ഇതെല്ലാം കണ്ട് ആകെ കിളി പോയ അവസ്ഥയിൽ ആയിരുന്നു ഞാൻ.കാണാനൊത്തിരി ആഗ്രഹിച്ച സീൻ ആയിരുന്നെങ്കിലും എന്റെ ചങ്കിൽ കത്തി കുത്തിയിറക്കിയപോലെയാണ് എനിക്ക് തോന്നിയത്. അമ്മയുടെ പ്രതികാരം നൂറു ശതമാനം ന്യായം ആണ്. അത് കൊണ്ട് തന്നെ ലച്ചുവിനോട് ഒരു തരിമ്പും എനിക്ക് ദേഷ്യം തോന്നിയില്ല.
പക്ഷെ അമ്മു !
എന്റെ കൂടെ നിന്ന് ഒറ്റുകാരിയുടെ പണിയല്ലേ അവൾ കാണിച്ചത്?
ലച്ചു അറിഞ്ഞാൽ എന്ത് സംഭവിക്കും എന്ന് ഞാൻ ഓരോ നിമിഷവും കിടന്ന് ഉരുകിയത് അവൾക്കും അറിയാവുന്നതല്ലേ. എന്നിട്ട് അവൾ നേരത്തെ കുറ്റസമ്മതം നടത്തി മാപ്പുസാക്ഷി ആയിരിക്കുന്നു. ഇപ്പൊ ഞാനാരായി..?
ഞാനറിയാതെ കാലുകൾ ചലിച്ചു തുടങ്ങി.എന്റെ കണ്ണ് നിറഞ്ഞിരുന്നു.
“എന്നെ വീണ്ടും പൊട്ടനാക്കിയപ്പോ തള്ളക്കും മോൾക്കും സമാധാനം ആയല്ലോ !
ഞാൻ ആരെയും നോക്കാതെ അരിശത്തോടെ പറഞ്ഞു.
“കളയെടാ കുഞ്ഞേ ഞങ്ങള് തമാശക്ക് കാണിച്ചതല്ലേ…?
ലച്ചു എന്റെ കയ്യിൽ പിടിച്ച് കൊണ്ട് സമാധാനിപ്പിച്ചു.
“സാരമില്ലമ്മേ.. അമ്മ കാണിച്ചതിൽ ഒരു തെറ്റും ഇല്ല..
ഞാൻ അമ്മയെ നോക്കി പറഞ്ഞു.
“കണ്ണേട്ടാ… ഞാൻ.. അമ്മ പറഞ്ഞപ്പോ….
അമ്മുവിന്റെ ശബ്ദം വല്ലാതെ വിറക്കുന്നുണ്ടായിരുന്നു.
എന്റെ മനസ്സിലെ ദേഷ്യം മുഴുവൻ കൈയ്യിലേക്ക് ഒഴുകിയെത്തിയതും എന്റെ വലത്തേ കൈ അവളുടെ കവിളിനു നേരെ ഉയർന്നു.കൈവീശിയുള്ള അടി കിട്ടിയതും അവൾ മുഖം പൊത്തി കൊണ്ട് നിലത്തു വീണു.
“നീയെന്താടാ കാണിച്ചേ…
തമാശക്കാണെന്ന് പറഞ്ഞതല്ലേ…
അവളെ പിടിച്ചെഴുന്നേല്പിച്ചു കൊണ്ട് ലച്ചു എന്റെ നേരെ ചീറി.അമ്മു ഒന്നും മിണ്ടാതെ വീണ്ടും എന്റെ കൈ പിടിക്കാൻ നോക്കി..
“മാറി നിക്കെടി.. ചൂലേ..
എന്നെ തൊട്ടു പോവരുത്.
എനിക്ക് നിന്നെ കാണേം വേണ്ടാ…..
എല്ലാ നിയന്ത്രണവും വിട്ട ഞാൻ
അലറി..
“ഞാൻ പറഞ്ഞിട്ട അവള്. നീയെന്നെയാ തല്ലണ്ടെ.. ഇവളെയല്ല ….
അവളെ തല്ലിയത് ലച്ചുവിന് തീരെ ഇഷ്ടപ്പെട്ടിട്ടില്ല…
“കണ്ണേട്ടാ സോറി…..
“മിണ്ടണ്ട നീയെന്നോട്..നിനക്ക് വട്ട് കളിപ്പിക്കാനുള്ള കോമാളി അല്ല ഞാൻ. എന്നാലും നീയെന്നോടിത് ചെയ്തല്ലോടി….”
സങ്കടം കൊണ്ട് വാക്കുകൾ മുറിഞ്ഞു..
“ഞാൻ നിർബന്ധിച്ചോണ്ടാടാ ഈ പാവം…
ലച്ചു ആദ്യമായി എന്റെയടുത്ത് അപേക്ഷയുടെ സ്വരത്തിൽ പറഞ്ഞു.
“എനിക്കിത് തന്നെ വേണം. ആ നരകത്തിൽ നിന്ന് ചേർത്ത് പിടിച്ചതിന് എനിക്ക് വയറു നിറച്ചു കിട്ടി…. മതിയായി എല്ലാം.. “
ദേഷ്യം കൊണ്ട് എന്റെ വായിൽ നിന്ന് എന്തൊക്കെയാണ് വരുന്നതെന്ന് എനിക്ക് തന്നെ നിശ്ചയമില്ലായിരുന്നു.
“കണ്ണാ മതി.. !
പറഞ്ഞ് പറഞ്ഞ് ഏറണ്ട പോടാ അപ്പുറത്ത്.. !
മുഖം പൊത്തികരയുന്ന അവളെ മറികടന്നു കൊണ്ട് ഞാൻ ഉമ്മറത്തേക്ക് നടന്നു. പിന്നെ അവിടെ നിക്കാൻ തോന്നിയില്ല.എവിടേക്കെങ്കിലും പോയാൽ മതി എന്നായിരുന്നു എനിക്ക്. അവളുടെ മുഖം കാണുന്നത് പോലും എനിക്ക് അസഹ്യമായി തോന്നി. എങ്ങോട്ട് പോവും.. ജിഷ്ണുവിന്റെ കൂടെ പോയാ അത് കള്ളുകുടിയിലെ അവസാനിക്കൂ..
ചിന്നു !
അതെ അവൾക്കേ ഇപ്പൊ അല്പമെങ്കിലും ആശ്വസിപ്പിക്കാൻ കഴിയൂ..
വണ്ടിയെടുത്ത് പോകാനൊരുങ്ങുമ്പോൾ അവർ രണ്ടുപേരും ഉമ്മറത്തേക്ക് വന്നു അവളെ കണ്ട ദേഷ്യത്തിൽ പോണപോക്കിൽ മുറ്റത്തിരുന്ന ചെടി ചട്ടി ചവിട്ടി മറിച്ചിട്ടാണ് ഞാൻ പോയത്.
ഞാൻ ചെല്ലുന്നത് അടുക്കളയിലെ ഗ്രില്ലിലൂടെ കണ്ട ചിന്നു ഓടി ഉമ്മറത്തേക്ക് വന്നു.നിറഞ്ഞ പുഞ്ചിരിയോടെ അവളുടെ അമ്മയും കൂട്ടിനുണ്ടായിരുന്നു.
“എന്താ ഏട്ടാ എന്ത് പറ്റി..?
എന്റെ മുഖത്തെ തെളിച്ചക്കുറവ് കണ്ട് ചിന്നു പരിഭ്രമത്തോടെ ചോദിച്ചു.
“പറയാം… എനിക്കാദ്യം കുറച്ച് നേരം ഒന്ന് കിടക്കണം. തലക്ക് വല്ലാത്ത പെരുപ്പ്…
“ആ കിടക്ക തട്ടി വിരിച്ചു കൊടുത്തേ ചിന്നൂ. ഇവനെന്തോ കാര്യമായിട്ട് പറ്റീട്ട്ണ്ട്…
അമ്മ അവളെ തോണ്ടി വിളിച്ചു കൊണ്ട് പറഞ്ഞു..
“വന്നേ ഏട്ടാ…
ചിന്നു എന്റെ കയ്യും വലിച്ച് കൊണ്ട് അവളുടെ റൂമിലേക്ക് നടന്നു .ഞങ്ങളെ അനുഗമിച്ചു കൊണ്ട് അവളുടെ അമ്മയും കൂടെ വന്നു.