“ശരി. അത് എന്തേലും ആയിക്കോട്ടെ.. ഞാൻ ഇപ്പോൾ വിളിച്ചത് അത് ചോദിക്കാൻ അല്ല. ഇത് തരാൻ ആണ്.”
അങ്ങനെ പറഞ്ഞു സുധി ഒരു കവർ എടുത്തു ശ്യാമയ്ക്ക് കൊടുത്തു.
“എന്താ.. അപ്പു ഏട്ടാ ഇത്..?
അങ്ങനെ പറഞ്ഞു ശ്യാമ ആ കവർ വാങ്ങി തുറന്നു നോക്കി.
അതിൽ കുറച്ചു പണം ആയിരുന്നു.
“ശ്യാമേ അതിൽ ഒരു ലക്ഷം രൂപ ഉണ്ട്. ശ്യാമ അത് കൊണ്ട് പോയി ആ മോതിരം തിരിച്ചു വാങ്ങാൻ നോക്ക്.”
ശ്യാമ ഞെട്ടി. എന്നിട്ട് സുധിയെ നോക്കി.
“ഇതെങ്ങനെ എനിക്ക് അറിയാം എന്നല്ലേ ശ്യാമ ചിന്തിക്കുന്നത്..? അതൊക്കെ എനിക്ക് അറിയാം എന്ന് വെച്ചോളൂ.”
“എന്നാലും. അപ്പു ഏട്ടന് എങ്ങനെ മനസ്സിലായി…? ”
“അത് മനസ്സിലാക്കാൻ എന്താ ഇത്രയും പണി. ശ്യാമയുടെ വിരലിൽ നോക്കിയാൽ പോരെ. ഞാൻ അന്നേ അത് നോക്കി വെച്ചിരുന്നു.”
ശ്യാമയുടെ കണ്ണ് നിറഞ്ഞു. ശ്യാമ സ്വന്തം വിരലിലേക്ക് നോക്കി. അതുവരെ മോതിരം ഉണ്ടായിരുന്ന വിരലിൽ ഇപ്പോൾ ഒരുപാട് നാൾ മോതിരം ഇട്ട പാട് മാത്രം.. എന്നിട്ട് പറഞ്ഞു
“അതിന് ഇത്രയും ആവശ്യം ഇല്ല.”
“സാരമില്ല. ബാക്കി ശ്യാമയുടെ കൈയിൽ നിന്നോട്ടെ. ഇനിയും ആവശ്യം ഉണ്ടല്ലോ..”
“വേണ്ട അപ്പു ഏട്ടാ എനിക്ക് ഇത് വേണ്ട. അപ്പു ഏട്ടന് ഇത് എവിടുന്നാ കിട്ടിയത്.. ആരോടെങ്കിലും കടം വാങ്ങിയതാണോ..?”
സുധി ചിരിച്ചു. ശ്യാമ തുടർന്നു.
” അല്ലെങ്കിൽ അയാൾ പറഞ്ഞത് പോലെ അപ്പു ഏട്ടൻ ഏതോ വലിയ കാശുള്ള കുടുംബത്തിലെ ആണോ..? ”
“ആര് പറഞ്ഞത് പോലെ..?”
“ആ മേനേജർ സുന്ദരൻ സാർ. സാർ എന്നോട് പറഞ്ഞു. സാർ ഏതോ കാശുള്ള കുടുംബത്തിലെ ആണെന്ന്. ”
സുധി ചിരിച്ചു കൊണ്ട് പറഞ്ഞു.
“അത് ആ ജോലി കിട്ടാൻ ഞാൻ അയാളോട് ഒരു കള്ളം പറഞ്ഞതാ.. ഇത് എന്റെ കൂട്ടുകാരൻ തന്നതാ.. എനിക്ക് തരാൻ ഉണ്ടായിരുന്ന പണം അവൻ തന്നു. അവന്റെ ആണ് ആ സ്കൂട്ടർ. അവൻ ആണ് എന്നെ സ്കൂളിൽ കൊണ്ട് വിട്ടത്. അതിന് ശേഷം അവൻ വേഗം ഒരു ഓട്ടോ പിടിച്ചു തിരിച്ചു പോയി.”
“എങ്കിലും എനിക്ക് ഇത് വേണ്ട അപ്പു ഏട്ടാ. ഇപ്പോൾ തന്നെ ഞാൻ അപ്പു ഏട്ടന്റെ കടക്കാരി ആയി. എന്നെകൊണ്ട് ഒരിക്കലും വീട്ടാൻ പറ്റാത്ത അത്രയും വലിയ കടം.”
അതും പറഞ്ഞു. ശ്യാമ പുറത്തേക്ക് പോകാൻ നോക്കി.
“ശ്യാമേ.”
സുധി കുറച്ചു ഗൗരവത്തിൽ വിളിച്ചു.
അത് കേട്ട് ശ്യാമ അവിടെ നിന്നു.
“എനിക്ക് ഒരു വാക്കേ ഉള്ളൂ ഒരു പ്രവൃത്തിയും . ഞാൻ പറഞ്ഞത് കെട്ടില്ലെങ്കിൽ. ” അങ്ങനെ ഗൗരവത്തിൽ പറഞ്ഞ ശേഷം ചിരിച്ചുകൊണ്ട് പറഞ്ഞു
“ഞാൻ പോയി കേസ് കൊടുക്കും.. ശ്യാമയ്ക്ക് എതിരെ. അത് വേണോ? എന്നിട്ട് ജയിലിൽ പോയി കിടക്കുന്നോ.. ഒരു മൂന്നാല് വർഷം..
ഞാൻ പറയുന്നത് എന്തും അനുസരിക്കാം എന്ന് പറഞ്ഞിട്ട് ഇങ്ങനെ ആണോ അനുസരിക്കുന്നത്. ?”
ശ്യാമ ആ കവറും എടുത്ത് ഒന്നും മിണ്ടാതെ താഴേക്ക് പോയി.
സുധി അവിടെ കിടന്നു. സാവധാനം ഉറങ്ങി പോയി.
“അപ്പു ഏട്ടാ.. അപ്പു ഏട്ടാ.. എഴുനേൽക്ക് ഭക്ഷണം കഴിക്കേണ്ടേ..? സമയം ഒരുപാട് ആയി. ”
ശ്യാമ വിളിക്കുന്നത് കേട്ടാണ് സുധി കണ്ണു തുറന്നത്. സുധി എഴുനേൽക്കാൻ നോക്കി അത് കണ്ടു ശ്യാമ സുധിയെ പിടിച്ചു എഴുനേൽപ്പിച്ചു.
സുധി ശ്യാമയെ നോക്കി.
ശ്യാമ നേരത്തെ ഉടുത്തിരുന്ന സാരിയൊക്കെ മാറ്റിയിരുന്നു. ഒരു ചൂരിദാർ ആണ് ശ്യാമ ഉടുത്തത്.
“വൈകുന്നേരം ആയോ…? സമയം എത്രയായി..?” സുധി ചോദിച്ചു.
“ഇല്ല. ഉച്ച കഴിഞ്ഞതേ ഉള്ളൂ. മൂന്ന് മണികഴിഞ്ഞു. ”
“ശ്യാമയ്ക്ക് സ്കൂളിൽ പോകേണ്ടേ.? ശ്യാമ എന്തിനാ വേഷം മാറിയത്.? നേരത്തെ സാരി ആണല്ലോ ഉടുത്തിരുന്നത്..?”
“ഞാൻ ഉച്ചക്ക് ശേഷം ലീവ് എടുത്തു…”
“എന്തിന്..? ശ്യാമയുടെ മേനേജർ ലീവ് തന്നോ…?”
“ഉവ്വ്. ലീവ് തന്നു. ”
“എന്ത് പറഞ്ഞ ലീവ് എടുത്തത്..? ”