ആരും ആരേയും നിയന്ത്രിക്കേണ്ട ആവശ്യമൊന്നുമില്ലെങ്കിലും മെമ്പർ നൗഷാദ് ഓടി നടന്ന് തന്റെ സാനിധ്യം എല്ലാവരേയും ബോധ്യപ്പെടുത്തി.. സ്ത്രീജനങ്ങൾക്കിടയിൽ കിടന്ന് വിരകുന്ന നൗഷാദിനെ കണ്ട് കാർന്നോമാർക്ക് കലി കയറിയെങ്കിലും അവൻ മെമ്പറാണല്ലോന്നോർത്ത് അവരങ്ങ് ക്ഷമിച്ചു..
ഇനി പോലീസ് വരുന്നത് വരെ പ്രത്യേകിച്ചൊന്നും ചെയ്യാനില്ലാതെ നിലാവത്തഴിച്ച് വിട്ട കോഴിയെപ്പോലെ നാട്ടുകാർ സോമന്റെ പറമ്പിലൂടെ അങ്ങിങ്ങ് നടന്നു..
✍️✍️✍️..ഉച്ചത്തിലുള്ള ഒരു നിലവിളി കേട്ട് മീനാക്ഷിയമ്മ മകൻ അനിക്കുട്ടന്റെ മുറിയിലേക്ക് കുതിച്ചെത്തി.. അവിടെ കണ്ണും വായും തുറന്ന് അനക്കമില്ലാതെ കട്ടിലിൽ കിടക്കുകയാണ് ഒരേയൊരു സന്താനം അനിക്കുട്ടൻ..
“പൊന്നു മോനേ… അമ്മേടെ കുട്ടനെന്ത് പറ്റിയെടാ… ?..അമ്മേ തനിച്ചാക്കി നീ പോയോടാ…?”..
ഇത്ര ചെറുപ്പത്തിൽ തന്റെ മകൻ പരലോകം പൂകിയോ എന്ന സന്ദേഹത്തിൽ മീനാക്ഷിയമ്മ അവനെ കുലുക്കിക്കൊണ്ട് അലമുറയിട്ടു..
“അ… അമ്മേ… സോ…”..
അനിക്കുട്ടൻ എന്തോ പറയാൻ ശ്രമിച്ചത് കണ്ട് മീനാക്ഷിയമ്മക്ക് സമാധാനമായി.. അവർ അവനെ പിടിച്ച് ശക്തിയായി കുലുക്കിക്കൊണ്ട് ഇഹലോകത്തേക്ക് മടക്കിക്കൊണ്ട് വന്നു..
“എന്താടാ അനിക്കുട്ടാ… എന്താ നിനക്ക് പറ്റിയത്… ?”..
വേവലാതിയോടെ മീ..അമ്മ ചോദിച്ചു..
“അമ്മേ… സോ…”..
അത്രയും പറയാനേ അനിക്കുട്ടന് പറ്റുന്നുള്ളൂ.. സോ വെച്ച് തുടങ്ങുന്ന അനേകം വാക്കുകളും വാചകങ്ങളും ഒറ്റനിമിഷം കൊണ്ട് മീ..അമ്മയുടെ ചിന്താമണ്ഡലത്തിലൂടെ കടന്ന് പോയി..അതിലൊന്നും മകൻ ഉദ്ദേശിച്ച സോ കണ്ടെത്താൻ അവർക്കായില്ല..
“മോനേ… എന്താടാ പറ്റിയത്… ?..
തെളിച്ച് പറയെടാ
പൊന്നേ…”..
മീ..അമ്മ പതം പറഞ്ഞ് കരഞ്ഞു…
“അമ്മേ… സോമേട്ടൻ…”..
അനിക്കുട്ടന് സംസാരിക്കാനുള്ള ശേഷി തിരിച്ച് കിട്ടി..എന്നാലും അമ്മക്കൊന്നും മനസിലായില്ല..
“അമ്മേ… സോമേട്ടൻ… മരിച്ചു… “…
വിറയലോടെ അനികുട്ടൻ ആ നടുക്കുന്ന സത്യം പറഞ്ഞു..
“മരിച്ചോ… എപ്പോ…?”..
മീ..അമ്മ വേവലാതിയോടെ ചോദിച്ചു..
“എനിക്കറിയില്ല അമ്മേ…ഇപ്പോ രതീഷ് വിളിച്ച് പറഞ്ഞതാ…”..
അനിക്കുട്ടൻ കട്ടിലിൽ നിന്നിറങ്ങി ധൃതിയിൽ കുളിക്കാനായി പോയി.. സോമൻ മരിച്ചതിൽ മീ..അമ്മക്ക് നല്ല സങ്കടമുണ്ടെങ്കിലും അതിലേറെ അവരെ അലട്ടിയത് മറ്റൊന്നാണ്..
ആ സോമന്റെ കൂടെയാണ് ചെറുപ്പം തൊട്ട് അനികുട്ടന് പണി.. ഇനി അവന് വേറെ പണിനോക്കേണ്ടി വരുമല്ലോ എന്ന പ്രശ്നമാണ് അവരെ അലട്ടിയത്..ആ..ഒരു സോമൻ ചത്തെന്ന് വെച്ച് തന്റെ മകന് വേറെ പണി കിട്ടാതിരിക്കില്ലെന്ന് മീ..അമ്മ സമാധാനിക്കുകയും ചെയ്തു..
സോമൻ നാട്ടിലെ അറിയപ്പെടുന്ന ‘കണ്ട്രാക്കാണ്.. മൂന്നാല് പണിക്കാർ കൂടെയുണ്ട്..അതിൽ പ്രമുഖനാണ് അനിക്കുട്ടൻ.. വീട്ടിലെ പ്രാരാബ്ധം മൂലം പത്താം തരം പഠനം കഴിഞ്ഞ് പണിക്കിറങ്ങിയതാണവൻ..
അവന്റെ തൊഴിലിൽ അപാരമായ സ്കില്ലുള്ള അനിക്കുട്ടനിപ്പോ പ്രായം ഇരുപത്തൊൻപത് സംതിംഗ്.. മുപ്പതാവാൻ അടുത്ത വൃശ്ചികം വരണം..
സോമന്റെ കൂടെ ചെറുപ്പത്തിൽ തന്നെ കൂടിയതാണ് അനിക്കുട്ടൻ.. സിമന്റും കമ്പിയും മണലും മെറ്റലും കൊണ്ട് കവിത രചിക്കുന്നവനാണിപ്പോ അനിക്കുട്ടൻ.. സോമന്റെ ചങ്കും..
നാൽപത്തെട്ട് നടപ്പുള്ള സോമന്റെ ഉറ്റ സുഹൃത്താണ് അനിക്കുട്ടൻ..പണിസൈറ്റിൽ അവർ ആശാനും ശിഷ്യനുമാണെങ്കിലും പണി കഴിഞ്ഞ് രണ്ടാളും നേരെ പോകുന്നത് ബാറിലേക്കാണ്.. അനിക്കുട്ടൻ അധികം കുടിക്കില്ലെങ്കിലും കുടിച്ച് പൂസാവുന്ന ആശാനെ വീട്ടിലെത്തിക്കലാണ് അവന്റെ പ്രധാന പണി..
ആശാന്റെ ഭാര്യ സുധേച്ചി അറിയാതെ ആശാനെ സിറ്റൗട്ടിലിട്ട് അനികുട്ടൻ മുങ്ങും..അല്ലെങ്കിൽ സുധേച്ചിയുടെ വായിൽ നിന്ന് വരുന്ന പുളിച്ച തെറി
താൻ കേൾക്കേണ്ടിവരുമെന്ന് അവനറിയാം..മൂന്നാല് തവണ അവനാ തെറി കേട്ടിട്ടുമുണ്ട്..എന്നാലും പൂസായ ആശാനെ വഴിയിലിട്ട് പോരാനൊന്നും അനിക്കുട്ടൻ തയ്യാറല്ല..
ഏത് പ്രതിസന്ധിയിലും അവൻ ആശാന്റെ കൂടെക്കാണും..ആശാനും അവനോട് വല്ലാത്ത സ്നേഹമാണ്..ആ ആശാനാണ് കാലയവനികക്കുള്ളിൽ മറഞ്ഞതെന്ന് അവന് വിശ്വസിക്കാനായില്ല.. കുളിയും കഴിഞ്ഞ് ചായ കുടിക്കാനൊന്നും നിൽക്കാതെ നൂറേ നൂറിലാണവൻ ആശാന്റെ വീട്ടിലേക്ക് വെച്ച് പിടിച്ചത്..