“ഞാനൊത്തിരി ബുദ്ധിമുട്ടിച്ചു അല്ലെ രണ്ടാളെയും….”
“അതെ ബുദ്ധിമുട്ടിച്ചു…!!! എടി കാന്താരീ… വിവാഹമെന്ന് പറയുന്നതൊന്നുമല്ല ജീവിതത്തിലെ ഏറ്റവും വലിയ കാര്യം… നിനക്ക് ഇഷ്ടമുള്ള ഒരാളെ നീ തന്നെയാണ് തിരിഞ്ഞെടുക്കണ്ടത്.. അവനു നിന്നെ ജീവനാണ് എന്ന് ഞങ്ങൾ രണ്ടാൾക്കുമറിയാം.. ഇതിൽ കൂടുതലെന്താ ഞങ്ങൾക്ക് വേണ്ടത്…” അമ്മയത് പറഞ്ഞു കഴിഞിട്ടെന്റെ നെറ്റിയിൽ തലോടി ഒരു മൃദു ചുംബനം നൽകി….
“മോളെ… ഞാനിന്നു അവന്റെ വീട്ടിലേക്ക് പോയിരുന്നു. വീടും പരിസരവുമൊക്കെ കാണാൻ. ഒറ്റയ്ക്ക് അവനൊത്തിരി കഷ്ട്പെടുന്നുണ്ട് എന്നറിഞ്ഞപ്പോൾ അവന്റെ വീടുപണിക്ക് കുറച്ചു പൈസ തരാമെന്നു ഞാൻ അവനോടു പറഞ്ഞപ്പോൾ. അവനത് സ്നേഹപൂർവ്വം നിരസിച്ചു. വാങ്ങിയില്ലെന്നു മാത്രമല്ല. നിന്റെ സമ്മതം കൂടാതെ തരുന്ന പൈസ ഒന്നും വേണ്ടാന്നും പറഞ്ഞവൻ….. ഞാനിന്നേവരെ ഇതുപോലെയൊരാളെ കണ്ടിട്ടില്ല…!!” എന്റെ ചെക്കനെയോർത്തു എനിക്ക് സന്തോഷവും അഭിമാനവും കൊണ്ട് ഞാനെന്റെ അച്ഛനെ നോക്കി ചിരിച്ചു.
“മോളല്ലേ അവനെ ആദ്യം ഇഷ്ടമാണെന്നു പറഞ്ഞെ…?!! ജസ്റ് അറിയാൻ ചോദിക്കുവാണേ…” അച്ഛൻ എന്റെ കണ്ണിലേക്ക് നോക്കി ചോദിച്ചു.
“ഇല്ലച്ഛാ… ഞങ്ങൾ ഇത്വരെ അങ്ങനെ ഇഷ്ടമാണെന്നു പറഞ്ഞിട്ടൊന്നുമില്ല.. പരസ്പരം ആഴത്തിൽ മനസിലാക്കുന്നുണ്ട് ബഹുമാനിക്കുന്നുണ്ട്…. എനിക്കൊരു ജോലികിട്ടീട്ട് മാത്രമേ ഞാൻ വിവാഹത്തിന് സമ്മതിക്കു…..പിന്നെ ബന്ധുക്കൾ ഓരോ ആലോചനയുമായി വരുമ്പോ പെണ്ണുകാണാൻ വേണ്ടി ഒരുങ്ങാതെ ഇരിക്കാമല്ലോ എന്ന് കരുതിയാണ് അച്ഛനോട് ഞങ്ങളുടെ നിശ്ചയമെങ്കിലും നടത്താൻ ഞാൻ ആഗ്രഹം പറഞ്ഞത്…”
“അമ്മെ… ദേ മിഥു വിളിക്കുന്നു…” എന്റെ ഫോൺ ടേബിളിൽ റിങ് ചെയ്തപ്പോൾ ഞാനച്ഛന്റെ മടിയിൽ നിന്നുമെണീറ്റു.
“എവിടെയാണിപ്പോ….”
“ഞാൻ എയർ പോർട്ടിലാ മേഥചേച്ചി…”
“ഓ പിന്നെം!! ഡാ…..നീയെന്നെ ചേച്ചി ന്ന് വിളിക്കാതെ ഇരിക്കാമോ പ്ലീസ്… കാലുപിടിക്കാം ഞാൻ…” ഞാനതു പറഞ്ഞപ്പോൾ പിറകിൽനിന്നുള്ള ചിരികേട്ട് എനിക്കും ദേഷ്യം മാറി ചിരി പയ്യെ മറ നീക്കി വരുന്നുണ്ടായിരുന്നു…
“ഉഹും.. ഫസ്റ് നൈറ്റിലുവിളിക്കാം…”
“നിന്നെ പറഞ്ഞിട്ട് കാര്യമില്ല…
പതിയെ വണ്ടിയോടിച്ചു വന്നാ മതിയേ…”
“ആഹ് ചേച്ചികുട്ടി…”
“പോടാ…..” ഞാൻ ചിണുങ്ങലോടെ ഫോൺ കട്ട് ചെയ്തു. ഡിന്നർ കഴിഞ്ഞു കിടന്നു….
മോതിരം മാറൽ ചടങ്ങ് കഴിഞ്ഞു. മിഥുൻ എന്റെയൊപ്പം സ്റ്റേജിൽ ചേർന്ന് നിന്നപ്പോൾ ഒരു കുശുമ്പുള്ള ചെറിയമ്മ അവനു എന്നെക്കാൾ ഒരല്പം ഉയരക്കുറവുളളത് കണ്ടു ചിരിക്കുന്നത് കണ്ടു ഞാൻ അവന്റെ കൈകോർത്തു പിടിച്ചു അഭിമാനത്തോടെ ഫോട്ടോയ്ക്ക് പോസ് ചെയ്തു. മിഥുൻ നീല കുർത്തയും കസവു മുണ്ടും. ഞാൻ നീല ബോർഡർ ഉള്ള കാഞ്ചിപുരം സാരിയും. കഴുത്തിൽ ചെറിയ നെക്ക്ലേസും. സ്റ്റെജിൽനിക്കുമ്പോ മിഥുന്റെ മുറപ്പെണ്ണ് എന്റെ കാതിൽ വന്നു പറഞ്ഞു. ജോഡി പൊരുത്തം സൂപ്പർ അഹ് ഇറുക്ക് എന്ന്…. എനിക്ക് ചിരി വന്നു…
നിശ്ചയം കഴിഞ്ഞ മൂന്നു മാസത്തിനു ശേഷം NET എക്സാം റിസൾട്ട് വന്നു. ഞാൻ ക്വാളിഫൈഡ് ആയതറിഞ്ഞപ്പോൾ എന്റെ അടുത്ത ബന്ധുക്കൾ കുറച്ചു പേര് വീട്ടിൽ വന്നു. സദ്യ ഒരുക്കി ഞങ്ങൾ ചെറിയ ആഘോഷമാക്കി. ഞാനുമാലോചിച്ചു കല്യാണവും കാതുകുത്തുമല്ല ഇതുപോലെ പെണ്ണിന് അഭിമാനിക്കാൻ വേണ്ടിയുള്ള കൊച്ചു കൊച്ചു നിമിഷങ്ങളാണ് ശെരിക്കും സെലിബ്രേറ്റ് ചെയ്യേണ്ടതെന്നും!!!!!!!!!!!!!
മിഥുന്റെ വീടിന്റെ തേപ്പു പണിയും പെയിന്റിംഗ് പണിയുടെയും തിരക്കായിരുന്നു അവൻ. എങ്കിലും വൈകീട്ട് അവന്റെ ബൈക്കിൽ ആദ്യമായി എന്റെ വീട്ടിലേക്ക് വന്നു. അപ്പുറത്തെ വീട്ടിലുള്ളോരൊക്കെ എല്ലാരും നോക്കുന്നുണ്ടായിരുന്നു. ഇതാടീ ചെക്കൻ…
മിഥുനെ അമ്മയും അച്ഛനും സ്വീകരിച്ചിരുത്തി. വിശേഷമൊക്കെ ചോദിച്ചു. പഠിത്തമൊക്കെ നടക്കുന്നുണ്ടോ എന്ന് ഞാൻ എല്ലാരുടെയും മുന്നിൽ അവനോടു ചോദിച്ചപ്പോൾ അവന്റെ നാണം കാണണം. കടിച്ചു തിന്നാൻ തോന്നി. എന്റെ കള്ള ചെക്കൻ…