പക്ഷെ ഇതൊന്നും മഞ്ജുസിനു അറിയില്ലായിരുന്നു. ഈ കാര്യങ്ങളൊക്കെ ഞാനും റോസമ്മയും സംസാരിച്ചിരിക്കുന്നതിന്റ അന്നാണ് മഞ്ജുസെന്നെ വിളിച്ചിട്ട് ഞാൻ ഫോൺ എടുക്കാത്ത സാഹചര്യം ഉണ്ടായതു , ഞങ്ങൾ വഴക്കിട്ടതും തെറ്റിയതും ഇറങ്ങിപോയതുമൊക്കെ അന്നത്തെ സംസാരത്തിന്റെ ഭാഗമായാണ് ! ഒടുക്കം ആ ബിസിനസ്സിന്റെ ലോഞ്ചിങ്ങിൽ വെച്ചാണ് മഞ്ജുസ് എല്ലാം അറിയുന്നത് . അത് കക്ഷിക്കും ഒരു സർപ്രൈസ് ആയിരുന്നു.
അതൊക്കെ സൗകര്യം കിട്ടുമ്പോൾ പറയാം .
“ആഹ്..എന്ന ശരി അളിയാ..ഞാൻ എന്തേലും ഉണ്ടേൽ വിളിക്കാം ”
ശ്യാം ഫോണിലൂടെ പയ്യെ മറുപടി നൽകി . അതിനു തിരിച്ചും ബൈ പറഞ്ഞു ഞാൻ കാൾ കട്ടാക്കി . പിന്നെ എന്നെയും നോക്കി കണ്ണുമിഴിക്കുന്ന റോസമ്മയെ നോക്കി കണ്ണുരുട്ടി .
“എന്താടി നോക്കണേ ഉണ്ടക്കണ്ണി ?”
ഞാൻ അവളെ നോക്കി മുരണ്ടു . പക്ഷേ പെണ്ണിന് ഒരു മാറ്റവും ഇല്ല . ചാ ച്ച ന്നു പറഞ്ഞു എന്റെ മുഖത്ത് അവളുടെ കുഞ്ഞി കൈകൊണ്ട് പയ്യെ ഒറ്റയടി !
“സ്സ്…എടി എടി നിനക്ക് അമ്മേടെ സ്വഭാവം ആണല്ലോ പൊന്നുസേ ..”
ഞാൻ പെണ്ണിനെ നോക്കി ചിരിച്ചു .
അപ്പോഴേക്കും മഞ്ജുസ് ആദിയേയും എടുത്തു ഉമ്മറത്തേക്കെത്തി . ചെറുക്കനെ കുപ്പായം ഒകെ ഇടീച്ചു സുന്ദര കുട്ടപ്പനാക്കിയാണ് അവളുടെ വരവ് !
“എന്താ കവി പുറത്തു നിക്കണേ ?”
മഞ്ജുസ് ഗൗരവത്തിൽ തിരക്കിക്കൊണ്ട് ഉമ്മറത്തെ കസേരയിലേക്കിരുന്നു . പിന്നെ ആദിയെ അവളുടെ മടിയിലേക്കിരുത്തി .
“ഏയ് ചുമ്മാ..ശ്യാമിന്റെ കാൾ ഉണ്ടാരുന്നു . സംസാരിക്കാൻ വേണ്ടി ഇറങ്ങീതാ”
ഞാൻ പയ്യെ പറഞ്ഞു ഉമ്മറത്തേക്ക് തിരിച്ചു നടന്നു .
“മ്മ്..പിന്നെ നാളെ എപ്പോഴാ അച്ഛനെ വിളിക്കാൻ പോണേ?”
മഞ്ജുസ് എന്നെ ഗൗരവത്തിൽ നോക്കി .
“രാത്രി അല്ലെ ഫ്‌ളൈറ് , അപ്പൊ ഒരുച്ച കഴിഞ്ഞിട്ടൊക്കെ പോയാൽ മതിയല്ലോ ”
ഞാൻ ഒഴുക്കൻ മട്ടിൽ പറഞ്ഞു ഉമ്മറത്തേക്ക് കയറി . പിന്നെ മഞ്ജുസിനു മുൻപിലായി തിണ്ണയിലിരുന്നു റോസ് മോളെ അവളുടെ നേരെ നീട്ടി .പാല് കുടിക്കാൻ പൂതി ആയിട്ടോ എന്തോ ഇത്തവണ പെണ്ണ് അമ്മയെ നോക്കി ചിണുങ്ങി .
“‘അമ്മ ..മാ ”
റോസ് മോള് എന്റെ കയ്യിൽ കിടന്നു കാലിട്ടടിച്ചു അമ്മയോടുള്ള സ്നേഹം അറിയിച്ചു .
“എനിക്കൊന്നും വേണ്ട ..നീ തന്നെ വെച്ചോ..അയ്യടാ അവളുടെ ഒരു ചിണുങ്ങല് ”
മഞ്ജുസ് റോസിമോളെ നോക്കി പുച്ഛമിട്ടു .
“ഡീ ..തമാശ കള മഞ്ജുസേ . നീ ഇതിനെ പിടിച്ചേ ..എന്നിട്ടാ മുതലിനെ ഇങ്ങു താ.”
ഞാൻ റോസിമോളെ അവളുടെ മടിയിലേക്കിരുത്തികൊണ്ട് പറഞ്ഞു . അതോടെ അവളുടെ മടിയിൽ രണ്ടു ട്രോഫിയും അടുത്തടുത്തായി ഇരുന്നു .
മഞ്ജുസ് ഇടം കൈകൊണ്ട് റോസമ്മയെ കൂടി പിടിച്ചു എന്നെ നോക്കി കണ്ണുരുട്ടി .ഞാനതു കാര്യമാക്കാതെ ആദിയെ നോക്കി കൈകൾ നീട്ടി .
“അപ്പൂസ് വാടാ ..അച്ഛനല്ലേ വിളിക്കണേ..”
ഞാൻ ചെറുക്കനെ നോക്കി കൊഞ്ചി . പക്ഷെ എന്നെ മൈൻഡ് ചെയ്യാതെ അവൻ മഞ്ജുസിനെ മുഖം മുകളിലേക്കുയർത്തികൊണ്ട് നോക്കി .
“ചെല്ലെടാ …”
മഞ്ജുസും അവനെ നോക്കി ചിണുങ്ങി . പിന്നെ ഞാൻ ഒന്നും നോക്കിയില്ല അവനെ ബലമായി ഇങ്ങു പിടിച്ചെടുത്തു എന്റെ മടിയിലേക്കിരുത്തി . റോസ് മോള് അതത്ര ഇഷ്ടപെടാത്ത പോലെ എന്നെ നോക്കുന്നുണ്ട് . കുശുമ്പത്തി !
“നീയെന്താടാ മുത്തേ അച്ഛന്റെ അടുത്തേക്ക് വരാത്തെ ? ”
ഞാൻ അവന്റെ തയ്യിൽ വലതു കൈകൊണ്ട് തഴുകി ചിരിയോടെ തിരക്കി . പിന്നെ അവനെ എന്റെ നേരെ പിടിച്ചുയർത്തി കവിളിലൊരുമ്മയും നൽകി .
“എങ്ങനെ വരും ..നീയവനെ കുഞ്ഞിലേ കണ്ണുരുട്ടി പേടിപ്പിച്ചിട്ട് അവനു നിന്നെ പേടിയായി കാണും ”
മഞ്ജുസ് ആരോടെന്നില്ലാതെ പറഞ്ഞു .
“പോടീ..അതൊക്കെ തമാശക്കല്ലേ”
ഞാൻ ആദിയുടെ കവിളിൽ ഒന്നുടെ മുത്തികൊണ്ട് പറഞ്ഞു .
“മ മ്മാ..ചാച്ച ..”
ഞാൻ ആദിയെ ഉമ്മവെക്കുന്നത് കണ്ട റോസ് മോള് മഞ്ജുസിനെ അടിച്ചുകൊണ്ട് എന്റെ നേരെ ചൂണ്ടി .
“ഓഹ്ഹ്..അവളുടെ ഒരു ചാച്ചാ ..ഞാൻ കണ്ടെടി പെണ്ണെ ”
മഞ്ജുസ് ചിരിച്ചുകൊണ്ട് പെണ്ണിനെ വാരിപിടിച്ചു .
“അച്ഛനെ നോക്കെടാ മുത്തേ ..”
ഞാൻ അപ്പോഴും ആദിയെ മെരുക്കാനുള്ള അടവുകൾ പയറ്റുകയായിരുന്നു . ഒടുക്കം ചെക്കനെ നോക്കി കുറെ ഗോഷ്ടിയൊക്കെ കാണിച്ചപ്പോൾ ഒന്ന് ചിരിക്കാൻ തുടങ്ങി . ഹോ ആശ്വാസം !
അപ്പോഴേക്കും മഞ്ജുസ് പെണ്ണിനെ എടുത്തുകൊണ്ട് കസേരയിൽ നിന്നെഴുന്നേറ്റു .
“നീ പോവാ ?”
ഞാൻ അവളെ നോക്കി പയ്യെ ചോദിച്ചു .
“ആഹ് ..ഞാൻ പെണ്ണിനുപാല് കൊടുത്തിട്ട് വരാം . തപ്പി നോക്കുന്നുണ്ട് ”
മഞ്ജുസ് ചെറു ചിരിയോടെ എന്നെ നോക്കി പറഞ്ഞു .
“ആഹ്..എന്ന ചെല്ല്..”
ഞാൻ ചിരിച്ചു . പിന്നെ ആധിയെ എടുത്തു മുറ്റത്തേക്കിറങ്ങി .
“നീയെങ്ങോട്ടാടാ ?”
മഞ്ജുസ് എന്നെ സംശയത്തോടെ നോക്കി .
“ഇപ്പൊ വരാം . കടയിലൊന്നു പോകാൻ ഉണ്ട് ”
ഞാൻ അവളെ നോക്കി കണ്ണിറുക്കി ആദിയേയും കൊണ്ട് ബൈക്കിനടുത്തേക്ക് നീങ്ങി .
“ദേ കവി..ഞാൻ നിന്നോട് പലവട്ടം പറഞ്ഞിട്ടുണ്ട് പിള്ളേരേം എടുത്തു ബൈക്കിൽ പോവരുതെന്നു ”
എന്റെ നീക്കം മനസിലായതോടെ മഞ്ജുസ് ഉമ്മറത്ത് നിന്ന് പല്ലിറുമ്മി .
“ഒന്ന് പോ മിസ്സെ..എടോ ഇവനിത് വല്യ ഇഷ്ടാ ”
ഞാൻ മഞ്ജുവിനോടായി പയ്യെ പറഞ്ഞു ആദിയെ നോക്കി . ചെറുക്കന്റെ മുഖത്തും ഒരു ചിരിയുണ്ട് .
“പിന്നെ പിന്നെ ..”
മഞ്ജുസ് ഉമ്മറത്ത് നിന്ന് കണ്ണുരുട്ടി .
“അതേടി …വണ്ടി നീങ്ങിയ ചെക്കൻ ചിരിയും കളിയും ഒക്കെ ആണ് …”
ഞാൻ പയ്യെ പറഞ്ഞു ആദിയെ ബൈക്കിലേക്ക് ഇരുത്തി . തൊട്ടു പിറകെയായി ഞാനും കയറി ഇരുന്നു സ്റ്റാൻഡ് തട്ടി . എന്റെ കാലിന്റെ തുടകൾക്കിടയിൽ ആദികുട്ടനെ ലോക് ചെയ്തുപിടിച്ചു ഞാൻ മഞ്ജുസിനെ നോക്കി .
“നീ പേടിക്കണ്ട മഞ്ജുസേ ..ഞാൻ പതുക്കെ പോവത്തേ ഉള്ളൂ ”
ഞാൻ അവളെ നോക്കി കണ്ണിറുക്കി .
അപ്പോഴേക്കും ആദി ഹാപ്പി മൂഡ് ആയിരുന്നു . ബൈക്കിന്റെ ടാങ്കിലേക്ക് കമിഴ്ന്നുകൊണ്ട്‌ അവൻ ടാങ്കിൽ കൈകൊണ്ട് അടിച്ചു ചിരിക്കാനൊക്കെ തുടങ്ങി . യാത്ര ഇപ്പൊ പോകുമെന്ന് അവനും തോന്നി തുടങ്ങിയിട്ടുണ്ട് ! ബൈക്ക് നീങ്ങി കാറ്റടിച്ചു തുടങ്ങിയാൽ ആദികുട്ടന് പിന്നെ സ്വർഗം കിട്ടിയ പോലെയാണ് !
ഞാൻ വണ്ടി സ്റ്റാർട്ട് ചെയ്തതും ആദിയുടെ മുഖം വിടരുന്നത് ഞാൻ പുഞ്ചിരിയോടെ ശ്രദ്ധിച്ചു .വളരെ കുറച്ചു ദിവസങ്ങളെ ആയുള്ളൂ ഈ കലാപരിപാടി തുടങ്ങിയിട്ട് . ഒരു ദിവസം ചെറുക്കൻ കരഞ്ഞപ്പോൾ ചുമ്മാ ബൈക്കിലിരുത്തി ഒന്ന് കറങ്ങിയതാണ് . അന്ന് സ്വിച്ച് ഇട്ട പോലെ അവന്റെ കരച്ചിലും നിന്നു! അതോടെ ഇത് നല്ളൊരു ഐഡിയ ആണെന്ന് എനിക്കും തോന്നി .
“എന്ന പോട്ടെ ടീച്ചറെ …”
ഞാൻ മഞ്ജുസിനെ നോക്കി ചിരിച്ചു .എല്ലാം നോക്കിക്കണ്ടു അവളുടെ ഒക്കത്തു റോസ് മോളും ഉണ്ട് . ഞാൻ ആദിയോടൊപ്പം ബൈക്കിലിരിക്കുന്നത് റോസ് മോള് പുരികം ചുളിച്ചു നോക്കുന്നുണ്ട് .
