വണ്ടിയെടുത്ത്‌ അവളുടെ വീട്ടിലേക്ക് കത്തിച്ചു വിട്ടു.അവളുടെ വീട്ടുകാര് എന്ത് പറയും എന്നൊന്നും ഞാനപ്പോൾ ചിന്തിച്ചതേ ഇല്ലാ. എനിക്കെന്റെ പെണ്ണിനെ കാണണം. രണ്ട് തല്ല് കൊണ്ടാലും വേണ്ടില്ല പിണക്കം മാറ്റണം. ഒന്ന് കെട്ടിപിടിക്കണം. എന്നാലേ ഈ ശ്വാസം മുട്ടല് തീരൂ…
അവളുടെ വീട്ടിലേക്കുള്ള പോക്കറ്റ് റോഡിലേക്ക് കയറുമ്പോൾ സമയം എട്ടുമണി ആവാറായിരുന്നു.ബൈക്കിന്റെ ശബ്ദം കേട്ട് അവളുടെ അമ്മ ഉമ്മറത്തേക്ക് വന്നു.എന്നെ കണ്ടതും ആ കണ്ണുകൾ വിടർന്നു.
അമ്മായിയച്ചനെ അവിടെ കാണാത്തത് കൊണ്ട് അങ്ങാടിയിലേക്ക് ഇറങ്ങിയതായിരിക്കും എന്ന് ഞാനൂഹിച്ചു .
“എന്താ കണ്ണാ നിങ്ങള് തമ്മില് പ്രശ്നം..?
ഉമ്മറത്തേക്ക് കയറിയതും അമ്മ ഉത്കണ്ഠയോടെ ചോദിച്ചു..
“ഒന്നും ഇല്ലമ്മേ.. എടക്ക് എന്തെങ്കിലും വേണ്ടേ… ഒരു രസല്ലേ.. “
ഞാൻ കൃത്യമായ ഉത്തരം കിട്ടാതെ കിടന്ന് മെഴുകി.
“ആ നല്ല രസാ.. ആ പെണ്ണ് ഒരു വക കഴിക്ക്ണില്ലാ. എപ്പഴും റൂമില് അടച്ചു പൂട്ടി കെടക്കും…കരച്ചില് തന്നെ പണി….
“എന്നിട്ടെവിടെ…?
അവളെ കാണാത്തത് കൊണ്ട് ഞാൻ തിരക്കി.
“റൂമില്ണ്ട്..
അമ്മ റൂമിലേക്ക് വിരൽ ചൂണ്ടി..
“ചില പൊട്ടലും ചീറ്റലും ഒക്കെ കേൾക്കും അമ്മ മൈൻഡ് ചെയ്യണ്ടാ ട്ടോ.. ”
ഞാൻ അതും പറഞ്ഞു കൊണ്ട് റൂമിലേക്ക് നടന്നു. വാതിൽ ചാരിയിട്ടേ ഒള്ളൂ. ശബ്ദമുണ്ടാക്കാതെ ഞാൻ വാതിൽ തുറന്ന് അകത്തു കയറി.
കമിഴ്ന്നു കിടക്കുകയാണ് പെണ്ണ്.കാല് രണ്ടും അനക്കികൊണ്ട് ഫോണിൽ നോക്കി കിടക്കുകയാണ്. അമ്മയുടെതാണെന്ന് തോന്നുന്നു മാക്സി ആണ് വേഷം.
ഞാൻ അവളുടെ പിന്നിൽ നിന്ന് ഫോണിലേക്ക് ഡയൽ ചെയ്തു.
ആദ്യ റിങ്ങിൽ തന്നെ അവൾ കട്ടാക്കി. വീണ്ടും വീണ്ടും അടിച്ചു.
ഒടുവിൽ അവൾ ഫോണെടുത്തു.
“ചത്തിട്ടില്ല…
ഒറ്റ ഡയലോഗിൽ ആ സംഭാഷണം അവസാനിപ്പിച്ചു കളഞ്ഞു പെണ്ണ്
“ഓഹ് അത് എനിക്കറിയാം.. “
ഞാൻ അവളുടെ പിന്നിൽ നിന്ന് മറുപടി നൽകി.
അവൾ ഞെട്ടി തിരിഞ്ഞു കൊണ്ട് എന്നെ നോക്കി. പ്രതീക്ഷിക്കാതെ എന്നെ കണ്ട അമ്പരപ്പ് ആ മുഖത്ത് വന്നെങ്കിലും അവൾ പെട്ടന്ന് മുഖം വെട്ടിച്ചു കളഞ്ഞു.
ഞാൻ വാതിലിന്റെ കൊളുത്തിട്ട് അവളുടെ കാൽചുവട്ടിൽ കട്ടിലിൽ ഇരുന്നു
ഇനി മടിച്ചു നിന്നിട്ട് കാര്യം ഇല്ലാ. ഞാൻ അവളുടെ അടുത്ത് കട്ടിലിൽ പോയി കിടന്നു. അവൾ രൂക്ഷമായി എന്നെ നോക്കിയതല്ലാതെ ഒരക്ഷരം മിണ്ടിയില്ല.
“സുഖല്ലേ…..
ഞാൻ ചിരിയോടെ ചോദിച്ചു..
“പോടാ പട്ടീ…
പിറുപിറുത്തു കൊണ്ട് അവൾ മുഖം വെട്ടിച്ച് തിരിഞ്ഞു കിടന്നു..
“ഒരബദ്ധം പറ്റിയതാ പെണ്ണെ ഒന്ന് ക്ഷമിക്ക്…… നീ വേണേൽ എന്നെ തല്ലിക്കോ…
അതിനൊന്നും മറുപടി ഉണ്ടായില്ല.അങ്ങനെ വിട്ടാൽ പറ്റില്ലല്ലോ
ഞാൻ നീങ്ങി ചെന്ന് അവളുടെ പിന്കഴുത്തിൽ കീഴ്ത്താടിയുരസി..
“മതിയെടാ നിർത്താം.. എന്നെകൊണ്ട് ഇനി പറ്റൂല..
ഞാൻ വേണേൽ കാല് പിടിക്കാം….. ”
അതോടെ അവൾ തിരിഞ്ഞു കിടന്നു പക്ഷെ എന്നെ നോക്കിയില്ല.കണ്ണീര് പിന്നെ കൂടപ്പിറപ്പാണല്ലോ.അട്ടത്തേക്ക് നോക്കി കിടക്കുകയാണ് പെണ്ണ്..
ഞാൻ പതിയെ അവളുടെ കൈഎടുത്ത് എന്റെ കയ്യിൽ പിടിച്ചു. ഒരു തവണ തട്ടി മാറ്റിയെങ്കിലും രണ്ടാമത് പിടിച്ചെപ്പൊൾ എതിർത്തില്ല.
“ഒരായിരം തവണ ഞാൻ മനസ്സില് മാപ്പ് പറഞ്ഞു കഴിഞ്ഞു.പക്വത ഇല്ലാത്ത ഒരുത്തന്റെ പൊട്ടത്തരം ആണെന്ന് കൂട്ടിയാ മതി. എന്റെ മോളൊന്ന് ക്ഷമിക്കെടാ..
ദേ നിന്നേം കൊണ്ട് ചെല്ലാന ലച്ചു പറഞ്ഞേക്കുന്നെ…….
ഞാൻ പരമാവധി കെഞ്ചി. എന്ത് തേങ്ങയായാലും വേണ്ടില്ല.അവളൊന്ന് മിണ്ടി കണ്ടാൽ മതി.
“ഓഹ് അപ്പൊ അമ്മക്ക് വേണ്ടിയാണ് അല്ലാതെ സ്വന്തം ഇഷ്ടത്തിനല്ലാ..
വല്ലാതെ ചുവന്ന ആ ഉണ്ടക്കണ്ണുകൾ എന്നെ പേടിപ്പിച്ചു……
“എഴുതാപ്പുറം വായിക്കാൻ നിക്കാതെ.. ന്റെ കുട്ടി ഒന്ന് ചിരിച്ചേ.. എന്നിട്ട് ദേ ഒരു പഞ്ചാര ഉമ്മ തന്നെ ഏട്ടന്……
“ശ്രീകുട്ടിയോട് പോയി ചോദിക്ക്
എനിക്ക് സൗകര്യം ഇല്ലാ…. “
ഉടൻ തന്നെ മറുപടിഎത്തി
അത് കേട്ടപ്പോൾ ദേഷ്യം വന്നെങ്കിലും ഞാൻ പിടിച്ച് നിന്നു.
പിന്നെ ചിരിക്കാൻ ശ്രമിച്ചു.ഇത്രേം നേരമായിട്ടും അവളെന്റെ മുഖത്തേക്കൊന്ന് നോക്കീട്ട് കൂടെ ഇല്ല…
“നീ തരുന്നില്ലേൽ വേണ്ടാ ഞാനെന്തായാലും ഒരുമ്മ തരാൻ പോവാ….
ഞാൻ മുഖം അവളുടെ മുഖത്തോടടുപ്പിച്ചു..
“എന്നെ തൊട്ടാൽ തലയടിച്ചു പൊട്ടിക്കും പറഞ്ഞില്ലാന്നു വേണ്ടാ… !
അവൾ മുരണ്ടു…
“എന്നാലും വേണ്ടില്ല.. ഒരുമ്മ കിട്ടീട്ട് മരിക്കാലോ…
“ഹൗ…
ചിരിയോടെ മുഖം അടുപ്പിച്ചതും കരണത്ത്‌ തന്നെ കിട്ടി ഒരെണ്ണം.
ഞാൻ പിന്മാറാൻ ഒരുക്കമല്ലായിരുന്നു വീണ്ടും എന്റെ ഉദ്യമം തുടർന്നു.അപ്പോഴെക്കെ പുറത്ത് കനത്തിൽ അടി വീണു കൊണ്ടിരുന്നു.തൊട്ടടുത്ത നിമിഷം എന്നെ തള്ളി മറിച്ചിട്ടു കൊണ്ട് അവൾ എന്റെ മോളിൽ കിടന്നു..
കവിളിൽ അമർത്തിയുള്ള ഒരു കടി ആയിരുന്നു പിന്നീട്…
“ഞാൻ നിന്നെ ചതിച്ചു അല്ലേടാ നാറി…?
മുഖമുയർത്തി കൊണ്ട് അവൾ ചോദിച്ചു..
“സോറി പെണ്ണെ ഞാൻ അറിയാതെ പറഞ്ഞതാ..”
ഞാൻ അവളെ സാന്ത്വനിപ്പിക്കാൻ നോക്കി
“പിന്നെന്താ പറഞ്ഞെ.. എന്നെ നരകത്തീന്ന് ചേർത്ത് പിടിച്ചൂന്ന് ലെ.. ഇഷ്ടല്ലെങ്കിൽ ഇട്ടിട്ട് പൊയ്ക്കോ ആരുടേം സഹതാപം ഒന്നും എനിക്ക് വേണ്ടാ.. “
ശബ്ദമിടറിക്കൊണ്ട് പറഞ്ഞതും അവൾ കിടക്കയിലേക്ക് മറിഞ്ഞു പൊട്ടിക്കരയാൻ തുടങ്ങി ..
അത് പറഞ്ഞു പോയതിന് ഞാൻ എത്ര വേദനിച്ചൂന്ന് ഇവൾക്കറിയില്ലലോ..
ഞാൻ അവളുടെ അടുത്തേക്ക് നീങ്ങിയതും എന്നെ അമ്പരപ്പിച്ചു കൊണ്ട് അവൾ തിരിഞ്ഞു കിടന്ന് എന്നെ കെട്ടിപിടിച്ച് കഴുത്തിലേക്ക് മുഖം പൂഴ്ത്തി കരഞ്ഞു. ഞാൻ ഒന്നും മിണ്ടാതെ ആ പുറം തലോടിക്കൊണ്ട് കിടന്നു.
“തന്നേ….
കരച്ചില് കഴിഞ്ഞപ്പോൾ അവൾ മുഖമുയർത്തി കവിളിൽ തൊട്ട് കാണിച്ചു..
കേൾക്കേണ്ട താമസം ഞാൻ അവിടെ ചുണ്ടമർത്തി അവളെ ചുറ്റി വരിഞ്ഞു..
ഇവിടേം…
അവൾ നെറ്റിയിൽ വിരല് കുത്തി
ചിണുങ്ങി…
അങ്ങനെ മുഖം മുഴുവൻ അവളെന്നെ കൊണ്ട് ഉമ്മ വെപ്പിച്ചു.പിന്നെ വീണ്ടും കഴുത്തിലേക്ക് മുഖം പൂഴ്ത്തി.
“പിണക്കം മാറിയോ കുഞ്ഞൂന്റെ.?
അതിന് പിണങ്ങാൻ പറ്റീട്ട് വേണ്ടേ…?
ഷിർട്ടിനുള്ളിലൂടെ കൈ കടത്തി എന്റെ നെഞ്ചിലെ രോമങ്ങൾ വലിച്ച് വിട്ട് കൊണ്ട് അവൾ മറുപടി നൽകി..
വേദനിച്ചോ?
തല്ലിയ കവിളിൽ തലോടിക്കൊണ്ട് അവൾ ഉമ്മ വെച്ചു.
“സാരല്ല ഇതിൽ കൂടുതൽ ഞാൻ പ്രതീക്ഷിച്ചതാ..
ഞാൻ ചിരിയോടെ മറുപടി നൽകി.
അങ്ങനെ കിടക്കുമ്പോൾ ഞാൻ അച്ഛമ്മയുടെ കാര്യം വെളിപ്പെടുത്തി.അതിന്റെ ഞെട്ടലിൽ നിന്ന് മുക്തയാവാൻ അവൾ കുറച്ച് സമയം എടുത്തു.
“ഇനി ഒരിക്കലും ഏട്ടൻ കുഞ്ഞൂനെ വെഷമിപ്പിക്കൂലാ ട്ടോ
എന്റെ ജീവനാണ്….. “
അവളെ അമർത്തിയണച്ചുകൊണ്ടത് പറയുമ്പോൾ എന്റെ കണ്ണും നിറഞ്ഞിരുന്നു.
അതിന് മറുപടിയായി അവളെന്റെ മുഖത്ത് പലകുറി ഉമ്മവെച്ചു
