അതിന് കാരണം മറ്റൊന്നാണ്. ഒരു ദിവസം ഇന്റർവെല്ലിന് പുറത്തിറങ്ങിയതിനു ശേഷം എന്റെ അടുത്തിരിക്കുന്ന ബെസ്റ്റ് ഫ്രണ്ട് അരുൺ പറഞ്ഞു.
” എടാ അപ്പുറത്തെ ക്ലാസിലെ നിമിഷ്യ്ക്ക് നിന്നോട് ഒരു നോട്ടം ഉണ്ടോ എന്നൊരു ഡൗട്ട്”
പോരേ പൂരം.
“ആണോ”
” അതേടാ നീ ഇന്റർവല്ലിനു പുറത്തിറങ്ങുമ്പോൾ ഒക്കെ അവൾ ഇടംകണ്ണിട്ട് നോക്കുന്നത് പോലെ എനിക്ക് തോന്നി ”
ബസ്സിലെയും സ്കൂളിലെയും തമ്മിൽ പ്രണയിക്കുന്നവരെ കാണുമ്പോഴും പിന്നെ പ്രായം ശരീരത്തിൽ ഹോർമോൺ ചേഞ്ചസ് ഉണ്ടാക്കിയതും കൊണ്ടാവാം എനിക്കും ഒരു പ്രണയിനി വേണമെന്ന് തോന്നൽ.
ഒരാളെ എനിക്ക് വേണ്ടി കണ്ടെത്തണം എന്ന് ഞാൻ ആലോചിച്ചു നടക്കുന്ന സമയത്താണ് അവൾ നിമിഷ യാണെന്ന് അരുൺ ഉറപ്പിച്ചു പറഞ്ഞത്.
ഒരു ആവറേജിന് കുറച്ചു മുകളിൽ അതിനപ്പുറം പറയാൻ എനിക്ക് ഒന്നും ഉണ്ടായിരുന്നില്ല. കുറച്ചു വെളുത്തിട്ടാണ് എന്നാൽ നല്ല വെളുത്തിട്ടല്ല, ഉയരവും തടിയും, പഠിത്തവും ഒക്കെ അതുപോലെ തന്നെയായിരുന്നു. നൂറിൽ ഒരു 60 മാർക്ക് കിട്ടും. എനിക്ക് എന്നെക്കുറിച്ച് നന്നായി അറിയുന്നതുകൊണ്ട് തന്നെ അത്യാവശ്യം സൗന്ദര്യമുള്ള അവൾ വളയുമോ എന്ന കാര്യം ഡൗട്ട് തന്നെയായിരുന്നു.
എന്നാൽ ലോകത്ത് ഇത്രയും കോൺഫിഡൻസ് തരുന്ന വേറെ ഫ്രണ്ട് ഉണ്ടോ എന്ന് വെല്ലുവിളിച്ചുകൊണ്ട് അരുൺ എനിക്ക് കോൺഫിഡൻസ് തന്നു. അവൾ പിറകിലോട്ട് നോക്കിയാലും മുന്നിൽ നിൽക്കുന്ന തന്നെയാണ് നോക്കുന്നത് എന്നായിരുന്നു അരുണിന്റെ വാദം. എന്തായാലും കുറച്ചുദിവസത്തിനുള്ളിൽ തന്നെ അവൾക്ക് മനസ്സിലായി ഞാൻ അവളുടെ പിറകെയാണെന്ന്.
ഞങ്ങളെ കാണുമ്പോൾ അവളുടെ കൂട്ടുകാരികൾ അവളുടെ എന്തോ പറഞ്ഞു ചിരിക്കും. അവളാണെങ്കിൽ അപ്പോൾ തന്നെ എന്നെ ദഹിപ്പിക്കുന്ന രീതിയിൽ ഒരു നോട്ടം നോക്കും. അതുകണ്ട് ഞാൻ നോട്ടം മാറ്റും. ചിലപ്പോൾ അവൾക്ക് എന്നോട് താൽപര്യമില്ലാത്ത കൊണ്ടായിരിക്കുമോ അങ്ങനെ നോക്കുന്നത് എന്നൊക്കെ ചിന്തിച്ചിരിക്കുമ്പോൾ…
“എടാ പെൺകുട്ടികൾ എല്ലാവരും അങ്ങനെയാണ് മനസ്സിൽ എത്ര സ്നേഹം ഉണ്ടെങ്കിലും അത് കാണിക്കില്ല. പിറകെ ഇങ്ങനെ നടത്തിക്കും ”
മനസ്സിൽ എന്തെങ്കിലും നെഗറ്റീവ് ചിന്ത വരുമ്പോഴേക്കും അരുൺ കോൺഫിഡൻസിന്റെ ബൂസ്റ്റർ ഡോസ് കുത്തിവെക്കും.
“അങ്ങനെ ആയിരിക്കുമല്ലേ”
“പിന്നല്ലാതെ നമുക്കറിയാവുന്നതല്ലേ പെണ്ണുങ്ങളെയൊക്കെ ”
ഏഴാംക്ലാസിൽ പഠിക്കുമ്പോൾ രണ്ട് ലൈൻ ഉണ്ടായവനാണ് അരുൺ അതുകൊണ്ടുതന്നെ അവന്റെ വാക്കുകൾ എനിക്ക് ദൈവവചനം ആയിരുന്നു.
അതുകൊണ്ടുതന്നെ അവളുടെ നോട്ടങ്ങളെയൊക്കെ മൈൻഡ് ചെയ്യാതെ അവളുടെ പിറകെ തന്നെ വച്ചുപിടിച്ചു.
എന്നാൽ സകല ധൈര്യവും സമ്പാദിച്ച് ജില്ലാ തല സ്കൂൾ കലോത്സവത്തിന് പ്രൊപ്പോസ് ചെയ്തപ്പോൾ കൊടുത്ത ഗ്രീറ്റിംഗ് കാർഡും റോസാപ്പൂവും ഡയറി മിൽക്കും കാറ്റിൽ പറന്നതോടുകൂടി അവളുടെ നോട്ടത്തിന്റെ യഥാർത്ഥ അർത്ഥം മനസ്സിലായി.
കുറച്ചുകൂടി കഴിഞ്ഞിട്ട് പ്രൊപ്പോസ് ചെയ്യാം എന്നായിരുന്നു എന്റെ പ്ലാൻ. അതിനൊരു കാരണം ഇതുവരെ ഒരു പോസിറ്റീവ് റെസ്പോൺസ് കിട്ടിയിരുന്നില്ല എന്നതായിരുന്നു.
എന്നാൽ
” എടാ നീ ആലോചിച്ചു നോക്കിയേ സ്കൂൾ കലോൽസവം അഞ്ചു ദിവസം ഉണ്ട്, ആദ്യത്തെ ദിവസം നീ പ്രൊപ്പോസ് ചെയ്തു എന്ന് വിചാരിച്ചോ അവൾ ഒക്കെ പറഞ്ഞു. പിന്നെയുള്ള ഈ അഞ്ചുദിവസം നിങ്ങളുടേതാണ് നിങ്ങളോട് ആരും ഒന്നും ചോദിക്കാനും പോകുന്നില്ല നിങ്ങൾക്ക് ഇവിടെ വേണമെങ്കിലും ഒന്നിച്ചു കറങ്ങി നടക്കാം. നിങ്ങളുടെ മധുര മനോഹരമായ അഞ്ചു ദിനങ്ങൾ” അവൻ കോൺഫിഡൻസ് കുത്തിവച്ചതോടുകൂടി ഞാൻ സട കുടഞ്ഞ എഴുന്നേറ്റു.
ആ സടയ്ക്ക് അവൾ തീയിട്ടു, പക്ഷേ കരിഞ്ഞത് മൊത്തം എന്റെ ഉള്ളാണെന്ന് മാത്രം.
” ഇതൊക്കെ വെറുതെയാണ് അവൾ നിന്നെ സ്നേഹിക്കും നമ്മൾ സ്നേഹിപ്പിക്കും” എന്നവൻ അടുത്ത കോൺഫിഡൻസ് ബൂസ്റ്റ് തരുമ്പോൾ തന്നെ അവന്റെ തലക്കെട്ട് ഒന്ന് കൊടുത്തു ഞാൻ അവിടെ നിന്ന് ഊരി.
” അവൾക്ക് വേറെ ലൈൻ ഉണ്ട് നീ വെറുതെ നടന്ന നാണംകെടേണ്ട ” എന്ന് അവളുടെ കൂട്ടുകാരി എന്റെ മുഖത്ത് നോക്കി പറഞ്ഞപ്പോൾ തൊലി ഉരിഞ്ഞു പോയി.