“”…സിദ്ധൂന് കാപ്പിയെടുക്കട്ടേ..??””‘_ എന്നനുവാദം ചോദിയ്ക്കുമ്പോലെ ചോദിച്ചപ്പോൾ ഞാനും തലകുലുക്കി…
അവരു തിരിഞ്ഞങ്ങുപോയപ്പോൾ,
“”…അതെന്താ നിന്നോടുമാത്രം പെർമിഷനൊക്കെ ചോദിച്ചേ..?? എന്റടുക്കൊന്നും ചോദിച്ചില്ലല്ലോ..!!”””_ മുന്നിലിരുന്ന പ്ളേറ്റിനേയും എതിരേയിരുന്ന എന്നേയും മാറിമാറിനോക്കിയായിരുന്നു മീനാക്ഷിയുടെ സംശയം…
അതിന്,
“”…ഇപ്പോളിതു വേണ്ടെന്നുമ്പറഞ്ഞ് അതൊണ്ടോയ് തിരിച്ചുകൊടുത്താൽ ഇനിയെപ്പൊ ഫുഡെടുത്താലും നിന്നോടും പെർമിഷൻചോദിയ്ക്കും..!!”””_ ഞാൻ ആക്കിച്ചിരിച്ചു…
എന്നാൽ പൊട്ടത്തിയ്ക്കതു മനസ്സിലായില്ല…
കുറച്ചുനേരം സാമ്പാറിൽകുതിർത്ത ഇഡ്ഡലിയും കൈയിൽവെച്ചിരുന്ന് എന്തൊക്കെയോ ചിന്തിച്ചു…
പിന്നെയോർക്കാതെ അതങ്ങു വായിലേയ്ക്കു വെച്ചപ്പോൾ അവളെത്തന്നെ നോക്കിയിരുന്ന ഞാൻ വെട്ടിച്ചിരിച്ചുപോയി…
അതുകണ്ടതും കക്ഷിയും അത്യാവശ്യം വൃത്തിയായൊന്നു ചമ്മി…
“”…മ്മ്മ്.! മൂഞ്ച്… മൂഞ്ച്… ഇനിയതു തിരികെക്കൊടുത്താൽ ആ പ്ളേറ്റുകൊണ്ടവര് തലതല്ലിപൊളിയ്ക്കും..!!”””_ അവൾടെ ചമ്മിയയിരുപ്പും ഭാവവുമൊക്കെക്കണ്ടപ്പോൾ ഞാൻ പറഞ്ഞു…
കേൾക്കേണ്ടതാമസം തലകുനിച്ചിരുന്ന് ആള് വെട്ടിവിഴുങ്ങാനും തുടങ്ങി…
അപ്പോഴേയ്ക്കും ചേച്ചിയെനിയ്ക്കുള്ള ബ്രേക്ക്ഫാസ്റ്റും കൊണ്ടുത്തന്നു…
അതുകഴിച്ചുകൊണ്ടിരിയ്ക്കുമ്പോളാണ് ജോക്കുട്ടച്ഛൻ കേറിവരുന്നത്…
പുള്ളിയെക്കണ്ട് ഞാനൊന്നു വെളുക്കെച്ചിരിച്ചതും,
“”…ആഹാ.! രണ്ടാളുമെഴുന്നേറ്റോ..?? എന്നിട്ടുറക്കോക്കെ എങ്ങനുണ്ടായിരുന്നു..??”””_ അതും ചോദിച്ചുകൊണ്ട് പുള്ളി കസേരവലിച്ചിട്ട് ഞങ്ങളടുത്തായിരുന്നു…
അതിന് ലെവനതു കേട്ടോന്നൊന്നു
തിരിഞ്ഞുംമറിഞ്ഞും നോക്കിയിട്ടാണ് കുഴപ്പമില്ലായിരുന്നൂന്നു ഞാൻ മറുപടികൊടുത്തത്…
കേട്ടെങ്കിലാ നാറി വീണ്ടും ചൊറിഞ്ഞിട്ടുവന്നാലോ…
പിന്നെക്കുറച്ചുനേരം കുശലമായി ചോദിച്ചതിനൊക്കെ മറുപടികൊടുക്കലായിരുന്നെന്റെ ഡ്യൂട്ടി…
ഒടുക്കം;
“”…ആഹ്..! അതൊക്കെപ്പോട്ടേ… എന്നിട്ടിന്നത്തെ പ്ലാനെന്താ..??”””_ പുള്ളി ഞങ്ങളെ മാറിമാറിനോക്കി പുരികമുയർത്തി…
…ഇനി ഞങ്ങൾടെ തീറ്റകണ്ടിട്ടു മുതലാകില്ലെന്നുതോന്നി പറഞ്ഞുവിടാനുള്ള ചോദ്യമാണോ..??_ ഞാനൊന്നു കുഴങ്ങി…
“”…അതുപിന്നെ… കഴിച്ചുകഴിഞ്ഞിട്ട്… കഴിച്ചുകഴിഞ്ഞിട്ടു പോണം..!!”””
“”…പോവാനോ..?? ഇന്നോ..?? അതൊന്നും നടക്കൂല..!!”””_ എന്റെ മറുപടിയ്ക്കയാൾ എടുത്തടിച്ചപോലെയാണ് അങ്ങനെപറഞ്ഞത്…
അതെനിയ്ക്കു ചെറിയതോതിലൊരാശ്വാസമുണ്ടാക്കി…
എന്തായാലും തീറ്റയുടെപേരിൽ ചാടിച്ചുവിട്ടില്ലല്ലോ…
എന്നിരുന്നാലും മീനാക്ഷി കൂടെയുള്ളതുകൊണ്ട് ഏതുനേരത്തുമതു പ്രതീക്ഷിയ്ക്കാം…
അതുകൊണ്ട് കൂടുതലിവടെ തങ്ങിനിൽക്കുന്നതു ശെരിയാവില്ല…
“”…അല്ലങ്കിൾ… ഞങ്ങൾക്കിന്നുതന്നെ പോണം… പോയിട്ട് കുറച്ചുപ്രോഗ്രാംസുണ്ട്..!!”””_ ഒഴിയാനായിപറയുമ്പോൾ മീനാക്ഷി തലയുയർത്തി എന്നെയൊന്നു നോക്കി…
അപ്പോഴേയ്ക്കും;
“”…എന്തുപ്രോഗാമുണ്ടേലും നിങ്ങളു കുറച്ചുദിവസമിവിടെ നിന്നിട്ടേപോകൂ… അന്നു നിന്റച്ഛനെവിളിച്ചപ്പോൾ നീ രണ്ടുദിവസമിവടെ നിന്നിട്ടേ മടങ്ങൂളൂന്നവനെനിയ്ക്കു വാക്കുതന്നതാ… അതോണ്ട് പോണകാര്യം മറന്നേക്ക്..!!”””_ പുള്ളിയെന്റെ സകലപ്രതീക്ഷകളും അടിച്ചമർത്തിക്കൊണ്ടു പറഞ്ഞു…
അതോടെന്റെഞെട്ടലും പുറത്തുവന്നു;
“”…അയ്യോ.! രണ്ടുദിവസോ..?? അതൊന്നും ശെരിയാവില്ല..!!”””_
മുടക്കുപറഞ്ഞ ഞാൻ അതിനൊരു കാരണംവേണോലോന്ന ചിന്തയിൽനോക്കുമ്പോൾ മുന്നിലിരിപ്പുണ്ട് മീനാക്ഷി…
അതോടെയവളെ ബലിയാടാക്കാനും തീരുമാനിച്ചു…
“”…നാളെ… നാളെയിവൾക്കു കോളേജുണ്ട്… ക്ലാസ്സുമിസ്സാക്കാൻ പറ്റത്തില്ല..!!”””_ ഞാൻ കൂട്ടിച്ചേർത്തതും
ഏതുകോളേജ്..?? ആരുടെക്ലാസ്സ്..?? എന്നമട്ടിൽ മീനാക്ഷിയുടെയൊരു നോട്ടം…
എനിയ്ക്കു ക്ലാസ്സൊന്നുമില്ലെന്ന് അന്നേരംതന്നെയവള് പറയോന്നുകരുതിയെങ്കിലും എന്തോഭാഗ്യത്തിന് പുള്ളിക്കാരിയൊന്നും പറഞ്ഞില്ല…
“”…അപ്പൊ നിനക്കുകോളേജും ക്ലാസ്സുവൊന്നുവില്ലേ..??”””_ കുഞ്ഞിനേംകൊണ്ട് അങ്ങോട്ടേയ്ക്കുവന്ന ജോയുടെ വകയായിരുന്നു ചോദ്യം…
കേട്ടതും മീനാക്ഷിയറിയാതെ എക്കിച്ചിരിച്ചുപോയി…
അതിനു ഞാനവളെ രൂക്ഷമായിനോക്കിയ ശേഷം;
“”…ആം.. ശെരിയാ… എനിയ്ക്കും ക്ലാസ്സുണ്ട്..!!”””_ ഞാനൊന്നു ചമ്മി…
എന്റെ ചമ്മലുകണ്ടിട്ടാണോന്നറിയില്ല എല്ലാമെന്നെനോക്കി ആക്കിച്ചിരിച്ചത്…
അതിനെന്തു മറുപടിപറയണമെന്നറിയാതെ ഇരുന്നുരുകിയപ്പോൾ,
“”…മീനുമോൾക്ക് മൂന്നാലുദിവസത്തേയ്ക്കു ലീവാണെന്നാണല്ലോ വിളിച്ചപ്പോളവൻ പറഞ്ഞത്..!!”””_ എന്നുംപറഞ്ഞു കാരണവരെന്നെ തുറിച്ചൊരുനോട്ടം…
അപ്പൊ തന്തച്ചാരതും വിളമ്പിയോന്ന മട്ടിലിരിയ്ക്കുമ്പോൾ,
“”…മീനൂനപ്പോൾ ലീവാണോ..??”””_ എന്നുംചോദിച്ച് ചേച്ചിയുമിടയ്ക്കു കേറി…
അതിനവൾ പാവ തലകുലുക്കുമ്പോലെ തലകുലുക്കുവേംചെയ്തു…
…ദ്രോഹി.!
“”…ആഹാ.! മീനൂന് ലീവായ്ട്ടാണോ ഇവനീപ്പോകാൻകിടന്നു വെപ്രാളപ്പെടുന്നേ..?? അപ്പൊ നിനക്കാണിവടന്നു പൊയ്ക്കോളാൻ
വയ്യാത്തതല്ലേ..??”””_ ചോദ്യമമ്മയുടെ ഭാഗത്തൂന്നാണ്…
എനിയ്ക്കാണേൽ എന്നാകോപ്പ് മറുപടിയായി എഴുന്നളിയ്ക്കണോന്നറിയാത്ത അവസ്ഥയും…
“”…അതുപിന്നെ സംശയോണ്ടോ..?? അവന്റെ മുഖംകണ്ടാലറിഞ്ഞൂടേ, കള്ളലക്ഷണോമായ്ട്ടിരിയ്ക്കുവാ… മീനൂനാണേലിവടെ നിൽക്കണോന്നൊക്കെണ്ട്… അല്ലേ മീനൂ..??”””_ ചേച്ചിയെന്റെ തലയിലേയ്ക്കെല്ലാ കുറ്റവുംചാർത്തിത്തന്നിട്ട് മീനാക്ഷിയെനോക്കി…
അതിനവൾ കുലസ്ത്രീചമഞ്ഞു തലയാട്ടുകേംചെയ്തു…
“”…അപ്പോളെന്റെ കൊച്ചിനേംകൊണ്ടിവടന്നു പൊയ്ക്കോളാൻ വയ്യാത്തത് ഈ കള്ളത്തെമ്മാടിയ്ക്കാണല്ലേ..??”””_ മീനാക്ഷിയുടെ തലയാട്ടലിനെയേറ്റു പിടിച്ചുകൊണ്ട് അവന്റമ്മയെനിയ്ക്കിട്ടൊരു കുത്ത്…
ഉടനേ ചേച്ചിയിടയ്ക്കുകേറി;
“”…അതിനാരാ ഇവനെയിവടന്നു വിടുന്നത്..?? ഒരാഴ്ച്ചകഴിയാതെ രണ്ടുമിവിടുന്ന് പോകാമ്പോണില്ല… അല്ലേ ജോക്കുട്ടാ..??”””_ പുള്ളിക്കാരിയതു പറഞ്ഞശേഷം അവന്റഭിപ്രായമറിയാൻ ചോദ്യമിട്ടു…
“”…പിന്നല്ലാതെ… നിങ്ങളു കുറച്ചുദിവസമിവടെനിന്ന് ഇവിടെയൊക്കെയൊന്നു ചുറ്റിയടിയ്ക്കടോ… ഈ ഹണിമൂണിനൊക്കെ ഏറ്റവുംബെസ്റ്റ്പ്ലേസ് ഇടുക്കിയാ..!!”””_ കൂട്ടത്തിൽ സ്വന്തംനാടിനിട്ടവനൊരു പ്രൊമോഷൻകൂടി കൊടുത്തപ്പോൾ, നിന്റപ്പന്റെ ഹണിമൂണാണോടാ നാറീന്നു ചോദിക്കാൻ വന്നതാണെങ്കിലും,
“”…അതൊക്കെശെരിയാ… എന്നാലും ബസ്സിനുകേറി ചുറ്റിയടിയ്ക്കുന്നതൊക്കെ ചടങ്ങാന്നേ… അതോണ്ടു ഞങ്ങളുപോയ്ട്ട് പിന്നൊരിയ്ക്കൽ ബൈക്കുമായ്ട്ടുവരാം… അന്നിടുക്കി മുഴുവൻ കറങ്ങീട്ടേപോകൂ..!!”””_ എങ്ങനേലും ഒഴിവാക്കിയവടെന്നു തെറിച്ചാൽമതിയെന്ന ചിന്തയിലാണ് ഞാൻ വെച്ചുതള്ളീത്…