അർത്ഥം അഭിരാമം 7
Ardham Abhiraamam Part 7 | Author : Kabaneenath
[ Previous Parts ] [ www.kambi.pw ]
ഇരയെ കണ്ട വ്യാഘ്രം പാറക്കെട്ടിനു മുകളിൽ നിന്ന് പറന്നിറങ്ങി…….
അഭിരാമി ജലപാതത്തിന്റെ അഗാധതയിലേക്ക് ആഴ്ന്നു പോയിരുന്നു……
മഞ്ഞിലൂടെയെന്നവണ്ണം തെന്നിത്തെറിച്ച് അജയ് വെള്ളത്തിലേക്ക് വീണു…
വീഴ്ചയുടെ ആഘാതത്തിൽ അവനൊന്നു മുങ്ങിപ്പോയി…
പുഴ , കുറച്ചു മുൻപിലായി, അദൃശ്യമാകുന്നത് അവൻ , മുങ്ങും നേരം കണ്ടു..
അതിനു താഴെ, ഗർത്തമാവാം…….
മുങ്ങി നിവർന്നപ്പോൾ അവൻ അഭിരാമിയെ ഒന്ന് തിരഞ്ഞു…
ഇല്ല…… !
കാണാനില്ല… !
“അമ്മാ………. ”
ചങ്കുപൊട്ടിത്തകർന്ന് അവൻ നിലവിളിച്ചു…
കാടും ജലപാതത്തിന്റെ ഹുങ്കാരവും മറികടന്ന് അവന്റെ ശബ്ദം പ്രതിദ്‌ധ്വനിച്ചു…
ഒരു പാറക്കഷ്ണം പോലും പിടിച്ചു നിൽക്കാൻ കിട്ടാതെ, അവൻ കൈകൾ വെള്ളത്തിൽ തുഴഞ്ഞ്, ചുറ്റും ഒന്നുകൂടി നോക്കി……
ഇല്ല…….!
അടുത്തെങ്ങും തന്റെ അമ്മയില്ല, എന്ന സത്യം അവനെ അടിമുടി തകർത്തുകളഞ്ഞു…
ധരിച്ചിരിക്കുന്ന വസ്ത്രങ്ങൾക്ക് കനം കൂടിത്തുടങ്ങി..
ബാഗിനകത്തും വെള്ളം കയറിത്തുടങ്ങിയത് അവനറിഞ്ഞു…
തലയ്ക്കു മുകളിലുള്ള പാറക്കെട്ടിനു മുകളിൽ, താൻ വെള്ളത്തിൽ നിന്നും രക്ഷപ്പെട്ടു ചെല്ലുന്നതും കാത്ത്, പുലി ശ്രദ്ധയോടെ ഇരിക്കുന്നത് അവൻ കണ്ടു……
പുലിക്കുട്ടി, പുലിയുടെ ഒരു വശത്തായി പുഴയിലേക്ക് നോക്കിയിരിക്കുന്നു……
ഒരു ഗർജ്ജനം കൂടി കേട്ടു……….
ജീവിതത്തിലാദ്യമായി നേരിട്ട് പുലിയുടെ ഗർജ്ജനം കേട്ട അവൻ വെള്ളത്തിൽ കിടന്ന് ഒന്ന് കിടിലം കൊണ്ടു…
അത് സമീപപ്രദേശങ്ങളെല്ലാം നടുങ്ങും വിധം ഭയാനകമായിരുന്നു……
സമീപത്തെ വൃക്ഷത്തലപ്പുകളിലിരുന്ന പക്ഷിക്കൂട്ടങ്ങൾ തലക്കു മുകളിലൂടെ ചിറകടിച്ചു ചിതറുന്നത് , ഒന്നുകൂടി മുങ്ങി നിവർന്ന അജയ് കണ്ടു..
ആസന്നമായ മരണം മുന്നിൽ കണ്ട്, ഹൃദയം തകർന്ന് അവൻ ഒന്നുകൂടി നിലവിളിച്ചു..
“അമ്മാ………. ”
തകർന്ന ഹൃദയത്തിന്റെ നിലവിളി , പുലിയുടെ ഗർജ്ജനത്തേക്കാൾ മാരകമായിരുന്നു..
പാറക്കെട്ടുകളിലും, ചുഴികളിലും പെട്ട് ചുറ്റിത്തിരിഞ്ഞ്, അവന്റെ ആക്രന്ദനം അലയൊലി കൊണ്ടു…
അടുത്ത നിമിഷം അജയ് ആ കാഴ്ച കണ്ടു…
വെള്ളത്തിനു മീതെ പരവതാനി പോലെ ഒഴുകിപ്പരന്നു പോകുന്ന അമ്മയുടെ ഷാൾ…!
അവന്റെ ഹൃദയം ഒന്ന് കുതി കുത്തി…
അടുത്തെവിടെയോ അമ്മയുണ്ട്…… !
രണ്ടു മൂന്ന് മിനിറ്റിനിടയിൽ , അമ്മ വെള്ളത്തിൽ ശ്വാസമെടുക്കാൻ കഴിയാതിരുന്ന കാര്യം ഓർത്തപ്പോൾ അവനൊരുൾക്കിടിലമുണ്ടായി……
രക്ഷപ്പെടാനും രക്ഷപ്പെടുത്താനുമുള്ള വ്യഗ്രത തലച്ചോറിലേക്ക് വൈദ്യുതി സ്ഫുലിംഗങ്ങൾ പോലെ ഇരച്ചുകയറിയപ്പോൾ, വെള്ളത്തിൽ തന്നെ കാലൂന്നി ഒരു ഡോൾഫിനേപ്പോലെ അജയ് വെള്ളത്തിനു മീതെ കുതിച്ചുയർന്നു……
അവനുയർന്നു വന്ന ഭാഗം, അവന്റെ ശരീരാകൃതിയിൽ ഒരു നൊടിയിട , ജലത്തിൽ ഒരു രൂപമായി തെളിയുകയും, അടുത്ത സെക്കന്റിൽ അത് മൂടിപ്പോവുകയും ചെയ്തു…
ഇര രക്ഷപ്പെടാൻ തുനിയുന്നത് , കൺമുന്നിൽ കണ്ട പുലി പാറപ്പുറത്ത് നിന്ന് നിവർന്നു……
വാൽ വായുവിൽ ഇടം വലം വീശി പുലി വീണ്ടും ഗർജ്ജിച്ചു……
മുൻകാലുകളിലൊന്ന് വായുവിൽ തുഴഞ്ഞ്, അത് ഇരയ്ക്കു നേരെ കുതിക്കാൻ ആയമെടുത്ത് നിന്നു..
ഒരു ചെറിയ മുരൾച്ച കൂടി പിന്നിൽ അജയ് കേട്ടു..
ഒഴുക്കിലേക്ക് ഗതി തെറ്റി വീണ അവൻ , പുലിക്കുട്ടി, അതിന്റെ അമ്മയെ അനുകരിച്ച് നിൽക്കുന്നത് ഒന്ന് മലക്കം മറിയുന്നതിനിടെ കണ്ടു..
അജയ് ഒഴുക്കിലേക്ക് വീണു…….
ആറ്റുവഞ്ചിപ്പടർപ്പിൽ ചുറ്റി ഷാൾ വെള്ളത്തിൽ ഓളം തള്ളുന്നത് കണ്ടുകൊണ്ട് , നിറഞ്ഞ മിഴികൾ അവൻ അടച്ചു കളഞ്ഞു…..
ഒഴുക്കിനെതിരെ അവനൊന്നു തുഴഞ്ഞു നിൽക്കാൻ ശ്രമിച്ചെങ്കിലും അത് വെറുതെയായിരുന്നു..
രക്ഷപ്പെട്ടു ചെന്നാലും കാത്തിരിക്കുന്നത് മരണമാണെന്ന ചിന്ത അവനെ അതിൽ നിന്നും പിന്തിരിപ്പിച്ചു എന്നു വേണം പറയാൻ …
അമ്മ, താഴെ ഉണ്ടായിരുന്നെങ്കിൽ എന്നവൻ ആശിച്ചു പോയി…
ആരോ എടുത്തെറിയുന്നതു പോലെയോ, യന്ത്ര ഊഞ്ഞാലിന്റെ ഔന്നത്യത്തിൽ നിന്ന് താഴേക്ക് നിപതിക്കുന്നതു പോലെയോ, ഒഴുക്കിനൊപ്പം അജയ് താഴേക്ക് വീണു……
തന്റെ കുടലുകൾ മലക്കം മറിഞ്ഞ് അണ്ണാക്കിൽ മുട്ടുന്നതു പോലെ അവനു തോന്നി…
വഴുവഴുപ്പുള്ള പാറകളിൽ ചുമലൊന്നിടിച്ചതും മൂക്കിൽ വെള്ളം കയറി നീറിയതും അഗാധതയിലേക്കുള്ള യാത്രക്കിടെ അവനറിഞ്ഞു …
കുരവപ്പൂ ചിതറും പോലെ വെള്ളം ചിതറിത്തെറിച്ചു……
ഉയരത്തിൽ നിന്നും വീണ ആഘാതത്തിൽ ശരീരം ചിതറിത്തെറിക്കുന്ന ഒരനുഭവം അവനുണ്ടായി…
പക്ഷേ, ജീവനിലുള്ള രക്ഷയും അഭിരാമിയും അവനെ സംബന്ധിച്ച് അതിനുമെത്രയോ മുകളിലായിരുന്നു…
വെള്ളത്തിലേക്ക് ബാഗുമായി സമുദ്ര പര്യവേഷകനേപ്പോലെ ആഴ്ന്ന, അജയ് ചവിട്ടുപടിയായിക്കിട്ടിയ കല്ലിൽ, ഉപ്പൂറ്റിയൂന്നി ഒരു അന്തർവാഹിനിയേപ്പോലെ മുന്നോട്ടു കുതിച്ചു……
പതഞ്ഞൊഴുകുന്ന ജലപ്പരപ്പിനു മീതെ പൊങ്ങി, അവൻ തലയൊന്നു കുടഞ്ഞു……
പരന്നൊഴുകുന്ന ജലവിതാനത്തിനു മീതെ അവന്റെ ദൃഷ്ടികൾ പാഞ്ഞു……
തലയിൽ നിന്നും മുഖത്തേക്ക് ഒലിച്ചിറങ്ങിയ വെള്ളത്തുള്ളികൾക്കിടയിലൂടെ, അവ്യക്തമായി അടുത്ത നിമിഷം അവനാ കാഴ്ച കണ്ടു……
ഒഴുകിപ്പോകാതിരിക്കാൻ കല്ലിൽ കെട്ടിപ്പിടിച്ച്, ശിരസ്സു മാത്രം പാറയ്ക്കു മുകളിലും നെഞ്ചിനു താഴേക്ക് വെള്ളത്തിലുമുലഞ്ഞ് കിടക്കുന്ന അഭിരാമി…….!
അവന്റെ മിഴികൾ വെട്ടിത്തിളങ്ങി… ….
വായിൽ നിറഞ്ഞ വെള്ളം തുപ്പിക്കളഞ്ഞ് അജയ് അവൾക്കു നേരെ നീന്തി……
ഒഴുക്കിനെതിരെ നീന്തുക ശ്രമകരമായിരുന്നുവെങ്കിലും, അവളോടുള്ള സ്നേഹത്തിന്റെ കുത്തൊഴുക്കിൽ ജലവേഗം വഴിമാറി…….
അവൾ ചാരിക്കിടക്കുന്ന പാറയ്ക്കരികിലേക്ക് കയ്യെത്തിപ്പിടിച്ച് അവൻ ശ്വാസം ഏങ്ങിവലിച്ചു……
” അമ്മാ………. ”
വെള്ളച്ചാട്ടത്തിന്റെ ശബ്ദം കാരണം, തന്നിലവശേഷിച്ച ശക്തി മുഴുവനെടുത്താണ് അജയ് വിളിച്ചത്…….
ശ്രദ്ധയോടെ അവൻ അവളുടെ മുഖത്തേക്ക് നോക്കി…
അഭിരാമിയുടെ കൺപീലികൾ പതിയെ വിടരുന്നത് അവൻ കണ്ടു..
ഒന്നും സംഭവിച്ചിട്ടില്ല, എന്നറിഞ്ഞപ്പോൾ അവന്റെ ഹൃദയം തുടിച്ചു …
അടുത്ത നിമിഷം അവന്റെ ചിന്തയിലേക്ക് പുലി കുതിച്ചെത്തി……
തലയുയർത്തി നോക്കാൻ ശക്തിയില്ലായിരുന്നുവെങ്കിലും അവൻ ഉയർത്തി നോക്കി……
പുലിയിരുന്ന പാറ കാണാനില്ല…
“അമ്മാ……. ”
അവൻ വീണ്ടും വിളിച്ചു… ….
ശക്തി കുറഞ്ഞ ഒരു ഞരക്കം മാത്രം അവളിൽ നിന്നുണ്ടായി…
അവൻ പാറപ്പുറത്തേക്ക് വലിഞ്ഞു കയറി, അവളെ വലിച്ചു കയറ്റി…
അവളുടെ കമ്പിളിത്തൊപ്പി അവൻ മുഖത്തു നിന്ന് ഊരിയെടുത്തു…
തന്റെ മടിയിലേക്ക് ചായ്ച്ചു കൊണ്ട് അജയ് അവളുടെ കവിളുകൾ തിരുമ്മിത്തുടങ്ങി……
” പുലി……..”
രണ്ടു മൂന്ന് മിനിറ്റു കഴിഞ്ഞപ്പോൾ അവൾ അസ്പഷ്ടമായി പുലമ്പി…
