“ആദി…don’t worry…just ആ റൂമിനു മുൻപിലൂടെ ചെല്ലുന്നു ഉള്ളിലേക്കൊന്നു നോക്കുന്നു..ആളവിടെ ഉണ്ടെങ്കിൽ നല്ലൊരു ചിരിയും കൊടുത്തു തിരിച്ചു പോരുന്നു…സിംപിൾ….”
ഞാനവിടെ നിന്ന് എന്നെത്തന്നെ പ്ലാൻ എല്ലാം പറഞ്ഞു പഠിപ്പിച്ചു….
“ഒക്കെ…സെറ്റ്…”
ഒന്നൂടെ ശ്വാസം നീട്ടി വിട്ടുകൊണ്ട് ഞാൻ പറഞ്ഞു….ഉള്ളിലെല്ലാം വല്ലാത്തൊരു ധൈര്യം വന്നത് പോലെ
“എല്ലാം സെറ്റ് ആയെങ്കിൽ കുറച്ചൊന്നു മാറി നിൽക്കാമോ….?
അതെന്താ പിറകിൽ നിന്നൊരശരീരി……
പെട്ടന്ന് പ്രതീക്ഷിക്കാത്തൊരു സാനിധ്യം മനസിലാക്കിയ ഞാൻ തിരിഞ്ഞു നോക്കി
ചാരു……….അന്നിട്ട അതേ കളർ ചുരിദാറുമിട്ട് കൈ രണ്ടും മാറിൽ കെട്ടി എന്നെത്തന്നെ നോക്കി നിൽക്കുന്നു….ഇറങ്ങിയോടിയാലോ….
”എന്ത്…എന്താ മിസ്സ്…?
ഒരുവിധം വിക്കി തടഞ്ഞു കൊണ്ടു ഞാൻ ചോദിച്ചു….ധൈര്യം തന്ന തെണ്ടിയൊക്കെ എവിടെയോ പോയി ഒളിച്ചിരുന്നു
“നീയെന്താ ആദിത്യാ നിന്ന് വിയർക്കുന്നത്…?
ചുണ്ടിൽ പൊട്ടിവിരിഞ്ഞ ചിരിയുമൊതുക്കി വച്ചുകൊണ്ടവൾ ചോദിച്ചു….വിയർക്കുവല്ല ശെരിക്കും ഞാൻ…നിന്നുരുകി ഒലിച്ചു പോയിക്കൊണ്ടിരിക്കുവാ….
”അത് പുറത്തു നല്ല ചൂടല്ലേ മിസ്സ്…“
തലചൊറിഞ്ഞുകൊണ്ട് ഞാൻ പറഞ്ഞു…എവടെ ആൾക്കതു കേട്ടിട്ടൊരു വിശ്വാസമില്ലാത്തത് പോലാണ് നിൽപ്പ്…കവിളൊക്കെ ചുവന്നിട്ടുണ്ട്…അവൾക്കറിയാം അവളെ മുൻപിൽ കണ്ടാൽ എന്റെ ധൈര്യമെല്ലാം പോകുമെന്ന്….അത് മനസ്സിൽ വച്ചുകൊണ്ടുള്ള നിൽപ്പാണ്……മോനെ ആദിത്യാ….ഇത്രയേ ഉള്ളോടാ നീ…ഞാൻ എന്നെത്തന്നെ പുച്ഛിച്ചുകൊണ്ട് ധൈര്യം കൊടുക്കാൻ ശ്രമിച്ചു….കുറച്ചൊക്കെ ഫലം കണ്ടുകെട്ടോ
”മിസ്സിനും ചൂടെടുക്കുന്നുണ്ടെന്ന് തോന്നുന്നല്ലോ…തേണ്ടേ കവിളൊക്കെ ചുവന്നു വരുന്നു…“
ജന്മന കിട്ടിയ നല്ല ടോപ്പ് ക്ലാസ് ചിരിയോടെ ഞാൻ പറഞ്ഞു…ഇനി നീ കുറച്ചു നേരം നിന്ന് വിയർക്ക് മോളെ ചാരുലതെ….
എന്റെ ചോദ്യം കേട്ട പാടെ കെട്ടിവച്ചിരുന്ന കൈകൊണ്ടവൾ കവിളൊന്ന് തലോടി നോക്കി….പിന്നെ ചുണ്ടിൽ വിരിഞ്ഞ ചിരി ഞാൻ കാണാതിരിക്കാൻ ചുണ്ടുകൾ രണ്ടും ഒന്നുമറിയാത്ത വിധം മൂടി വച്ചു കൈ പത്തി കൊണ്ടു
എന്തായാലും മുൻപിൽ വന്നു പെട്ടു…ഇനി വിടില്ല എന്ന വാശിയിൽ ആയിരുന്നുഞാൻ
“പിന്നെ ചാരു മിസ്സേ…എനിക്കൊരു കാര്യം ക്ലിയർ ചെയ്യാൻ ഉണ്ടായിരുന്നു…”
വളരെ പ്രധാനപ്പെട്ട കാര്യം പറയാനുണ്ടെന്ന വിധത്തിൽ ഞാൻ പറഞ്ഞു…അല്ലെങ്കിൽ എന്റെ അഭിനയം കൊണ്ടവളെ വിശ്വസിപ്പിച്ചു
ക്ലാസ്സുമായി ബന്ധപ്പെട്ട എന്തെങ്കിലും ആയിരിക്കുമെന്ന് കരുതിയ പാവമെന്റെ ചാരു പെട്ടെന്ന് തന്നെ അധ്യാപകയായി മാറി…അല്ലെങ്കിലാ ബാധ കയറി എന്ന് പറയുന്നത് ആവും ശെരി
“പറയു…”
അറിയാനുള്ള ആകാംഷയിലവളുടെ നീളൻ കണ്ണുകളിലെ കറുത്ത കൃഷ്ണമണിയുടെ വലുപ്പം കൂടി വന്നു
“ഇന്നലെ ഞാൻ കൊറേ ആലോചിച്ചു……ഇതുവരെ തോന്നിയതൊരു അട്ട്രാക്ഷൻ മാത്രമാണ് ഞാൻ പറയില്ല….വേറാരൊടും തോന്നാത്തൊരിഷ്ടമായിരുന്നു…അതിനെ അട്ട്രാക്ഷൻ എന്നൊരു പേരു പറഞ്ഞു വില താഴ്ത്തി കാണാൻ എനിക്ക് പറ്റില്ല….പിന്നെ പോസ്സിബിൾ ആണോന്നുള്ള ചോദ്യം….ഞാൻ ഇന്നലെയെന്റെ അമ്മയോട് ചോദിച്ചു ഇതിനെപ്പറ്റി….അമ്മക്ക് എന്നെ വിശ്വാസമാ…എന്റെ തീരുമാനങ്ങൾ ഒരിക്കലും തെറ്റില്ലെന്ന വിശ്വാസം….അച്ഛനും എന്നെ വിശ്വസിക്കും……….ഇനി ചോദിക്കാനുള്ളത് ചാരുവിനോടാ…”
വളരെ സാവധാനം ഞാനെന്റെ മനസ്സിലപ്പോ തോന്നിയ കാര്യങ്ങൾ അവളോട് പറഞ്ഞു….മനസ്സിലുള്ളത് പറയുമ്പോളും എന്റെ കണ്ണുകൾ അവളുടെ മുഖത്തു തന്നെ ആയിരുന്നു…..ആദ്യമൊരു അത്ഭുതത്തോടെയും പേടിയോടെയുമെന്റെ വാക്കുകൾ കേൾക്കുകയായിരുന്നെങ്കിലും പിന്നീട് അമ്മയുടെയും അച്ഛന്റെയും കാര്യങ്ങളിലേക്ക് എത്തിയപ്പോ അവിടെയുള്ള പേടിമാറി പകരം നാണം കൊണ്ടാ കവിളുകൾ പിന്നെയും ചുവന്നു വന്നത് ഞാൻ കണ്ടിരുന്നു…ആ ഒരൊറ്റ വിശ്വാസത്തിലാ ഇവളോട് ഞാനിപ്പോ ഈ കാര്യം ചോദിക്കാൻ പോണത്