പുലർച്ചെ ആയോണ്ട് വാഹനം ഒന്നുമില്ലാത്തത് കൊണ്ട് പെട്ടെന്ന് തന്നെ എത്തി…അപ്പോൾ ഗേറ്റിനടുത്ത് ഒരു സെറ്റ് സാരിയിൽ എന്നേയും കാത്ത് അവളുണ്ടായിരുന്നു…വെട്ടം അത്രയ്ക്കങ്ങ് വീണിറ്റില്ല…ഞാൻ വണ്ടി ഗേറ്റിന് മുന്നിലായി നിർത്തിയതും പെണ്ണ് വേഗം ചാടി കേറി…
” പെട്ടെന്ന് വിട്…ആരും കാണണ്ടാ….അവരൊക്കെ ഉറക്കാ… ”
പുറകീന്ന് അവൾ തിടുക്കം കൂട്ടി…
” എന്തോന്നെടി അതിന് ഇതെന്താ ഒളിച്ചോട്ടവൊ… ”
ഞാൻ മിററിലൂടെ അവളെ നോക്കി ചോദിച്ചു…
” പിന്നെ ഇത്ര രാവിലെ എന്നേം കൂട്ടി അമ്പലത്തിൽ പോകാൻ ഇയാളാരാ എൻ്റെ ഭർത്താവോ…ഞാൻ കൂട്ടുകാരിയുടെ ഒപ്പം പോന്നെന്നാ ഇന്നലെ പറഞ്ഞത്… അതോണ്ട് പുരാണം പറഞ്ഞ് അവരെ ഉണർത്താതെ വണ്ടി വിട് മോനെ ദിനേശാ… ”
അവള് ചുറ്റും നോക്കിയതിന് ശേഷം പറഞ്ഞു…അതോടെ കാര്യം ഏതാണ്ട് എനിക്കും കത്തി…പറഞ്ഞത് ശരിയല്ലേ…അതോടെ ഞാൻ വേഗം വണ്ടി മുന്നോട്ടെടുത്തു…
” മ്മ് എന്താലും…ഒരു ഒളിച്ചോട്ടത്തിൻ്റെ വൈബുണ്ട്…പുലർകാലം… അതും വീട്ടുകാരറിയാതെ…ഒപ്പം സെറ്റ് സാരി… ഇനി ഒരു താലിയുടെ കുറവ് കൂടെ ഉള്ളു… ”
ഞാൻ വണ്ടിയോടിക്കുമ്പോൾ ആരോടെന്നില്ലാതെ പറഞ്ഞു…അത് കേട്ട് പുറകീന്ന് അവൾ കുണുങ്ങി ചിരിക്കുന്നത് കേട്ടു…
പിന്നെ ഒന്നും രണ്ടും സംസാരിച്ച് വണ്ടി മുന്നോട്ടെടുത്തു… യാത്രയിലെ വഴികളും ഒക്കെ മനോഹരമായിരുന്നു…കുന്നുകളും മറ്റും…ആ കാഴ്ചകൾ കണ്ട് വണ്ടി ഓടിക്കുമ്പോൾ തണുപ്പ് പോലും നമ്മൾ മറന്ന് പോകും…അവസാനം ലക്ഷ്യസ്ഥാനമായ ക്ഷേത്രത്തിനടുത്തെത്തി…അതോടെ വണ്ടിയും പാർക്ക് ചെയ്യ്തിറങ്ങി…അപ്പോൾ വെട്ടം നന്നായി ഉണ്ടായിരുന്നു….സെറ്റ്സാരിയിലെ അവളുടെ സൗന്ദര്യം കണ്ടെൻ്റെ ഹൃദയമിടിപ്പ് വർധിക്കുന്നത് ഞാൻ അറിഞ്ഞു…അത് കണ്ടെനെ നോക്കി അവൾ എന്താ എന്നർത്ഥത്തിൽ പുരികം ഉയർത്തിയതും പെട്ടെന്ന് സ്വബോധം വന്ന ഞാൻ ഒന്നുമില്ല എന്ന അർത്ഥത്തിൽ തലയാട്ടി…അതോടെ ഞാനും അവളും ഉള്ളിലേക്ക് കയറി…
പുറത്ത് നിന്ന് ഉള്ളിലേക്ക് നോക്കി പ്രാർത്ഥിച്ചതിനുശേഷം പുറത്തൂടെ അമ്പലത്തെ വലം വെക്കാൻ തുടങ്ങി…
” അതേ ഇയാളുടെ നക്ഷത്രം ഏതാ… ”
വലം വെക്കുമ്പോൾ വഴിപാട് കൗണ്ടറ് കണ്ട് അവൾ ചോദിച്ചു…
” അരിവാൾ ചുറ്റിക നക്ഷത്രം…എന്തേ…എടോ എനിക്ക് ഇതിന്റെ ആവിശ്യം ഒന്നുമില്ല… ”
ഞാൻ അവളുടെ ഉദ്ദേശം മനസ്സിലാക്കി പറഞ്ഞു…
” അത് ഇയാൾ അല്ല തീരുമാനിക്കുന്നത്… മര്യാദയ്ക്ക് പറാ… ”
അവളെൻ്റെ മറുപടി കേട്ട് ദേഷ്യപ്പെട്ടു…
” എൻ്റമ്മോ… എനിക്കറിയാൻ പാടില്ല…എന്തോ തിരുവാതിരയോ തിരുവോണോ അങ്ങനെ എന്തോ ആണ്… ”
ഞാൻ ഇഷ്ട്ടകേടോടെ മറുപടി കൊടുത്തു…
” ഇതിപ്പൊ ഇതിലേതാ… ”
അവളാകെ ധർമ്മ സങ്കടത്തിലായി…
” എൻ്റെടോ ഇതിനൊക്കെ എന്തിനാ ഇത്ര ടെൻഷൻ അടിക്കാൻ…നീ ഈ വിരലിൽ ഏതേലും ഒന്നിൽ ഒന്ന് തൊട്… ”
ഞാൻ അവൾക്ക് നേരെ രണ്ട് വിരൽ നീട്ടി…അതോടെ അവൾ എൻ്റെ ചൂണ്ട് വിരലിൽ തൊട്ടു…
” ആ തിരുവാതിര ഫിക്സ്… ”
ഞാൻ അവളെ നോക്കി ചിരിയോടെ പറഞ്ഞു…ശരിക്കും ഇതിലേതാന്ന് എനിക്ക് അറിയില്ല കേട്ടോ…അവൾ തൊട്ടത് ഞാൻ തിരുവാതിര മനസ്സിൽ വെച്ച വിരലാണ്…അതോടെ അവൾ മനസ്സില്ലാ മനസോടെ പോയി എന്തൊക്കെയോ വഴിപാട് കഴിപ്പിക്കുന്നത് കണ്ടൂ…അല്ലേലും നക്ഷത്രത്തിൽ ഒക്കെ വല്ല കാര്യവുമുണ്ടോ… ഇതിനോട് എനിക്ക് വല്യ താൽപ്പര്യം ഇല്ല…
അങ്ങനെ അതും കഴിഞ്ഞ് ബാക്കി പ്രദക്ഷിണം ചെയാൻ തുടങ്ങി…
” അല്ല ഇയാൾക്ക് ദൈവത്തിൽ ഒന്നും വിശ്വാസമില്ലേ… ”
നടക്കുമ്പോൾ അവളെന്നെ നോക്കി ചോദിച്ചു…
” അങ്ങനൊന്നൂല്ല…പക്ഷെ അന്തമായുള്ള വിശ്വാസമില്ല…പിന്നെ എൻ്റെ അമ്മ ഒരു ശിവ ഭക്തയാണ്…ചിലപ്പൊ എൻ്റെ സ്വഭാവവും ദേഷ്യവും കണ്ടാ പറയും എനിക്ക് ശിവൻ്റെ സ്വഭാവം ആണെന്ന്…അത് കേട്ട്.. കേട്ട്.. പുള്ളികാരനോട് ഒരു ഇഷ്ട്ടമൊക്കെയുണ്ട്…നമ്മളെ പോലെ ദേഷ്യകാരൻ ആണല്ലോ… ”
ഞാൻ ഒരു ചിരിയോടെ മറുപടി നൽകി…
” ദേഷ്യത്തിൻ്റെ കാര്യത്തിൽ അത് നേരാ …പക്ഷെ മഹാദേവൻ വെറും ദേഷ്യക്കാരൻ ഒന്നുമല്ല… ആത്മാർത്ഥ പ്രണയത്തിന്റെ ഉടമയും ഭഗവാൻ തന്നെയാണ്… ”
അവളെന്നെ നോക്കി ഒരു പുഞ്ചിരിയോടെ പറഞ്ഞതും എനിക്ക് കേൾക്കാൻ എന്തോ ആകാംഷയായി…
” ആണോ…അങ്ങനൊക്കെയുണ്ടോ… ”
” പിന്നല്ലാതെ…ഭഗവാൻ ശക്തിയെ പ്രണയിച്ചപോലെ വേറൊരു പ്രണയവും ഇല്ല…അതല്ലേ സ്വന്തം പാതിയായി ചേർത്ത് അർദ്ധനാരീശ്വര രുപം വരെ ഉണ്ടായത്…ശിവൻ ഇല്ലെങ്കിൽ ശക്തി ഇല്ല… ശക്തി ഇല്ലെങ്കിൽ ശിവനും ഇല്ല… ”
അവളെനിക്ക് അങ്ങനെ പ്രദക്ഷിണത്തിൽ ഓരോന്നും പറഞ്ഞ് തന്നു..അതൊക്കെ ഞാൻ ശ്രദ്ധയോടെ കേട്ടു…അപ്പോഴേക്കും ഞങ്ങൾ പുറത്തെ പ്രദക്ഷിണം കഴിഞ്ഞ് ഉള്ളിലേക്ക് കയറിയിരുന്നു…. ശ്രീകോവിലിന് മുന്നിൽ എത്തിയതും അവള് കണ്ണടച്ച് പ്രാർത്ഥിക്കാൻ തുടങ്ങി…
” എൻ്റെ പൊന്ന് ഭഗവാനെ ന്വാമ്മിന് പ്രത്യേകിച്ച് പറയാനൊന്നൂല്ലാ…അവൾടെ നിർബന്ധത്തിൽ വന്നതാ… അതുകൊണ്ട് അവൾ പ്രാർത്ഥിക്കുന്നത് അങ്ങ് നടത്തി കൊടുത്തേക്ക്…എന്നിട്ട് നൈസായിട്ട് അവളെ എനിക്ക് തന്നേക്ക്… ”
ഞാൻ അകത്തുള്ള ശിവഭഗവാൻ്റെ പ്രതിഷ്ഠിയിൽ നോക്കി മനസ്സിൽ മന്ത്രിച്ചു…
” പിന്നെ അവൾ പറഞ്ഞു തന്നു ഭഗവാൻ്റെ പ്രേമകഥയൊക്കെ…അങ്ങനെ ഒന്നും സ്നേഹിക്കാൻ പറ്റില്ലെങ്കിലും… കുറച്ചൊക്കെ എനിക്കും ടിപ്സ് പറഞ്ഞു തരണേ…എന്തോ ഇവളെ നഷ്ടപ്പെടുത്താൻ തോന്നുന്നില്ല അതാ…. ”
ഞാൻ എൻ്റെ കുഞ്ഞാഗ്രഹവും പുള്ളിക്കാരാന് മുന്നിൽ പറഞ്ഞ് അതുതന്നെ തൊട്ടടുതുള്ള അമ്മ ശക്തിയുടെ മുന്നിലും പറഞ്ഞ് ഞാൻ തൊഴുത് പുറത്തിറങ്ങി… എന്നിട്ട് ഉള്ളിൽ തന്നെ ഉള്ള ഒരാൽ തറയിലേക്ക് കയറി ഇരുന്നു…അവൾ വഴിപാട് പ്രസാദം വാങ്ങി വരാം എന്ന് പറഞ്ഞിരുന്നു… അവിടെ ആൽത്തറയിൽ ഇരിക്കുനേരം വല്ലാത്ത അനുഭൂതിയായിരുന്നു.. ആകെ ഒരു പോസിറ്റീവ് എനർജി….അത് എനിക്ക് വല്ലാതെ ഇഷ്ടപ്പെട്ടു…അങ്ങനെ അതും ആസ്വദിച്ചിരിക്കുമ്പോഴായിരുന്നു അവൾ പുറത്തേക്ക് വന്നത്…അടുത്തെത്തിയതും ഞൊടിയിടയിൽ കയ്യിലിരുന്ന ചന്ദനം എടുത്ത് എൻ്റെ നെറ്റിയിൽ ചാർത്തി…ഒരു നിമിഷം ഞാൻ സ്തംഭിച്ചുപോയാ പ്രവർത്തിയിൽ…അതേ സമയം തന്നെ ഉള്ളിൽ ശ്രീകോവിൽ നിന്ന് മണിമുഴക്കവും എൻ്റെ കാതുകളിലേക്ക് ഇരിച്ചു കയറി…ഇനി ഭഗവാൻ ഞാൻ പ്രാർത്ഥിച്ചത് എനിക്ക് നൽകുവാണോ…??
തുടരും……