അവളവിടെക്കിടന്ന് കറങ്ങുന്നുണ്ടായിരുന്നു.
“” അതേയ്… ചിക്കൻ ഞാനുണ്ടാക്കാണോ..?! “”
ഞാൻ ശ്രെദ്ധിക്കുന്നില്ല എന്ന് കണ്ടതും അവള് ചോദിച്ചു.
അത് കേട്ട് ഞാനവളെയൊന്ന് നോക്കി.
“” ഒരു ദോശചുടാനറിയാത്ത നിന്നെ ഞാമ്മിശ്വസിക്കണോന്ന് ആണോ പറഞ്ഞുവരുന്നേ…!! “”
അന്ന് ദോശ വേണേൽ ഉണ്ടാക്കിതിന്നോ എന്ന് പറഞ്ഞപ്പോൾ അവൾ അറിയില്ല എന്ന് പറഞ്ഞതോർത്ത് ഞാൻ പറഞ്ഞു.
“” അത് ദോശ വീട്ടിലാർക്കുമിഷ്ടല്ല… അതോണ്ട്ണ്ടാക്കി ശീലമില്ലാഞ്ഞിട്ടാ..!! “”
അവള് വിശദീകരിച്ചപ്പോൾ ഞാനൊന്ന് ചിന്തിച്ചു.
“” അപ്പൊ നിനക്കിതൊക്കെ ഉണ്ടാക്കാനറിയാവോ…? “”
അതിനവള് പാവ തലകുലുക്കണപോലെ തലയിട്ടിളക്കി.
അവൾക്കറിയാമെങ്കിൽ അതല്ലേ നല്ലത്…! വെറുതേ അറിയാത്ത ഞാനെന്തിന് റിസ്ക് എടുക്കണമെന്നൊരു ചിന്ത മനസ്സിൽ വന്നപ്പോൾ ഞാനവളോട് ചെയ്തോളാൻ പറഞ്ഞു.
അതിനവളുടെ മുഖത്തെയാ സന്തോഷമൊന്ന് കാണേണ്ടതായിരുന്നു.
ഇവളിതൊക്കെയറിഞ്ഞിട്ട് തന്നെയാണോ എന്നൊരു സംശയമുള്ളതുകൊണ്ട് മാത്രം അവള് എന്താണ് ചെയ്യുന്നതെന്നും നോക്കി ഞാനവിടെത്തന്നെ നിന്നു.
അവളാദ്യം ചിക്കൻ ക്ലീൻ ചെയ്യാൻ തുടങ്ങി. അത് നല്ലപോലെ കഴുകി ഒരു പത്രത്തിലേക്ക് മാറ്റി. പിന്നെ അതിലേക്ക് ഉപ്പും കുരുമുളകും മഞ്ഞൾപൊടിയും ചേർത്ത് നന്നായി ചേർത്ത് പിടിപ്പിച്ചു. ഇതൊക്കെ നടക്കുമ്പോഴേക്ക് നേരത്തേ ഞാൻ അടുപ്പിൽ കയറ്റിയിരുന്ന കുക്കർ മൂന്ന് വിസിലായിക്കഴിഞ്ഞിരുന്നു. ഞാൻ അത് അടുപ്പിൽനിന്നിറക്കിവച്ചു.
അവൾ കുക്കറിൽനിന്ന് ചോറ് മറ്റൊരു പത്രത്തിലേക്ക് മാറ്റിയിട്ട് അത് കഴുകി അതിലേക്ക് മസാല പിടിപ്പിച്ച് വച്ച ചിക്കൻ എടുത്തിട്ടു. പിന്നെ കുറച്ച് വെള്ളവുമൊഴിച്ചു. ഇവളിതെന്ത് തേങ്ങയാ ഈ ചെയ്യണേ എന്നൊരു ഭാവത്തോടെ ഞാനവളേം നോക്കി നിക്കുകയാണുണ്ടായത്.
ഇതൊന്നും നേരത്തെക്കണ്ട വിഡിയോയിൽ ഇല്ലായിരുന്നല്ലോ…! ഇനിയിവൾക്ക് ഇതെപ്പറ്റി വല്യപിടിയൊന്നുമില്ലാഞ്ഞിട്ടാണോ…?!
പക്ഷേ അവളുടെയാ കോൺഫിഡൻസ് കണ്ടിട്ട് അറിയാത്തപോലെയൊന്നും തോന്നണുവില്ല.
വറുത്തെടുത്തിരുന്ന അണ്ടിപ്പരിപ്പും മുന്തിരിയും ഉള്ളിയുമൊക്കെ നെയ്‌ച്ചോറിന് മുകളിൽ വിതറി ഞാൻ അതൊന്ന് ടേസ്റ്റ് ചെയ്ത് നോക്കി. വല്യ തരക്കേടില്ലാണ്ട് സംഭവം റെഡിആയിട്ടുണ്ട്.
അവള് കുക്കർ അടച്ച് വച്ച് ബാക്കി പണിയിലേക്ക് കടന്നു. ഒരു ഉരുളിപോലുള്ള പാത്രമെടുത്ത് അതിലേക്ക് കുറച്ചെണ്ണ ഒഴിച്ചു. അതൊന്ന് ചൂടായി വന്നപ്പോ ബാക്കിയുണ്ടായിരുന്ന ഉള്ളിയെടുത്ത് അതിലിട്ട് വഴറ്റിത്തുടങ്ങി. അതിലേക്ക് കുറച്ച് കറിവേപ്പില കൂടി ഇട്ടു.
കുക്കർ ഒരുവിസിൽ അടിച്ചപ്പോൾ അവൾ ചിക്കൻ അടുപ്പീന്ന് ഇറക്കി.
ഞാനിതൊക്കെ ചെറിയൊരു കൗതുകത്തോടെ നോക്കിയിരുന്നു. അപ്പൊ ഇവക്കിതൊക്കെ അറിയായിരുന്നല്ലേ…!
ഉള്ളിയൊക്കെ ഒന്ന് മൂത്ത് വന്നതും മുറിച്ചുവച്ചിരുന്ന തക്കാളിയും കൂടെ അതിലേക്ക് ഇട്ടു. പിന്നെ മുളക് പൊടി മഞ്ഞൾപൊടി കുരുമുളക് പൊടി ഇതൊക്കെ ചേർത്ത് ഇളക്കി.
പിന്നെ കുക്കറിൽ ഇട്ട് വേവിച്ചിരുന്ന ചിക്കൻ കൂടെ അവളതിലേക്ക് ഇട്ടു.
അപ്പൊ അവിടെ പരന്ന ആ മണം.
‘ ഹെന്റെ സാറേ…..!!’
വായിൽ വെള്ളം നിറഞ്ഞുപോയി. ഒരു കപ്പല് കിട്ടിയിരുന്നേ വായിലൂടെ ഓടിച്ച് കളിക്കായിരുന്നു.!!
അവൾ തീ കുറച്ചുവച്ച് കറി നല്ലപോലെ ഇളക്കി. പിന്നെ അവസാനവട്ട ജോലിപോലെ ബാക്കിയുണ്ടായിരുന്ന മുളകും ഇഞ്ചിയും വെളുത്തുള്ളിയുമൊക്കെ അതിലേക് ചേർത്തു. കുറച്ചുനേരം കൂടെ അതൊന്ന് തിളക്കാൻ വിട്ടിട്ട് അവൾ സ്റ്റവ് ഓഫ് ചെയ്തിട്ടെന്നെ നോക്കിയൊന്ന് ചിരിച്ചു.
അതിന് ഞാനുമവളെനോക്കിയൊന്ന് ചിരിച്ചു.
ഒന്നുവില്ലേ ചിക്കനൊക്കെ ഉണ്ടാക്കിത്തന്നെയല്ലേ… ചിരിക്കാഞ്ഞിട്ട് ഫീലായിട്ടവള് അത് തൊടാമ്പോലും സമ്മതിച്ചില്ലേ അതിലും വല്യനാണക്കേട് വേറെയില്ല..!!
“” അപ്പൊ ഉണ്ടാക്കാനറിയാന്ന് ചുമ്മാ പറഞ്ഞതല്ലാലെ…!! താൻ ചുമ്മാ തള്ളിയതാന്ന് ഓർത്ത് നിക്കുവായിരുന്നു ഞാൻ… “”
പക്ഷേ അവളതിന് മറുപടിയൊന്നും തന്നില്ല. വെറുതെയൊന്ന് ചിരിച്ചുകാണിക്കുകമാത്രം ചെയ്തു.
‘ഹൊ…! ഒരു ചിക്കങ്കറി ഉണ്ടാക്കിയപ്പോഴേക്കവളുടെ ജാഡ നോക്കിക്കേ… ഏപ്പരാച്ചി..!! ഇക്കണക്കിനിവള് വല്ല ബിരിയാണിയെങ്ങാനും ഉണ്ടാക്കിയാലെന്തായിരിക്കും..!!”
മനസിലവളെ തെറിയുമ്പറഞ്ഞ് ഞാൻ കഴിക്കാനായ്
കുറച്ച് നെയ്ചോറും ചിക്കനും എടുത്തുകൊണ്ട് ഡൈനിംഗ് ടേബിളിൽ ചെന്നിരുന്നു.
മൊത്തത്തിലുള്ളയാ മണം…! കൊതിയായിട്ട് പാടില്ല.
സത്യത്തിലെനിക്കിപ്പോ താടകയോട് കുറച്ച് ബഹുമാനമൊക്കെ തോന്നണുണ്ട്.
ഒന്നുവില്ലേ നമുക്കറിയാത്ത കാര്യം ചെയ്യുമ്പോ അതങ്ങീകരിച്ചുകൊടുക്കാനുള്ള മനസെനിക്കുണ്ടെന്ന് കൂട്ടിക്കോ..!
അവളും ഒരുപാത്രത്തിലേക്ക് ഫുഡ് വിളമ്പി അതുമെടുത്ത് എന്റെ ഓപ്പോസിറ്റ് സൈഡിൽ വന്നിരുന്നു.
അവളുടെ ശ്രദ്ധ എന്നിലായിരുന്നു. ഒരു കൊച്ചുകുട്ടിയുടെ കൗതുകത്തോടെ അവളെന്നെ നോക്കിയിരിക്കുന്നുണ്ട്.
‘ഇനിയെന്റെ മുഖത്ത് എന്തേലുവിരിപ്പുണ്ടോ…!! ‘
പക്ഷേയാ ചിന്തയെ ഒക്കെ പട്ടിവിലകൊടുത്ത് ഞാൻ മാറ്റിവച്ചു. വിശന്ന് വയറമ്മയ്ക്ക് വിളിച്ചോണ്ടിരിക്കുമ്പോ ഉണ്ടാക്കിവച്ച ഫുഡും മുന്നിൽവച്ച് അവളെന്നെനോക്കണതെന്തിനാണെന്ന് കണ്ടുപിടിച്ചാലെനിക്ക് ‘ഗുരുജി’ ക്യാഷ്യൊന്നും തരാമ്പോണില്ലല്ലോ….!!
അതുകൊണ്ട് മാത്രം അവളുടെ നോട്ടം കാര്യമാക്കാതെ ഞാൻ കഴിക്കാൻ തീരുമാനിച്ചു.
ചിക്കന്റെയാ കളറും മണവും ഒക്കെ കാണുമ്പഴേ വായിൽ വെള്ളം നിറയുന്നു.
എല്ലില്ലാത്ത ഒരു കഷ്ണം ചിക്കനെടുത്ത് ഞാൻ നേർത്ത ഒരു ചിരിയോടെ വായിൽ വച്ചു.
അതിന്റെ രുചി നാവിലറിഞ്ഞതുമെന്റെ കണ്ണ് തള്ളിപ്പോയി.!!
എരിഞ്ഞണ്ടം കീറിപ്പോയീന്ന്…! അമ്മാതിരിയെരുവ്…
പുറത്തേക്ക് തുപ്പാനാണ് വാതുറന്നതെങ്കിലും അപ്പോഴത്തെ വെപ്രാളത്തിലതകത്തോട്ടിറങ്ങിപ്പോയി.
അന്നനാളമൊക്കെ കത്തിപ്പോയെന്ന് തോന്നണു…!
വായീന്ന് പുറത്തേക്ക് പോകുന്നത് ശ്വാസമാണോ അതോ തീയാണോയെന്ന് കൺഫ്യൂഷനടിച്ച് വട്ടായിനിക്കുവായിരുന്നു ഞാൻ !!
“” ഹാാാാ…..!! വെള്ളം… വെള്ളം !! “”
“” എന്താ… ന്താപറ്റിയെ..! “”
ഒരുവെപ്രാളത്തോടെ താടക ഒരുഗ്ലാഡ് വെള്ളമെടുത്തെനിക്ക് നേരെ നീട്ടിക്കൊണ്ട് ചോദിച്ചു.
പക്ഷെയതിനു മറുപടികൊടുക്കാമ്പറ്റുന്ന അവസ്ഥയിലല്ലല്ലോ ഞാൻ.
വെള്ളം കുടിച്ചപ്പഴാണ് അതബദ്ധമായെന്ന് മനസിലായത്. എരുവ് മൊത്തത്തിൽ വ്യാപിച്ചു.!!
കുറച്ചുമുന്നേ വായിക്കൂടെയോടിച്ച കപ്പല് ഇപ്പൊ വേണേ കണ്ണീക്കൂടെ ഓടിക്കാം…!! അതുപോലാണ് കണ്ണിക്കൂടെ വെള്ളം വരണത്.
“” ഡീ… നീയിത് മനപ്പൂർവം ചെയ്തയല്ലേ…! എന്നോട് പകരമ്മീട്ടാൻ…!! “”
എരുവൊന്നടങ്ങിയതും ഞാനവളോട് അലറി.
“” ഞാനെന്ത്ചെയ്തൂന്നാ…. എന്താന്ന് തെളിച്ച്പറ…!! “”
“” ഓഹ്… എന്താ അഭിനയം..!! നിനക്ക് ഞാനോസ്കാറ് വാങ്ങിത്തരാടി കോപ്പേ… അവൾടെമ്മൂമ്മേടെ…!””