” എന്തിന്…?? ”
ഞാൻ എൻ്റെ സംശയം ഉന്നയിച്ചു…ഒന്നാമത് എനിക്കവളെ കാണാൻ താൽപര്യവും ഇല്ലായിരുന്നു…
” നീ പറയുന്നത് കേട്ടാൽ മതി… മിക്കവാറും ഇന്നത്തോടെ ഞാൻ അത് നിർത്തി തരാം… ”
ചേട്ടത്തിയുടെ വായിൽ നിന്നത് കേട്ടപ്പൊ ഒരു വശപിശക് തോന്നിയെങ്കിലും ഞാൻ സമ്മതിച്ചു…കാരണം ആ മാരണം എങ്ങനേലും ഒന്ന് തലേന്ന് ഒഴിഞ്ഞാ മതിയ്ന്നാണല്ലോ എനിക്ക്…
” ഹാ ഞാൻ നന്ദുവേം കൂട്ടി വരാം… ”
ഞാൻ സമ്മതിച്ചു….അപ്പോഴും പ്ലാൻ എന്താന്ന് പുള്ളിക്കാരി പറഞ്ഞു തന്നില്ല കേട്ടോ…
” അപ്പൊ ശരി ഞാൻ എന്നാ അങ്ങോട്ട് ചെല്ലട്ടേ…അവിടെ എന്തായി ഒന്നും അറിയില്ലല്ലോ… ”
ചേട്ടത്തി ഒരു കപട ദേഷ്യം കാണിച്ച് പറഞ്ഞു…അങ്ങനെ ഓരോന്നാണല്ലോ കാണിച്ച് കൂട്ടിയത്…ഞാൻ അതിനൊന്ന് ചിരിച്ച് കാണിച്ചു…
” ഹേയ് അവന്മാര് കംപ്ലൈൻറ് ഒന്നും ചെയ്യില്ല… ചേട്ടത്തിയെ ശല്യം ചെയ്തതാണല്ലോ കേസ്… അപ്പൊ പരാതി കൊടുത്താ പണി അവന്മാർക്ക് തന്നെ കിട്ടും… ”
ഞാൻ നിസ്സാര ഭാവത്തിൽ പറഞ്ഞ് ചിരിച്ചു…അത് കേട്ടതും പെട്ടന്ന് ചേട്ടത്തി എൻ്റെ അടുത്തേക്ക് വന്നു…
” താങ്ക്സ്…എൻ്റെ അനിയനാ ഇത്…എന്നാലും ചേച്ചി പേടിച്ച് പോയി… ”
സ്നേഹത്തോടെ അതിലേറെ വാത്സല്യത്തോടെ തുളുമ്പുന്ന കണ്ണുമായി ചേട്ടത്തി അത് പറഞ്ഞപ്പൊ ഒരു നിമിഷം എൻ്റെ കണ്ണും ഒന്ന് നിറഞ്ഞു…കാരണം ഇതൊക്കെ എനിക്ക് ആദ്യമായൊരു അനുഭവം ആയിരുന്നു…ഒരു ചേച്ചിയുടെ വാത്സല്യമൊക്കെ…
” അയ്യേ…അനിയനോട് താങ്ക്സോ…ഒന്ന് പോയെ ചെല്ല്…എൻ്റെ ചേട്ടത്തിക്കൊരു പ്രശ്നം വന്നാൽ പിന്നെ ഞാൻ കൈയ്യും കെട്ടി നോക്കി നിൽക്കുവോ… ”
ഞാൻ ചിരിയോടെ ആ കണ്ണുകൾ ഒപ്പി…അത് കൂടി കേട്ടതും ചേട്ടത്തി സന്തോഷം കൊണ്ടെന്നെ കെട്ടി പിടിച്ചു…ഞാനും ചേട്ടത്തിയെ സമാധാനിപ്പിച്ചു…
” അത് പോട്ടെ നീ കോളേജിന്നെ കള്ള് കുടിക്കുമല്ലേ… ”
പെട്ടന്നെന്തോ ഓർത്തപോലെ പുള്ളിക്കാരി എൻ്റെ ചെവിട് പിടിച്ച് തിരിക്കാൻ തുടങ്ങി…
” അയ്യോ… വിട്….എനി ഇല്ല…സോറി…. ”
ഞാൻ കുതറിമാറാൻ ശ്രമിച്ചു പക്ഷെ പുള്ളിക്കാരി വിട്ടില്ല…ഒടുക്കം നല്ല ഒരു തിരി തിരിച്ച് വിട്ടു…
” ആ എൻ്റെ ചെവിട് പൊന്നായി… ”
” ഓ..നന്നായിപോയി…ഇനി മേലാൽ ആവർത്തിച്ചാ നല്ല അടി വാങ്ങും നീ… ”
ചേട്ടത്തി ഒരു ചിരിയോടെ അതിൽ ഇച്ചിരി ഭീഷണിയും ചാലിച്ച് പറഞ്ഞു…
” അപ്പൊ ഞാൻ പോട്ടെ… പിന്നെ മറ്റേത് ഉച്ചയ്ക്ക് ഞാൻ പറഞ്ഞപോലെ…ഓക്കെ ”
” ഓ ശരി എല്ലാം തമ്പുരാട്ടി പറയും പോലെ… ”
ഞാൻ കൈകൂപ്പി ചിരിച്ചുകൊണ്ട് പറഞ്ഞു…അതിന് എൻ്റെ തലമണ്ടയ്കൊരു കൊട്ടും തന്ന് പുള്ളിക്കാരിയും ഒരു ചിരിയോടെ തിരിഞ്ഞു നടന്നു…ഒരു നിമിഷം ആ പോക്ക് ഞാൻ നോക്കി നിന്നു…അങ്ങനെ ഈയുള്ളവൻ്റെ ജീവിതത്തിലേക്ക് ഒരു പാവം ചേച്ചികുടി വന്നിരിക്കുന്നു…ഇത്രേം കാലം ഇച്ചിരി വെറുപ്പ് തോന്നിയ ഈ സാധനം ഇത്രയും പാവമാണെന്ന് അറിയാൻ വൈകിപ്പോയി…അങ്ങനെ അതും ആലോചിച്ച് ഞാൻ പിള്ളാരുടെ അടുത്തേക്ക് പോയി…
അങ്ങനെ സമയം പിള്ളേരുമൊത്ത് തള്ളിനീക്കി…അതിനിടയിൽ ആതിരയുടെ കാര്യവും ചേട്ടത്തി പറഞ്ഞതും ഓക്കെ ഞാൻ പിള്ളാരോട് പറഞ്ഞു…അത് കേട്ടതും അവന്മാർക്കും ആവേശം…എന്താണ് പുള്ളിക്കാരി കാട്ടാൻ പോകുന്നത് എന്നറിയൻ…അതിന് മുന്നേ ഞാൻ ആതിരയോട് ചേട്ടത്തി പറഞ്ഞ പോലെ വരാൻ പറഞ്ഞിരുന്നു…അങ്ങനെ പറഞ്ഞ സമയം ആയപ്പോൾ ഞാനും നന്ദുവും ഇറങ്ങി…ബാക്കി രണ്ടിനോടും വന്നിട്ട് പറയാം എന്ന് പറഞ്ഞു…
അങ്ങനെ ഞാനും നന്ദുവും ഗ്രൗണ്ടിന് സൈഡിലേക്ക് വിട്ടു… പ്രതീക്ഷിച്ച പോലെ അവിടെ ആതിര ഉണ്ടായിരുന്നു…അവളൊറ്റകായിരുന്നു…മോണ്സ്റ്റർ…. പക്ഷെ അവിടെ എങ്ങും ചേട്ടത്തിയുടെ പൊടി പോലും ഇല്ല…ഇനി പണി പറ്റിച്ചതാണോ…? അങ്ങനെ ഓരോന്ന് ചിന്തിച്ച് അവളുടെ അടുത്തെത്തി…
” ആ എന്താ നിനക്ക് പറയാൻ ഉള്ളേ… ”
അവളുടെ അടുത്തെത്തിയതും ഞാൻ ഒരു ഇഷ്ട്ടകേടോടെ ചോദിച്ചു…
” അത് പിന്നെ ഇച്ചിരി പേഴ്സണൽ ആ…നന്ദു ഒരു അഞ്ച് മിനിറ്റ് ഞങ്ങൾക്ക് തരുവോ… ”
അവളേന്നേയും നന്ദുവേയും മാറി മാറി നോക്കി പറഞ്ഞു…