“എനിക്കെല്ലാമറിയാടോ…താൻ പറഞ്ഞു വേണ്ട ഞാനതറിയാൻ..”അവളൊരു ചെറിയ ചിരിയോടെയാണ് പറഞ്ഞത്
“എനിക്കറിയാം നിങ്ങൾ തമ്മിലെന്താന്നൊക്കെ..നിങ്ങൾ പറഞ്ഞില്ലേലുമീ കോളേജിലെല്ലാർക്കും അറിയന്നതുവാ..”
“കൊള്ളാം..അപ്പൊ തനിക്കറിയാം ഈ കാണിച്ചുകൂട്ടുന്നതൊക്കെ അവൾക്ക് കൊള്ളുമെന്ന്…” എന്റെ വാക്കിൽ ഒരു ദയനീയത ഉണ്ടായിരുന്നോ എന്നൊരു സംശയം!!
“ഓ അതുപിന്നെ എനിക്ക് ലച്ചുനോട് ശത്രുത ഒന്നുമില്ലടാ ചുമ്മാ അവളെയിങ്ങനെ വട്ട് പിടിപ്പിക്കാൻ നല്ല രസമാ..അതാ…”
“അയ്ശെരി…എല്ലാം കരുതിക്കൂട്ടി ചെയ്യണത് നീയും അവസാനമവള്ടെ അടിയും ഇടിയും തെറിയും കേൾക്കുന്നത് ഞാനും..കൊള്ളാമനൂ..എന്നാലും വല്ലാത്ത ചെയ്ത്താണ് ട്ടാ…”
ഞാൻ പറഞ്ഞത് കേട്ടവളിരുന്ന് ചെറുതായി ചിരിച്ചു..
ഇതാദ്യമായാണ് അനുവുമായി ഞാൻ ഇത്ര ഫ്രീയായി സംസാരിക്കുന്നത്..ശ്രീയെ പേടിച്ചും അനുവിത്ര ക്ലോസ് ആവുമ്പോ എന്തോ സ്പെല്ലിംഗ് മിസ്റ്റേക്ക് മണത്തു ഞാൻ കഴിവതും ഒഴിഞ്ഞു മാറുമായിരുന്നു..എന്നിട്ടും അനുവിനോട് ചിരിച്ചൂന്നും പറഞ്ഞ് ശ്രീയുടെ വക ചെറിയ പിച്ചും മാന്തുമൊക്കെ ഡെയിലി ഡോസ് ഉണ്ടായിരുന്നു!!
അതിനിടയിൽ കഴിക്കാനുള്ളത് വന്നു..ലൈം കുടിച്ചുകൊണ്ട് ഞങ്ങൾ സംസാരം തുടർന്നു..
അല്പം കഴിഞ്ഞപ്പോ അനുവിന്റെയടുത്തൊരുത്തൻ വന്നിരുന്നു..
ഹരി എന്ന ഹരീഷ് വർമ്മ കോളേജിലെ ആസ്ഥാന കോഴിയും , തന്തയില്ലാഴ്മ കാണിക്കുന്നതില് പി എച് ഡി എടുത്തിട്ടത് അലങ്കാരമായി കൊണ്ടുനടക്കുന്നവനും, സകല നെറികെട്ട പണികളും കയ്യിലുള്ളവൻ..അവനൊപ്പം അവന്റെ വാലായി നടക്കുന്ന വേറെ രണ്ട് അവന്മാരുമുണ്ട്
“ആഹാ മോളെ നീയിന്ന് നല്ല ഹോട്ട് ആയിട്ടുണ്ടല്ലൊടി..ആരെ വളയ്ക്കാനാടി ഈ ഒരുക്കവൊക്കെ…”
ഹരി അവളോട് ചേർന്നിരുന്ന് മുഖമവളുടെ അടുക്കലേക്ക് ചേർത്താണ് അവനത് പറഞ്ഞത്
അവനെ പണ്ടേ കണ്ടൂടാത്ത എനിക്കത് കണ്ടപ്പോ..പിടിച്ചില്ലെങ്കിലും വെറുതെ ഒരു അടിയുണ്ടാക്കാതിരിക്കാൻ ഞാൻ അവനോട് മര്യാദയുടെ ഭാഷയിൽ സംസാരിക്കാൻ തന്നെ തീരുമാനിച്ചു..കസേരയിൽ നിന്നെണീറ്റ് അനുവിന്റെ അടുത്ത് ചെന്നവളെ കയ്യിൽപിടിച്ചെണീപ്പിക്കുന്നതിനിടയിൽ അവനോടായി പറഞ്ഞു
“ഹരീ…ചുമ്മാ അനാവശ്യ പ്രശ്നം ഉണ്ടാക്കാതെ നീ പോവാൻ നോക്ക്..”
“അയ്യോ..സാർ ഇവിടുണ്ടാരുന്നോ..ശോ ഞാൻ കണ്ടില്ലല്ലോ സാറേ..ഒഞ്ഞു പോയിക്കേടാ…”
പരിഹാസം കലർത്തിയവൻ പറഞ്ഞു
“ഹരീ..ക്യാന്റീനാണ് ഇവിടെ വെച്ച് പ്രശ്നം ഉണ്ടാക്കിയ നിനക്ക് അറിയാലോ പ്രിൻസിയുടെ ചെവിയിലിതു ചെല്ലും..കഴിഞ്ഞ പ്രവിശ്യത്തെപോലെ 15 ദിവസത്തെ സസ്പെൻഷൻ ആയിരിക്കേല ഡിസ്മിസ്സൽ അടിച്ച് കയ്യിൽ തരുവെന്ന് പറഞ്ഞത് നിനക്ക് ഓർമ്മയൊണ്ടാവുവല്ലോ…അതോർത്ത നിനക്ക് കൊള്ളാം..” അവനോട് അത് പറഞ്ഞു ഞങ്ങൾ അവിടെനിന്ന് നടന്നപ്പോ പിറകിൽ നിന്ന് അവൻ അത്യാവശ്യം ഉറക്കെ തന്നെ
“പിന്നെ ഈ പറയുന്ന നീ വല്യ പുണ്യാളൻ ആണല്ലോ..ഒന്നടങ്ങ് അഭിനന്ദേ..!!” ഹരീഷ് എന്നെ നോക്കി നിന്ന് പറഞ്ഞിട്ട് അവൻ തുടർന്നു
“ക്ലാസ്സിലൊന്നും കേറാതെ രണ്ടും കൂടെയെവിടെക്കാണോ പോണത്…അവനൊറ്റയ്ക്ക് കൊണ്ടുപോയി മുതലാക്കാനാണ് ”
പുറകിലേക്ക് നോക്കി അവന്റെ കൂട്ടുകാരോടായി പറഞ്ഞവൻ ചിരിച്ചു..
അനുവും കാന്റീനിലുള്ള അത്യാവശ്യം ആൾക്കാരുമത് കേട്ടിരുന്നു..
കേട്ടയുടനെ അനു എന്നെ തള്ളിമാറ്റി നേരെ ചെന്ന് ഹരിയുടെ കരണം പുകച്ചൊരടിയും കൊടുത്തിരുന്നു എല്ലാം നിമിഷങ്ങൾക്കകം നടന്നു..
“എടീ…” എന്നലറിക്കൊണ്ടവൻ അവൾക്ക് നേരെ കയ്യും വീശിക്കൊണ്ട ചെന്നപ്പോഴേക്കുമവന്റെ കയ്യിലെന്റെ പിടി വീണിരുന്നു…
“പെണ്ണുങ്ങളോടാന്നോടാ പോർക്കെ അഭ്യാസം കാണിക്കുന്നെ..”
അത് ചോദിച്ചവനെ പിടിച്ച് തള്ളി മാറ്റി
“ദേ പിള്ളേരെ..ഇവിടെക്കിടന്ന് വല്ല പ്രശ്നവും ഉണ്ടാക്കിയ പ്രിൻസിപ്പാൾ നെ അറിയിക്കും കേട്ടല്ലോ..!!! ” കാന്റീൻ ലെ ഒരു ചേച്ചി വന്ന് പറഞ്ഞപ്പോ സീനൊഴിവാക്കി നിന്നെ ഞാൻ എടുത്തോളാടാ എന്നൊരു നോട്ടവും നോക്കി ഹരി അവിടെ നിന്നും പോയി..
ഞാനും അനുവും അടുത്ത പീരിയഡ് ആവും വരെ കോളേജിലെ പാർക്കിലേക്ക് ചെന്നിരുന്നു…അവിടിവിടെയായി ക്ലാസ് കട്ട് ചെയ്ത് വന്നിരിക്കുന്ന പ്രണയ ജോഡികളും വെറുതെ കാറ്റുകൊള്ളാനും കുറച്ചുപേര് ഇരിപ്പുണ്ട്
ഞാനുമവളും അവിടെയുള്ളൊരു സ്റ്റോണ് ബെഞ്ചിൽ പോയിരുന്നു..
“എന്തായാലും നന്നായനൂ..”
“എന്താടാ..?”
“അല്ല..അവനിട്ടു പൊട്ടിച്ചതെ..എനിക്കങ്ങോട്ടുഷ്ടപ്പെട്ടു..എന്തായിരുന്നു ശബ്ദം ‘പഠക്കെ’…നന്നായൊള്ളു..”
“പിന്നെ അനാവശ്യം പറഞ്ഞ കേട്ടൊണ്ട് നിക്കാൻ എന്നെക്കൊണ്ട് പറ്റില്ലട..”
“പക്ഷെ അവനോടൊക്കെ ഇങ്ങനെ ചെയ്യുമ്പോ നീ സൂക്ഷിക്കണം..അവനാന്നെ മൊത്തത്തിൽ റോങ്ങാ..എന്തോ ചെയ്യുവെന്ന് പറയാനൊക്കത്തില്ല..”
“ഓ…അവനൊന്നും എന്നെയൊന്നും ചെയ്യാൻ പോണില്ലട..”
“ഏ..അതെന്താ നിനക്ക് കൊമ്പൊണ്ടോ..”
ആകെയൊരു സംശയത്തിൽ ഞാൻ ചോദിച്ചു
“കൊമ്പൊന്നുവില്ല പക്ഷെ അവനെന്നെ ഒന്നും ചെയ്യില്ല!!!..”
ഫോണിലേക്ക് നോക്കിയിരുന്നാണ് അവളത് പറഞ്ഞത്
“അതാ..ചോദിച്ചേ എന്താ കാരണോന്ന്..??”
അവളന്നേരം അവളുടെ ഫോൺ എടുത്തെന്റെ നേരെ നീട്ടി..ഞാനത് വാങ്ങി സ്ക്രീനിൽ നോക്കിയപ്പോ..കരാട്ടെ യൂണിഫോമിൽ ഇടത്തെ കാൽ ഒരുവശതെക്ക് നീട്ടി വലത് കാലിലൂന്നി ശരീരം മറുവശത്തോട്ട് ആഞ്ഞ് ഒരു കിക്ക് ചെയ്ത് ഫോട്ടോയ്ക്ക് പോസ് ചെയ്ത് നിൽക്കുന്നൊരു പെണ്കുട്ടി..
“..നീ കരാട്ടെ ഒക്കെ പഠിച്ചിട്ടുണ്ടോ??”
“പഠിച്ചിട്ടുണ്ട്..ഇപ്പൊഴും പഠിക്കുന്നുമുണ്ട്…”
“ആഹാ കൊള്ളാലോ..ഇതൊക്കെ പുതിയ അറിവണല്ലോ…”
“എന്തൊക്കെ അറിയാൻ കിടക്കുന്നു നീ..”
“..അതിലെന്തോ പന്തികേടില്ലേ??..”
അവളോടതു ചോദിച്ചപ്പോൾ
“ഏയ് എന്ത് പന്തികേട്”
അനുവുമായി മുന്നേ തന്നെ കൂട്ടാവേണ്ടതായിരുന്നു എന്നെനിക്കു തോന്നി തുടങ്ങി, ഫോണിലേക്ക് നോക്കിയിരിക്കുന്ന അവളെ നോക്കി ഞാൻ വിളിച്ചു
“അനൂ..”
“പറയട…”
“എടൊ സോറി..”
“എഹ്..എന്തിന്..?”
“അല്ല..ഇത്രേം നാൾ ആയിട്ട് താൻ എന്നെ നല്ലൊരു ഫ്രണ്ട് ആയി കണ്ടിട്ടും ഞാൻ അത് കണ്ടില്ലെന്ന് പറഞ്ഞു നടന്നു..ഇപ്പൊ അതിലെനിക്ക് കൊറച്ച് വിഷമം ഒക്കെ തോന്നിണ്ട് ട്ടാ…”
“ഹാ..കൊള്ളാം ഇത് ലച്ചു കേൾക്കേണ്ട..നിന്നെ കൊല്ലും..”അതു പറഞ്ഞവൾ ചിരിച്ചു..
രണ്ടു സ്റ്റോണ് ബെഞ്ചുകൾ അടുത്തടുത്ത് കിടന്നിരുന്നിടത്താണ് ഞങ്ങൾ ഇരുന്നത് അതിൽ..അനുവിന് എതിരെയായി കിടന്ന് ബെഞ്ചിൽ ഞാനെണീറ്റ് മാറി ഇരുന്നു
എന്നിട്ടവളുടെ കയ്യീന്ന് ഫോണ് പിടിച്ച് മാറ്റി വെച്ചിട്ട് അവളുടെ കൈകൾ കൂട്ടി പിടിച്ച് ഞാൻ പറഞ്ഞു
“എടോ..അവളൊരു പാവമാണ് സ്നേഹിച്ചാൽ ജീവൻ കളയുന്നൊരുത്തിയ..അവളെ ഞാൻ പറഞ്ഞ് മനസ്സിലാക്കാം..നീയിനി അവളെ എരികേറ്റണ പരിപാടി ഒന്നും ചെയ്യരുത്..എനിക്കീ കോളേജിൽ അധികം ഫ്രണ്ട്സൊന്നുമില്ല..ആ ഒരൊഴിവിലേക്ക് തന്നെ കൂട്ടുന്നതിൽ വിരോധമൊന്നുമില്ലെന്ന് കരുതിയെക്കുവാ കേട്ടോ…”
അനു അപ്പോഴുമൊരു ചെറിയ ചിരിയുമായി എന്നെ നോക്കി ഇരിക്കുകയാണ്..