ഒരു വേട്ടക്കാരൻ ഇരയെ നിരീക്ഷിക്കുന്നതുപോലുള്ള നോട്ടം.
കാരണം ആ നോട്ടത്തിൽ ദേഷ്യമോ വെറുപ്പോ ഒന്നും ഉണ്ടായിരുന്നില്ല.
അതിലും അപകടകരമായ മറ്റെന്തോ ഉണ്ടായിരുന്നു.
പൂർണ്ണമായ നിശ്ശബ്ദത.
പൂർണ്ണമായ ആത്മവിശ്വാസം.
തന്റെ മുന്നിൽ നിൽക്കുന്നവർ ആരായാലും ഒരു പ്രശ്നമല്ല എന്ന ഭാവം.
ആ നിമിഷം എനിക്ക് ഒരു കാര്യം മനസ്സിലായി.
ആ വണ്ടിക്കുള്ളിൽ ഇരിക്കുന്ന ആൾ സാധാരണക്കാരൻ അല്ല.
ആ പുക പതിയെ അന്തരീക്ഷത്തിൽ അലിഞ്ഞുചേർന്നപ്പോൾ ആ മുഖം എനിക്ക് കൂടുതൽ വ്യക്തമായി കാണാൻ തുടങ്ങി.
അത് ഏകദേശം എന്റെ അതേ പ്രായം വരുന്ന ഒരു ചെറുപ്പക്കാരനായിരുന്നു.
സത്യം പറഞ്ഞാൽ, കാണാൻ നല്ല ഭംഗിയുള്ള ഒരാൾ.
മുഖത്ത് നന്നായി ട്രിം ചെയ്ത താടി. കൂർത്ത കണ്ണുകൾ. അതിന് മുകളിൽ ഭംഗിയായി വളർന്ന കട്ടിയുള്ള പുരികങ്ങൾ. വെളുത്ത നിറമുള്ള മുഖവും ആ തണുത്ത ഭാവവും ചേർന്നപ്പോൾ അയാളുടെ രൂപത്തിന് ഒരു പ്രത്യേക ആകർഷണം ഉണ്ടായിരുന്നു.
പക്ഷേ ആ മുഖത്തിലെ ഏറ്റവും ശ്രദ്ധേയമായ കാര്യം സൗന്ദര്യമല്ലായിരുന്നു.
അത് അയാളുടെ നോട്ടമായിരുന്നു.
അയാൾ വീണ്ടും ആ കട്ടിയുള്ള സിഗരറ്റ് ചുണ്ടിലേക്ക് ചേർത്തു. ഒരു വലി എടുത്ത ശേഷം പതിയെ പുക പുറത്തേക്ക് വിട്ടു.
അപ്പോഴാണ് ആ കണ്ണുകൾ എന്റെ മേൽ വന്ന് പതിഞ്ഞത്.
അറിയാതെ തന്നെ എന്റെ ശരീരം ഒന്ന് മുറുകി.
വെറുതെ ഒന്ന് നോക്കിയതല്ല.
എന്നെ മുഴുവൻ വായിച്ചെടുക്കാൻ ശ്രമിക്കുന്നതുപോലെ.
തല മുതൽ കാൽവരെ ഒരു നിമിഷം കൊണ്ട് അയാൾ എന്നെ വിലയിരുത്തി.
അവസാനം ആ നോട്ടം എന്റെ കണ്ണുകളിൽ വന്ന് നിന്നു.
ഞങ്ങളുടെ കണ്ണുകൾ തമ്മിൽ കോർത്തു.
ആരും ഒന്നും പറഞ്ഞില്ല.
എന്നാലും ആ നിശ്ശബ്ദതയിൽ എന്തോ ഒരു സംഭാഷണം നടക്കുന്നതുപോലെ തോന്നി.
ചുറ്റുമുള്ള ശബ്ദങ്ങളൊക്കെ എവിടെയോ അകന്നു പോയിരുന്നു.
കുറച്ച് നിമിഷങ്ങൾ ഞങ്ങൾ അങ്ങനെ തന്നെ പരസ്പരം നോക്കി നിന്നു.
ആ കണ്ണുകളിൽ ഭീഷണിയില്ലായിരുന്നു.
പക്ഷേ ഒരു വിചിത്രമായ തീവ്രത ഉണ്ടായിരുന്നു.
എന്നെക്കുറിച്ച് എന്തോ അറിയുന്ന ഒരാളുടെ നോട്ടം പോലെ.
എന്തുകൊണ്ടോ ആ നിമിഷം എന്റെ മനസ്സിൽ ഒരു തോന്നൽ വന്നു.
ഇത് ആദ്യ കൂടിക്കാഴ്ച ആയിരിക്കാം.
പക്ഷേ ഇത് അവസാനത്തേതും ആയിരിക്കില്ല…
“”പോവാം…?”
പെട്ടെന്ന് സൈഡിൽ നിന്ന് വന്ന മായയുടെ ശബ്ദമാണ് എന്നെ ചിന്തകളിൽ നിന്ന് ഉണർത്തിയത്.
“ആ… കഴിഞ്ഞോ? എന്നാ പോവാം.”
ഞാൻ അവളുടെ കയ്യിൽ നിന്ന് സഞ്ചി വാങ്ങി.
മായ സ്കൂട്ടർ സ്റ്റാർട്ട് ചെയ്ത് പതിയെ മുന്നോട്ട് എടുത്തു.
ഞാൻ പിന്നിൽ കയറി ഇരിക്കുന്നതിനിടയിലും എന്റെ കണ്ണുകൾ അറിയാതെ ആ താറിന്റെ ഭാഗത്തേക്ക് നീങ്ങി.
ഒരിക്കൽ കൂടി അവനെ നോക്കി.
അവൻ ഇപ്പോഴും അതേ ഇരിപ്പിലാണ്.
സിഗരറ്റ് വിരലുകൾക്കിടയിൽ കത്തിക്കൊണ്ടിരിക്കുന്നു.
പക്ഷേ ഒരു കാര്യം മാത്രം മാറിയിരുന്നില്ല.
ആ കണ്ണുകൾ.
അവ ഇപ്പോഴും എന്റെ മേൽ തന്നെ ആയിരുന്നു.
ഒരു നിമിഷം ഞങ്ങളുടെ കണ്ണുകൾ വീണ്ടും തമ്മിൽ ഉടക്കി.
“ഇങ്ങനെ നോക്കാൻ മാത്രം എന്താ ഉള്ളത്?”
ഞാൻ മനസ്സിൽ പറഞ്ഞു.
“ഇനി ഇവന് എന്നെ അങ്ങ് ഇഷ്ടപ്പെട്ടോ?”
ആ ചിന്ത വന്നതും എനിക്ക് തന്നെ ചിരി വന്നു.
അതോടെ ഞാൻ നോട്ടം മാറ്റി.
സ്കൂട്ടർ മുന്നോട്ട് നീങ്ങി.
ടൗൺ പതിയെ പിന്നിലേക്ക് മറഞ്ഞു.
പക്ഷേ എന്തുകൊണ്ടോ ആ നീല കലർന്ന കണ്ണുകൾ മാത്രം എന്റെ മനസ്സിൽ നിന്ന് മായുന്നുണ്ടായിരുന്നില്ല.
അങ്ങനെ ഞങ്ങൾ ടൗണിൽ നിന്നും കുറച്ചു ദൂരം പോയി…
“എടി മായേ ആരാ ആ വണ്ടിയിൽ ഉണ്ടായിരുന്ന ചെറുക്കൻ…?”
ഞാൻ അവളോട് ഒന്ന് ചേർന്നിരുന്നു ചോദിച്ചു…