അച്ചായൻ പറഞ്ഞ കഥ… അർജുന്റെ റിയ കുട്ടി .. നിലാവ് പോലെ വന്നവൾ 4
Achayan Paranjakadha Arjunte Riyakutty Nilavu pole Vannaval Part 4 |
Author : Eakan | Previous Part
പോലീസ് സ്റ്റേഷൻ
ഞാൻ സ്റ്റേഷനിന്റെ അകത്തേക്ക് കയറി.. അവിടെ ഒരുവശത്തു ഒരു ബെഞ്ചിൽ നാലുപേര് ഇരിക്കുന്നുണ്ട്.. അതിൽ ഒന്ന് ഇക്കയാണ്.. ഇക്കയുടെ അടുത്തിരിക്കുന്നത് റിയകുട്ടിയുടെ ചെറിയുമ്മ ആയിരിക്കണം… അവിടെ കുറച്ചു മാറി ഒരു പയ്യൻ ഇരുന്നിട്ടുണ്ട്… പിന്നെ ഒരു കിളവനും.. പൈയ്യനെ ഞാൻ മുൻപ് കണ്ടിട്ടുണ്ട് … കിളവനെ മുൻപ് കണ്ടിട്ട് ഇല്ല.
എന്നെ കണ്ട ഉടനെ ഇക്ക എഴുനേറ്റ് എന്റെ അടുത്തേക്ക് വന്നു പറഞ്ഞു.
“സാറെ ഞങ്ങളെ സഹായിക്കണം.. ഞങ്ങളെ ഇവിടുന്ന് രക്ഷിക്കണം. ”
“അതിന് ഇക്ക എന്ത് തെറ്റ് ചെയ്തിട്ടാ ഇവിടെ പിടിച്ചു കൊണ്ട് വന്നത്?.. ഇതാരാ ഇക്കയുടെ കൂടെ ഉള്ളത്.?”
“ഇതെന്റെ കെട്യോൾ ആണ് സാറെ… സുബൈദ. ഞങ്ങളെ ഇവിടെ എന്തിനാണ് കൊണ്ടുവന്നതെന്ന്
അറിയില്ല സാറെ. ഞങ്ങള് വീട്ടിൽ സംസാരിച്ചിരിക്കയായിരുന്നു. അപ്പോഴാ പോലീസ്കാർ വന്നു ഞങ്ങളെ പിടിച്ചു കൊണ്ട് വന്നത്… ”
“അപ്പൊ!!! ഇക്കയുടെ മക്കളോ? ”
അവർ വീട്ടിൽ ഉണ്ട്..
ആസമയം അവിടെ വന്ന കോൺസ്റ്റബിൾ ചോദിച്ചു.,.
ആരാ..? എന്താ വേണ്ടത്,?
“സാറെ എന്റെ പേര് അർജുൻ.. ഇക്കയെ ഇവിടെ കൊണ്ട് വന്നിട്ടുണ്ട് എന്നിറിഞ്ഞു വന്നതാ…. ഇതിപ്പോ എന്താ സാറെ കേസ്? ”
“അതിന്നും പറയാൻ പറ്റില്ല.. പല കേസും ഉണ്ട്… ഒരു പെൺകുട്ടിയുടെ സമ്മതം ഇല്ലാതെ നിർബന്ധിച്ചു വിവാഹം കഴിപ്പിക്കാൻ ശ്രമിച്ചു… അതിനു വേണ്ടി വിവാഹ പ്രായം എത്തുന്നതിനു മുൻപേ പീഡനം.. കേസ് പോസ്കോ.. ആവാൻ ആണ് സാധ്യത.. ”
“സാറെ പീഡനമോ “?
“ആ അതേ മാനസീകമായും,, പട്ടിണിക്കിട്ടും.. എല്ലാം പീഡനം തന്നെ. ജാമ്യം പോലും കിട്ടാൻ ചാൻസ് ഇല്ല..” .
“സാറെ ആരെകൊണ്ടെങ്കിലും വിളിച്ചു പറയിച്ചാൽ രക്ഷയുണ്ടോ സാറെ? ”
“ഒരു രക്ഷയും ഇല്ല.. വിളിച്ചു പറയുന്നവർ കൂടെ തൂങ്ങും… ഇത് സി ഐ സാർ നേരിട്ട് വിളിച്ചു പറഞ്ഞു എടുത്ത കേസ് ആണ്.. പോരാത്തേന്.. മജിസ്ട്രേസിന്റെ ഓഫീസിൽ നിന്നുപോലും വിളിച്ചു.. സാറിന് ഇതിൽ പങ്ക് ഇല്ലെങ്കിൽ വേഗം പോയിക്കോ അല്ലെങ്കിൽ സാറും ഇതിന്റെ കൂടെ തൂങ്ങും.. ”
“S I സാറുണ്ടോ.. ഒന്ന് സംസാരിച്ചു നോക്കാൻ..?”
“S I സാറില്ല… സാർ പുറത്തു പോയിരിക്കുകയാ.. ഒരു കൂട്ട് പ്രതി കൂടെ ഉണ്ട് . അവരെ പൊക്കാൻ പോയതാ.. കാണണമെങ്കിൽ ഇവിടെ എവിടെയെങ്കിലും ഇരിക്ക് സാറിപ്പോൾ എത്തും. ”
“അപ്പൊ സാറെ ഇതിൽ നിന്ന് രക്ഷപെടാൻ എന്താ ഒരു വഴി. ”
“ഒരു വഴിയേ ഉള്ളൂ … കേസ് കൊടുത്ത ആളുടെ കാല് പിടിച്ചു കരഞ്ഞു പറഞ്ഞു നോക്കുക,. ചിലപ്പോൾ രക്ഷപെടാൻ കഴിഞ്ഞേക്കും.. ”
ഞാൻ വീണ്ടും ഇക്കയോട് ചോദിച്ചു..
“എന്താ ഇക്ക ഈ കേൾക്കുന്നത്? നിങ്ങളും ഇതിന് കൂട്ട് നിന്നോ? എന്നാപ്പിന്നെ ജയിൽ ഒന്ന് കണ്ടിട്ട് വാ … എത്ര കൊല്ലം കിടക്കേണ്ടിവരും എന്ന് പറയാൻ കഴിയില്ല.”
ഇക്കാക്ക് ഏകദേശം കാര്യങ്ങൾ പിടികിട്ടി കാണും ഇതിന്റെ പിന്നിൽ ആരാണെന്ന്.. പക്ഷെ എങ്ങനെ കൃത്യമായി ആ സമയം പോലീസ് എത്തി.. അതായിരിക്കും ഇക്കയ്ക്ക് മനസ്സിൽ ആവാത്തത്…
“പ്ലീസ് സാറെ രക്ഷിക്കണം… സാർ വിചാരിച്ചാൽ നടക്കും…. പക്ഷെ ഇതിനെല്ലാം കാരണം ഇവളാണ്.. ഇവള് കിടക്കട്ടെ ജയിലിൽ.. എന്നിട്ട് പഠിക്കട്ടെ.. അല്ലാതെ ഞാൻ എന്ത് പറയാനാണ് സാറെ ” ഇക്ക പറഞ്ഞു.
ഞാൻ തിരിഞ്ഞു ആ ചെറുപ്പക്കാരനെ നോക്കി..
” നമ്മൾ മുൻപ് കണ്ടിട്ടുണ്ടല്ലോ? എന്തായിരുന്നു പേര് പറഞ്ഞത്? ”
“ഫൈസി ..ഫൈസൽ ”
“ഇതാരാ. ഇതാണോ ഉപ്പൂപ്പ… കല്യാണ ചെക്കൻ.. പ്രായം വളരെ കുറഞ്ഞു പോയല്ലോ? എന്തായാലും കൊള്ളാം … ഉപ്പൂപ്പാക്കും കൊച്ചുമോനും ഒരുമിച്ചു പോയി കിടക്കാം.. ഒരേ സെല്ല് കിട്ടാൻ പ്രാർത്ഥിച്ചോ… പിന്നെ ഇതുപോലെ ഉള്ള കേസിൽ പെട്ടു അകത്തു പോയാലെ അവിടെ കുറെ അവന്മാരെ കാണും നല്ല കൈത്തരിപ്പ് തീർക്കാൻ കാത്ത് നിൽക്കുന്നവർ.. അവരുടെ ഒരടിക്ക് ഇല്ലല്ലോ ഈ ഉപ്പൂപ്പ.. ഇങ്ങേരുടെ കാര്യം കഷ്ട്ടം ആണല്ലോ? ഇനി എന്നെങ്കിലും പുറത്ത് ഇറങ്ങിയാൽ സർക്കാർ ആശുപത്രിയിൽ ഒരു കട്ടിലിൽ കിടക്കാം രണ്ടാൾക്കും … നല്ല ഇഞ്ച പരുവം ആക്കും അവന്മാർ.. എല്ലാവർക്കും അത് ബാധകം ആണ്…”