അത് കേട്ടതോട് കൂടി ശ്യാമ തളർന്നുപോയി. ശ്യാമിക്ക് തലചുറ്റൽ അനുഭവപ്പെട്ടു. ശ്യാമ അവിടെയുള്ള കസേരയിൽ ഇരുന്നു.
അവർ തുടർന്ന് പറഞ്ഞുകൊണ്ടേയിരുന്നു.
” സാർ പറഞ്ഞതനുസരിച്ച് കേസ് മൂവ് ചെയ്താൽ . ആ സ്ത്രീക്ക് ചുരുങ്ങിയത് മൂന്നോ നാലോ വർഷമെങ്കിലും ജയിലിൽ കിടക്കേണ്ടി വരും. അതിനുള്ള എല്ലാ തെളിവുകളും സാറിന്റെ കൈയിലുണ്ടെന്ന പറഞ്ഞത്. കൂടാതെ ആക്സിഡന്റ് ക്ലെയിം ആ സ്ത്രീയിൽ നിന്ന് തന്നെ ഈടാക്കുകയും ചെയ്തേക്കാം. ചുരുങ്ങിയത് ഒരു 50 ലക്ഷം വരെയെങ്കിലും ആവാൻ സാധ്യതയുണ്ട്.”
അവർ പറയുന്നത് ഒന്നും പിന്നെ ശ്യാമ കേട്ടില്ല. ശ്യാമ ബോധംകെട്ട് വീണിരുന്നു.
കുറച്ച് സമയം ശ്യാമ അങ്ങനെ തന്നെ കിടന്നു. പിന്നെ എഴുന്നേറ്റ് പോയി മുഖം കഴുകി. ശ്യാമെയ്ക്ക് എന്തുചെയ്യണമെന്ന് മനസ്സിലായില്ല. എത്രയും പെട്ടെന്ന് സുധിയെ കണ്ട് സംസാരിച്ചില്ലെങ്കിൽ താൻ ആകെ കുഴപ്പത്തിലാകും എന്ന്. ശ്യാമയ്ക്ക് തോന്നി.
ശ്യാമ സുധിയെ കാത്തിരുന്നു. ശ്യാമയ്ക്ക് ഭക്ഷണം കഴിക്കാൻ ഒന്നും തോന്നിയില്ല. സുധിയെ എത്രയും പെട്ടെന്ന് കാണണം. കാര്യം പറയണം. വേണമെങ്കിൽ കാലു പിടിക്കണം. ഒന്നും മനപ്പൂർവ്വം അല്ലെന്നും തനിക്ക് അറിയാതെ പറ്റിപ്പോയതാണെന്നും പറയണം.
ശ്യാമ അമ്മയ്ക്ക് ഭക്ഷണം കൊടുത്തു കാത്തിരുന്നു. സ്കൂളിലേക്ക് തിരിച്ച് ചൊല്ലേണ്ട സമയമായിട്ടും സുധിയെ കണ്ടില്ല.
ശ്യാമ മനസ്സില്ല മനസ്സോടെ സ്കൂളിലേക്ക് പോയി. കുറച്ചുകഴിഞ്ഞ് ശ്യാമയ്ക്ക് മറ്റൊരു ഫോൺ വന്നു. അതും അറിയാത്ത ഒരു നമ്പറിൽ നിന്ന്. ശ്യാമ ഫോൺ കാൾ എടുത്തു. ശ്യാമ പേടിച്ചെന്ന പോലെ പറഞ്ഞു.
“ഹലോ…”
” ഹലോ ശ്യാമേ ഇത് ഞാനാ സുധി. ”
ശ്യാമയ്ക്ക് പ്പെട്ടെന്ന് എന്തു പറയണമെന്ന് മനസ്സിലായില്ല. സുധി തുടർന്ന് പറഞ്ഞു.
” ശ്യാമയ്ക്ക് ബുദ്ധിമുട്ടാവേണ്ട എന്ന് കരുതിയ ഞാൻ അവിടെ നിന്നും ഇറങ്ങിയത്. എനിക്ക് വേണ്ടി ചിലവാക്കിയത് ഒക്കെ ഞാൻ ശ്യാമയ്ക്ക് തിരിച്ചു തരാം.”
“ഹലോ ഹലോ എനിക്കൊന്നു കാണണം”
ശ്യാമ എങ്ങനെയോ പറഞ്ഞു.
” ശ്യാമയ്ക്ക് ചിലവായ പണത്തെ കുറിച്ച് പറയാനാണോ..? എങ്കിൽ നമുക്ക് നാളെ കാണാം. ”
” നാളെയോ ? അപ്പോൾ ഇന്ന് വീട്ടിൽ വരില്ലേ..? ”
” ഇനി വീട്ടിലേക്ക് വരുന്നില്ല. തൽക്കാലം താമസിക്കാൻ എന്റെ ഒരു സുഹൃത്തിന്റെ വീട് കിട്ടിയിട്ടുണ്ട്. കുറച്ചു ദൂരെയാണ് എന്നാലും സാരമില്ല. ശ്യാമയ്ക്ക് ഞാൻ ഒരു ബുദ്ധിമുട്ടാകുന്നില്ല. ”
” എനിക്കൊരു ബുദ്ധിമുട്ടും ഇല്ല. പ്ലീസ് വീട്ടിലേക്ക് വരണം. ഞാൻ ചിലവാക്കിയ പണം എനിക്ക് തിരിച്ചു തന്നില്ലെങ്കിലും സാരമില്ല. പക്ഷെ വീട്ടിൽ വരാതിരിക്കരുത്. കാണാത്തതുകൊണ്ട് അമ്മ ചോദിച്ചു.. ഞാനെന്തു പറയും. എനിക്കറിയില്ല. ”
” ശരി എന്തായാലും. നാളെ ഞാൻ സ്കൂളിൽ വരാം. അവിടെനിന്ന് സംസാരിക്കാം. എന്നിട്ട് ബാക്കി കാര്യങ്ങൾ തീരുമാനിക്കാം…”
“സ്കൂളിലോ ….? വീട്ടിൽ വന്നാൽ പോരേ..? വീട്ടിൽ വച്ച് സംസാരിക്കാമല്ലോ..?”
സുധി ചിരിച്ചു..
” നോക്കാം.. എന്തായാലും നാളെ ഞാൻ സ്കൂളിൽ വരും. എനിക്ക് അവിടെ ഒരാളെ കാണാൻ ഉണ്ട്. അപ്പോൾ അവിടെ വെച്ച് കാണാം.”.
” ശരി. എന്നാൽ അങ്ങനെ ആയിക്കോട്ടെ. പക്ഷേ വീട്ടിൽ വരാതിരിക്കരുത്. വീട്ടിൽ തന്നെ താമസിക്കണം. എനിക്കൊരു ബുദ്ധിമുട്ടുമില്ല. എന്തുവേണമെങ്കിലും ചെയ്തുതരാം.”
” ശരി നാളെ കാണാം. പിന്നെ .!! ഇത് നേരത്തെ തന്നെ ശ്യാമയെ വിളിച്ചു പറയണമെന്ന് കരുതിയത് ആണ്. പക്ഷേ ശ്യാമയുടെ നമ്പർ എന്റെ കയ്യിൽ ഉണ്ടായിരുന്നില്ല.. ”
” പിന്നെ ഇപ്പോൾ എങ്ങനെ കിട്ടി. എന്റെ നമ്പർ… ”
“അതോ…?”
എന്ന് പറഞ്ഞ് സുധി ചിരിച്ചു.
” ശ്യാമ ഇന്നലെ എനിക്ക് ഒരു ചെറിയ ഫോൺ വാങ്ങി തന്നില്ലേ. ഞാൻ അതിൽ എന്റെ സിം ഇട്ടപ്പോൾ എന്റെ ഒരു പഴയ സുഹൃത്ത് വിളിച്ചു. ഞാൻ അവനോട് കാര്യം പറഞ്ഞു. അവൻ വീട്ടിലേക്ക് ഒരു വണ്ടി പറഞ്ഞയച്ചു. ഞാനാ വണ്ടിയിൽ കയറി നേരെ പോയത് നമ്മുടെ ഹോസ്പിറ്റലിൽ ആണ്.