ഇത്രയും വലിയൊരു സഹായം ചെയ്ത സരസ്വതി അമ്മയെ പെരുവഴിയിൽ ആക്കാതെ ദേവൻ മംഗലത്ത് തറവാട്ടിലേക്ക് കൊണ്ട് വന്നു. അമ്മ പോയതോടെ അച്ഛൻ മാനസികമായി ആകെ തകർന്നു. ഇപ്പൊ എല്ലാം ഒന്ന് പച്ചപിടിച്ചു വന്നതും ഉത്തരവാദിത്തങ്ങൾ എല്ലാം ദേവനെ ഏൽപ്പിച്ച് അദ്ദേഹം വിശ്രമ ജീവിതം തിരഞ്ഞെടുത്തു.
ദേവൻ രക്ഷപെട്ടതിൽ ഏറ്റവും അധികം സന്തോഷിച്ചത് തേജസ് ആയിരുന്നു. തന്റെ ഉറ്റസുഹൃത്തിന്റെ പഴയ കളിചിരിയും സന്തോഷവും അവനിലേക്ക് തിരിച്ചു വന്നു. ആപത്ത് കാലത്ത് സഹായിച്ച തേജസിനെ അവനും മറന്നില്ല. കൈയിൽ പൈസ വന്നതും ആദ്യം തീർത്തത് തേജസിന്റെ കടം ആയിരുന്നു.
കാലം വീണ്ടും മുന്നോട്ട് സഞ്ചരിച്ചു. അമ്മയെ മാമന്റെ വീട്ടിൽ ആക്കി തേജസ് അവന്റെ വീട് പുതുക്കി പണിഞ്ഞു. ഇന്ന് രാവിലെ നല്ല സമയം നോക്കി തന്റെ പുതിയ വീട്ടിലേക്ക് അവന്റെ അമ്മ വലത് കാൽ വെച്ചു കയറി. അടുപ്പിൽ പാൽ പതഞ്ഞു തൂക്കുമ്പോൾ അവിടെ കൂടി നിന്ന എല്ലാരുടെയും മനസും മുഖവും സന്തോഷം കൊണ്ട് നിറഞ്ഞു.
ക്ഷണിച്ച എല്ലാരും പാലുകാച്ചിന് തന്റെ വീട്ടിൽ എത്തി സന്തോഷത്തോടെ മടങ്ങി പോയി. അവസാനം എന്നത്തേയും പോലെ ഞാനും അമ്മയും വീട്ടിൽ ഒറ്റക്ക് ആയി. പതിവുപോലെ ഞാൻ അമ്മയുടെ മടിയിൽ സ്ഥാനം പിടിച്ചു.
“… അമ്മക്ക് ഒരുപാട് സന്തോഷം ആയടാ…” അമ്മയുടെ മടിയിൽ കിടന്ന എന്റെ തലയിൽ തലോടികൊണ്ട് അമ്മ പറഞ്ഞു.
“… നിന്റെ അച്ഛൻ ഇന്ന് ഉണ്ടായിരുന്നെങ്കിൽ അദ്ദേഹത്തിന് എന്ത് സന്തോഷം ആവുമെന്നോ…” ഞാൻ അമ്മ പറയുന്നതിന് എല്ലാം കാതോർത്തു.
“… ഞാൻ ചോദിക്കാതെ തന്നെ നീ എന്റെ എല്ലാ ആഗ്രഹങ്ങളും സാധിച്ചു തന്നിട്ടുണ്ട് ഈ വീട് ഉൾപ്പെടെ. എനിക്ക് ഇനി ഒരു ആഗ്രഹം കൂടെയേ ഉള്ളു…”
“… അമ്മ എന്ത് ആഗ്രഹം പറഞ്ഞാലും അമ്മയുടെ മോൻ അത് സാധിച്ചു തന്നിരിക്കും…” വളരെ സന്തോഷത്തോടെയും അഭിമാനത്തോടെയും ഞാൻ പറഞ്ഞു.
“… എന്റെ കണ്ണ് അടയും മുമ്പ് നിന്റെ വിവാഹം എനിക്ക് കാണണം. എന്റെ പേരക്കുട്ടികളെ മതി വരുവോളം കൊഞ്ചിക്കണം…” അമ്മ അത് പറഞ്ഞതും എന്റെ സന്തോഷവും ചിരിയും എല്ലാം മങ്ങി.
“… കഴിഞ്ഞത് എല്ലാം മറന്ന് മോൻ അമ്മക്ക് വേണ്ടി ഇതുകൂടി സാധിച്ചു താ. ഏത് പെണ്ണ് ആയാലും അമ്മക്ക് ഒരു കുഴപ്പവുമില്ല…” ഏറെ പ്രതീക്ഷയോടെ അമ്മ പറഞ്ഞു.
“…അമ്മ ഇത് മാത്രം എന്നോട് ചോദിക്കരുത്. ഇനി ഒരു കല്യാണം…. അത് ശെരിയാവില്ല…” അമ്മയുടെ മടിയിൽ നിന്നും എഴുനേറ്റ് ഞാൻ എന്റെ ഉള്ളിൽ ഉള്ളത് പറഞ്ഞു.
“…ഏതൊരു അമ്മയ്ക്കും സ്വന്തം മോന്റെ കല്യാണം കാണണം എന്ന് ആഗ്രഹം ഉണ്ടാവില്ലേ ഞാനും അത്രെ ആഗ്രഹിച്ചോളും…” എന്റെ കവിളിൽ തലോടി അത്രയും പറഞ്ഞശേഷം അമ്മ സ്വന്തം മുറിയിലേക്ക് പോയി.
ഇത് പറയുമ്പോൾ ആ കണ്ണുകൾ നിറഞ്ഞിരുന്നോ. അമ്മയുടെ പോക്ക് കണ്ട് വിഷമം തോന്നിയ ഞാനും അവിടെന്ന് എഴുനേറ്റ് എന്റെ മുറിയിൽ പോയി കിടന്നു. എത്ര ശ്രമിച്ചിട്ടും ഉറങ്ങാൻ കഴിഞ്ഞില്ല അമ്മയുടെ വാക്കുകൾ എന്നെ പഴയ ഓർമയിലേക്ക് കൊണ്ട് പോയി. വളരെ കഷ്ട്ടപെട്ടാണ് ഞാൻ ഉറങ്ങിയത്. ഇടക്ക് ഉറക്കത്തിൽ അച്ഛനെ സ്വപ്നം കണ്ടു.
പിറ്റേന്ന് എഴുന്നേറ്റപ്പോ ഒരുപാട് താമസിച്ചു. സമയം നോക്കിയപ്പോ 9.00 മണി കഴിഞ്ഞു. സാധാരണ എട്ട് മണിക്ക് ശേഷം അമ്മ എന്നെ ഉറങ്ങാൻ സമ്മതിക്കാത്തത് ആണ്. എന്നാൽ ഇന്ന് എന്നെ വിളിച്ചെഴുനേൽപ്പിക്കാൻ കക്ഷി വന്നില്ല. പാവം ചിലപ്പോ ഇന്നലത്തെ തിരക്കൊക്കെ കാരണം ആകെ ക്ഷീണിച്ച് ഉറങ്ങുവായിരിക്കും. അമ്മയുടെ മുറിക്ക് മുന്നിൽ എത്തിയപ്പോ വാതിൽ ചാരിയിട്ടേ ഉള്ളു. തള്ളി തുറന്ന് ഞാൻ നേരെ മുറിയിലേക്ക് കടന്നു.
“… എന്തൊരു ഉറക്കമാണ് അമ്മേ ഇത്. ഞാൻ എത്ര നേരായിട്ട് ഒരു ചായക്ക് വേണ്ടി വിളിക്കാണെന്നോ…” കട്ടിലിൽ കിടക്കുന്ന അമ്മയോട് സംസാരിച്ചുകൊണ്ട് ഞാൻ നേരെ ജനലിലെ കർട്ടൻ മാറ്റാൻ പോയി.