💘💘ഡിയർ ഫോളോവേഴ്സ് 💘💘

[ കബനി ]

---

ഞങ്ങളുടെ പുതിയ വീഡിയോയിലേക്കു സ്വാഗതം…….❤️

ഇന്നലെ ഇൻസ്റ്റാഗ്രാമിലും ഫേസ്ബുക്കിലുമായി പോസ്റ്റ് ചെയ്ത പുതിയ വീഡിയോയുടെ കമന്റുകൾ നോക്കുകയായിരുന്നു രമ്യ…

അച്ചു വന്നിട്ടില്ല… സാധാരണ അവന്റെ കൂടെ ഒരുമിച്ചിരുന്നാണ് കമന്റുകൾ നോക്കുന്നതും മറുപടി കൊടുക്കുന്നതും..

“ ഫൺ ടൈം രച്ചൂസ്…” എന്ന പേജ് ക്രിയേറ്റ് ചെയ്തതും വീഡിയോയ്ക്കുള്ള ഓരോ കണ്ടന്റ് കണ്ടു പിടിക്കുന്നതും എഡിറ്റ് ചെയ്ത് പോസ്റ്റ് ചെയ്യുന്നതും ഒക്കെ അച്ചുവാണ്…

പത്തു പതിനയ്യായിരം ഫോളോവേഴ്സ് ഒക്കെയുണ്ട്. പക്ഷേ, ഇതുവരെ അതിൽ നിന്നു വരുമാനമൊന്നും ആയിട്ടില്ല…

നാളെ നമുക്കത് സാധിക്കും എന്നാണ് അച്ചുവിന്റെ പക്ഷം.

സാധിക്കുമായിരിക്കും….

അതിനു വേണ്ടി അവൻ പറയുന്നതു പോലെ നിന്നു കൊടുക്കുന്നു… അഭിനയിക്കുന്നു…

അല്ലെങ്കിലും അഭിനയത്തിന്റെ ബാലപാഠങ്ങൾ അറിഞ്ഞിട്ടാണോ എല്ലാവരും ഈ പണിക്കിറങ്ങുന്നത്…

ഇന്നും ഉണ്ട് കുറച്ചു മുഖമില്ലാത്ത ഞരമ്പുരോഗികളുടെ വൃത്തികെട്ട കമന്റുകൾ…

അമ്മയും മകനും ആണെന്ന വിചാരമില്ലാത്ത തെണ്ടിപ്പരിഷകളുടെ കണ്ടാലറയ്ക്കുന്ന കമന്റുകൾ..

കോമഡി കണ്ടന്റ് റീൽസിൽപ്പോലും ഇത്തരം വൃത്തികേട് എഴുതിവിടുന്ന മലയാളികളുടെ സദാചാരബോധത്തെക്കുറിച്ച് ഓർത്തപ്പോൾ രമ്യയ്ക്കു ദേഷ്യവും സങ്കടവും ഒരുമിച്ചു വന്നു…

പാവം അച്ചു… !

ഇതൊക്കെ കാണുമ്പോൾ അവന് ഉള്ളിൽ വിഷമവും സങ്കടവും ഉണ്ടെന്ന് തനിക്കറിയാം..

അവനത് പുറത്തു കാണിക്കാത്തത് തനിക്കും കൂടി വിഷമമാകും എന്ന് കരുതിയാണെന്നും തനിക്കറിയാം..

സത്യത്തിൽ രമ്യയ്ക്ക് റീൽസ് ചെയ്യാൻ വലിയ താല്പര്യമൊന്നും ഉണ്ടായിരുന്നില്ല..

അച്ചു, കോഡിംഗ് കോഴ്സ് ചെയ്യുന്ന സമയത്ത് ഒരു പ്രമോഷൻ വീഡിയോയിൽ വോയ്സ് ചെയ്തത് രമ്യയായിരുന്നു..

അതും അവന്റെ ഒറ്റ നിർബന്ധം കാരണം…

അമ്മയുടെ ശബ്ദം അടിപൊളിയായിരുന്നു , എന്നായിരുന്നു അവന്റെ വാദം.

അതു കേറിയങ്ങ് കൊളുത്തി..

വീഡിയോയേക്കാൾ കൂടുതൽ ആളുകൾ ചോദിച്ചത് ശബ്ദം ആരുടെ എന്നതായിരുന്നു…

അതായിരുന്നു തുടക്കം…

പിന്നെ, ആഴ്ചയിൽ എന്തെങ്കിലും കോമഡി കണ്ടന്റ് തപ്പിപ്പിടിച്ച് , അച്ചു ഒരു വീഡിയോ പോസ്റ്റ് ചെയ്യും.

അതൊക്കെ റീച്ചായിത്തുടങ്ങിയതോടെ രമ്യയ്ക്കും താല്പര്യമായിത്തുടങ്ങി എന്നു വേണം പറയാൻ..

കോമഡി പിന്നെ ഇമോഷണൽ , സെന്റി വീഡിയോകളിലേക്കു കടന്നു…

പിന്നെ പാചകം, സ്പൂഫ്, പ്രേമം എന്നു വേണ്ട സകല വിഷയങ്ങളിലും അച്ചു ഓരോ പുതിയ കണ്ടന്റുമായി വരും..

അച്ചുവിനും രമ്യയ്ക്കും അതല്ലാതെ മറ്റൊരു നേരം പോക്ക് വീട്ടിൽ ഇല്ലായിരുന്നു എന്നതായിരുന്നു സത്യം…

അങ്ങനെയിരിക്കെയാണ് കുറച്ചു നാളുകളായി റീൽസുകളുടെ കമന്റുകൾ മോശമായിത്തുടങ്ങിയത് ഇരുവരുടെയും ശ്രദ്ധയിൽ പെട്ടത്…

എന്തിട്ടാലും ഒരു മോശം കമന്റ് എങ്കിലും വരും…

രമ്യയ്ക്കു , അത് ആദ്യമൊരു ഷോക്കായിരുന്നു…

അച്ചുവാണെങ്കിൽ അത് ഗൗനിച്ചതു കൂടിയില്ല…

അത്തരം കമന്റുകൾ തങ്ങൾക്കു കൂടുതൽ ഫോളോവേഴ്സിനെ നേടിത്തരുമെന്നായിരുന്നു അവന്റെ പക്ഷം.

അത് ഏറെക്കുറെ സത്യവുമായിരുന്നു…

പിന്നീട്, രമ്യയും അത്തരം കമന്റുകളെ അവഗണിച്ചു തുടങ്ങി..

പക്ഷേ, ഇപ്പോൾ പഴയതു പോലെയൊന്നുമല്ല കമന്റുകളുടെ നിലവാരം…

പറ്റെ ആഭാസം…

ചിലതൊക്കെ , ഇരുവരും ചേർന്ന് ഡിലീറ്റ്

ചെയ്യുകയോ, ഹൈഡ് ചെയ്യുകയോ ചെയ്യും…

ഒന്നിനും മറുപടി കൊടുക്കാതിരിക്കാൻ ഇരുവരും ശ്രദ്ധിച്ചിരുന്നു…

ഒരു പ്രേമഗാനത്തിന്റെ റീലിലാണ് ആദ്യമായി അത്തരം കമന്റ് കണ്ടത് എന്നത് രമ്യ ഓർത്തു…

“അമ്മയും മകനും ഒന്നുമല്ല, അവളുടെ കാമുകനാണത്…”

എന്നായിരുന്നു കമന്റ്…

അച്ചുവിനെയും രമ്യയേയും അടുത്തറിഞ്ഞ ചിലർ അത് തിരുത്തുകയും തങ്ങളറിയുന്നവരാണെന്ന് മറുപടി കൊടുത്തും പ്രശ്നം പരിഹരിച്ചു…

കമന്റുകൾ കൂടിയപ്പോൾ നാട്ടുകാർക്കും മടുത്തു തുടങ്ങി , എന്നു വേണം കരുതാൻ..

അതിനെക്കുറിച്ച് അച്ചു, ചിരിയോടെ രമ്യയോട് പ്രതികരിച്ചത് ഇങ്ങനെയായിരുന്നു…