അങ്ങിനെയാണവൻ രാമേട്ടന്റെ ടീമിൽ വന്ന് പെട്ടത്..
ആദ്യ ദിവസം തന്നെ രാമേട്ടന് അവനെ ഇഷ്ടമായി.. ഒരു മടുപ്പുമില്ലാതെ ആസ്വദിച്ച് അവൻ ജോലി ചെയ്യുന്നത് കണ്ട് രാമേട്ടന് അവനെ ശരിക്കും പിടിച്ചു..
പതിയെപ്പതിയെ രാമേട്ടനും, ഉമ്മറും സുഹൃത്തുക്കളായി..
അവർ പരസ്പരം എല്ലാം തുറന്ന് പറഞ്ഞു..
തന്റെ വീടിനെപ്പറ്റിയും, വീട്ട് കാരെ പറ്റിയുമെല്ലാം ഉമ്മർ വിശദമായി രാമേട്ടനോട് പറയും.
രാമേട്ടൻ പക്ഷേ, എല്ലാമൊന്നും പറഞ്ഞില്ല..
ഉമ്മർ പണി കഴിഞ്ഞാൽ ദിവസവും ബാറിൽ കയറും..
കൂടുതലായി അടിക്കില്ല..
എന്നാലും ബാറിലെ ഭക്ഷണം അവനിഷ്ടമാണ്..
ചിക്കനും ബീഫും അവൻ നന്നായി കഴിക്കും..
സുഹൃത്തുക്കളായതിൽ പിന്നെ രാമേട്ടനെ എന്നുമവൻ ബാറിലേക്ക് വിളിക്കും..
ഭാര്യയെ പേടിയുള്ള രാമേട്ടൻ ഇത് വരെ ഉമ്മറിന്റെ കൂടെ പോയിട്ടില്ല..
വീട്ട്കാരെ പറ്റിയൊക്കെ ഉമ്മർ തിരക്കാറുണ്ടെങ്കിലും രാമേട്ടൻ ഒന്നും വിട്ട് പറയാറില്ല..
അത് കേൾക്കുന്നത് തന്നെ രാമേട്ടന് വിഷമമാണ്..
വീട്ടിൽ നിന്ന് കുറച്ചകലെയാണ് ഇന്ന് രാമേട്ടന് പണി..
അഞ്ച് മണിക്ക് പണി നിർത്തി എല്ലാരും പോകാനൊരുങ്ങി..
ഉമ്മറിന് ഒരു ചപ്പടാച്ചി ബൈക്കുണ്ട്..
അതിലാണവന്റെ വരവും പോക്കും..
നടന്ന് തുടങ്ങിയ രാമേട്ടന് അടുത്ത് ഉമ്മർ ബൈക്ക് നിർത്തി..
“രാമേട്ടാ കയറ്… ഞാൻ വീട്ടിലാക്കാം..”
“വേണ്ടെടാ… ഇവിടുന്ന് ഓട്ടോ കിട്ടും…ഞാനതിൽ പൊയ്ക്കോളാം… “
രാമേട്ടൻ ഒഴിഞ്ഞ് മാറി..
“ ദേ.. രാമേട്ടാ… ഞാനേതായാലും ആ വഴിക്കാ… ഇങ്ങോട്ട് കയറിക്കേ…”
രാമേട്ടന് കയറാതെ മാർഗമില്ലായിരുന്നു..
അയാൾ പിന്നിൽ കയറിയതും ഉമ്മർ ഒരിരമ്പലോടെ ബൈക്ക് മുന്നോട്ട് കുതിപ്പിച്ചു..
രാമേട്ടൻ മരണപ്പിടുത്തം പിടിച്ചു.. മുന്നിലുള്ള വാഹനങ്ങളെ വെട്ടിമാറ്റി ഉമ്മർ ബൈക്ക് പറപ്പിച്ചു..
മെല്ലെപ്പോക്കൊന്നും അവന് അറിയുകയേ ഇല്ല..
തന്റെ വീട്ടിലേക്കല്ലെന്നും, ഇത് ടൗണിലേക്കുള്ള വഴിയാണെന്നും രാമേട്ടന് മനസിലായപ്പൊഴേക്കും ഉമ്മർ ബാറിന്റെ പാർക്കിംഗിൽബൈക്ക് കൊണ്ട് ചെന്ന് നിർത്തിയിരുന്നു..
“രാമേട്ടാ… ഇറങ്ങ്… ഇന്നെന്റെ വക
ചിലവ്…”
ബൈക്ക് ഓഫാക്കിക്കൊണ്ട് ഉമ്മർ പറഞ്ഞു..
“വീട്ടിലേക്കെന്ന് പറഞ്ഞ് ഇങ്ങോട്ടാണോടാ നീയെന്നെകൊണ്ട് വന്നേ…?”
വണ്ടിയിൽ നിന്നിറങ്ങി പേടിയോടെ രാമേട്ടൻ ചോദിച്ചു.
“ഉം… എന്തേ.. രാമേട്ടൻ കുടിക്കില്ലേ..?”
“കുടിക്കും… പക്ഷേ ഇന്ന് വേണ്ട… ഞാൻ വീട്ടിൽ പോട്ടെ ഉമ്മറേ…”
ദയനീയമായി രാമേട്ടൻ പറഞ്ഞു..
“ശരി… നിങ്ങള് കുടിക്കണ്ട… എന്നാലും എന്റെ കൂടെ വരണം…
എനിക്ക് കുടിക്കണം…
എനിക്ക് ചില കാര്യങ്ങൾ രാമേട്ടനോട് പറയാനുമുണ്ട്…”
“എന്റെ പൊന്നു മോനേ…നിനക്കെന്ത് പറയാനുണ്ടെങ്കിലും നാളെ പണി സൈറ്റിലെത്തിയിട്ട് പറയാം..
ഇപ്പത്തന്നെ വൈകിയെടാ… “
രാമേട്ടന് വെപ്രാളമായി..
“നിങ്ങളെന്താ രാമേട്ടാ… സ്കൂൾ കുട്ടിയോ… ?.
വൈകിയെന്നും പറഞ്ഞ് ഇത്രക്ക് വെപ്രാളപ്പെടാൻ.. ?”..
എങ്ങിനെയാണ് ഇവനെയൊന്ന് പറഞ്ഞ് മനസിലാക്കുക എന്നറിയാതെ രാമേട്ടൻ കുഴങ്ങി.
ഉമ്മർ, രാമേട്ടന്റെ കയ്യും പിടിച്ച് ബാറിനുള്ളിലേക്ക് കയറിക്കഴിഞ്ഞു..
ഒഴിഞ്ഞൊരു മൂലയിലേക്ക് ഉമ്മർ, രാമേട്ടനെ പിടിച്ചിരുത്തി..
“രാമേട്ടൻ കുടിക്കണ്ട… എന്തേലും ഭക്ഷണം കഴിക്കാലോ… ?.
എനിക്ക് ചില കാര്യങ്ങൾ പറയാനുണ്ട്..അത് കഴിഞ്ഞിട്ട് ഞാൻ തന്നെ വീട്ടിൽ കൊണ്ട് ചെന്നാക്കാം…”
ഉമ്മർ മദ്യത്തിനും, ഭക്ഷണത്തിനും ഓർഡർ കൊടുത്തു.
ഭക്ഷണം മുന്നിലെത്തിയിട്ടും രാമേട്ടൻ തൊട്ട് പോലും നോക്കിയില്ല..ഉമ്മർ മദ്യം ഗ്ലാസിലേക്കൊഴിച്ച് വെള്ളം ചേർത്ത് ഒറ്റവലിക്കടിച്ചു..
“ എടോ മനുഷ്യാ.. ഇത് നിങ്ങൾക്ക് തിന്നാൻ കൊണ്ടു വെച്ചതാ… എടുത്ത് കഴിക്ക്…”
പൊറോട്ട പ്ലേറ്റിലേക്ക് പിച്ചിയിട്ടു കൊണ്ട് ഉമ്മർ പറഞ്ഞു..
“ എന്റെ പൊന്നു ഉമ്മർകുട്ടീ… നീയെന്നെ ബുദ്ധിമുട്ടിക്കല്ലെ…എനിക്കൊന്നും വേണ്ട…
നീ പറയാനുള്ളത് പറ…”
രാമേട്ടൻ കരച്ചിലോളമെത്തിയിരുന്നു..
ഉമ്മർ ചിക്കനും കൂട്ടി പൊറോട്ട അടിച്ച് കയറ്റി , ഒരു പെഗ് കൂടി വീശി..