ഞാൻ പറഞ്ഞു തീർന്നതും പൊടുന്നനെ അമ്മയുടെ ഒരു ചോദ്യം…
” ഹാ അതൊക്കെ ആയി…അതല്ല ഇവിടുത്തെ വിഷയം…ഈ പറഞ്ഞ കാര്യത്തിനൊക്കെ കാരണവന്മാർ അല്ലേ ഉണ്ടാവേണ്ടത്…ഈ പൈതൽ എന്തിനാ… ”
” ഓ ഒരു പൈതൽ…നീ പറയുന്നത് കേട്ടാൽ മതി…അങ്ങനെ മുതിർന്നവർ കുട്ടികൾ എന്നൊന്നുമില്ല… നമ്മുടേം അവരുടേം കുറച്ച് ബന്ധുക്കളുള്ള ഒരു ചടങ്ങ്…അത്രെന്നെ… ”
” മ്മ്…. ”
കൂടുതൽ ഒന്നും പറഞ്ഞിട്ട് കാര്യമില്ല എന്ന് തോന്നുന്നു…അതോടെ ഞാൻ മൂളിക്കോണ്ട് അകത്ത് കയറി… പിന്നെ പതിവ് പോലെ ഫ്രഷായി ചായയും കുടിച്ച് രണ്ടാളോടും സമയം ചിലവഴിച്ചു…ഒരുക്കം അത്താഴവും തട്ടി റൂമിലേക്ക് വിട്ടു…ഫോണെടുത്ത് നൈസ് ആയിട്ടവൾക്കൊരു മെസേജ് അയക്കാൻ തീരുമാനിച്ചു…
” അതേ… സോറി കുറേ പറഞ്ഞു കേട്ടോ… ”
ഞാൻ സെൻ്റ് ചെയ്യ്തു… കുറച്ചു കഴിഞ്ഞ് മെസേജ് കണ്ടെങ്കിലും നോ റിപ്ലൈ…
” താൻ അവിടുന്ന് പെട്ടെന്ന് പോയത് കൊണ്ടല്ലേ ഇതൊക്കെ സംഭവിച്ചേ…കഴിഞ്ഞത് കഴിഞ്ഞില്ലേ…ഒന്ന് മിണ്ടടോ ശൂർപ്പണഖേ… ”
ഞാൻ ഒന്നൂടെ എറിഞ്ഞു നോക്കി.. ചിലപ്പൊ ബിരിയാണി കിട്ടിയാലോ…പക്ഷെ കിട്ടി ഒരു പാട് ചുവന്ന് തുടുത്ത ദേഷ്യത്തിൻ്റെ സ്മൈലി…അതോടെ നൈസ് ആയിട്ട് ആ ഉദ്യമം ഉപേക്ഷിച്ചു… പിന്നെ നന്ദുവിന് മെസേജയച്ചു…അവന്മാരൊക്കെ എന്നെ കാണാൻ ഇരിക്കുവാണെന്നവൻ മെസേജ് അയച്ചു… പിന്നെ സൂര്യയുടെ കോൾ വന്നു.. സംഭവം എല്ലാം അറിഞ്ഞപ്പോൾ തന്നെ അവൻ എന്നെ വിളിക്കുന്നുണ്ട്… തിരക്കിനിടയിൽ എടുക്കാൻ പറ്റിയില്ല…പിന്നെ അവനോട് നടന്നതിനെ കൊണ്ടൊക്കെ സംസാരിച്ചു… പിന്നെ നാളെ മുങ്ങരുതെന്നും അവൻ ഓർമ്മിപ്പിച്ചു…അങ്ങനെ ഒടുക്കം എപ്പോഴോ ഉറക്കത്തിലേക്ക് വഴുതി വീണു…
പിറ്റേന്ന് പതിവ് പോലെ അമ്മയുടെ തെറിയും കേട്ട് എഴുന്നേൽക്കുന്നു… പിന്നെ ആസ് യൂഷ്വൽ… ബ്രേക്ക് ഫാസ്റ്റ് ഒക്കെ കഴിച്ച് ഒടുക്കം മൂന്ന് കാറിലായി…ഞങ്ങൾ ഇറങ്ങാനൊരുങ്ങി…
ഒരു വണ്ടിയിൽ ഞാനും കുടുംബവും…മറ്റേതിൽ സൂര്യയുടെ ഫാമിലി… പിന്നെയുള്ള കാറിൽ ബാക്കി ഉള്ള ബന്ധുക്കൾ…അത്രയ്ക്ക് ആളുകൾ ഒന്നുമില്ല…എന്നാലും ഇതൊക്കെ ഒരു ഫോർമാലിറ്റി ചടങ്ങുകൾ അല്ലേ…നമ്മൾ ന്യൂ ജൻ പിള്ളേർക്ക് ദഹിക്കുവോ…പക്ഷെ ചില കണ്ണാപ്പികളെ പോലെ വയസ്സ് പോലും തെളിയാതെ രാവിലെ ഏതേലും അമ്പലത്തിൻ്റെ മുന്നിൽ പോയി എള്ളോളം തരി ഇട്ടുണ്ടാക്കുന്നതിനേക്കാൾ ബെറ്റർ ഇത് തന്നെയാണ് കേട്ടോ…അത് വേറെ കാര്യം…അങ്ങനെ വീട്ടിൽ നിന്നും യാത്രതിരിച്ചു…
” ഡാ നീയെങ്ങോട്ടാ വഴിയൊന്നും അറിയാതെ ഈ വെച്ച് കീറുന്നത്… ”
യാത്രയിൽ എൻ്റെ പോക്ക് കണ്ട് മുന്നിലിരിക്കുന്ന അച്ഛൻ ചോദിച്ചു…പുവർ ഡാഡി…ഇങ്ങേർക്കറിയില്ലല്ലോ നമ്മൾ ഈ റൂട്ടിലെ സ്ഥിരം കസ്റ്റമർ ആണെന്ന്…
” ഹോ…അത് ചേട്ടത്തി പറഞ്ഞ് തന്നിട്ടുണ്ട്… ”
ഞാൻ തൽകാലം ദിവ്യ കുട്ടിയുടെ കാര്യം മറച്ചുവച്ചു… അതിന് അങ്ങേരൊന്ന് മൂളി…അതോടെ വേഗം വണ്ടി പറപ്പിച്ചു… കുറച്ചു നേരത്തിനു ശേഷം വണ്ടി അവിടേക്ക് കയറി…സാധരണ ആ പൊട്ടിക്കാളി ഇറങ്ങുന്ന വഴിയിൽ നിന്നും മാറിയുള്ള വഴിയെ അച്ഛൻ എന്നോട് എടുക്കാൻ പറഞ്ഞു…അപ്പോഴാണ് മനസ്സിലായത് അത് വഴിയെ വണ്ടി പോകൂന്ന്…അങ്ങനെ അവളുടെ തറവാട്ടിൽ ആദ്യമായി ഞാൻ കാല് കുത്തി… സിനിമയിലൊക്കെ കാണുന്നതുപോലെ കൊള്ളാം…. അപ്പോഴേക്കും മറ്റ് വണ്ടികളും എത്തിയിരുന്നു… തറവാടിന്റെ ഉമ്മറത്ത് തന്നെ ഞങ്ങളെ സ്വീകരിക്കാൻ ചേട്ടത്തിയുടെ ബന്ധുക്കളും ഉണ്ടായിരുന്നു…അങ്ങനെ ഉള്ളിൽ കേറി പിന്നെ ഓരോ ചടങ്ങുകൾ ആയിരുന്നു…ചേട്ടത്തിയേയും സൂര്യയേയും അടുത്തിരുത്തി ഓരോന്നൊക്കെ കാരണവന്മാർ സംസാരിക്കുന്നുണ്ട്… ദിവ്യയെ ആണെങ്കിൽ കാണുന്നുമില്ല…മടുപ്പ് പിടിച്ച് ഞാൻ കുറച്ചു നേരം കഴിഞ്ഞപ്പോൾ പുറത്തേക്കിറങ്ങി…
കുറച്ചു നേരം കഴിഞ്ഞ് തറവാടിൻ്റെ മുറ്റത്തിൽ ഫോണും പിടിച്ച് നടക്കുമ്പോഴാണ് ചേട്ടത്തി അങ്ങോട്ട് വരുന്നത്…
” എന്താ മോനെ മാറി നിക്കുന്നെ…ഒരു സ്റ്റേഷൻ കിട്ടാത്ത പോലുണ്ടല്ലോ… ”
എൻ്റെ അടുത്തെത്തിയതും ഒരു ചിരിയോടെ ചേട്ടത്തി ചോദിച്ചു…അതിന് ഒന്നൂല്ല്യാന്നുള്ളർത്ഥത്തിൽ ഞാൻ തലയാട്ടി…
” അല്ല ചടങ്ങൊക്കെ ഇത്ര പെട്ടെന്ന് കഴിഞ്ഞോ ചേട്ടത്തി… ”
” ഇല്ലെടാ…ഇനി നിശ്ചയത്തിൻ്റെ തീയതിയെ പറ്റി സംസാരിക്കുന്നുണ്ട്…അത് ആണുങ്ങൾ സംസാരിക്കുന്നതല്ലേ…അപ്പൊ നീയിവിടെ പോസ്റ്റായിരിക്കുന്നത് കണ്ടപ്പൊ ഇങ്ങോട്ട് പോന്നു… ”
ചേട്ടത്തി ഒരു ചിരിയോടെ കാര്യം പറഞ്ഞു… പിന്നെ ഞങ്ങൾ ഒന്നും രണ്ടും സംസാരിച്ചിരിന്നു… ദിവ്യയെ പറ്റി ചോദിക്കണം എന്നുണ്ട് പക്ഷെ ചെറിയോരു മടി… അതോണ്ട് വേണ്ടാന്ന് വെച്ചു…
” അല്ല അത് പോട്ടെ ഇന്നലെ സിനിമയ്ക്ക് പോയ വിശേഷമൊക്കെ ഇവിടൊരാൾ വന്ന് പറഞ്ഞു…അല്ല ചെറുക്കാ നിനക്കിത് തന്നെയാണോ പണി…ആ പെണ്ണ് ശരിക്കും പേടിച്ചു…ഇന്നലെ തൊട്ടേ മുഖം ദേഷ്യം കൊണ്ട് രണ്ട് കൊട്ടയുണ്ട്… ”
പെട്ടന്ന് രോഗി ഇച്ചിച്ചതും വൈദ്യൻ കൽപിച്ചതും മിൽമ എന്ന് പറയും പോലെ ചേച്ചി അവളുടെ കാര്യം പറഞ്ഞപ്പോൾ എനിക്ക് ആകാംക്ഷയായി…
” അത് പിന്നെ പെട്ടന്നുള്ള ദേഷ്യത്തിൽ…അത്രയ്ക്ക് വല്ല്യ കൊഴപ്പം ഒന്നുമില്ലായിരുന്നു… ”
ഞാൻ ഒരു ചിരിയോടെ മറുപടി നൽകി..
“മ്മ് പിന്നേ… നിന്റെ കാര്യം ഞാനും ഇന്നലെ കണ്ടതാണല്ലോ…അതോണ്ട് കൂടുതൽ ന്യായികരണം ഒന്നും വേണ്ട…നിനക്കെവിടുന്നാ ഇത്രയ്ക്ക് ദേഷ്യം… ”
ചേച്ചി എന്നെ നോക്കി ഒരു കപട ദേഷ്യത്തോടെ ചോദിച്ചു…അതിന് തമ്പുരാനറിയാം എന്നർത്ഥത്തിൽ ഞാൻ കൈ മലർത്തി…
” മ്മ് ആ പെണ്ണ് ദേഷ്യത്തിലാ…അതാ നിന്നെ കാണാനൊന്നും വരാത്തെ… ”
” ഞാൻ സോറി ഒക്കെ പറഞ്ഞു പക്ഷെ ആള് കലിപ്പിലിണെന്നെനിക്കറിയാം…എന്താ ഒരു വഴി ചേട്ടത്തി ആ കലിപ്പ് മാറ്റാൻ… ”
” നിനക്കൊരു പ്രശ്നം പോകാൻ പറഞ്ഞ വഴിയാണ് ഇപ്പൊ അതിനെക്കാൾ വലിയ പ്രശ്നങ്ങൾ ഉണ്ടാക്കാൻ ഇടയായത്… ”
ചേച്ചി ഒരു ചിരിയോടെ എൻ്റെ കൈയ്യിലൊരു തല്ല് വെച്ചു തന്നു…
” ഹേയ് എനിയങ്ങനെ ഒന്നും ഉണ്ടാവില്ല…ഒരു വഴി പറഞ്ഞു താടോ… ”
ഞാൻ ചെറിയ കുട്ടിയെ പോലെ വാശിപിടിച്ചു…
” വഴി….മ്മ് ഒരു കാര്യമുണ്ട്…അതിൽ ചെലപ്പൊ കക്ഷി വീഴും… ”
ചേച്ചി എന്നെ നോക്കി ഒരു ചിരിയോടെ പറഞ്ഞു…അതിന് ഞാൻ എന്താ അതെന്ന് ചോദിച്ചു…
” അവളെന്നോട് കുറച്ചു ദിവസ്സമായി ഇവിടെ കുറച്ചു മാറിയുള്ള ഒരു ഗൗരിശങ്കര ക്ഷേത്രമുണ്ട്… അവിടെ പോകണം എന്ന് പറയുന്നു…അവളുടെ ഇഷ്ടപെട്ട സ്ഥലം ആണത്… ഒരുപാട് തവണ പോയിട്ടുണ്ട് പക്ഷെ അവൾക്ക് ഇടയ്ക്കിടയ്ക്ക് അവിടെ പോകണം…ആള് വല്ല്യ മഹാദേവ ഭക്തയാ…നീ അവളെ അവിടെ കൂട്ടി പോ…നമ്മുക്കത് വച്ചൊന്ന് നോക്കാം… ”
ചേച്ചി എന്നെ നോക്കി കാര്യം പറഞ്ഞു…ആദ്യം സ്ഥലം മനസ്സിലാകാത്തപ്പോൾ ചേച്ചിയോട് കൂടുതൽ ചോദിച്ചപ്പോൾ എനിക്കും അവിടം മനസ്സിലായി….വല്ല്യ പ്രശ്നമില്ല…ഞാനും ആ ക്ഷേത്രത്തെ പറ്റി അമ്മ പറഞ്ഞു കേട്ടിട്ടുണ്ട്…ഒരു കുന്നിൻ്റെ താഴാവരയിൽ ഉള്ള ഒരു ക്ഷേത്രം….കാണാൻ മനോഹരമാണെന്നാ അമ്മ പറഞ്ഞത്…