അതുകണ്ടാദ്യമൊന്നു
പേടിച്ചഞാൻ,
“”…എന്തോപറ്റി..??”””_ യെന്നു തിരക്കീതും,
“”…വയറ്… വയറുവേദനിയ്ക്കുന്നെടാ..!!”””_ ന്നുംപറഞ്ഞവൾ വയറുംപൊത്തിപ്പിടിച്ച് അമറാൻതുടങ്ങി…
“”…ഓഹ്.! അഭിനയോക്കെ കൊള്ളാം… ഞാനിതു തിന്നാണ്ടിരിയ്ക്കാനുള്ള നിന്റടവല്ലേയിത്..?? എന്നിട്ടു ഞാൻ വെച്ചേച്ചുപോകുമ്പോൾ നെനക്കെടുത്തു ഞണ്ണണംലേ..?? ഐഡിയയൊക്കെ മനസ്സിലിരിയ്ക്കത്തേയുള്ളൂ… തരത്തില്ലെടീ… ഇതീന്നൊറ്റൊരെണ്ണം തരത്തില്ല..!!”””_ വേണ്ടാഞ്ഞിട്ടും അവളെടുത്തു കഴിച്ചാലോന്നുപേടിച്ച് പ്ളേറ്റോടുകൂടി തിരിഞ്ഞിരുന്നാണ് ഞാനതുപറഞ്ഞത്…
പട്ടിയിട്ട് തിന്നത്തുവില്ല, പശൂനിട്ട് കൊടുക്കത്തുമില്ലെന്ന് നിങ്ങളുകേട്ടിട്ടല്ലേയുള്ളൂ..??!! ആം.!
എന്നാൽ മീനാക്ഷിയുടെ മുക്കലുംമൂളലും ഞെളിപിരിയുമൊക്കെ അതിക്രമിയ്ക്കാൻ തുടങ്ങിയപ്പോൾ ഇനിയിവളു പറയുന്നേല് വല്ല സത്യവുമുണ്ടോന്നൊരു ഡൌട്ട്… വെറുതെയെന്തിനാ റിസ്ക്കെടുക്കുന്നേ..??!!
“”…മ്മ്മ്.! നെനക്കുവേണേൽ ഒരെണ്ണമെടുത്തോ..!!”””_ പരീക്ഷിയ്ക്കാനായി പ്ളേറ്റവൾടെ മുന്നിലേയ്ക്കു നീക്കിയതേ ഓർമ്മയുള്ളൂ…
“”…എടുത്തോണ്ടു പോടാ നാറീ..!!”””_ ന്നും ചീറിക്കൊണ്ടവൾ പ്ളേറ്റിനുവശത്തായിരുന്ന ചക്കക്കുരു പെറുക്കി എന്നെയെറിഞ്ഞു…
അതിലൊരെണ്ണം ഉച്ചിയിൽക്കൊണ്ടു കുതിച്ചപ്പോഴാണ് സിസ്റ്റം വർക്കായത്…
വായിലുവെച്ചാൽ തിരിച്ചുകടിയ്ക്കാത്ത സാധനത്തോട് മീനാക്ഷിയിങ്ങനെ പ്രതികരിയ്ക്കണമെങ്കിൽ അതിലെന്തോ വശപ്പിശകുണ്ട്…
ഇനിയിവൾടെ തീറ്റകണ്ട് വീട്ടുകാരുതന്ന പണിവല്ലതുമാണോ..?? എന്നാലൂമ്പി…
“”…എടാ… നീയെന്താലോചിച്ചോണ്ടിരിയ്ക്കുവാ..?? എനിയ്ക്കു വയറുവേദനിയ്ക്കുന്നെടാ… എന്നേതേലും ഹോസ്പിറ്റലിക്കൊണ്ടു പോടാ… അല്ലേ, സത്യായ്ട്ടും ഞാനിവടെക്കിടന്നു ചാവും..!!”””_ വയറുംപൊത്തിപ്പിടിച്ചവൾ വീണ്ടുംകിടന്നുരുളാൻ തുടങ്ങി…
“”…ഓഹ്.! ചുമ്മാ… തമാശപറയല്ലേ…!!”””
“”…എടാ… ഞാൻ സത്യവാപറഞ്ഞേ… എനിയ്ക്കു വയറുവേദനിയ്ക്കുന്നെന്ന്… എന്നെയൊന്നാശൂത്രിക്കൊണ്ടോടാ… പ്ലീസ്സ്..!!”””_ അവൾവീണ്ടും കിടന്നുചിതറാൻ തുടങ്ങീപ്പോൾ,
“”…ഞാനപ്പഴേപറഞ്ഞതാ… കണ്ണിക്കണ്ടതൊന്നും മേടിച്ചുകഴിയ്ക്കല്ലെന്ന്… അതെങ്ങനാ ആർക്കും കൊടുക്കാണ്ടു തിന്നുകാണും, മിക്കവാറുമിത് അവരുകൊതിവെച്ചതാവത്തേയുള്ളൂ..!!”””_ എന്നുംപറഞ്ഞവളെ കുറ്റംചാർത്തുമ്പോഴും മീനാക്ഷിപറയുന്നതിലെന്തേലും വാസ്തവമുണ്ടോന്ന സംശയത്തിലായിരുന്നു ഞാൻ…
“”…ഞാനവരുതന്നതേ കഴിച്ചുള്ളൂ… എനിയ്ക്കറിയാവോ ഇതിങ്ങനൊക്കെ വരോന്ന്… ആ തള്ളയൊണ്ടല്ലോ, അവരെന്നെ ചതിച്ചതാടാ… അമ്മേ… ഞാനിപ്പച്ചാകുവേ..!!”””_ അതുകേട്ടതുമെനിയ്ക്കു ചിരിവന്നു…
ഉടനെ,
“”…വെറുതേ നോക്കിയിരുന്നു കിണിയ്ക്കാതെ പോയൊരു ഡോക്ടറെ വിളിച്ചോണ്ടുവാടാ… അല്ലേ ഞാനിപ്പം ചാവും..!!”””_ ന്നായി അവൾ…
“”…ഓ.! ഇനിയിപ്പെന്തിനാ വേറൊരു ഡോക്ടറ്..?? നീ സ്വന്തായ്ട്ടങ്ങ് ചികിത്സിച്ചോന്ന്… ഒന്നൂല്ലേലും കുടുംബത്തൊരു ഡോക്ടറുണ്ടായ്ട്ട് പുറത്തൂന്നാളെ വിളിയ്ക്കുന്നതു മോശമല്ലേ..?? ഇനി തൊട്ടോ തടവിയോ വല്ല സഹായോംവേണേൽ ഹെൽപ്പറായ്ട്ട് ഞാനുംകൂടാം… എന്തേയ്..??”””_ ചോദ്യമവസാനിച്ചതും കലിപൂണ്ട മീനാക്ഷി, കാലെത്തിച്ചെന്നെയൊരു തൊഴി…
എന്നാൽ തൊഴിച്ചതെന്നെയാണെങ്കിലും നിലവിളിയവൾടെ വായീന്നായിരുന്നു പൊന്തീത്…
ചവിട്ടാനായി കാലെത്തിച്ചപ്പോൾ വയറുവലിഞ്ഞതായിരുന്നു കാറാനുള്ള റീസൺ…
“”…എന്നെ തൊഴിച്ചേച്ച് നീ കിടന്നു കാറുന്നോടീ മറ്റവളേ..??”””_ പഞ്ചാബീഹൌസിലെ ഹനീഫിക്കാടെ ഡയലോഗുംകടമെടുത്ത് അവൾടെനേരേ ചീറുമ്പോൾ ഡോറിൽ വീണ്ടുമൊരു മുട്ടുകേട്ടു…
…കോപ്പ്.! ഇമ്മാതിരികിടന്നു ഡോറിമ്മേൽമുട്ടാൻ ഇതെന്താ മെൻസ്ഹോസ്റ്റലിലെ കക്കൂസോ..??
മനസ്സിൽ പ്രാകിക്കൊണ്ടു നേരേ ഡോറുപോയി തുറന്നപ്പോൾ പരിഭ്രമിച്ചമുഖവുമായി നിൽക്കുവാണ് ആരതിയേച്ചി…
“”…എന്നതാ..?? എന്നതാ ഒരു കരച്ചിലൊക്കെ കേട്ടത്..?? എന്നാ പറ്റീതാ..??”””_ പരിഭ്രാന്തിയുടെ കാരണം മറച്ചുവെയ്ക്കാതെ ചോദ്യമിട്ടതും അടവുകൾടെയുറവിടമായ ഞാൻ പ്ളേറ്റുതിരിച്ചു;
“”…ചേച്ചീ… ഇവടടുത്തു നല്ല ഹോസ്പിറ്റലേതുണ്ട്..??”””
“”…എന്നതാ..?? എന്നാപറ്റിയേ..??”””_ എന്റെ ചോദ്യംകേട്ടതുമവരുടെ മുഖത്തൊരാശങ്ക പടർന്നു…
“”…അതിവൾക്കൊടുക്കത്തെ വയറുവേദന… ഞാനേതേലും ഹോസ്പിറ്റലിക്കൊണ്ടോവാൻ റെഡിയാക്കുവാരുന്നു..!!”””_ പറഞ്ഞതും എന്നെയും മറികടന്നുകൊണ്ട് പുള്ളിക്കാരിയകത്തേയ്ക്കു കേറി,
“”…വയറുവേദനയോ..?? അതിപ്പെന്താ പെട്ടെന്നങ്ങനെ വരാൻ..??”””_ അവരു വേവലാതിയോടെ ചോദിച്ചു ബെഡ്ഡിൽ മീനാക്ഷിയുടടുത്തിരുന്നു…
…ഏയ്‌.! പെട്ടെന്നൊന്നുവല്ല, നേരത്തേവിളിച്ച് അപ്പോയ്ൻമെന്റെടുത്തിരുന്നു..!! _ എന്നുപറയാനായി നാവങ്ങോട്ടു ചൊറിഞ്ഞതാ… പിന്നെയാ പാവംചേച്ചീടെ മുഖത്തുനോക്കി അങ്ങനെ പറയണ്ടെന്നുകരുതി…
ഞാനതും ചിന്തിച്ചുനിൽക്കുന്നേരം ചേച്ചിയെന്നെയൊന്നു നോക്കിക്കൊണ്ടു മീനാക്ഷിയോടു ചേർന്നിരുന്ന് ഞാൻ കേൾക്കാതെന്നോണം ചോദിച്ചു;
“”…എന്നാ… എന്നാ പറ്റിയേ…?? ഡേറ്റായതാണോ..??”””_ എന്ന്…
അതിനു മീനാക്ഷി;
“”…ങ്‌ഹൂം.! അതൊക്കെ കഴിഞ്ഞതാ..!!”””_ ന്നു മറുപടികൊടുത്തപ്പോൾ ഇതിനിടയിലിതൊക്കെ എപ്പോളെന്ന ഭാവമായിരുന്നെനിയ്ക്ക്…
എന്നിട്ടു നമ്മളിതൊന്നുമറിയുന്നില്ലല്ലോ..??!!
അപ്പോഴേയ്ക്കും വീണ്ടുമാ ചേച്ചിയുടെ സ്വരമുയർന്നു;
“”…എന്നിട്ടിതെപ്പോൾ തുടങ്ങീതാ..??”””
“”…അതോ… അതാച്ചക്കപ്പഴം വലിച്ചുകേറ്റിയേപ്പിന്നെയാ… വെറുതേ കിട്ടീതാണല്ലോന്നോർത്തു ന്യായത്തിനു വലിപ്പിച്ചിട്ടുണ്ടാവും..!!”””_ ചോദ്യം
മീനാക്ഷിയോടായിരുന്നെങ്കിലും ഞാൻ വെച്ചുതൊടുത്തു,
“”…മിക്കവാറുമെല്ലാംകൂടി വെച്ചുപെരുക്കീട്ട് വയറുപൊട്ടിപ്പിളരുവാന്നാ തോന്നുന്നേ… ഇനീപ്പെന്താ ചെയ്ക..??”””_ ഞാൻ ചേച്ചിയെനോക്കി…
“”…ആണോ കൊച്ചേ..?? ചക്കപ്പഴം കഴിച്ചേച്ചുവന്നതാണോ..?? അതിനത്രയ്ക്കുംവേണ്ടി കഴിച്ചിരുന്നോ..??”””_ സംശയനിവാരണം നടത്താനായി ചോദിച്ചതും,
“”…ഓ.! അതിലെന്താത്ര സംശയം..?? അല്ലേ ചേച്ചിയിവൾടെ വയറേലൊന്നു ഞെക്കിനോക്കിയേ… ചക്കക്കുരുവൊക്കെ ചെവീക്കൂടെ തെറിയ്ക്കും..!!”””_ എന്നൊരു ഡയലോഗായിരുന്നെന്റെ വായീന്നുവന്നത്…
അതിന്,
“”…നീയൊന്നു മിണ്ടാണ്ടിരീടാ… ഞാനൊന്നു ചോദിച്ചോട്ടേ..!!”””_ ന്നുള്ള ചേച്ചിയുടെ മറുപടികേട്ടതും ഞാനൊന്നു ഞെട്ടി…
ആകെയരമുക്കാൽ മണിയ്ക്കൂറത്തെ പരിചയംമാത്രമുള്ളയെന്നോട് അങ്ങനെപറയണമെങ്കിൽ..?? ഞാനതോടൊന്നടങ്ങി…
പക്ഷേ, സാധാരണയങ്ങനൊരു സാഹചര്യത്തിലവൾടെ മൂക്കാമ്മണ്ടയിടിച്ചു പൊട്ടിയ്ക്കാമെന്നു ചിന്തിയ്ക്കുന്നയെനിയ്ക്ക് ഇതെന്താപറ്റിയേന്നുമാത്രം മനസ്സിലായില്ല…