” ഞാൻ മാന്യമായി പറഞ്ഞു.
ഞങ്ങളുടെ ടേബിൾ അത്യാവശ്യം വലുതായത് കൊണ്ട് അവർക്ക് സുഖമായി ഇരിക്കാമായിരുന്നു. അവർ വേഗം വന്ന് ബാക്കിയുള്ള കസേരകളിലേക്ക് ഇരുന്നു.
ചേച്ചി ആകെ പെട്ടു!
ഇനിയിപ്പോ ഞങ്ങളുടെ പ്ലേറ്റിൽ നിന്ന് കട്ടെടുക്കാനോ, അല്ലെങ്കിൽ വാശി പിടിക്കാനോ പറ്റില്ല. മുന്നിൽ അപരിചിതരായ, അതും ജൂനിയേഴ്സ് ആയ പിള്ളേർ ഇരിക്കുമ്പോൾ എങ്ങനെയാ തരം താഴുക?
അവർ വന്നതും മെനു കാർഡ് കയ്യിലെടുത്തു. എന്തൊക്കെയോ ഓർഡർ ചെയ്യാൻ തുടങ്ങിയതാണ്. പക്ഷേ പെട്ടെന്നാണ് കൂട്ടത്തിലെ ഒരുത്തന്റെ കണ്ണുകൾ ഞങ്ങളുടെ പ്ലേറ്റിലേക്ക് പോയത്.
കാരണം ഞാൻ നല്ല ആവേശത്തിൽ ബിരിയാണി കഴിക്കുകയാണ്. ആ മണം അവരുടെ മൂക്കിലേക്കും അടിച്ചു കയറിരിക്കണം .
“എടി … നമ്മക്കും ബിരിയാണി കഴിച്ചാലോ…”
അവൻ തൊട്ടത്തിരുന്നവളോട് ചെവിയിൽ പറഞ്ഞു…
പക്ഷേ പൊട്ടന്റെ ശബ്ദം എനിക്ക് കേൾക്കാമായിരുന്നു…
അവന്റെ മറുപടി കേട്ടതും ആ പെണ്ണ് ഞങ്ങളെയൊന്ന് നോക്കി. അവൾ കഴിക്കാണോ വേണ്ടയോ എന്നുള്ള ഒരു നൂൽ പാലത്തിൽ നിൽക്കുകയാണ്…
“ഏട്ടത്തി നല്ല കിടിലൻ ബിരിയാണി ലേ … സൂപ്പർ സാധനം!” അവളുടെ തീരുമാനമെടുക്കൽ പെട്ടെന്നാക്കാൻ വേണ്ടി ഞാൻ ഏട്ടത്തിയോട് എല്ലാവർക്കും കേൾക്കുന്ന രീതിയിൽ പറഞ്ഞു…
എന്തായാലും സംഗതിയേറ്റു. അവർ മെനു കാർഡ് മടക്കിവെച്ചു.
“അഞ്ച് ചിക്കൻ ബിരിയാണി!”
അവർ ഓർഡർ കൊടുത്തു.
ഇത് കേട്ടതും ചേച്ചിയുടെ കിളി പോയി!
ഇപ്പോൾ അവസ്ഥ എന്താണെന്ന് വെച്ചാൽ, ഞങ്ങളുടെ വലിയ റൗണ്ട് ടേബിളിൽ ഇരിക്കുന്ന എട്ടുപേരിൽ ഏഴുപേരും കഴിക്കുന്നത് ചിക്കൻ ബിരിയാണിയാണ്…
നടുക്കിരുന്ന് ചൂട് കഞ്ഞി ഊതിക്കുടിക്കേണ്ടി വരുന്ന ഗതികെട്ട ജന്മമായി എന്റെ ചേച്ചി മാറി!
വിധി… അല്ലാതെന്ത് പറയാൻ!
ചുറ്റും ഇരുന്ന് എല്ലാവരും ബിരിയാണി കഴിക്കുമ്പോൾ, ആ മണത്തിൽ മുങ്ങിപ്പൊങ്ങി, ഉപ്പില്ലാത്ത കഞ്ഞി കുടിക്കുന്ന ചേച്ചിയുടെ മുഖം കാണാൻ തന്നെ എന്ത് രസമായിരുന്നു എന്നോ…
ഞാനും ഏട്ടത്തിയും പരസ്പരം നോക്കി ചിരി കടിച്ചുപിടിച്ചു. പ്രതികാരം വീട്ടുമ്പോൾ ഇത്രയും സുഖം കിട്ടുമെന്ന് ഞാൻ കരുതിയില്ല!
ഞങ്ങൾ ആവേശത്തിൽ ബിരിയാണി കഴിച്ചുകൊണ്ടിരിക്കുകയായിരുന്നു. ചേച്ചി ഇടക്കിടക്ക് ഞങ്ങളെയും ആ മെഡിക്കൽ പിള്ളേരെയും മാറി മാറി നോക്കി നെടുവീർപ്പിടുന്നുണ്ട്.
അപ്പോഴാണ് ആ കൂട്ടത്തിലെ ഒരു പെൺകുട്ടി അടുത്തിരുന്നവനെ തോണ്ടിയിട്ട് കണ്ണിന്റെ സൈഡ് കൊണ്ട് എന്നെ കാണിച്ചുകൊടുക്കുന്നത് ഞാൻ ശ്രദ്ധിച്ചത്. അവൾ അവന്റെ ചെവിയിൽ എന്തോ മന്ത്രിക്കുന്നുണ്ട്.
അവൻ എന്നെ ഒന്ന് നോക്കി, എന്നിട്ട് അവളോട് ‘നീയൊന്ന് മിണ്ടാതിരുന്നേ’ എന്ന രീതിയിൽ കണ്ണ് കാണിച്ചു. മുഖത്ത് ചെറിയൊരു വെപ്രാളം പോലെ.
പക്ഷെ അവൾ വിട്ടില്ല. അവൾ ആകാംക്ഷയോടെ എന്നോട് ചോദിച്ചു: