ഇടയ്ക്കിടെ അബി അന്ന് സ്വാമി പറഞ്ഞ കാര്യം ഓർത്ത് ചിരിക്കുമായിരുന്നു …
‘ ഇത്രയും സന്തോഷമായ തന്റെ കുടുംബത്തിൽ എന്ത് പറ്റാൻ.. അല്ലേൽ തന്റെ കുടുംബത്തെക്കൊണ്ട് നാട്ടുകാർക്ക് എന്ത് പറ്റാൻ..,ഓരോരോ കള്ള സ്വാമികൾ.., എത്രയോ പാവങ്ങൽ ഇവരുടെ വലയിൽ വീഴുന്നു…’ ഇതായിരുന്നു അബിയുടെ ചിന്ത..!!
ജൂടിന്റെ ഒമ്പതാം ക്ലാസ്സ് വരെ കാര്യങ്ങൾ വളരെ സ്മൂത്ത് ആയി തന്നെ പോയി… എല്ലാ നല്ല കാര്യങ്ങളുടെയും രാജകുമാരനായി തന്നെ അവൻ കൊടി കുത്തി വാണു..!
ഒമ്പതാം ക്ലാസ്സ് പകുതി ആയപ്പോഴാണ് ജൂട് പഠിത്തം അല്ലാതെയുള്ള കാര്യങ്ങളെ കുറിച്ച് കൂടുതൽ ബോധവാനായത്..,
ക്ലാസ്സിലെ ഒരു തല്ലിപ്പൊളി ഗ്യാങ്ങിൽ അവൻ അറിയാതെ ഇൻവോൽവ് ആകുവയായിരുന്നു…! ചെറിയ ചെറിയ അടിപിടികളും , ഗുണ്ടായിസങ്ങളും ഉണ്ടായിരുന്ന ഒരു ഗ്രൂപ്പ്.., ക്ലാസ്സിലേയും , ചെറിയ ക്ലാസ്സിലേയും കൊച്ചു കുട്ടികളെ വിരട്ടി ജീവിക്കുന്ന വളരെ മാന്യന്മാരുള്ള ഒരു അധോലോകം..!
അതിലേക്ക് ജൂട് ഒരു കാണിയെപ്പോലെ കടന്ന് ചെന്നു.., ഒരാഴ്ച.!! ഒരാഴ്ച കൊണ്ട് അവൻ ആ ഗ്യാങ്ങിന്റെ നേതാവ് ആയി.. പുതിയ രാജകുമാരൻ വന്നപ്പോൾ ഗ്യാങ്ങിന്റെ ഘടന തന്നെ മാറി..,
ചെറിയ ചെറിയ കുട്ടികളെ വിട്ടിട്ട്.., മുതിർന്ന കുട്ടികളും.., അത്യാവശ്യം പുറത്തെ സ്കൂളിലെ മുതിർന്ന ക്ലാസ്സിലെ കുട്ടികളുമായി അടിപിടി തുടങ്ങി.., ഓരോ അടിപിടിയും കഴിഞ്ഞു ജയം കൊണ്ടുള്ള മടങ്ങി വരവ് മറ്റുള്ള കുട്ടികളുടെ കൊട്ടേഷൻ ടീം ആയി രൂപാന്തരപ്പെട്ടു..
പരിണിത ഫലം.., രണ്ട് സ്കൂളുകൽ തമ്മിലും രണ്ട് ചേരി പ്രദേശങ്ങൾ തമ്മിലും കൊലപാതകം നടക്കും എന്നൊരവസ്ഥ വന്നപ്പോൾ.., ഗ്യാങ്ങ് ലീഡറിനെയും , വലം കൈകളെയും സ്കൂളിൽ നിന്നും പുറത്താക്കി..!!!
വീട്ടിൽ അത് വലിയ പ്രശ്നം സൃഷ്ടിച്ചു എങ്കിലും അടുത്ത വർഷം മുതൽ പുതിയ സ്കൂളിൽ പോയി മര്യാദക്ക് പഠിക്കാം എന്ന് പറഞ്ഞ് ജൂട് തലയൂരി..! ഒമ്പതാം ക്ലാസ്സ് പകുതി കഴിഞ്ഞത് കൊണ്ട് മറ്റൊരു സ്കൂളിൽ പോകാൻ പറ്റില്ല എന്നുള്ള വാശിയിലായിരുന്നു ജൂട്..
അങ്ങനെ രണ്ടാം വർഷം ജൂട് പുതിയൊരു സ്കൂളിലേക്ക് പഠിക്കാൻ ചെന്നു.. അവിടെ ആദ്യത്തെ മൂന്ന് മാസം കഴിഞ്ഞ് അവനെ വരവേറ്റത് രാഷ്ട്രീയ പാർട്ടി ആയിരുന്നു..!!
ആദ്യമൊക്കെ മര്യാദക്ക് ആയിരുന്നു എങ്കിലും അവിടെയും ജൂട് മുൻപന്തിയിലേക്ക് തള്ളപ്പെട്ടു.., പ്രതിഷേധം , പ്രകടനം , സമരം , കോലം കത്തിക്കൽ ഇങ്ങനെ എന്ത് സംഭവം ഉണ്ടേലും ജൂട് ഇല്ലാതെ ഒരു ആഘോഷം ഇല്ലാതെ ആയി.. സ്കൂൾ ഇലക്ഷനിൽ പാർട്ടി സീറ്റും ലഭിച്ചു.. അതും ഉന്നത സ്ഥാനം..!!
സൂര്യനെ തോൽപ്പിക്കുന്ന തിളക്കത്തിൽ എരിഞ്ഞു നിൽക്കുന്ന ജൂടിന് പെൺകുട്ടികളുടെ വോട്ട് ചോദിക്കാതെ തന്നെ വീഴുമായിരുന്നു..! അങ്ങനെ വലിയ നേതാവായി സ്കൂളിൽ വിലസുന്ന സമയത്ത്.., ഒരു ബസ് ജീവനക്കാരൻ ഒരു പെൺകുട്ടിയോട് അപമര്യാദയായി പെരുമാറുന്നത്..,
വാർത്ത ജൂടിന്റെ ചെവിയിൽ എത്തി.. ജൂടും പിള്ളേരും കളത്തിലിറങ്ങി ബസ് ജീവനക്കാരനെ പഞ്ഞിക്കിട്ടു.. തിരികെ വരാൻ നേരം കൈയിൽ കിട്ടിയ ഒരു ഇരുമ്പിൻ പൈപ്പ് കൊണ്ട് ജൂട് ബസിന്റെ ഗ്ലാസ് അടിച്ച് പൊട്ടിച്ചു.. കണ്ട് നിൽക്കുന്ന കുട്ടികളുടെ സകല രോമങ്ങളും എഴുന്നേറ്റു നിൽക്കുന്ന ഒരു സീൻ ആയിരുന്നു അത്..
സ്റ്റൈലിൽ വന്ന ജൂട് മുന്നിൽ കണ്ട മറ്റൊരു ബസിന്റെ കൂടി ഗ്ലാസ് അടിച്ച് പൊട്ടിച്ചു..! ആവേശം കൂടിയപ്പോൾ അതിനെ ഓവർ ടേക്ക് ചെയ്തു കയറിയ ബസിന്റെ കണ്ണാടിയിൽ അവൻ ചാടി അടിച്ചു.., കറങ്ങി തറയിൽ നിന്ന അവന്റെ പുറകിൽ ബസിന്റെ കണ്ണാടി ചില്ലും കൂടായി വീണു… ഇരുമ്പ് പൈപ്പ് തറയിൽ ഇട്ടിട്ട് തിരിഞ്ഞു നോക്കിയ ജൂട് ഒന്ന് ഞെട്ടി..!
‘ സുൽത്താൻ ബത്തേരി.., ഫാസ്റ്റ് പാസ്സഞ്ചർ.., കെ.എസ് .ആർ.ടി.സി..’ ആ സംഭവത്തോടെ രണ്ടാമത്തെ സ്കൂളിൽ നിന്നും അവൻ പുറത്താക്കപ്പെട്ടു..
സർക്കാർ മുതലിൽ കൈ വെച്ചതിനാൾ പാർട്ടിക്കാർക്ക് ജൂടിനെ രക്ഷിക്കാനായില്ല..!