ഉല്ലാസയാത്ര

Ullasayaathra | Author : Akhileshettan

---

” നിനക്ക് ഭ്രാന്താണ് സൽമ … വെറുതെ എന്റെ ഒരു ദിവസം കളയാനായിട്ട്… ”

 

” നിങ്ങൾക്ക് പോരാൻ പറ്റുമോ ഇല്ലയോ.. അത് പറ…? ”

 

” എടി മക്കളൊന്നും ഇല്ലാതെ നമ്മളൊറ്റയ്ക്ക്… ”

 

“അവരെ വിളിക്കാഞ്ഞിട്ടൊന്നും അല്ലല്ലോ… നമ്മുടെ കൂടെ പോരാൻ കുറച്ചിലല്ലേ…”

 

” എടി.. എന്നാലും…. ”

 

“ഞാൻ കിടക്കാൻ പോവാ… രാവിലെ നേരത്തെ എണീക്കണം… നിങ്ങൾ കൂടെ വന്നാലും ഇല്ലെങ്കിലും ഞാൻ പോവും… ഗുഡ് നൈറ്റ്‌….”

 

അതും പറഞ്ഞു സൽമ ആ ബെഡ്‌റൂമിലെ ലൈറ്റ് ഓഫ് ചെയ്ത് തന്റെ മുടി വാരികെട്ടി ബെഡിലേക്ക് കിടന്നു. അവളെ ഒന്ന് നോക്കി ഞാനും ബെഡിലേക്ക് കിടന്നു.

 

രണ്ട് ദിവസായി അവൾ തുടങ്ങിയിട്ട്. പെരുന്നാളായിട്ട് എങ്ങോട്ടും കൊണ്ട് പോയിട്ടില്ല. ഇപ്രാവശ്യത്തെ പെരുന്നാളിന് പെങ്ങന്മാരും കുട്ടികളൊക്കെ ഇങ്ങോട്ട് വിരുന്ന് വന്നത് കൊണ്ട് അവൾക്ക് അവളുടെ വീട്ടിലേക്ക് പോലും വിരുന്ന് പോകാൻ പറ്റിയിട്ടില്ല.

 

കൊറേ കാലായി അവൾ പുറത്തൊക്കെ ഒന്ന് പോയിട്ട്. രണ്ട് വർഷം മുൻപ് അവളുടെ ആങ്ങള സുബൈറിനെ എയർ പോർട്ടിൽ നിന്ന് കൊണ്ട് വരാൻ പോയതാണ് ഈ അടുത്ത് അവൾ പുറത്ത് പോയത്.

 

ഇനി എന്നെ പറ്റി പറയാം..

എന്റെ പേര് അബു 48 വയസ്സ് ഭാര്യ സൽമ 33 വയസ്സ് രണ്ട് ആൺ മക്കൾ… മൂത്ത ആള് 19 വയസ്സ് രണ്ടാമത്തെ ആള് 18 വയസ്സും.. ഞാൻ അവളെ കെട്ടുന്നത് എന്റെ മുപ്പതാം വയസ്സിലും അവൾക്ക് അന്ന് 18 വയസ്സുമായിരുന്നു പ്രായം…

 

എനിക്ക് ടൗണിൽ ഒരു ചെറിയ ചായക്കട ആണ്. ഉപ്പ ആയി തുടങ്ങിയതാണ്. അത് അടച്ചിടാൻ പറ്റാതോണ്ട് ആണ് ഞാൻ അവളെ എങ്ങും കൊണ്ട് പോവാത്തത്. ഒരു ദിവസം അടച്ചിട്ടാൽ ഉള്ള കസ്റ്റമേഴ്സ് മുഴുവൻ വേറെ നല്ല കട നോക്കി പോകുമോ എന്നുള്ള പേടികൊണ്ട് പെരുന്നാൾക്ക് പോലും ഇത്രയും കാലം അടച്ചിടാറില്ല.

 

അത് കൊണ്ട് ആണ് ഈ യാത്രയെ ഞാൻ എതിർക്കുന്നത്. ഇനി ഇപ്പൊ പറഞ്ഞിട്ട് കാര്യമില്ല അവൾ എല്ലാം തീരുമാനിച്ചു കഴിഞ്ഞു.

 

തന്റെ രണ്ട് മക്കളായ അസറും അജ്മലും അവരുടെ ഫ്രണ്ട്സിന്റെ കൂടെ ഡൽഹിയിലേക്കോ മറ്റൊ മറ്റന്നാൾ വൈകീട്ട് ടൂർ പോകുവാണ്. അവർ ഒരാൾ പ്ലസ്റ്റുവിലും ഒരാൾ പത്തിലുമാണ് പഠിക്കുന്നത്. അവൾ പറഞ്ഞ പോലെ ഞങ്ങളുടെ കൂടെ പോരാൻ അവർക്ക് കുറച്ചിലാണെന്ന് എനിക്കും തോന്നിയിട്ടുണ്ട്.

 

കെ എസ് ആർ ടി സിയുടെ വൺ ഡേ ടൂർ പോകുന്ന ബസിലാണ് നാളെ പോകേണ്ടത്. നാളെ രാവിലെ ഇവിടുന്ന് പുറപ്പെട്ടാൽ നാളെ തന്നെ രാത്രി തിരിച്ചെത്തും.മൂന്നാർ ആണ് പോകുന്നത്. എന്തായാലും അവളുടെ ആഗ്രഹമല്ലേ പോയേക്കാം. അതും ചിന്തിച്ച് ഞാൻ ഉറക്കത്തിലേക്ക് വീണു .

 

***************************

 

സ്കൂട്ടർ ബസ് സ്റ്റാൻഡിന്റെ സൈഡിലുള്ള പാർക്കിങ്ങിൽ നിർത്തി ഞാനും സൽമയും നേരെ ഉള്ളിലേ ഓഫീസിൽ കയറി ബസിന്റെ കാര്യവും മറ്റും തിരക്കി. അവർ പറഞ്ഞു തന്നതനുസരിച്ച് ഞങ്ങൾ സ്റ്റാൻഡിന്റെ അറ്റത്ത് നിർത്തിയിരിക്കുന്ന ബസിന് അടുത്തേക്ക് ചെന്നു. കുറച്ചാളുകളൊക്കെ എത്തിയിട്ടുണ്ട്. ഞങ്ങൾ ബുക്ക്‌ ചെയ്ത ടിക്കറ്റ് കാണിച്ച് ഉള്ളിലേക്ക് കയറി. മൂന്ന് പേര് ഇരിക്കുന്ന ഒരു സീറ്റിൽ ഒന്നും രണ്ടും സീറ്റിലാണ് ഞങ്ങൾ. വിൻഡോ സീറ്റ് വേറെ ആരോ ബുക്ക്‌ ചെയ്തതാണെന്ന് കണ്ടക്ടർ പറഞ്ഞു.

 

” അല്ല സൽമ അനക്ക് രണ്ട് പേര് ഇരിക്കുന്ന സീറ്റ് ബുക്ക്‌ ചെയ്താൽ പോരാരുന്നോ…? ”

 

“ഇത് തന്നെ ഇങ്ങളെ മക്കളോട് കെഞ്ചിയിട്ടാണ് ബുക്ക്‌ ചെയ്ത് തന്നത്. പിന്നേണ് രണ്ട് പേര് ഇരിക്കുന്നത്. മിണ്ടാതെ അവിടെ ഇരിക്കാൻ നോക്കീം…”

 

അതും പറഞ്ഞു അവൾ ഉള്ളിലേക്ക് കയറാൻ നോക്കിയതും ഞാൻ അവളെ തടഞ്ഞു.

 

” നിക്ക്… നിക്ക്.. ഞാൻ നടുവിൽ ഇരിക്കാം.. ഇയ്യ് ഇപ്പുറത്തു ഇരുന്നാൽ മതി… ഇനി ഏത് തെണ്ടിയാണോ അവിടെ ഇരിക്കാൻ വരുന്നതെന്ന് ആർക്കറിയാം…. ”

 

അതും പറഞ്ഞു ഞാൻ നടുവിലേക്ക് ഇരുന്നു. അവൾ ഇപ്പുറത്തും ഇരുന്നു. അല്പം കഴിഞ്ഞപ്പോൾ ഒരു നീളൻ കാവി ജുബ്ബയും വെള്ളമുണ്ടും ഒരു ബാഗും തോളിൽ ഇട്ട് ഏകദേശം ഒരു 35 വയസ്സ് തോന്നിക്കുന്ന യുവാവ് ഞങ്ങളുടെ സീറ്റിനടുത്തേക്ക് വന്നു.