എനിക്ക് ആയില്യയോട് അത് മറയ്ക്കാൻ കഴിയുമെന്ന് തോന്നുന്നില്ല. അത് അവളെ വഞ്ചിക്കുന്ന പോലെയാണ്. അവളുടെ സ്നേഹത്തെ പുച്ഛിക്കുന്ന പോലെയാണ്.
ഇതെല്ലാം കൂടി ലാവപോലെ പൊങ്ങിവന്നപ്പോൾ എനിക്ക് നിയന്ത്രിക്കാൻ ആയില്ല. അവൾ റൂമിന്റെ ഡോർ തുറന്നപ്പോൾ തന്നെ ഞാൻ തടഞ്ഞു.
ഞാൻ: റൂമിലേക്ക് കയറും മുൻപ് എനിക്കൊരു കാര്യം പറയാനുണ്ട്, ആയില്യ.
ആയില്യ: എന്താ?
ഞാൻ: അത്..കുറച്ചു സീരിയസ്സാണ്. എനിക്ക് ഇത് പിടിച്ചു നിർത്താൻ പറ്റുമെന്ന് തോന്നുന്നില്ല. പറഞ്ഞില്ലെങ്കിൽ എന്നെകൊണ്ട് പറ്റില്ല. ആയില്യക്കൊരു ദിവ്യ ചേച്ചിയെ അറിയില്ലേ. ബാംഗ്ലൂർ ഉള്ളത്..അവരുമായി ഞാൻ പലതവണ ബന്ധപ്പെട്ടിട്ടുണ്ട്.
അവിടെ എന്റെ വീടിനടുത്താണ് അവരുടെ താമസം. അവർ ഒരു പാവം സ്ത്രീയാണ്.
എനിക്ക് ഇത് ആയില്യയിൽ നിന്ന് ഒളിക്കാൻ കഴിയുന്നില്ല. ഇത് തെറ്റാണെന്നു അറിയാം. ശിക്ഷ എന്താണെങ്കിലും വാങ്ങാൻ തയ്യാറാണ്. എന്റെ കരണത്ത് നീട്ടി ഒരടിയടിച്ചിട്ടു പറഞ്ഞാൽ മതി എന്താണെങ്കിലും.
ഞാൻ എനിക്ക് തോന്നിയപോലെ കാര്യം അവതരിപ്പിച്ചു. അവൾ എന്റെ നേരെ നോക്കി. ഞാൻ കണ്ണിറുക്കിയടച്ചു.
അവൾ പതിയെ മുന്നോട്ട് നടക്കുന്നതായി അവളുടെ കൊലുസിന്റെ ശബ്ദം സൂചിപ്പിച്ചു. കണ്ണുകൾ രണ്ടും ഇറുക്കി അടച്ചു അവളുടെ വിരലുകൾ എന്റെ കവിളിൽ പതിയുന്നത് പ്രതീക്ഷിച്ചു ഞാൻ നിൽക്കുകയാണ്!!
കണ്ണടച്ച് നിൽകുമ്പോൾ എന്റെ കവിളിൽ ഒരു മൃദു സ്പർശനം ഫീൽ ചെയ്തു. താമരപ്പൂകൊണ്ട് തൊടുന്നപോലെ.
ഞാൻ കണ്ണുതുറന്നപ്പോൾ കാണുന്നത് ആയില്യ എന്റെ കവിളിൽ ചുംബിക്കുന്നതാണ്. എന്നെ ഒരേ സമയം അത്ഭുതപ്പെടുത്തുകയും അല്പം ഭയപ്പെടുത്തുകയും ചെയ്ത ഒരു സംഭവമാണ് അത്.
അവളെന്തായിരിക്കും പറയാൻ പോകുന്നത് എന്നോർത്തു. ഗ്ലാസ് മേശപ്പുറത്ത് വെച്ച ശേഷം അവൾ രണ്ടു കൈകൊണ്ട് എന്റെ മുഖം പൊതിഞ്ഞു പിടിച്ചു.
ആയില്യ: ഉണ്ണിയേട്ടനെ ഇഷ്ടപ്പെടാൻ എന്താ കാരണമെന്നു മുൻപ് ചോദിച്ചിട്ടില്ലെ? ഒന്നിതാണ്.. കള്ളം മനസ്സിൽ നിൽക്കില്ല. ഇക്കാര്യം എനിക്ക് അറിയാമായിരുന്നു. ഇതെപ്പോഴാ എന്നോട് പറയാൻ പോകുന്നത് എന്ന് ഞാൻ ചിന്തിച്ചിരുന്നു.
ഞാൻ: ആയില്യക്ക് എങ്ങനെ അറിയാം ഇതൊക്കെ?
ആയില്യ: ഉണ്ണിച്ചേട്ടൻ നാട്ടിലേക്ക് പോന്നതിനു ശേഷം ഒരു ദിവസം ദിവ്യച്ചേച്ചി എന്നെ കാണാനായിട്ടു വന്നിരുന്നു.
അവരുടെ ഭർത്താവ് മരിച്ചതും, നിങ്ങൾ കണ്ടുമുട്ടിയതും, അവരുടെ വീട് ജപ്തി ചെയ്തതും അവർക്ക് വീടെടുത്ത് കൊടുത്തതും, മകന്റെ ഫീസ് കൊടുത്തതും..അങ്ങനെ എല്ലാം അവർ എന്നോട് വിടാതെ പറഞ്ഞു.
അവർ അവസാനം പറഞ്ഞ കാര്യമാണ് എന്നെ ശരിക്കും ഫീൽ ചെയ്യിച്ചത്. ഉണ്ണിച്ചേട്ടൻ ഇല്ലായിരുന്നെങ്കിൽ അവർ ഒരു വേശ്യയാകുമായിരുന്നു അത്രേ. ഇതൊക്കെ അവർ പറഞ്ഞപ്പോ ഞാൻ സത്യത്തിൽ ഒന്നുമല്ലാതായിപ്പോയി.
എന്റെ അച്ഛനമ്മമാരിൽ നിന്നും തനി ഓപ്പോസിറ്റാണ്‌ എന്റെ ഭർത്താവ്. അവർ ഈ ഉണ്ടാക്കുന്ന പണം അവരോടൊപ്പം അവസാനിക്കും.
എന്നാൽ ദിവ്യ ചേച്ചിയെ പോലെയുള്ള ആളുകൾക്ക് രക്ഷപ്പെടാൻ കഴിയാതെ വേശ്യയായി തീർന്നിരുന്നെങ്കിലോ.
അതിനിടവരാതെ രക്ഷിച്ചില്ലേ. ഇതിനപ്പുറം ഒരു സന്തോഷം എനിക്കുണ്ടോ..
ആയില്യയുടെ കണ്ണുകൾ നിറയുന്നുണ്ടായിരുന്നു. ഇതൊക്കെ അവൾ പറയുമ്പോൾ എനിക്ക് എന്റെ സമാധാനവും സന്തോഷവും അടക്കാനായില്ല.
അന്ന് ആ രാത്രി ആദ്യമായിട്ടാണ് ഞാൻ ഒരു പെൺകുട്ടിയെ സന്തോഷത്തോടെ എടുത്തുയർത്തി കറക്കുന്നത്. സിനിമയിലൊക്കെ കണ്ടിട്ടുണ്ടെങ്കിലും ഞാൻ അറിയാതെ അങ്ങനെ ആ സമയം ചെയ്തുപോയി.
പിന്നെ നടന്നതൊന്നും വ്യക്തമായി ഓർക്കുന്നില്ല.
കല്യാണത്തിന്റെ തിരക്കുകളും ഉറക്കമിളച്ചിലും രാവിലെ മുതൽ രാത്രി വരെയുള്ള നിൽപ്പും എല്ലാം കാരണം ഞങ്ങൾ രണ്ടും ടയേഡ് ആയിപോയി.
പലരും പറഞ്ഞു കേട്ടിട്ടുള്ള ആദ്യരാത്രി കഥകളൊക്കെ നുണയാണെന്ന് ഞങ്ങൾക്ക് രണ്ടു പേർക്കും അന്നാണ് മനസിലായത്.
എങ്കിലും അന്ന് രാത്രി ഞാൻ അവളെ ചുംബിച്ചു തീർത്തത്തിന്റെ ദൈർഘ്യമളക്കാൻ ആരെക്കൊണ്ടും കഴിയുമായിരുന്നില്ല.