” എത്ര സങ്കടത്തോടെയാ ഞാൻ ഇരിക്കുന്നേന്നറിയോ… ഭക്ഷണം പോലും കഴിക്കാൻ തോന്നുന്നില്ല… അത്രമാത്രം ഇഷ്ടാ എൻ്റെ ഈ അജ്ജുവെ എനിക്ക്… ”
അവൾ വാക്കുകളിലൂടെ തകർത്തഭിനയിക്കുമ്പോൾ ഒരു നിമിഷം ഞാൻ ആ വാക്കുകളിൽ അലിഞ്ഞ് ചേർന്നു പോയി…അവൾ ശരിക്കും അതെന്നെ നോക്കി ഒന്ന് പറഞ്ഞെങ്കിൽ എന്ന് ഞാൻ കൊതിച്ചു പോയി…
” ഇനിയും എന്നെ വിട്ട് അകലല്ലേ അജ്ജൂ…അത് അത് ചിലപ്പൊ എനിക്ക് താങ്ങാൻ പറ്റില്ലാ…ഞാൻ വല്ല കടും കൈയും ചെയ്യ്തു പോവും… ”
ഇത്തവണ അവൾ പറഞ്ഞതിന് ശേഷം കണ്ണിൽ നിന്ന് ഇത്തിരി വെള്ളം കൂടി വരുത്തി…തിരിഞ്ഞൊരൊറ്റ നടത്തം…ഇതൊക്കെ കണ്ട് ആതിര ആകെ ഫ്ലാറ്റ്…ദിവ്യയുടെ ആ അഭിനയം കണ്ട് ഓസ്കാർ മോഷ്ടിച്ചാണേലും അവൾക്ക് അത് നൽകണം എന്നെനിക്ക് തോന്നിപ്പോയി…
” കുഞ്ചു പോകല്ലേ…നിൽക്ക്… ”
അത്രയും നേരം മൗനത്തിൽ നിന്ന ഞാൻ അവളുടെ പോക്ക് കണ്ട് പുറകീന്ന് വിളിച്ചു…പക്ഷെ അവൾ തിരിഞ്ഞു നടക്കുക തന്നെയായിരുന്നു… അതോടെ ഞാനും പുറകെ നടന്നു…ആദ്യം പക്ഷെ ആതിരയുടെ മുന്നിൽ ഒന്ന് നിന്നു…
” കണ്ടല്ലോ…ഇതാ ഞാൻ നിന്നോട് വേണ്ടാ… വേണ്ടാന്ന് പറഞ്ഞത്…നീ കുറച്ച് മുന്നേ പറഞ്ഞല്ലോ ഇല്ലാത്ത പ്രേമ കഥ പറഞ്ഞെന്ന്…ആ ഇല്ലാത്ത പ്രേമ കഥയിലെ നായിക ആണ് ആ പോകുന്നത്…ദിവ്യ… ഈ അർജ്ജുൻ്റെ ദിവ്യ… മനസ്സിലായോ….”
ഞാൻ ആതിരെയെ നോക്കി ഒരു വിജയഭാവത്തിൽ പറഞ്ഞതും…അവൾ ഞെട്ടികൊണ്ട് തലയാട്ടി…അവളോട് പറഞ്ഞ വാക്കുകൾ എൻ്റെ ഉള്ളിൽ നിന്നും ആരോ പറയിച്ച പോലെ ആയിരുന്നു എനിക്ക് തോന്നിയത്…അതോടെ ഞാൻ അടുത്തുള്ള നന്ദുവേയും വിളിച്ച് ദിവ്യയുടെ പിന്നാലെ കോളേജിന് വെളിയിലേക്ക് നടന്നു…
കോളേജിന് പുറത്ത് ഞങ്ങളേയും കാത്ത് ചേട്ടത്തി ചിരിയോടെ ഉണ്ടായിരുന്നു…എല്ലാം ഒപ്പിച്ചു വെച്ചിട്ട് ഒന്നും അറിയാതെ പോലെ നിൽക്കുവാ…മുന്നേ നടന്ന ദിവ്യ വേഗം പുള്ളിക്കാരിയുടെ പുറകെ കയറി നിന്നു…
” ഞാനൊന്നും അറിയില്ലേ…എല്ലാം എന്നെ കൊണ്ടീ പെണ്ണുംപിള്ള ചെയ്യിപ്പിച്ചതാണേ… ”
അവൾ ചേട്ടത്തീടെ പുറകിൽ മറഞ്ഞു നിന്ന് ചിരിയോടെ പറഞ്ഞു…അത് കേട്ട് ബാക്കി എല്ലാവരും ചിരിക്കാൻ തുടങ്ങി…
” എന്നാലും എൻ്റെ ചേട്ടത്തി ഇതൊരുമാതിരി മറ്റേടത്തെ പ്ലാൻ ആയിപ്പോയി…ഞാൻ ആകെ കിളി പോയ അവസ്ഥയിലായിരുന്നു…ഇങ്ങനൊന്നും ചെയ്യാൻ മാത്രമുള്ള ശല്ല്യം ഒന്നുമില്ലായിരുന്നു… ”
ഞാൻ ചേട്ടത്തിയെ നോക്കി കപട ദേഷ്യം കാണിച്ച് പറഞ്ഞു…
” ഹി ഹി ഹി…നിനക്ക് അത് തന്നെ വേണം…എന്നെ നേരത്തെ കുറേ തീ തീറ്റിച്ചതല്ലേ… അപ്പൊ എന്തേലുമൊക്കെ ഞാൻ തിരിച്ചു തരേണ്ടെ…ഇത് നിനക്കിട്ട് തന്ന് പണിയാ…പിന്നെ മറ്റേത് മുളയിലേ നുള്ളുന്നതാ നല്ലത് അല്ലേൽ പണിയാനും… ”
ചേട്ടത്തി ഒരു ചിരിയോടെ പറഞ്ഞ് ദിവ്യയെ പുറകിൽ നിന്ന് മുന്നിൽ പിടിച്ചു നിർത്തി…
” എന്നാലും ഈ സാധനം എന്തൊരു അഭിനയായിരുന്നു… മനുഷ്യൻ അങ്ങില്ലാണ്ടായി… ”
ഞാൻ ദിവ്യയെ നോക്കി ചെറുചിരിയോടെ പറഞ്ഞു…അതിനവളും ചിരിച്ചു നിന്നു…
” സത്യം…ഞാൻ ചുറ്റും വല്ല ക്യാമറയും ഉണ്ടോന്ന് നോക്കുവായിരുന്നു…ഇത് വല്ല ഷോർട്ട് ഫിലിമോ…പ്രാങ്കോ മറ്റോ ആണെന്ന് വരെ ചിന്തിച്ചു പോയി… ”
നന്ദുവും എൻ്റെ വാദത്തെ പിന്തുണച്ചു…
” അതല്ലേലും എൻ്റെ കുഞ്ചൂസ്സാരാ മോൾ…അതല്ലേ ഇതിനെ കളത്തിൽ ഇറക്കിയത്… ”
ചേട്ടത്തി അവളെ ഒന്ന് പൊക്കിയടിച്ച് പറഞ്ഞു…
” എന്താലും ഇന്നത്തോടെ ആ ശല്ല്യം ഫ്രീ ആയി ഒഴിവായി… ”
ഞാൻ ഒന്ന് നെടുവീർപ്പിട്ടു…
” ഫ്രീ ആയോ… പോയി വണ്ടി എടുത്ത് വാ മിസ്റ്റർ…എനിക്ക് അതിന്റേതായ ചിലവുണ്ട്… ”
പെട്ടന്ന് എൻ്റെ വാക്ക് കേട്ട് ദിവ്യ ഒരു ചിരിയോടെ മുന്നോട്ട് വന്ന് പറഞ്ഞു…
” എന്തോന്ന്…?? ”
ഞാൻ ചോദ്യ ഭാവത്തിൽ അവളെ നോക്കി പുരികം ഉയർത്തി…
” പിന്നലാതെ മാറ്റിനിക്ക് പോകാൻ ചേച്ചിയെ കൂട്ടാൻ വന്നതാ…ഈ സാധനം ഒഴിവു കിഴിവ് ഇന്നലെ തൊട്ടേ പറയുന്നുണ്ട്…അപ്പോഴാ പരിഹാരം എന്നോണം എന്നെ ഇതും പറഞ്ഞ് കളത്തിൽ ഇറക്കിയത്…അതോണ്ട് മോൻ വേഗം വന്നേ… ”
അവളെന്നെ നോക്കി പറഞ്ഞതും ഞാൻ നേരെ ചേട്ടത്തിയിലേക്കാക്കി ശ്രദ്ധ…
” എന്നെ നോക്കണ്ടാ…എനിക്ക് പോകാൻ തീരെ വയ്യായിരുന്നു അപ്പോഴാ ഈ ഐഡിയ വന്നത്…നിന്റെ പ്രശ്നവും മാറും…ഇവളുടെ ശല്യവും ഉണ്ടാവില്ല…എപ്പടി… ”