” ഇല്ല സാറേ .പക്ഷേ ഞാൻ കഴിച്ചാലും അതാർക്കും മനസിലാവില്ല. ഒരു ദിവസം രാത്രി സാറ് തനിച്ചിവിടെ നിൽക്കണം അപ്പോഴേ മനസിലാവൂ. “
“എന്നിട്ട് ബാക്കി പറയൂ “
” ബോഡി കണ്ട് തിരികെ വരേണ്ട സമയം കഴിഞ്ഞിട്ടും രണ്ടു പേരും വരാതായപ്പോൾ ഞാൻ അകത്തേക്ക് പോയി നോക്കി. രണ്ടു പേരും ചേർന്ന് അകത്തുള്ള ഒരു ബോഡി പുറത്തിറക്കുകയായിരുന്നു. എന്നെ കണ്ടതും ബോഡി തറയിൽവെച്ച് അരവിന്ദ് എന്തോ വെച്ചെന്റെ തലയ്ക്കടിച്ചു. തുടർന്നവൻ വേദയോട് രക്ഷപ്പെടാൻ പറഞ്ഞു .അപ്പോഴേക്കും എന്റെ ബോധം പോയിരുന്നു.”
“വേദയേയും അരവിന്ദിനേയും ഇനി കണ്ടാൽ നിങ്ങൾക്ക് തിരിച്ചറിയാൻ കഴിയുമോ?”
“അതെന്തു ചോദ്യമാ സാറേ,ജന്മത്ത് മറക്കാൻ പറ്റുമോ അവരെ.വേദയുടെ മുഖത്തൊരു കറുത്തപാടുണ്ട്.പോരാത്തതിന് കാലിന് ചെറിയ മുടന്തും “
എനിക്ക് ചെറുതായി ചിരി വരുന്നുണ്ടായിരുന്നു. എന്നേയും അരവിന്ദിനേയും ചൂണ്ടി പ്രശാന്ത് ചോദിച്ചു.
“ഇവരെ രണ്ടു പേരേയും അറിയുമോ?”
ഇല്ല എന്നർത്ഥത്തിൽ അയാൾ തല ചലിപ്പിച്ചു.
“ഇതാണ് വേദ പരമേശ്വറും ,അരവിന്ദും. നിങ്ങളെ ആരോ തെറ്റിദ്ധരിപ്പിച്ചതാവാം.”
“ഇതെങ്ങനെ ശരിയാവും? ഇവരല്ല അവിടെ വന്നവർ. അവരാണ് യഥാർത്ഥ അരവിന്ദും വേദപരമേശ്വറും “
ക്യാമറ ഓഫാക്കി പ്രശാന്ത് എഴുന്നേറ്റു.വാസുദേവൻ അപ്പോഴും പിറുപിറുക്കുന്നുണ്ടായിരുന്നു.
പിന്നീട് പോയത് മോർച്ചറിയുടെ ഭാഗത്തേയ്ക്കാണ്. അവിടെ പ്രത്യേകിച്ച് ഒന്നും ഉണ്ടായിരുന്നില്ല. എങ്കിലും എന്റെ സൂക്ഷ്മ നിരീക്ഷണത്തിൽ ഒരു സിഗരറ്റ് കുറ്റി കണ്ടു.സജീവിന്റെ മുറിയിലും സുനിതയുടെ മുറിയിലും കണ്ട അതേ ബ്രാൻഡ് .
അലോഷ്യസ് തന്ന ഫോണിൽ ഒരു മെസ്സേജ്
“വേദയുടെ വീട്ടിനകത്ത് രണ്ട് പേർ കയറിയിട്ടുണ്ട് എത്രയും വേഗം വരിക. ഈ Msg തൽക്കാലം അരവി കാണണ്ട.”
പക്ഷേ അരവിയുടെ മുഖമാകെ മാറിയിരുന്നു. തിരികെയുള്ള യാത്രയിൽ അരവിയെ എങ്ങനെയെങ്കിലും ഒഴിവാക്കിയേ തീരൂ. എവിടെയോ ഒരു അക്ഷരത്തെറ്റുണ്ട്. ഭാഗ്യവശാൽ അരവിക്ക് ഒരു കോൾ വന്നു. തെല്ലുമാറി നിന്ന് ശബ്ദം താഴ്ത്തി അവൻ സംസാരിച്ചു.
“എനിക്ക് അത്യാവശ്യമായി ഒരിടം വരെ പോവാനുണ്ട് നിങ്ങൾ വിട്ടോളൂ”
ഉർവ്വശി ശാപം ഉപകാരപ്രദമെന്ന പോലെ അവന്റെ വാക്കുകൾ.അരവിയെ അവിടെ വിട്ട് ഞങ്ങൾ യാത്ര തുടർന്നു.
“സർ ഇന്നലെ റിസപ്ഷനിൽ വെച്ച് സിസ്റ്റർ എമിലിനോട് മോർച്ചറിയിലേക്കുള്ള വഴി ചോദിച്ചത് അരവിന്ദ് തന്നെയാണ്. പക്ഷേ സജീവിന്റെ മൃതദേഹം കടത്തിയത് അരവിനാണെന്നു തെറ്റിദ്ധരിപ്പിച്ചതാണ്. മുഖത്ത് പാടുള്ള നടക്കുമ്പോൾ മുടന്തുള്ള ഒരു സ്ത്രീയാണ് വേദയുടെ വേഷം “
അലോഷ്യസ് ചിന്തയിലാണ്ടു.
“സർ അരവിക്കിപ്പോൾ വന്ന ഫോൺ….?”
ഞാൻ വിക്കി
“അതവരുടേതാണ്.ഇന്റർനാഷണൽ കോൾ അരവിയുടെ എല്ലാ കാളും ഇപ്പോൾ നമ്മുടെ നിയന്ത്രണത്തിലാണ്. അവനിപ്പോൾ പോവുന്നത് നിന്റെ വീട്ടിലേക്കാണ്. അവനവിടെത്തും മുന്നേ നിന്റെ വീട്ടിൽ കയറിയവരെ നമ്മളുടെ ആളുകൾ പിടികൂടും കൂട്ടത്തിൽ അരവിന്ദിനേയും. നടന്ന കാര്യങ്ങളിൽ അരവിന്ദ് പറഞ്ഞത് 50% മാത്രം പറയാൻ ഇനിയും 50% ബാക്കിയാണ്.”
അരവിയുടെ ഒരു മെസ്സേജ് എനിക്ക് വന്നു
“വേദ നീ ട്രാപ്പിലാണ്. “
തിരിഞ്ഞു നോക്കിയപ്പോൾ അലോഷ്യസിന്റെ മുഖത്ത് ഒരു വല്ലാത്ത ഭാവം.
എന്ത് വന്നാലും ഞാൻ നേരിടാൻ തന്നെ തീരുമാനിച്ചു. എത്രയും വേഗം ജോണ്ടിയുടെ അടുത്തെത്തണം.കൂടി വന്നാൽ ഇവർ എന്നെ കൊല്ലും അതിൽ കൂടുതൽ ഒന്നുമില്ല. അലോഷിക്കു സംശയം തോന്നാതിരിക്കാൻ ഞാൻ ചോദിച്ചു.
“എന്റെ വീട്ടിൽ രണ്ടു പേർ ഉണ്ടെന്നത് എങ്ങനെ അറിഞ്ഞു.?”
“ഓഹ് ഞാനത് പറയാൻ മറന്നു. വേദയുടെ വീടിനു തൊട്ടു മുന്നേ എയർ ഫോഴ്സ് ആണല്ലോ.എയർഫോഴ്സിൽ എനിക്കൊരു സുഹൃത്തുണ്ട് ഷേണായി. എയർഫോഴ്സ് പരിസരം ക്യാമറ നിരീക്ഷണത്തിലാണെന്ന കാര്യം വേദയ്ക്കറിയാമോ?”
” അറിയാം”
“കഴിഞ്ഞ ദിവസം വേദയുടെ വീട്ടിൽ വന്നവർ ബൈക്ക് നിർത്തിയത് എയർ ഫോഴ്സിനു സമീപത്താണ്. അന്ന് ഞാൻ പറഞ്ഞപ്പോൾ എയർ ഫോഴ്സിലെ ബൈക്കിൽ അവർ ഇറങ്ങുന്നതും കയറി പോകുന്നതുമായ cctv ദൃശ്യങ്ങൾ ഷെണായി ഒരു പെൻഡ്രൈവിലാക്കി എനിക്കു തന്നു. അന്നു ബൈക്കിൽ വന്നൊരാളെ ഇന്നു രാവിലെ ഞാൻ പൊക്കി.”
എന്റെ കണ്ണുകൾ മിഴിഞ്ഞു.
” രാവിലെ കാപ്പിക്കടയിൽ അവനുണ്ടായിരുന്നു നമുക്കെതിരെയുള്ള സീറ്റിൽ നീ ഓർക്കുന്നുണ്ടോ?”
“യെസ്, ഞാൻ ഓർക്കുന്നു. വല്ലാതെ അവൻ നമ്മളെ നിരീക്ഷിക്കുന്നുണ്ടായിരുന്നു.”
ഞാൻ പറഞ്ഞു.
” ഉം. അവനെ കണ്ടത് കൊണ്ടാണ് CI നൈനാൻ കോശിയോട് നമ്മൾ വിവാഹിതരാവാൻ പോവുന്നവരാണെന്നു പറഞ്ഞത്. അവൻ വന്നത് ഞാനാരാണ് എന്നറിയാൻ മാത്രമാണ്. നിന്റെ ഭാവി വരൻ എന്നത് ശത്രുക്കൾക്ക് ദോഷമായി വരില്ല മറിച്ച് അന്വേഷണ ഉദ്യോഗസ്ഥനാണെന്നറിഞ്ഞാൽ അവർക്ക് തലവേദനയും നമുക്ക് ലക്ഷ്യത്തിലെത്താനുള്ള സമയവും കൂട്ടും “
പറയുന്നത് വിശ്വസിക്കാമോ?ആകെ കൺഫ്യുഷനായി .
” പിന്നെ നിനക്ക് കിട്ടിയ ആ ഫയലിൽ നിന്നും ഈ കേസുമായി ഒന്നു രണ്ട് പ്രധാന കാരണങ്ങൾ കണ്ടെത്തിയിട്ടുണ്ട്. അതിലെ പ്രധാനപ്പെട്ട ഒരു കാരണം ICU വിൽ നിന്നും കൃഷ്ണപ്രിയ മിസ്സായി, അർജ്ജുനന്റെ ബോഡി, ഇപ്പോൾ സജീവിന്റേയും. അതിനർത്ഥം ഐസിയുവിൽ കിടന്ന കൃഷ്ണപ്രിയയ്ക്ക് ജീവനില്ലായിരുന്നു. വേദയ്ക്ക് മനസിലായോ കാര്യങ്ങൾ?”
ഞാൻ തലയാട്ടി. ഇതെന്റെ മനസിലും തോന്നിയതായിരുന്നു.
” അതായത് ബോഡി അവർ മാറ്റണമെങ്കിൽ അവർ ഭയക്കുന്ന എന്തോ ഒന്ന് അവിടുണ്ട്.അതായത് ബോഡിയിൽ ഉണ്ട്.പിന്നെ ആറാമത്തെ ഫയലിലെ രണ്ട് കുട്ടികളുടെ തിരോധാനത്തിനു ശേഷം മാതാപിതാക്കൾ ആത്മഹത്യ ചെയ്യുന്നു. പിന്നെ ഈ കേസിലെല്ലാം പെട്ടവരുടെ ഫാമിലിയെ പറ്റി ഞാൻ പത്രങ്ങളിലെ ന്യൂസ് നോക്കി. കൃഷ്ണപ്രിയയുടെ മാതാപിതാക്കളെ പറ്റി പിന്നീട് ഒരറിവും ഇല്ല, അർജ്ജുനന്റെ മാതാപിതാക്കളും രണ്ട് ചേച്ചിമാരും ഒരു ദിവസം രാത്രി വീടിനകത്ത് അറിയാതെ പറ്റിയ തീപിടുത്തത്തിൽ ഒരുറക്കത്തിൽ വെന്തുമരിച്ചു. വേദയുടെ മാതാപിതാക്കളും കൂടെയുണ്ടായിരുന്ന ഡോക്ടറും ആക്സിഡണ്ടിൽ മരണപ്പെട്ടു, പിന്നീട് ഡോക്ടറുടെ ഭാര്യയും മരണപ്പെട്ടു. പിന്നീടുള്ളത് നീയാണ്.നമ്മൾ കണ്ട തിരിച്ചറിയപ്പെട്ട മരണങ്ങൾക്ക് ശേഷം അവരുടെയെല്ലാം ഏറ്റവുമടുത്ത ബന്ധുക്കൾ ഒന്നുകിൽ മരണപ്പെടും അല്ലെങ്കിൽ മിസ്സിംഗ്.സജീവ് മരണപ്പെട്ടു, തുളസിയും തീർത്ഥയും മിസ്സിംഗ്. സുനിത മരിച്ചു, പിന്നാലെ മുരുകേശൻ അടുത്തത് അവളുടെ ചേച്ചിയാവും”
അലോഷ്യസ് പറഞ്ഞത് ശരിയാണ്. ഫോണിൽ ഒരു മെസേജ് ടോൺ. ഒരു Mail വന്നതാണ് ഞാൻ ഓപൺ ചെയ്തു
“57 rof_______tne”
കഴിഞ്ഞ തവണ വന്ന മെയിൽ ഐഡിയിൽ നിന്നും തന്നെ. ഞാനത് അലോഷ്യസിനെ കാണിച്ചില്ല. എന്തായിരിക്കും അതിനർത്ഥം. എന്തോ കോഡാണോ?
