” പിന്നെ അവമാർക്ക് ഓരോ ചായ ഒക്കെ വാങ്ങി കൊടുത്തു അതാ വൈകിയെ ”
” ആ കൊച്ചേ എന്താ ഇങ്ങോട്ട് വരാത്തെ ”
” അവന്റെ കസിൻ കൂടെ ഇണ്ടായിരുന്നു. അവന് എവിടെയോ പോണം എന്നൊക്കെ പറഞ്ഞു അതാ ഞാൻ പിന്നെ അങ്ങോട്ടേക്ക് പോയെ ”
” അയ്യോ ആ കൊച്ചിന് ഇങ്ങ് വരാർന്നു ” ഞാൻ പിന്നെ ഒന്നും പറയാതെ അകത്തേക്ക് പോയി. ഒന്ന് ഫ്രഷ് ആയിട്ട് താഴേക്ക് വന്നു.
” നിനക്ക് ചായ വേണോ അച്ചു ”
” വേണ്ട ആന്റി എനിക്ക് ഇനി ഇന്ന് ഒന്നും വേണ്ട വയർ ഫുള്ളാണ് ”
” ആഹാ അപ്പ നന്നായിട്ട് കഴിച്ചിട്ട് ഉണ്ടല്ലോ ” ഗായത്രി പറഞ്ഞു.
” ഹാ ഉണ്ട് അതിന് നിനക്ക് എന്തേലും പ്രശ്നം ഉണ്ടോ” ഞാൻ അവളോട് ചോദിച്ചു
അവൾ ഷോൾഡർ അനക്കി ഇല്ലാ എന്ന് മറുപടി പറഞ്ഞു. ഞാൻ ആന്റിനെ നോക്കി അകത്തേക്ക് കേറി. കഴിച്ചു എന്ന് പറഞ്ഞത് കൊണ്ടാണോ എന്ന് അറിയില്ലാ രാത്രിയിൽ ആരും വിളിച്ചില്ല . ഞാൻ കൊറച്ച് നേരത്തെ എഴുന്നേറ്റു. ഫോൺ എടുത്ത് സമയം നോക്കിയപ്പോൾ 6 മണി നേരം വെളുക്കുന്നതേ ഒള്ളൂ ഞാൻ പയ്യെ ബാൽക്കെണിയിലേക്ക് നടന്നു. പെട്ടെന്ന് എന്റെ കാതുകളിൽ ശിവ കീർത്തനം കേൾക്കാൻ തുടങ്ങി. അത് എനിക്ക് വല്ലാത്ത ഒരു എനർജി ആയിരുന്നു തന്നത്. ഞാൻ വേഗം താഴേക്ക് ചെന്നു ആന്റി അവിടെ എന്തോ തിരക്ക് വെച്ച് പണിയിൽ ആണ്.
” ആ ഇന്ന് ഒരുപാട് നേരത്തെ ആണല്ലോ അച്ചു ” ആന്റി എന്നെ കണ്ടപ്പഴേ ചോദിച്ചു.
ഞാൻ ആന്റിനെ ഒന്ന് നോക്കി നിന്നുപോയി കാരണം എന്റെ അമ്മേനെ പോലെ തന്നെ കുളിച് ശുദ്ധിയായി നെറ്റിയിൽ ഒരു ചന്ദന കുറി ചാർത്തി. സാരിയുടെ തലപ്പ് ചുറ്റി ആന്റി.
” എന്ത്‌ പറ്റി അച്ചു നിനക്ക് ” ആന്റിയുടെ അടുത്ത വിളിയിൽ ഞാൻ ഉണർന്നു.
” ആന്റി ആ പാട്ട് കേൾക്കുന്ന അമ്പലം ഇവിടെ അടുത്താണോ ”
” ആ ഇവിടുന്ന് കൊറച്ച് ദൂരം ഒള്ളൂ. എന്താ അച്ചു നിനക്ക് പോണോ ”
” ഹാം ഒന്ന് പോണം എന്ന് തോന്നുന്നു ആന്റി ഞാൻ അമ്പലത്തിൽ പോയിട്ട് കൊറേ ആയി ”
” ആണോ എന്നാ നീ പോയിട്ട് വാ. വേണേൽ നീ അവളെ കൂടെ കൂട്ടിക്കോ ” അവളെയോ ഞാൻ ഒന്ന് ആലോചിച്ച് കൂട്ടണോ എന്ന്
” വേണ്ട ആന്റി ഞാൻ ഒറ്റക്ക് പൊക്കോളാം ” ഞാൻ വേഗം റൂമിലേക്ക് ചെന്ന് വേഗം കുളിച്ച് ഒരു പാന്റും ഷർട്ടും ഇട്ട് താഴേക്ക് ഇറങ്ങി.
” അച്ചു ”
” ആ ആന്റി ”
” നീ ഈ പാന്റ് ഇട്ടിട്ട് ആണോ പോകുന്നെ ”
” ആന്റി ഞാൻ മുണ്ട് ഒന്നും കൊണ്ടു വന്നില്ല അതാ ”
” നിക്ക് ഞാൻ തരാം നിനക്ക് മുണ്ട്. ഏട്ടൻ മുണ്ട് ഒക്കെ വാങ്ങും പക്ഷെ ഉടുക്കാറില്ല ഞാൻ തരാം നിനക്ക് വേണ്ടത് ഏതാ എന്ന് വെച്ച് നീ എടുത്തോ ” ആന്റി റൂമിലേക്ക് കേറി പോയി. ഞാൻ ആന്റിനെ കാത്ത് അവിടെ ഇരുന്നു പിന്നെ ആന്റി വന്നപ്പോൾ ഞാൻ ഞെട്ടി കാരണം
ഒരു ലോഡ് കൊണ്ടു വരുന്ന പോലെ കൊറേ മുണ്ട് അതും പാക്കറ്റിൽ നിന്ന് പൊട്ടിക്കാത്തത്.
” ഇത് എന്താ ആന്റി ഇത്രയും ” അമ്പരപ്പ് മാറാതെ ഞാൻ ആന്റിനോട് ചോദിച്ചു.
” ഇതൊന്നും അല്ല ഇനിയും ഉണ്ട് നീ തല്ക്കാലം ഇതൊക്കെ റൂമിൽ കൊണ്ടു വെച്ചോ” എന്ന് പറഞ്ഞു അതൊക്കെ എനിക്ക് തന്നിട്ട് ആന്റി അടുക്കളയിലേക്ക് പോയി.
ഞാൻ അതൊക്കെ ചുമന്ന് റൂമിൽ കൊണ്ടു വെച്ചു. ഒരു ഇളം നീല കളർ കരയുള്ള മുണ്ട് എടുത്തു അത് ഉടുത്ത് പുറത്തേക്ക് ഇറങ്ങി വണ്ടി സ്റ്റാർട്ട്‌ ചെയ്തു. അപ്പോൾ ആന്റി അകത്തുന്ന് വന്നു.
” അച്ചു മുൻപോട്ട് പോയി ആ പെട്ടിക്കടയുടെ സൈഡിൽ കൂടെ പോയാൽ മതി നേരെ അമ്പലം ആണ് ” ഞാൻ അതിന് തല കുലുക്കി വണ്ടി എടുത്ത് പോയി. ആന്റി പറഞ്ഞപോലെ ഞാൻ ഒരു അമ്പലത്തിന്റെ മുൻപിൽ ചെന്ന് നിർത്തി.
ബൈക്കിൽ നിന്ന് ഇറങ്ങി മുൻപിൽ ഒരു പടിക്കെട്ട് കേറി മുകളിലേക്ക് ചെന്നു. മുൻപിൽ വലിയ ഒരു ഗോപുരം അതിലേക്ക് എന്റെ കണ്ണുകൾ നീണ്ടു. പല തരത്തിൽ ഉള്ള കൊത്തുപണികൾ ഉള്ള ഗോപുരം അത് കണ്ടപ്പോൾ കണ്ണുകൾ അതിന്റെ പുറകെ പോയി. എത്ര നേരം ഞാൻ അതിൽ നോക്കി നിന്നു എന്ന് എനിക്ക് അറിയില്ലാ.
” എന്താ കുട്ടി തൊഴാൻ വന്നതല്ലേ ” കൊറച്ചു പ്രായം ഉള്ള ഒരാൾ എന്നോട് ചോദിച്ചു.
” ആ അതെ ”
” പിന്നെയെന്താ ഇവിടെ ഇങ്ങനെ നോക്കി നിൽക്കണേ ”
” അത് ഞാൻ അതൊക്കെ കണ്ടപ്പോൾ നോക്കി നിന്നതാ ”
” അതിൽ എന്താ അത്രക്ക് കാണാൻ ഉള്ളത് ”
” എന്താ അവിടെ ” ഒരു സ്ത്രീയുടെ ഗാംഭീര്യമുള്ള ശബ്ദം കേട്ടു.
” ഒന്നുമില്ല തമ്പുരാട്ടി. ഈ കുട്ടി എന്താ ഇവിടെ ഇങ്ങനെ നിൽക്കുന്നത് എന്ന് ചോദിച്ചതാ ”
” താൻ ഇങ്ങോട്ട് വരുക ” അത് പറഞ്ഞപ്പോൾ അയാൾ എന്റെ അടുത്തുന്ന് പോയി.
ഞാൻ അകത്തേക്ക് പോയി. കിഴക്കേ നടയിലൂടെ കേറി ശ്രീകോവിലിന്റെ മുന്നിൽ നിന്ന് തൊഴാൻ തുടങ്ങി പെട്ടെന്ന് ശബ്ദം കേട്ട് ഞാൻ കണ്ണ് തുറന്നു. മുന്നിൽ ഒരാൾ ഇടയ്ക്ക പിടിച്ച് അത് വായിക്കുന്നു കൂടെ സോപാനം പാടുന്നു
‘* വിശ്വേശ്വരായ നരകാർണ്ണവതാരണായ കർണ്ണാമൃതായ ശശിശേഖരധാരണയ
കർപ്പര കാന്തി ധവളായ ജടാധരായ
ദാരിദ്ര്യദു : ഖ ദഹനായ നമ : ശിവായ ായ ണായ………..*’ ആ സോപാനസംഗീതത്തിൽ ലയിച്ച് ഞാൻ അവിടെ നിന്നും. മനസ്സിന് വല്ലാത്ത ഒരു സന്തോഷം തോന്നി. ഞാൻ അവിടെ കൊറച്ച് നേരം ഇരുന്നിട്ട് ആണ് പ്രസാദം വാങ്ങി വന്നത്. പുറത്തേക്ക് ഇറങ്ങിയപ്പോൾ പുറത്ത് എന്നോട് സംസാരിച്ച ആളും ആ പ്രായമായ സ്ത്രീയും ഉണ്ടായിരുന്നു. അവർ ഒരു പഴയ ബെൻസ് കാറിൽ കേറി പോയി .
ഞാൻ ബൈക്ക് എടുത്ത് വീട്ടിലേക്ക് പോയി . വീട്ടിലേക്കു ബൈക്ക് വെച്ചു. ഞാൻ അകത്തേക്ക് ചെല്ലുമ്പോൾ ഒരാൾ ഇരുന്ന് നല്ല പോളിംഗ് ആണ്.
കൂടെ നിമ്മിയും ഉണ്ട്. എന്നെ കണ്ടപ്പോൾ അവൾ ഒരു ഗുഡ് മോർണിംഗ് പറഞ്ഞു.
ഞാനും ഗുഡ് മോർണിംഗ് പറഞ്ഞ് റൂമിലേക്ക് ചെന്ന് ഡ്രസ്സ്‌ മാറി താഴേക്ക് ഇറങ്ങി അപ്പോഴേക്കും അവര് പോയിരുന്നു.
” നീ എന്താ അച്ചു വൈകിയെ ”
” എന്റെ ആന്റി എനിക്ക് അവിടെന്ന് പോരാനെ തോന്നിയില്ല അത്രക്ക് ഇഷ്ടായി അമ്പലം ”
” ആഹാ. വേഗം കഴിച്ചിട്ട് പോകാൻ നോക്ക് സമയം ആകുന്നു. നീ ബൈക്ക് കൊണ്ടാണോ പോകുന്നെ ”
” അല്ല ആന്റി കൊറച്ച് ദിവസം കഴിഞ്ഞിട്ട് കൊണ്ടുപോകാം “
ഞാൻ വേഗം കഴിച്ച് ഇറങ്ങി. ഞാൻ റോഡിലേക്ക് ഇറങ്ങിയപ്പോൾ ഒരു ഫസിനോ എന്നെ ഓവർ ടേക്ക് ചെയ്തു പോയി. സമയം വൈകിയ കൊണ്ട് ഞാൻ ഒരു ഓട്ടോയിൽ കേറി ആണ് പോയത് .
ഞാൻ ഓട്ടോയിൽ നിന്ന് ഇറങ്ങി പൈസ കൊടുത്ത് അകത്തേക്ക് ഓടി ക്ലാസ്സിന്റെ മുൻപിൽ എത്തി ഉള്ളിലേക്ക് നോക്കി ഭാഗ്യം ടീച്ചർ വന്നിട്ടില്ല ഞാൻ ക്ലാസ്സിൽ കേറി ബാക്ക് ബെഞ്ചിലേക് നോക്കി അവർ രണ്ടും അവിടെ തന്നെ ഇരിപ്പുണ്ടാർന്നു.
ആവണി ഇടക്ക് ഇടക്ക് വാച്ചിൽ നോക്കുന്നുണ്ടായിരുന്നു. ഞാൻ വന്നത് അവൾ അറിഞ്ഞിട്ടില്ല. വാച്ചിൽ നിന്ന് തല പൊക്കി ഡോറിലേക്ക് നോക്കിയപ്പോൾ അവൾ എന്നെ കണ്ടു. ആ മുഖത്ത് എന്തെന്ന് ഇല്ലാത്ത സന്തോഷം നിറയുന്നത് ഞാൻ അറിഞ്ഞു. ദൈവമേ ഇത് എനിക്ക് പണിയാകുമോ എന്തോ . ഞാൻ ചെന്ന് അവരുടെ കൂടെ ഇരുന്നു.
