“അതെന്താ സംഭവം ? നീ മോളെ അടിച്ചോ ?”
ഞാൻ മഞ്ജുസിനെ നോക്കി കണ്ണുരുട്ടി .
പിള്ളേരെ , അതിപ്പോ ആദി ആയാലും റോസ് ആയാലും മഞ്ജുസ് അടിച്ചാൽ അവൾക്ക് എന്റെ വായിന്നു കണക്കിന് കേൾക്കും . അവളുടെ കോളേജിലെ എന്തോ നോട്സ് ഒകെ ഒരു ദിവസം ആദി കളിച്ചോണ്ടിരിക്കെ കീറി കളഞ്ഞതിനു മഞ്ജുസ് ഒന്ന് ചന്തിക്കിട്ട് പെടച്ചു ! അത് കണ്ടുകൊണ്ടാണ് ഞാൻ അന്ന്
റൂമിലേക്ക് വന്നത് . അന്ന് പിന്നെ ഞങ്ങൾക്ക് വഴക്കിടാൻ വേറെ കാരണം ഒന്നും വേണ്ടി വന്നില്ല . എന്റെ അടുത്തേക്ക് വരാൻ മടിച്ചു നിക്കുന്ന ആദിമോൻ അന്ന് അടികൊണ്ട വിഷമത്തിൽ കുറെ നേരം എന്നോടൊപ്പം ആയിരുന്നു . പക്ഷെ അവളുടെ ദേഷ്യം ഒകെ അടങ്ങി ഒന്ന് ചിരിച്ചു കാണിച്ചാൽ ചെക്കൻ എന്നെകളഞ്ഞേച്ച്‌ അവളുടെ കൂടെ പോകും !
“അയ്യോ അങ്ങനെ അടിച്ചിട്ടൊന്നും ഇല്ല ..”
മഞ്ജുസ് എന്റെ സ്വഭാവം ഓർത്തു ഒന്ന് ചിണുങ്ങി .
“ചുമ്മാ പറയുവാ കണ്ണേട്ടാ ..അന്ന് പെണ്ണ് എന്തോ കുരുത്തക്കേട് കാണിച്ചപ്പോ സോഫയിൽ നിന്ന് ചാടി ഇറങ്ങി അതിനെ ഒറ്റയടി .എന്റമ്മോ .പൊന്നൂസ് എന്ത് കരച്ചിൽ ആയിരുന്നു .”
അഞ്ജു സ്വല്പം കാര്യമായി തന്നെ പറഞ്ഞു .
അഞ്ജു പറഞ്ഞു നിർത്തിയതും മഞ്ജുസ് ആദികുട്ടന്റെ നെറ്റിയിൽ ഒരുമ്മ കൊടുത്തു എന്നെ നോക്കി കണ്ണിറുക്കി .
“എന്നിട്ട് ?”
ഞാൻ അഞ്ജുവിനെ നോക്കി മുണ്ടിന്റെ തലപ്പുകൊണ്ട് കയ്യും വായും തുടച്ചു .
“എന്നിട്ടെന്താ , കൊറച്ചു കഴിഞ്ഞപ്പോഴാ ബോധം വന്നത് . പിന്നെ പെണ്ണിനേം കെട്ടിപിടിച്ചു ചേച്ചിയും വൻ കരച്ചില് ..വൻ കോമെഡി ആയിരുന്നു ”
മഞ്ജുവിനെ കളിയാക്കികൊണ്ട് അഞ്ജു നിന്ന് ചിരിച്ചു .
“പോടീ..”
മഞ്ജുസ് അത് കേട്ട് ജാള്യതയോടെ പറഞ്ഞു .
അപ്പോഴേക്കും റോസമ്മ വീണ്ടും ബഹളം വെക്കാൻ തുടങ്ങി .
“ദാ വരുവാടി പെണ്ണെ …”
അവളുടെ ചിണുക്കം നോക്കി ഞാൻ കണ്ണുരുട്ടി . പിന്നെ ചെറിയൊരു ചിരിയോടെ ഡൈനിങ് ടേബിളിൽ ഇരുന്ന റോസിമോളെ എടുത്തു തോളിലേക്കിട്ടു ഉമ്മറത്തേക്ക് നടന്നു .എന്നെ വിടാതെ അള്ളിപിടിച്ചുകൊണ്ട് അവളും കിടന്നു .
“അപ്പിയൊക്കെ ഇട്ടല്ലോ അല്ലെ ?”
പോകുന്ന നേരം ഞാൻ മഞ്ജുസിനെ ചോദ്യ ഭാവത്തിൽ നോക്കി .
“ആ..അതൊക്കെ കഴിഞ്ഞു ഡാ …”
അവൾ തലയാട്ടി ചിരിച്ചു .
“ഓ ..അപ്പൊ പേടിക്കാൻ ഇല്ല ..”
ഞാൻ പയ്യെ പറഞ്ഞ് ഉമ്മറത്തേക്ക് നീങ്ങി .
റോസ് മോളെയും എടുത്തു ഞാൻ ഉമ്മറത്ത് കിടന്ന കസേരയിലൊന്നിൽ ഇരുന്നു തിണ്ണയിലേക്ക് കാലുനീട്ടി. എന്റെ മടിയിലായി പെണ്ണിനെ ഇരുത്തി ഞാൻ പോക്കെറ്റിൽ ഇട്ടിരുന്ന മൊബൈൽ എടുത്തു.
“എടി പൊന്നുസേ ,അച്ഛടെ മടിയില് ഇച്ചീച്ചി ഒഴിച്ചാൽ എന്റെ സ്വഭാവം മാറും ട്ടോ “
ഞാൻ പെണ്ണിനെ നോക്കി കണ്ണുരുട്ടി പയ്യെ പറഞ്ഞു .
പക്ഷ അവൾക്കതൊന്നും കേൾക്കാനോ മനസ്സിലാക്കാനോ താല്പര്യമില്ല. ഞാൻ പോക്കെറ്റിൽ നിന്ന് ഫോൺ എടുത്തതോടെ അവൾക്കും അത് വേണം . ഫോണിൽ ഇടം കൈകൊണ്ട് പിടിച്ചു പെണ്ണതു പിടിച്ചു വലിക്കാൻ തുടങ്ങി . ഞാനും ഒന്ന് ബലം പിടിച്ചപ്പോൾ പെണ്ണ് തനി സ്വരൂപം പുറത്തെടുത്തു .
“ഹീ …ച്ചാ ച്ചാ ..”
പെണ്ണ് ഉറക്കെ അലറിക്കൊണ്ട് മൊബൈൽ പിടിച്ചു വലിച്ചു .
“പോടീ തെണ്ടി …”
ഞാൻ അവളെ നോക്കി കണ്ണുരുട്ടികൊണ്ട് മൊബൈൽ പിടിച്ചു മാറ്റി . പിന്നെ അവളുടെ കഴുത്തിൽ എന്റെ കുറ്റിരോമങ്ങൾ ഉരസി .
“ഹി ഹ് ഹി ഹി ഹ് ”
ഇക്കിളി എടുത്തതും പെണ്ണ് എന്റെ കയ്യിൽ കിടന്നു ചിണുങ്ങി ചിരിച്ചു .
“അച്ഛന് ഒരാളെ വിളിക്കാൻ ഉണ്ടെടി പെണ്ണെ …”
ഞാൻ അവളെ നോക്കി ആരോടെന്നില്ലാതെ പറഞ്ഞു . പിന്നെ ഒരു കൈകൊണ്ട് അവളെ അടക്കിപ്പിടിച്ചു ശ്യാമിന്റെ നമ്പറിൽ വിളിച്ചു നോക്കി .
ഒന്ന് രണ്ടു റിങ് കഴിഞ്ഞപ്പോൾത്തന്നെ കക്ഷി ഫോൺ എടുത്തു .
“ആഹ്…എന്താ അളിയാ ?”
ശ്യാം മുഖവുര കൂടാതെ തിരക്കി .
“ഒന്നും ഇല്ലെടാ ..അവിടത്തെ കാര്യം ഒക്കെ ഓക്കേ അല്ലെ ? ”
ഞാൻ ഓഫീസിലെ കാര്യം അന്വേഷിച്ചുകൊണ്ട് ചോദിച്ചു .
“എല്ലാം ഓക്കേ ആണെടെയ്. പിന്നെ നിന്റെ റോസ്‌മേരി കുറച്ചു ക്യാഷ് ചോദിച്ചിട്ടുണ്ട് ..”
ശ്യാം എന്നെ ഒന്നാക്കിയ പോലെ ചിരിച്ചുകൊണ്ട് പറഞ്ഞു .
“അതിനെന്തിനാ മൈരേ നീ ചിരിക്കണേ ? ”
ഞാൻ ശബ്ദം ഒന്ന് താഴ്ത്തി പല്ലിറുമ്മി . കുഞ്ഞു റോസ് അതൊന്നും മനസിലാകാതെ എന്നെ ഉറ്റു നോക്കുന്നുണ്ട് .
“നിന്നെ അല്ലെടി മുത്തുമണിയെ …”
ഞാൻ അവളുടെ നോട്ടം കണ്ടു ചിരിയോടെ ചിണുങ്ങി പെണ്ണിന്റെ കവിളിൽ പയ്യെ നുള്ളി . അതോടെ കക്ഷി ഹാപ്പി ആയി .
“ചി ഹി…എന്താടാ അവിടെ ? കൊച്ചുങ്ങള് കൂടെ ഉണ്ടോ ?”
ശ്യാം ചിരിയോടെ തിരക്കി .
“ആഹ്..പെണ്ണ് ഒപ്പമുണ്ട് ..അതൊക്കെ കള റോസ്‌മേരിയുടെ കാര്യം എന്താ സംഗതി ?”
ഞാൻ സംശയത്തോടെ ചോദിച്ചു .
“ചുമ്മാ …അവൾക്ക് ബിസിനസ്സിന്റെ ആവശ്യത്തിന് കുറച്ചു ക്യാഷ് മറിക്കാൻ ഉണ്ടാകുമോ എന്ന് ചോദിച്ചു ? ഞാൻ എന്താ വേണ്ടേ ?”
ശ്യാം ചോദ്യ ഭാവത്തിൽ തിരക്കി .
“അവൾക്കു ഇനി പുതിയതായിട്ട് എന്ത് ബിസിനെസ്സ് ആണ് ? ഒരെണ്ണം തന്നെ ഞാൻ തലവെച്ചു പോയതാ ”
ഞാൻ ചിരിയോടെ പറഞ്ഞു .
“അതിനെന്താ മൈരേ ..അത് സക്സസ് അല്ലെ ..മാത്രല്ല പുള്ളിക്കാരി ഇപ്പോ കിടുക്കൻ ഫാഷൻ ഡിസൈനർ
കൂടിയല്ലേ ”
ശ്യാം ചെറിയ ചിരിയോടെ പറഞ്ഞു .
“അതൊക്കെ ശരി തന്നെ. പക്ഷെ നീ കൂടുതൽ ഇളിക്കണ്ടാ …എന്റെ മഞ്ജുസിനില്ലാത്ത ദെണ്ണം ആണല്ലോ നിനക്ക് ?”
ഞാൻ അവന്റെ ഇളി കേട്ട് ചൂടായി . പക്ഷെ ശബ്ദം ഒന്ന് താഴ്ത്തിക്കൊണ്ടാണ് ഞാൻ സംസാരിച്ചത് .
“പിന്നെ ..എനിക്കൊരു കോപ്പും ഇല്ല . പക്ഷെ അവളോടുള്ള നിന്റെ സോഫ്റ്റ് കോർണർ എനിക്കത്ര ഇഷ്ടമല്ല ”
ശ്യാം തീർത്തു പറഞ്ഞു .
“ആണോ…നന്നായി . അവളും ഇത് തന്നെയാ എന്നോട് പറയാറ് ”
ഞാൻ പയ്യെ ചിരിച്ചു .
“എന്തോന്ന് ?”
ശ്യാം അമ്പരപ്പോടെ ചോദിച്ചു .
“ആ ശ്യാമിനോട് എന്തിനാ ഈ സോഫ്റ്റ് കോർണർ എന്ന് റോസമ്മയും ഇടക്കു ചോദിക്കും ”
ഞാൻ ചിരിയോടെ പറഞ്ഞു .
“എന്ന നീ എന്നെ ഡിവോഴ്സ് ചെയ്യടാ ..”
ഞാൻ പറഞ്ഞത് കേട്ട് ശ്യാം ചൂടായി .
“കിടന്നു തുള്ളല്ലേ മൈ ….”
എന്റെ ശബ്ദം ഉയർന്നതും മടിയിലിരുന്ന റോസ് മോള് എന്നെ നോക്കി അമ്പരന്നു ഇരിപ്പുണ്ട് .അതുകൊണ്ട് തന്നെ പറയാൻ വന്നത് ഞാൻ വിഴുങ്ങി .
“ഡാ ഹോൾഡ് ചെയ്യ്…ഇപ്പൊ വരാം ..”
ഞാൻ റോസിമോളെ നോക്കി ചിരിച്ചു ഫോണിൽ കൂടി പറഞ്ഞു .
പിന്നെ അവളെ എടുത്തു പിടിച്ചു കൊണ്ട് എഴുനേറ്റു .
“എന്തേടി ചുന്ദരി ..ചാച്ചനു ഉമ്മ തന്നെ ..”
ഞാൻ പെണ്ണിനെ നോക്കി ചിണുങ്ങി കവിളിൽ തൊട്ടു കാണിച്ചു . കാര്യം മനസിലായ റോസ് മോള് എന്റെ കഴുത്തിൽ കൈചുറ്റികൊണ്ട് എന്റെ കവിളിൽ പയ്യെ ഉമ്മവെച്ചു .
“ചാ..ചാ ..മ്മം മ്മം മ്മം ”
പെണ്ണ് എന്റെ കവിളിൽ ചുണ്ടു ചേർത്തു “ഉമ്മ” എന്ന് പറയുകയാണ് ! ഈ രീതിയിൽ ആണ് പുറത്തു വരിക എന്നുമാത്രം !
